EPISTEL MINGGU 22 JANUARI 2023 – MIKA 7:7–20

Epistel Minggu 3 Dung Epiphanias 22 Januari 2023
MINGGU 3 DUNG EPIPHANIAS
MINGGU, 22 JANUARI 2023
“HAGOGOON NI DEBATA NA PALUAHON“
Mika 7:7–20

PATUJOLO

Mika panurat ni buku on marharoroan sian huta na margoar Maressa Ga di luat Dangsina Juda, 40 kilometer sian Jerusalem (ida Mika 1:14). Panurirang Mika sazaman do dohot Panurirang Amos dohot Jesaya. Di hapanurirangonna, godang do dipasahat si Mika angka kritik tu Raja Juda na lobi marpos ni roha tu angka koalisi politik internasional asa tu Debata. Mangkaposi angka panggonggom Juda na korup, panurirang pargapgap, malim na so daulat, angka partigatiga na sintong di arga dohot timbangan dohot angka panguhum na mangulahon ulaon suap. Panurirang Mika pasahathon ala ni dosanasida do umbahen na tarbuang nasida. Mangkobasi do Panurirang Mika di bagasan tolu rezim, di ari ni Raja Juda i ma si Jotam, Ahas dohot Hiskia. Hatiha i ndang tarbuang dope Halak Israel tu habuangan Babel. Alai ala pangalaosion ni bangso i jala dosa niula nasida gabe i ma bonsir na gabe tubu rimas ni Debata tu nasida na so olo paubahon rohanasida.

BACA JUGA BAHAN JAMITA MINGGU 2 DUNG EPIPHANIAS – MINGGU, 15 JANUARI 2023

HATORANGAN

Somal do di portibion molo nunga adong di jolma i pintor ginjang rohana. Ndang diharingkoton be Tuhan i, ndang parduli be tu angka ulaon huria manang haporseaon. Songon i do na masa di Halak Israel. Secara politis margogo do nasida  jala secara ekonomi makmur do nasida. Alai lupa do nasida tu Tuhanna na, mula ni nasa na denggan di ngolu ni jolma. Lam tamba di nasida angka pasupasu ni Debata gabe lam tamba dibahennasida angka pangalaho dosa. Mamungka sian pangisi bangso isahat tu angka panguhum, panggonggomi sahat tu raja, sude mangulahon dosa.

Di torop ni jolma na so parduli be tu Tuhani, alai tongtong do satia si Mika tu Tuhan i, asa i do umbahen na didok ibana, “alai anggo ahu manatap tu Jahowa do” (ayat 7). Manatap lapatanna manontong mamparateatehon, mamparrohai.

Alai gabe sisogo do panurirang Mika ala ni habaranionna maminsang angka parange dosa ni na torop i. Gabe diasangi na torop i do ibana. Alai ndang gabe mabiar ibana di angka musu na i. Didok Panurirang Mika, ai tinggang pe ibana, sai hehe do muse; ai hundul pe ibana nuaeng di bagasan haholomon, disondangi Jahowa do ibana (ayat 8). Umporsea do Panurirang Mika tu hasintongan ni Hata ni Debata. Lapatanna porsea do si Mika gumogo do Debata sian angka hamaolon na niadopan jala na dihilala ibana. Tolap do Debata paubahon na masa i gabe dalan mangalehon hasintongan ni uhum-Na tu bangso Israel. I do boasa didok panurirang Mika, “sai toguon-Na do ahu sogot tu hatiuron, idaonku do hatigoran-Na” (ayat 9). Alai molo musuna i, idaon ni angka musuna ma i sogot jadi hungkupan ni haurahon do angka bohinasida (ayat 10). Pos situtu do roha ni si Mika na so pasombuon ni Debata angka hajahaton ni jolma, na ingkon ro do pamalosan-Na. Ingkon hona luntak songon gambo di alaman do angka siula hajahaton i.

