EPISTEL MINGGU 20 NOVEMBER 2022 – PENGKHOTBAH 8:9-17

EPISTEL MINGGU, 20 NOVEMBER 2022 - NUNGA DIBONDUT HAMONANGAN HAMATEAN

Epistel Minggu Ujung Taon Huria 20 November 2022
MINGGU UJUNG TAON HURIA
MINGGU, 20 NOVEMBER 2022
NUNGA DIBONDUT HAMONANGAN HAMATEAN
Pengkhotbah 8:9-17

PATUJOLO

Huria ni Tuhanta na hinaholongan. Ari minggu sadarion digoari do Minggu Parningotan ni angka na Monding manang Ujung Taon Huria. Molo tinaringotan hamatean, adong do dua gombaran na boi idaonta. Na parjolo, hamatean ni daging (jasmani), ima hamatean hombar tu uhum ni Debata alani dosanta, jala napaduahon ima gombaran ni hamatean ni partondion (rohani). Parjolo sahali, di portibi on masa ma hamatean ni partondion dung madabu jolma na parjolo i tu bagasan dosa. Dung i adong panirangion dohot uhum secara rohani dung hamatean ni pamatang/daging (jasmani). Alai dung adong haheheon ni naung monding marhite Tuhanta Jesus Kristus, gabe adong ma hamatean na paduhalihon na dibagasanna uhum maradophon sibolis dohot angka pardosa (parjahat) digoari mai “uhum na manontong” (hukuman kekal).

Disada sisi na asing, hamatean i, ima sada peristiwa naung boi tarjalo (peristiwa lumrah); ala jolma i ditotophon sahali mate (Heber 9:27) dungi pe asa diuhum. Jala na rap do hita dohot Ibana (Joh. 11:16). Alai disada sisi muse, hamatean i sada peristiwa na so tarjalo (tidak wajar). Hamatean i upa ni dosa do i (Rom. 6:23), siala ni i ma tama do i gabe sihabiaran. Secara biologis, ingkon masa do hamatean, alai hamatean ni sasahalak jolma ndang dos dohot parmate ni pahanpahanan. Alai on ma taingot: ianggo hamatean i, ala ni dosa do (1 Musa 2:17; Rom 5:12). Jadi, hamatean (maut) ala ni dosa i, andul do i jumorbut sian hamatean ni daging (pamatang). Jolma i ndang tarjorat dibagasan jaring nasib (takdir), manang ala ni garis ni tangan (suratan tangan), siala ni i, molo mardosa sahali sahalak jolma, ndang adong be na boi siulahononna taringot tu si. Ala Debata do di atas ni saluhutna, molo dilehon Ibana uhum hamatean ala dosa, dilehon do nang tongtong upa ngolu salelengna tu angka naung porsea.

Hamonangan ni Jesus Kristus maradophon hamatean na salelenglelengna i, (1 Kor. 15:26, 54) ido hasisingkopna jala sempurna do i. Laos hamonangan i diparade do tu bangsoNa nang tu hita dibagasan partikkian on. Partalu ni hamatean pasti doi. Ndang adong be huaso ni hamatean na paduhalihon tu angka halak na porsea (Pang. 2:11; 20:6). Jadi, siala ni i, ingkon masa do hape hamatean tu ganup jolma, jala ndang tarboto manang sadihari hamamasana. Marhite Epistel Minggu 20 November 2022 on, mangarahon hita ganup jolma laho paradehon roha, asa unang dihabiari hamatean i, alai mangarade ma marhite panghobasion na tama maradophon Debata!

BACA JUGA BAHAN JAMITA MINGGU UJUNG TAON HURIA – MINGGU, 20 NOVEMBER 2022

HATORANGAN

Panurat ni Buku Parjamita on, ima jolma na mansai jujur jala realistis manggombarhon parngoluan ni jolma. Tung tangkas do ibana manghatahon (blak-blakan, apa adanya) taringot tu na masa di ngolu ni jolma, na mansa jotjot parir dihilala jolma i: Parjolo, dibereng Parjamita on do adong parngoluan na mansai koras (keras). “Orang yang satu menguasai orang yang lain hingga ia celaka.” Pasiak-siak tu angka halak na gale tung jotjot do masa ditongatonga ni portibion, na so boi tarambatan. Sai songon na so adong campur tangan manang haparsidohoton ni Debata dohot pangurupion ni Debata diportibion. Jotjot do masa, ise na margogo ima na monang. Gabe tubu sungkun-sungkun di roha ni jolma, didia do pangurupion ni Debata. Paduahon, diida Parjamita on do tung masa do ketidakadilan di parugamoon di hatiha i. Jumotjot do dipangke ugamo laho memihak kelompok na salah, mambela dohot merestui halak na mangulahon hajahaton, hape halak na mangaluhon na sintong, ndang be dihargai bahkan olo gabe dihalupahon nasida. “…orang-orang fasik…boleh masuk, sedangkan orang yang berlaku benar harus pergi dari tempat yang kudus dan dilupakan dalam kota.” (ayat 10). Na mangihut, di ida Parjamita on do ia halak na jahat jotjot do marhamonangan ngoluna. Ndang boi gira manang hatop dipatupa uhum tu halak na mangulahon hajahaton (Ayat 11), gabe so adong be rasa keadilan di tongatonga ni masyarakat. Nang tu partingkian si nuaeng on pe, jotjot dope jumpang angka pejabat dohot angka namora na mangulahon korupsi bolon na so hona uhum, ala boi do disogok nasida angka Hakim, asa diputarbalikkon hasintongan i. On ma pergumulan na mansai balga di parngoluanta si nuaeng on.

