Evangelium Minggu Sexagesima
Minggu, 20 Februari 2022
“Mangalo Hajahaton Marhitehite Nadenggan”
Lukas 6:27-37
PATUJOLO
Hata Ni Halak do i, Ndang Hata Ni Debata
Dinamangajar Jesus di dolok, sada sian pangajarionNa asa taula nadenggan tu saluhut jolma songoni nang tu musu. Molo tabandinghon Luk. 6:27 adong perbedaan tu Mateus 5:43 “Dibege hamu do hata na mandok: “Holong ma roham di donganmi; hosom ma ia di musum!”. Sian ayat on hira dua hata ni Tuhan i; Sada, manghaholongi dongan, paduahon marhosom dompak musu. Toho do songoni? Hata ni Debata di Mat.5:43 i molo di hata Inggris (CEV) terjemahanna: “You have heard people say, “Love your neighbors and hate your enemies.” Lapatanna: “dibege hamu do halak mandok”. Jadi hata Inggris “People says” maksudna hata ni halak/ jolma; jadi dang hata ni Debata (songon terjemahan Indonesia i). Alai ala nunga leleng i jala sai jojot dihatahon, gabe hira hata nasian Tuhan songon angka hata ni Debata naung tarsurat, hape nasian angka panurirang pargapgap i sambing do i (bnd. Luk.6:26 = panurirang pargapgap). Jala adong do imbarna, ai molo ‘hata ni halak’ mandok “hosomi ma musumi” (Mat.5:43). Nang di padan narobi ndang hea dihatahon Tuhanta asa manghosomi musu, alai ingkon haholongan sude jolma doshon diriniba, songoni do nang tu na mamusu i. (bnd.3 Musa 19:18).
Asing do Hata Ni Jesus Dohot Hata Ni Panurirang Pargapgap
Mateus 5:44 dohot Lukas 6:27 sarupa do hatana mandok;
a) Mateus 5:44 Alai Ahu do mandok tu hamu: Holong ma rohamu di musumuna,..
b) Lukas 6:27 Alai hudok ma tu hamuna na manangi: Haholongi hamu ma musumuna. Jesus mandok; ingkon haholongan ma dohot musu, jala patupaon ma nang nadenggan tu musu i. Alai anggo hata ni panurirang pargapgap; ingkon hosoman do musu, jala hata i nunga leleng dibege jolma i. Ima parasing ni hata ni panurirang pargapgap sian Jesus.
Jolma Namanangihon Panurirang Pargapgap, Muba Gabe Sitangihon Hata Ni Jesus:
Asa boi tarula namanghaholongi musu, ingkon muba do angka siihuthon Jesus. Molo di angka nasalpu olo manangihon hata ni panurirang pargapgap, gabe sitangihon hata ni Jesus ma nuaeng. Ido umbahen dimulai Jesus di ayat 27 i mandok; “Alai hudok ma tu hamuna na manangi….” Maksudna angka jolma na manangihon Jesus i. Manang ise pe na olo manangihon hata ni Jesus, ba dihaholongi ma dohot musuna, ai dongan jolma do nang musu i.
Alani i, dipangajarionNa i, Jesus naeng patingkoshon pangalaho ni siihuthon Jesus asa denggan marpangalaho maradophon tu sude jolma dohot ma nang tu na mamusui hita. Ima gabe sibonsiri, umbahen pola ganjang dipatorang Jesus di jamita on.
HATORANGAN
Adong tolu turpuk na bolon na gabe sipatorangon hombar tu jamita sadari on namarpardomuan tu ojahan ni jamita i:
1) Patupa ma Nadenggan Tu Sude Jolma.