Di son ma hita ditogutogu asa unang ganggu rohanta tu hasintongan ni Hata ni Debata, ala ni angka na masa. Ingkon pos do rohanta tu Debata. Nang pe sipata mansai paet jala parir angka na masa di tongatonga ni ngolunta. Na mangolu on, na martingki do sude jala ingkon adong do proses. Ndang adong na pintor mamora manang torus di hapogoson, ingkon adong do prosesna. Ndang adong na torus di bagasan parsahitan manang torus hipas, ingkon adong do dalanna manang prosesna. Nunga ditotaphon Debata uhumna uju na ditompa Ibana nasa na adong, marproses do sude, sian ari parjolo sahat tu ari paonomhon. Songon i do nang di na laho mangida hapapatar ni hasintongan ni Hata ni Debata adong do prosesna. I do boasa didok panurirang Mika, ingkon ro do ari parpaulihon. Di ayat 11 di Bibel dipangke hata “parik” molo dihata Ibrani dipangke do hata gader, lapatanna dorpi manang tembok (a wall), handang manang pagar (fence, hedge). Jadi hata parik laho patoranghon pangomat manang partahanan. Hagogoon ni Debata ndada holan paulihon ekonomi manang budaya ni bangso-Na alai dohot do paulihon pangomat, partahanan manang hasangapon ni hajolmaon i. Di ayat 12-14 dipatorang si Mika, na ingkon hehe do Bangso Assur na markoalisi dohot Misir laho mangago, mangarimpason manang maniaphon Israel, alai molo ro ari ni Tuhan i laos gabe denggan do muse bangso ni Tuhan i.

Di ayat 14 dipataridahon si Mika adong do partalian ni Debata dohot bangsoNa. Ndang na pasombuon ni Debata marsitaonon angka bangsoNa asal ma olo bangso i paubahon roha. Ido boasa didok si Mika sai parmahani ma bangsoM marhitehite batahiM. Di turpuk on digombarhon do Debata songon parmahan, jala Debata do na marmahani bangsoNa marhitehite batahi-Na, bona, batang (rod), antuk-antuk, pentungan, tongkat (staff, scepter). Dipillit hata batahi di turpuk on laho patorangkon dalan ni Debata laho maminsang, dalan ini Debata paturehon bangso-Na asa jora di angka ulaon dosa. Tontu lam antusanta ma lapatan ni hata i, i ma: na marmahani marhitehite batahi i ma Debata na maminsang, asa tung jora mangulahon dosa, asa boi ture.

Di ayat 15 diulahi si Mika paboahon na masa di na robi di bangso i uju dipatupa Debata halongangan laho paruarhon bangso i sian Misir. Dipaboa ibana do songon dia bangso parbegu gabe murak, ala mangasang gogo tu bangso ni Debata (ayat 16). Tangkas do dipaboa si Mika, nasa jolma na maralohon parmahanion ni Debata, ujung ni ngoluna ingkon mandilat orbuk songon ulok, ingkon hitirhitir di partabuniannasida, angka dotdot jala mabiar maradophon Debata (ayat 17). Sian on antusanta ma nidok ni turpuk on, na mandok: manang ise na olo manjalo pamsinsangion ni Debata, i ma parmahanion ni Tuhan i, ingkon ture ma ngoluna sogot.

Molo taparateatehon di angka ayat na parjolo, marrimas situtu do Debata tu parange dosa. Ndang olo Debata kompromi tu angka parange dosa. Ndang pasombuon ni Debata, ingkon do baloshonon-Na. Alai di si olo jolma i marhamubao ni roha, di si ma tarida dengan basa ni Debata na mura roha-Na marpamuati (ayat 18). Popoanna jala reongkononna do angka dosa dohot hajahatonta (ayat 19). Gabe lehononna hasintongan tu ngolunta songon na binahenNa tu si Jakkob, si Abraham angka ompu ni Israel (ayat 20). Gabe boi ma antusanta, ala ni tangkang ni rohanta do asa ndang tarjalo hita dengan basa ni Debata, ndang jora hita mangulahon dosa. Di si hita jora mangulahon dosa jala marhamubaon ni roha, di si ma patar denggan basa ni Debata di ngolunta.

Kunjungi juga kanal YouTube HKI untuk mengetahui informasi seputar pelayanan HKI.

HAHONAAN

Hagogoon ni Debata na paluahon dang tarjalo jolma i molo so olo ibana diparmahani Debata di bagasan ngoluna, marhitehite paminsangion ni Debata na masa di ngoluna. Dosa do bonsir hasasega ni ngolu ni jolma i, jala ndang olo Debatanta markompromi tu dosa, sandok dang na pasombuon ni Debata, ingkon baloshonon-Na. Baliksa, molo olo jolma i paubahon roha na, di si ma tarjalo, jala patar ma di ibana hagogoon ni Debata na paluahon.

Penulis:
Pdt. Ewen J Silitonga, S.Th

Penyunting:
Vic. Pdt. Timothy P. Saragi

BAHAN EPISTEL INI JUGA DAPAT DIUNDUH DENGAN MENG-KLIK TULISAN DI BAWAH INI
EPISTEL MINGGU 22 JANUARI 2023 – MINGGU 3 DUNG EPIPHANIAS