EPISTEL MINGGU 27 MARET 2022-LUKAS 15:1-7

Epistel Minggu 27 Maret 2022
Minggu Letare
Marlas ni Roha jala Marsuraksurak di Bagasan Tuhan
Lukas 15:1-7

PATUJOLO

Turpuk ni Epistel Minggu 27 Maret 2022 on Evangelium Lukas, i ma na sinurathon ni si Lukas sekitar taon 70M, dungkon parangan ni Rom manghansurhon Jerusalem dohot bagas joro na di huta i. Marimbar sian surat na asing, barita na uli na pinasahat ni si Lukas on manurathon marragam hata umpama na pinasahat ni Tuhan Jesus ima; halak Samaria na asiroha i (Luk. 10:25-37), umpama taringot tu birubiru na lilu (Luk. 15:1-7), taringot tu hupang na mago (Luk. 15:8-10), dohot Anak na mago (Luk. 15:11-32). Jala na diondolhon di bagasan partingkian on ima umpama taringot tu birubiru na lilu (Luk. 15:1-7).

Konteks ni turpuk Epistel Minggu 27 Maret 2022 on dipasahat Tuhan Jesus hatiha angka sijalo beo dohot halak na mardosa ro tu Ibana laho manangihon Ibana. Angka sijalo beo ima sahalak na mangula di pamarentaon Romawi laho papunguhon beo sian halak Jahudi, ujungna nasida pe jotjot do dihatahon gabe siparjehe ni bangso (penghianat bangsa) laos dihasogohon halak Jahudi do anggo angka sijalo beo i. Sedangkan halak pardosa na dihatahon di bagasan turpuk on boi do i marlapatan angka pangalangkup, pamunu, dohot lan na asing dope. Di bagasan turpuk on digombarhon do asi ni roha ni Debata na tung mansai balga tu halak pardosa naung lilu jala mago sian dalan ni Debata. Tung pe godang halak na sintong na manghaporseai Debata, alai ringkot jala mararga do di Ibana sahalak pardosa. Ido umbahen pola dilehon Ibana Anak-Na Nasasada i, ima Tuhan Jesus Kristus laho mangalului dohot paluahon nalilu dohot na targogot.

Sude do halak di portibion dang manghalomohon situasi na di bagasan agoan. Alai mungkin sahali hea do hita agoan ugasan na mansai mararga. Umpamana sihumisik manang barang na mansai tahaholongi, jala lomo rohanta mangida barang ta i. Di halak na asing mungkin dang mararti barang ta i, alai molo dihita na memang manghaholongi barang ta i, pasti do hita marusaha mangalului jala manjumpanghonsa muse nang pe adong angka ugasan/barang na asing punata. Roha na agoan si songon on ma na dipatorang Tuhan Jesus di bagasan hata umpama na pinasahat-Na taringot tu birubiru na lilu. Laos on do na naeng sirajumanta di bagasan turpuk jamita on.

BACA JUGA JAMITA MINGGU LETARE – MINGGU, 27 MARET 2022

HATORANGAN

Saluhutna do jolma dang mardiaimbar di adopan ni Debata (ayat 1-2): Songon parborsir ni turpuk jamita on ima hatiha dunghon disaksihon nasida Tuhan Jesus adong di tongatonga ni nasida. Ro ma angka halak Parise dohot angka siboto surat marungutungut tu Tuhan Jesus ala didophon roha ni nasida ianggo Jesus ima Rabi manang pangajar hata ni Debata, hatiha i Jesus marsaor dohot halak pardosa jala na dietong halak na hodar, toru jala lea. Dang diantusi halak Parise dohot siboto surat hata on, makana marungutungut nasida holan alani Jesus rap mangan dohot halak pardosa. Alani i Jesus naeng manguba pola pingkir ni halak Parise dohot siboto surat. Nasida marpingkiran anggo Jesus ingkon do lobi mangalehon partingkianna dohot halak na badia, songon nasida didok roha nasida. Alai di parnidaan ni Jesus lobi denggan do molo godang partingkkian-Na dohot halak pardosa na olo marbalik sian dalanna na lilu. Halak Parise dohot siboto surat dang diantusi natinuju ni Jesus tu portibi on. Nasida marpingkir Jesus dang tagamon marsaor dohot halak pardosa. Hape Jesus ro dang tu halak na bonar jala badia, alai Jesus ro ima tu halak pardosa na mangharingkothon haluaon sian dosa.

Marhite hata on disungguli do hita taringot tu ise do hita diadopan ni Debata? Ia hita nasailaon ima halak na mardosa naung dilului jala dipalua marhitehite Tuhan Jesus Kristus. Luhut do diulahon Ibana hombar tu holong ni roha-Na ala mararga hita diadopan-Na. Alani i, unang ma mulak mangaliluhon diri hita di bagasan dosa dohot pangalaosionta. Alai mangoluma di bagasan panoguon ni Tuhan Jesus, mardalan di dalan na sintong huhut dang manimbil di bagasan hata dohot parulaon hita. Molo tung pe tahuton hita, sorat, jala lomos rohanta, disosoi Jesus do asa ro ma hita tu Ibana laos abingonNa do hita asa sonang di bagasan ampuanNa. Jala Ibana sandiri manungkol laos pahothon hita, tung sura adong dope donganta na di bagasan haliluon ni dosa dohot pangalaosion nasida. Unang ma hita tudos tu halak Parise dohot siboto surat na manghasogohon nasida. Na ringkot dihasogohon ima dosana ndada jolmana. Unang ma mandophon dirinta badia jala dang mangharingkothon hasesaan ni dosa ala sude do hita dos di adopan ni Debata. Alai ulahon ma hamubaon ni roha mardongan holong. Usahahon ma laho manghophop laos mamboan halak na lilu tu dalan ni Debata raphon tangiang, mangalean hata sipaingot manang sosososo, manghajongjonghon pangajarion hata ni Debata dohot ngolu na sintong. Ala ringkot jala mararga do hita luhutna di adopan ni Debata.

Haroro ni Jesus laho mangalului na lilu (halak na mardosa) (ayat 3-7): Umpama on mansaritahon taringot sahalak parmahan ni birubiru nampuna 100 birubiru. Disada tingki sada birubiru i mago. Alani situasi si songon i, ditinggalhon ibana ma 99 birubiruna di dolokdolok, laos laho ma manjumpanghon sada bibubiru na lilu i. Panorangion taringot tu birubiru ima partanda na mansai jotjot dijumpangi di bagasan Bibel ta on. Birubiru ima dorbia na mansai oto, dang boi mangalului siallangon dohot siinumonna sandiri sopola iringon manang togutoguon ni parmahanna baliksa mangondihon dirina sandiri. Hatiha tajaha turpuk on pasti do ganup hita sungkunsungkun dirohanta. Songon dia ma sahalak parmahan nampuna 100 birubiru laho maninggalhon 99 birubiru na ginonggomanna holan laho mangeaki sada birubiru na lilu? Molo secara ilmu manajemen tontu sisongon on pasti dang tarjalo pingkiran. Tarlumobi ma songon di partingkian on godang do halak pasombuhon sada birubiru mago asalma 99 birubiru na asing dang mago. Tu aha mangalului sada birubiru na lilu molo adong dope 99 birubiru? Manang na tung mansai mararga jala na rumingkot do na sada i sian na 99 i? Boha molo na 99 na tininggalhon ni parmahan i mago sude? Di hatahon di bagasan turpuk on ditinggalhon do birubiru i di dolokdolok, inganan parmahanion na biasana dang inganan na berbahaya. Jadi, na 99 birubiru i, ndada na ditadinghon sembarangan. Parmahan maninggalhon na 99 nai jala mangalului na mago i, patuduhon ianggo na birubiru i na sadanai dang na ummuli. Birubiru na lilu i ndada na lobi denggan sian birubiru na 99 nai. Alai gabe tandi (unggul) alani kondisina. Isarana adong lima halak na marhahamaranggi di sada keluarga. Di sada partingkian, marsahit ma sada sian lima na marhahamaranggi i, sahit na pe nunga tung mansai posi. Umbahen i nalnal orang tua di sada keluarga i, dilehon do lobi perhatianna tu ibana sian na asing i, seolaholah na opat nai dang dianturehon. Alai ianakhon na marsahit on gabe tandi jala paling dianturehon sialani kondisina, kondisi parsahitonna. Sian on botoonta ma imbarna pangajarion ni Tuhan Jesus dohot hadirion ni portibion. Molo portibi mameop togu hadirion ni ekonomi alai molo Jesus mangajarhon anggo diparnidaan ni Debata, sada birubiru tung mansai mararga do i.

Birubiru i ima sada gombaran ni sahalak jolma pardosa naung mago sian dalan ni Debata. Alai ianggo birubiru naso lilu i, ima halak naung porsea tu Jesus Kristus laos nunga marbalik sian dosana mulak tu dalan ni Debata. Halak Kristen digombarhon songon birubiru jala parmahan ni birubiru i ima Jesus Kristus. Parsorion ni halak na tongtong mangolu di bagasan dosa doshon birubiru na lilu jala targogot. Ibana targogot sian Debata huhut sian uduranna jala sian dirina sandiri. Dang diboto ibana didia ibana maringan jala agoan tungkan dohot natinuju ni rohana. Ibana di holangholang ni asupan dorbia na buas maradu hatahuton jala ibana pe manghasiholi duhut na rata dohot pangondian ni Parmahan. Alai dang jumpangna dalan na dapot mamboan ibana mulak. Sahalak parmahan na burju dang na olo agoan sada birubiru pe, nangpe bahat uduran ni birubiruna na asing. Alani ido parmahan gabe marusaha laho mangalului dohot manjumpanghonsa. Dungkun ni i mulak ma parmahan i jala diboan ma birubiruna i di atas ni abarana siala diboto ibana do, nunga loja huhut lomos birubiruna i. Ibana papunguhon dohot mamboan birubiru i tu bagasan ampuanna, abaraNa ima gombaran huasona na pagomoshon dohot manungkol birubiruna asa birubiru naung diporsan manang dituhukna unang be mago jala hangoluan nisalelengnilelengna di ibana.
Alai molo sahalak parmahan ima sahalak na mangganupi haporluon ni birubiru i, mangondihon birubiruna sian dorbia na buas, mandaoni na tarlukka dohot manogunogu manang tudia pe parmahan i mamboan birubiru i. Sian gombaran on ima patuduhon taringot tu hadirion ni Tuhan Jesus laos ditorushon ma i tu partingkion si saonari na laho manghatahon ima sahalak pandita manang parhalado ni huria pe tong do sada parmahan di tonga-tonga ni huria. Umpama on dipatorang Tuhan Jesus laho pabotohon ianggo ulaonna di portibi on ima mangalului birubiru na lilu. Ibana sandiri disuru Debata laho mangaluli jolma na di bagasan dosa. Tu angka siseanNa pe sian mulana, Jesus manghatahon haroroNa tu portibi on ima mangalului jolma na lilu sian dalan ni Debata.

Kunjungi juga kanal YouTube HKI untuk mengetahui informasi seputar pelayanan HKI.

HAHONAAN

Ojahan ni Epistel Minggu 27 Maret 2022 on dohot Minggu Letare, i ma: Marlasniroha Jala Marsuraksurak Di Bagasan Tuhan. Alani aha do hita marlas ni roha jala marsuraksurak? Tontuna alani Asi dohot holong ni Tuhan i. Ai taboto do, tongtong do hita dilului Debata. Debata sandiri do na laho mangalului saluhut jolma pardosa i. Molo birubiru na lilu dohot na targogot do hita di bagasan partingkian on laos dang taboto di dia hita. Ingot ma dilului Debata do hita marhitehite Jesus i. Tatangihon ma barita nauli jala panjouon ni Jesus i tu hita asa mulak hita tu Ibana, ro ma hita tu Ibana naung mate laos hehe laho humophop hita sian dosa. Porsea ma hita tu Ibana antong saipaluaon-Na do hita laos dipadame hita tu Debata Ama. Asa hangoluan salelengnilelengna di hita.

Molo Debata sandiri mangalului birubiru na lilu i, boha hira-hira hita ianakhon-Na tu birubiru na mago i? Olo do hita parsidohot mangalului donganta na asing i? Holan alani sahalak jolma dioloi Debata do kerja keras. Hinorhon ni i do molo saut do pasombuonta nasida naung lilu sian dalan ni Debata di bagasan dosana, ima sada parulaon naso Kristiani. Alana sahalak ianakhon ni Debata pasti do dang manghalomohon donganna mago. Alani i tangianghon ma laos usahahon boha ma asa mulak ibana muse tu Debata. Molo adong sahalak ruas di gareja ta na mulai sumurut. Boha do sikap ta? Tapasombu do manang marusaha do hita nasa tolap ni gogonta laho padalanhon sada solusi asa boi nasida mulak tu Tuhan i? Taingot ma sahalak jolma mararga do diadopan ni Debata. Jala dihatahon do molo adong sahalak na marbalik rohana tu dalan ni Debata sandok surusuruan pardisurgo marlasniroha. Saluhut do umpama i manggombarhon ianggo di adopan ni Debata, sahalak na mago i ringkot do jala nunga pasti molo mulak ibana tung marlasniroha do roha ni parmahanna ima Jesus Kristus. Amen.

Penulis:
Departemen Marturia

Penyunting:
Yohanes Simatupang