Ise do ‘sude jolma’ nidokna dison? Adong dua rumang ni jolma hombar tu ulaonna; ima angka namangulahon nadenggan dohot najahat. Jala dipangido Jesus asa taulahon nadenggan ndada holan tu angka jolma siula nadenggan i (naburju) alai dohot ma nang tu angka jolma najahat jala namarjahat tu hita sandiri. Opat massam ma pamaloson ni jolma maradophon angka ulaon ni dongan, ima:
a) Denggan tu nadenggan. Molo binahen nadenggan tu halak namambahen nadenggan tu iba, denggan do i, alai biasa do pe i, dang adong dope surungna sian parjahat, ai parjahat pe dipatupa do songoni tu donganna parjahat.
b) Jahat tu najahat. Molo binahen najahat tu halak namambahen najahat tu iba, sarupa parjahat do hita disi. Antong taparsiajari ma manghasogohon hajahaton unang ma parjahat.
c) Jahat tu naburju. Molo binahen najahat tu angka sibahen nadenggan tu iba, doshon ulaon ni angka anak ni sibolis do nataula i.
d) Burju tu najahat. Molo binahen nadenggan tu halak namambahen na roa tu iba, targoar ma iba disi angka anak ni Debata.
Di hita saluhutna, dia ma najumotjot taula sian na 4 i?
Alai sipata, so unang pola patupa nadenggan tu jolma najahat, patupa nadenggan tu angka naburju pe ra sipata ndang sai tarbalos hita manang dang olo hita. (jangankan berbuat baik kepada orang jahat, mungkin berbuat baik kepada orang yang berbuat baik kepada kita pun, kita tidak mau atau lalai). Molo songoni sai bohama tarpatupa hita nadenggan tu parjahat? Jala lobi parah dope pangalaho, molo mangulahon na roa maradophon naburju marroha.
Alai marhite jamitaNa, dipangido Jesus, ingkon boi jala tolap do hita patupahon nadenggan nang tu jolma namajahati hita. Ai marhite namangula na denggan ma hita manaluhon hajahaton i. Molo tung sipata maol i, tapangido ma gogo sian Tuhanta. Nian torop do hita naboi mambalos nadenggan tu angka dongan namambahen nadenggan.
Dipatorang Tuhanta Jesus ma, angka jolma namanjahati tu hita, ima:
a) Na mamusui dohot namanghosomi:
b) Na mamurai dohot namangasupi: (mencaci maki)
c) Na mamastap hurum dohot namambuat ulos/baju-baju
d) Na mambuat ugasan (harta kepunyaan)
Tontu godang dope ragam ni angka hajahaton na so apala disurat di son. Boi ma hita manggoari i, angka dia ma rumang ni hajahaton na hea taida manang tahilala di bahen halak tu hita. Jala porlu do hita martangiang dohot mangulahon nadenggan tu jolma sisongoni. Anggiat tung muba jala ditanda dalan hasintongan nasian Tuhanta. Ai Tuhan nagabe tiruanta, dipatupa do tong nadenggan tu natois marroha (tidak tahu berterima kasih) dohot tu angka parjahat.
2) Balga do Upa Dohot Parulian Ni Jolma Sibahen Nadenggan
Mardongan Holong.
Hea do ra tabege didok; “mate-mate naburju do”. Sipata di gareja pe olo do tarbege i molo adong angka sihobasan rupani. Di ulaon hatopan keluarga pe olo do terbege hata i sian sahalak na ringgas mula ulaon, ala adong doganna nalosok manang hira so peduli. Alai husungkun ma tu hamu, di dia do adong ayat di Bibel i tarsurat songoni? Molo adong do, tung aha ma gunana hita patupa angka nadenggan hombar parsuru ni Debata ianggo gabe tu hamagoan ujungna. Alai on do didok di bibel i; “Sai burju ma ho rasirasa mate; dung i lehononku ma tu ho tumpal hangoluan i!” (Pangungkapon 2:10 B). Ido natingkos. Antong molo adong mandok na songoni; boi do alusanta; “Daong bah, didok Tuhanta dang mate-mate naburju, alai angka naburju dapotan tumpal hangoluan do”. Hata napagale semangat do ianggo sai adong mandok, mate-mate naburju. Taingotma, molo sai niulahon nadenggan, balga do upa dohot parulian silehonon Tuhanta tu hita, i ma tumpal hangoluan.
Antong manontong ma burju, mardongan roha naias dohot habisuhon. Ido hamauliateon ni rohantta paboa naung dapotan denggan basa hita sian Tuhanta, jala parjambar hangoluan do angka parulibasa. Antong tapatupa nadenggan ndada holan tu angka naburju tu iba, alai dohot do nang tu angka namarjahat. Ai talu do hajahaton binahen ni angka ulaon nadenggan. Ido umbahen didok Jesus; “Ai molo dihaholongi hamu na marholong ni roha di hamu, parulian dia ma i di hamu? Ai nang angka parjahat dihaholongi do na marholong ni roha di nasida. Jala anggo dibahen hamu na denggan tu angka sibahen na denggan tu hamu, parulian dia ma i di hamu? Nang angka parjahat i, songon i do pambahenna. (:32-33).
Angka ulaon nadenggan mangihuthon perikop ta on, ima:
- Manghaholongi musu
- Patupa nadenggan tu na manghosomi
- Pasu-pasu hamu namamurai hamu
- Manangiangkon namangasupi (mencaci maki)
- Marsilehon-lehon tu namangido
- Parholong ni roha
- Sibahen nadenggan
- Parasi roha
- Olo paluahon (mengampuni)
3) Unang Hamu Manguhumi, jala Unang Manorui
Boha ma bahenonta asa unang hita manguhumi, unang manorui jala unang mamaloshon najahat tu angka namangulahon hajahaton tu hita? Memang olo do toppu haruar hata bura sian halak Kristen tu namangula na roa. Targoda do hita jotjot songoni, mungkin ala menjengkelkan, jala nunga jotjot. Songoni hata na manguhumi, gabe hira hita namanontuhon sasahalak jolma masuk tu surgo manang dang.
Sian ayat 36-37, didok; “Gabe parasiroha ma hamu, songon Amamuna, Parasiroha i!” Ondo hata parsuru ni Jesus tu hita, asa unang manguhumi hita. Jomolo ma hita marsiajar gabe parasiroha, asa tarula hita parsuruNa i; unang manguhumi alai paluahon (memaafkan) jala unang manorui. Di hata ni Tuhan i pe didok do; “unang hamu marlulu.., di Ahu do pamaloson… (Rom.12:19; Heber 10:30)
HAHONAAN
Tontu godang do naboi buatonta nagabe aplikasi sian jamita on. Jala piga sian i boi ma tapaheba be, jala on ma naboi binuat:
- Marhite jamita on, dipangido asa lobi dumenggan ma hita marpambahenan, gabe jolma naolo manghaholongi sude jolma, taula ma nadenggan tu saluhut jolma. Unang ma sipata mamilliti mambahen nadenggan, hira siida rupa.
- Asa sitangihon hata ni Jesus ma hita namangulahon holong jala patupa nadenggan tu saluhut jolma dohot nang tu angka namamusui hita. Unang ma angka sitangi hata ni panurirang pargapgap. Dos do i, ai molo holan namanangihon hata ni hajolmaon do hita, ndang tolap hita manghaholongi musu, gari patupa nadenggan tu namambahen nadenggan pe sipata taharaushon do i. Antong tatangihon ma hata ni Jesus, jala nang pe sipata maol mangula nadenggan i, alai disi do tarida pengorbananta namangihuthon jala natumangihon hata ni Kristus. Ai upa dohot parulian sijaloonta ndada holan sian jolma, alai sian Tuhanta, ima tumpal hangoluan.
- Sai taula ma nadenggan di tonga ni punguan, tarlumobi di huria, unang ma adong angka hosom, parmusuan asa maju huria i jala sonang rohanta mangula, marhuria. Rap ma hita manaluhon hajahaton i marhite namangula angka nadenggan. Unang ma adong angka dendam namangambati hamajuon ni huria, alai sai parasi roha jala parlambas roha ma hita, naolo marpamuati.
Sai dipasu-pasu Tuhanta ma hita saluhutna, Amen.
Penulis:
Pdt. Hopol M. Sihombing, STh
(HKI Resort Khusus Teladan)
Penyunting:
Yohanes Simatupang, S.Th
