Lukas 10:38-42, JAMITA MINGGU VIII DUNG TRINITATIS MINGGU, 17 JULI 2016

‘Pangkobasion Dohot Manangihon Jesus’

 Patujolo :

Mangkobasi dohot mangadopi nahinalomohon ni Jesus di ganup ni sada-sada halak marragam-ragam do. Cara ni sada-sada halak naporsea laho mangkobasi dohot mangadopi Jesus pe marragam do. Alai nang pe marragam cara pangkobasion dohot pangadopion ni ganup na porsea mamillit tohap nauli. Mololaho mangulahon tohap I, unang mangiburu tu dongan na mamillit tohap na marbeda-beda sian ibana. Alai di rajumi ma ganup ma tohap pangkobasionnai, laho pataridahon pangoloion, haunduhon dohot sonang ni roha mangoloi Jesus, asa gabe halomoan ni Jesus pangobasion i, na manghrhon bungaran ni harajaon ni Tuhan.

 Hatorangan:

Kemungkinan disengaja si Lukas do turpuk on di bahen dung turpuk taringot tu “Perintah Utama”. Di dua bagian on taida ditujuhon tu parugamoon. Disuruh Jesus siseanNa mangulahhon aturan na ingkon siulahonon ni halak Yahudi na marhubungan dohot adat. Di tonga-tonga ni angka kesibukan, ulaonta si ganup ari dohot ulaon parugamoonta, unang ma lupa hita mamillit na paling umporlu/penting/utama ido na pinangido ni turpuk on. Di ay. 38 dibongoti Jesus do sada luat/huta, ndang apala di paboa huta dia na binongotan nai. Di na bongot Jesus tu huta I, di jangkon sada parompuan namargoar si Marta do Ibana tu jabuna. Di turpuk on ndang apala dipatorang hubungan ni si Marta dohot si Lazarus. Di turpuk on dipatorang, si Marta sada parompuan na aktif manghobasi angka na ringkot tu sipanganon, siinumon di Jesus, alai si Maria anggi ni si Marta hundul hundul do, di jolo ni Jesus tumangihon hataNa.

Ayat 39-40 dung sahat Jesus tu jabu ni si Marta holan na hundul di si Maria tumangihon hata ni Jesus. Marsitutu do si Maria mananginangi hata ni Jesus, songon sisean na manangihon pangajarion ni guruna. Alai anggo si Marta di haronsothon manghobasi sipanganon tu tamunai. Marnida anggina, si Maria nasonang holan nahundulhundul di lambung ni Jesus mananginangi hataNa, gabe muruk ma si Marta. Didok si Marta mandok Jesus”. Tuhan ndang diantoi rohaM, napinasombu ni anggikku ahu marhobas sahalakku? Pandohan ni si Marta on secara halus marsuru Jesus asa disuruh Jesus si Maria mangurupi angkangna marhobas. Alai ndang ditolopi Jesus, hata ni si Marta i, ditolopi Jesus sikap ni si Maria i do.

Ayat 41 panolopion ni Jesus di sikap ni si Maria i tarida sian pandohanna: “O Marta, Marta! Lan do disarihon roham jala di hasuhahon ho! Dipillit si Maria do tohap nauli i; dang sibuaton i sian ibana”. Sian pandohan ni Jesus on ndang naso ringkot panghobasion sipanganon dohot si inumon, alai adong do tingkina, maharingkothon dohot manghobasi sipanganon dohot siinumon gabe lupa manangihon sian hata ni Jesus.

Ayat 42: Pandohan: “Ndang sibuaton i sian ibana” namarlapatan doi unang adong mangiburu manang ise marnida cara ni dongan na, laho mangadopi dohot manghormati (melayani) Jesus. Dang naso porlu manghobasi sipanganon, siinumon, alai molo ipe tohap dipillit sada halak laho mangadopi (melayani Jesus unang mangiburu marnida cara ni donganna mangadopi (melayani) Jesus, alai dihaporseai ma silehonlehon ni Debata tu ibana, mangharingkothon parhobason sipanganon dohot siinumon i, pangkeon mai laho patuduhon panjalahion dohot hapataron ni halomoan ni Jesus di ngoluna.

 Sipahusor-husoron ni roha:

Torop do halak Kristen di partikkian on diharonsothon manghobasi di tonga-tonga ni masyarakat dohot di huria. Dipanghobasion ni halak Kristen i marragam do motivasi dohot cara na. Marhite turpuk on dipaingot do hita asa tumagon mangharonsothon tumangihon hatani Jesus sian na manarihon sipanganon dohot parminumon di pardagingon.

Molo pe adong di tonga-tonga ni huria na manghobasi angka pembangunan dohot parartaon ni huria, adong na marbarita nauli, adong na manghobasi na sopot somarama somarina, adong naburju mananginangi hata ni Tuhan sopola adong sipatupaonna di sinamot dohot angka na asing, unang ma mangiburu manang ise marnida donganna. Ai pangiburuon i ndang sikap na hinalomohon ni Jesus i. Alai aha jala songon dia pe panghobasion ni hita panghobasion dohot panangihonon di hata ni Tuhan, Jahowa ma partanobatoanta. Jahowa ma tahaposi namangalehon silas ni roha di hita.

Halak na mangiburu mida tohap ni donganna ima halak naso mambahen Jahowa partanobatoanna. Goar ni minggu ta sadarion di goari do Estomihi (Jahowa do partanobatoan), alani i songon goar minggutta sai Jahowa ma partanobatoanta di sandok panghobasion dohot panangihononta di hataNa.

(Pdt. S. Situmorang, STh)

 

Bagikan Postingan ini: