Epistel Minggu SEPTUAGESIMA
Minggu, 13 FEBRUARI 2022
Epistel: Mateus 4: 23 – 25
Patujolo
Diturpukta on dipatuduhon do songon dia panghobasion na diulahon Jesus di bagas joro na adong di luat Galilea, na ro do Ibana tu portibi on asa marjamita. Haluaon na manontong na binoanNa nunga dihatahon jala dibaritahon Ibana sandiri (Heb.2:3), asa tarida ma holong ni rohaNa tu haluaon i, jala songoni ma nian holong ni roha ni jolma tu haluaon na pinarade ni Jesus. Ro do Jesus tu Galilea, luat ni Zebulon dohot Naftali dung sahat tu Ibana barita taringot tu si Johannes pandidi naung dipamasuk tu hurungan ala pamaritaon na pinatupana. Galilea, sada luat na dao sian Jerusalem, dianggap kasar, na dihagigihon torop halak jala dianggap do luat i ndang maradat. Tarbarita do luat i haroroan ni soldadu, ndang sopan. Tusi do Jesus ro mamaritahon hata dohot hasintongan taringot tu harajaon ni Debata.
Jamita na pinasahat ni Jesus tudos songon barita na jinamitahon ni si Johannes pandidi taringot tu hamubaon ni roha dohot harajaon banua ginjang (Mat.3:2). On do barita sijamitahonon. Surusuruan banua ginjang pe ndada marasing barita na binoanna sian na binaritahon ni Jesus (Gal. 1: 8). Paubahon roha, harajaon ni Debata sibaritahonon tu angka pangisi ni tano on, tu saluhut bangso dohot marga dohot hata dohot houm, Debata do sisombaon na tumompa langit, tano dohot laut (Pang. 14:6 – 7).
Hatorangan
Tung mansai ringgas do Jesus marjamita. Pola do humaliang luat Galilea, Ibana mangajari di bagas joro mamaritahon harajaon ni Debata. Harajaon na gok pasu-pasu dohot hamuliaon, ima harajaon na laho sipasahaton ni Debata. Harajaon na manontong, na mangatasi saluhut harajaon na di portibi on. Barita na uli gabe undang-undang dasar ni harajaon i, Debata na gabe Raja na patupahon haluaon di bangsoNa. Dipodahon do tu angka bangso laho mangulahon patik ni Debata. Ima harajaon banua ginjang, Kristus sandiri do na manjamitahonsa, asa togu haporseaon ni na umbegesa.
Di dia Jesus marjamita? tontu di bagas joro. Alai ndada holan di bagas joro. Di bagas joro ma Jesus manjamitahon hataNa di turpuk on. Di inganan i ma padan na robi di baritahon jala diajarhon. Didalani Jesus do sandok luat Galilea mangajar. Sasintongna boi do pabotohonon ni Jesus asa saluhut jolma ro tu Ibana. Alai ndada i na niulahonNa, dipatuduhon do haserepon ni roha dohot hasintonganNa, Ibana sandiri do na ro tumopot jolma pardosa, paluahon jala pamalum jolma na tinompaNa i. torop do huta di luat Galilea, di dalani Jesus do torop huta na di luat i. Na mardalani do Ibana mambahen na denggan (Ul. 10:38). Ndada adong dope parjamita na mardalani songoni, ndang mananda loja, pamalum na marsahit songon Kristus. Mardalan do Ibana sian huta tu huta lain, manogihon angka jolma pardosa asa mardame dohot Debata. Gabe sada sitiruon do i tu angka parbarita na uli, asa diparade nasida dirina laho mangulahon na denggan, marsihohot, ditingki na une nang naso une (2 Tim. 4:2), laho mamaritahon hata ni Debata.
Di turpuk on pe dipabotohon do hinabalga ni huaso ni Jesus pamalum angka na marsahit. Ndada holan marjamita Ibana, alai dohot do pamalumhon na di bagas parsahiton. Diulahon jesus do ulaonNa marhite ‘hata’. Dipamalum Jesus do ragam ni parsahiton tahe. Adong do piga-piga sahit na maol di obati angka parubat, alai malum do sahit i di bahen Jesus. Hata ni Jesus do pamalum jolma sian parsahitonna. Dipamalum jolma na mapitung, pampang, solpot, angka na sarion, disonggopi tondi na hodar. Marhuaso do Ibana di ragam ni sahit i.
Torop do jolma na ro tu Jesus, ndang tarbilang godangna. Ndada holan sian luat Galilea dohot humaliang Galilea, dohot do sian luat Jerusalem dohot Judea. Tarbarita do huaso dohot hagogoon ni Jesus sahat tu luat Siria, ndang holan di tonga-tonga ni halak Jahudi, dohot do angka bangso na asing. Marhite barita na sahat tu sipareon nasida boi mambahen torop halak sian luar ni bangso Jahudi na manjalo barita las ni roha jala manjalo Jesus sipalua di pudian ni ari. Ido na mambahen tung torop jolma na ro mangihuthon Jesus, ai nunga tarsar barita taringot tu goarNa di sandok luat i. dilului torop halak do hahipason di pamatang jala hahisaron di partondion. Marhite turpuk on, taida ma torop do jolma na marlas ni roha mangihuthon Jesus, marnida gogo dohot huaso na pamalum nasida sian parsahiton, alai lupa nasida na Ibana do Debata dohot Guru/Mesias na sasintongna.
Diparade Jesus do hamamalum tu saluhut halak na marhaposan di Ibana. Tarlumobi ma tahe hamalumon sian sorop ni dosa, asa dapotan di hangoluaon sisalelenglelengna. Tarida ma sian i na Ibana do Debata na gabe jolma, Anak ni Debata. Ai ndang adong sahalak pe na marhuaso boi patupahon sisongoni molo so Debata Ibana (Joh. 3:2). Jesus do Mesias, raja ni saluhut bangso, marhuaso do Ibana tu angka na tinompaNa, dipamalum angka parsahiton, dipargogoi angka na marsak, di togu angka na gale, dipalua do jolma i sian dosa jala diparade hangoluan na salelenglelengna. Marlas ni roha jala mariaia do jolma na mambahen jesus haposan jala haporusanna.
Hahonaan
Torop do halak Kristen na mangulahon panghobasion di huria. Molo disungkun, panghobasion na songon dia naung taula di ganup hurianta? Di zaman saonari on ndang saotik sian halak Kristen na torop manghobasi secara aktif di punguan-punguan, alai ndang haru hea manghobasi di Gereja. Sian panghobasion na niulahon Jesus, paling utama do dibahen Jesus pamaritaon barita nauli i/panghobasion i di bagas joro. Ai tangkas do diboto Jesus hinaarga ni pamaritaon tu torop halak di bagas joro, tung pe ndada holan di bagas joro Ibana marjamita.
Godang do Gereja-gereja na memfokushon manang manekanhon panghobasionna tu hamamalum sian parsahiton, manang focus tu panghobasion di kesembuhan jasmani. Molo naung boi pamalum jolma sian na marsahit, ima didok roha ni torop halak gereja na sintong, tung pe sala do na sisongoni. Panghobasion na mansai ringkot si baritahonon ima barita taringot tu hamubaon ni roha dohot harajaon ni Debata. Ai haluaon sisalelenglelengna do na pinatupa ni Jesus, jala marolopolop do saluhut bangso na marhaposan tu Ibana. Amen!
Penulis:
Departemen Marturia HKI
Penyunting:
Yohanes Simatupang, S.Th