Huria ni Tuhanta, di ida Parjamita do, olo do gabe halak partigor na mangae uhum ni halak parjahat, jala parjahat gabe manjalo upa ni halak partigor (ayat 14). Pendek kata, yang benar diganjar seperti orang fasik dan orang fasik hidupnya dipenuhi pahala yang seharusnya menjadi milik orang benar. On ma sada ketimpangan na balga, na masa di tonga-tonga nasida. Marhite turpuk on, tubu ma sungkun-sungkun na ringkot sirajumanta, ima: “Nunga songon dia ngolunta on di adopan ni Debata jala aha do naung dapotta dungkon mangolu hita diadopan ni Debata? Nunga manghorhon hatuaon nataulahon saleleng on? Sungkunsungkun on manantang hita halak na porsea di ujung taon huria on dohot mamasuhi taon baru huria. Boha do tutu hita boi manghatindanghon pangaramotion ni Debata di tonga-tonga permasalahan na jotjot itaadopi di ngolunta. Di tingki ngolu ni panurat bukku Parjamita on, gok do jolma sian bangso ni Debata na sai mangulahon dosa, manundalhon Debata jala holan mangasahon dirina sandiri, mangasahon gogo dohot angka parbinotoanna sandiri. Gabe dang Debata be dipuji nasida, alai dirina sandiri nama (keegoisan), ujung na, gabe marsiak ma nasida di ngoluna. On ma na jotjot tong masa di ngolu ni angka torop jolma alani haboion dohot hamaloonna.

BACA JUGA ALMANAK MINGGU UJUNG TAON HURIA – MINGGU, 20 NOVEMBER 2022

Dipatangkas panurat bukku on do, ndang mangolu diadopan ni Debata be bangso Israel uju i, alani do disoarahon Parjamita on, nang pe mamora bangso i, ndang boi gabe marlomolomo dibagasan ngoluna, nang pe leleng nasida mangolu, molo so Debata do dihaposi jala dipasangap, gabe sia-sia do saluhutna i jala dang manghorhon las ni roha manang hatuaon. Molo itajaha buku Parjamita 8: 9 – 17 on, boi do gabe tubu sungkun-sungkun di rohanta muse: aha do narumingkot taulahon di ngolunta on? Aha do na ta utamahon di ngolunta on? Aha do sihabiaranta di ngolu on? Mungkin adong do hita na mangutamahon arta, jala mabiar molo mago arta i, ala naung loja mangalului i. Adong do na mangutamahon jabatan jala mabiar mago jabatanna i, adong do na mangutamahon kesuksesan jala mabiar mago kesuksesanna i. Marragam ma anggo habiaran ni jolma di ngoluna. Alai molo itapamanat sian sudena i, ternyata aha na ita utamahon, laos ido na ita habiari mago sian hita. Jadi, molo Debata ita utamahon di bagasan ngolunta on, marlapatan ma i ingkon mabiar do hita molo mago Debata sian ngolunta. Ai molo nunga Debata na ita utamahon dibagasan ngolunta pasti do itaharingkothon angka HataNa dohot PodaNa diginjang ni saluhut kepentingan pribadinta, jala rela do hita berkorban demi mangulahon lomo ni roha ni Debata. Alai molo nunga mangolu hita dibagasan Tuhan, hape lalap pajolohon kehendak sandiri sian kehendak ni Debata, jala jotjot mamboan goar ni Debata holan laho membenarkan diri, gabe mago ma niat tulusta na mangihuthon Tuhan, gabe tartuktuk songon na dipatorang di ayat 10 – 11 di bagasan turpuk on. Jala molo sai ita bandinghon do dirinta dohot jolma na so mangolu dibagasan Debata, olo do gabe dang tarjalo rohanta molo ngolu nasida boi tetap denggan. Sialani do asa tongtong hita fokus holan tu Debata.

Kunjungi juga kanal YouTube HKI untuk mengetahui informasi seputar pelayanan HKI.

HAHONAAN

Memang dang mura jolma boi mangolu diadopan ni Debata, alai ido  dalan na asa martua, ala ido mambaen asa boi ta pasiding dosa i jala gabe marsihohot ma hita dibagasan Tuhan i huhut marhamonangan manaluhon sorop ni hamatean. Taingot ma, ditatap Debata do perjuanganta i (jerih payah kita) di na mangulahon HataNa, jala ingkon pasupasuonna do angka na satia di tingkina/pada waktunya. Manongtong ma hasatiaonta mangihuthon lomo ni roha ni Debata di ngolunta. Alani ita patujolo ma Debata di ginjang ni saluhutna, ala manatap do ibana di parjuangannta, mangulahon HataNa. Molo saleleng di bagasan sataon on, hita sai mangulahon dosa jala mambaen muruk Debata, nuaeng ma tingkina, ita tadinghon ma i jala ta masuhi ma taon baru Huria on marhite ngolu na mambahen Debata diginjang ni saluhutna. Ai martua do halak na mangolu dibagasan Debata. Amen.

Penulis:
Pdt. Hotman Hutasoit, M.Th

Penyunting:
Vic. Pdt. Timothy P. Saragi

BAHAN EPISTEL INI JUGA DAPAT DIUNDUH DENGAN MENG-KLIK TULISAN DI BAWAH INI
EPISTEL MINGGU 20 NOVEMBER 2022 – MINGGU UJUNG TAON HURIA

Bagikan Postingan ini:

About Timothy Saragi

Staf Biro Infokom HKI

View all posts by Timothy Saragi →