NATAL 25 DESEMBER 2023

Lukas 2:15-20

SALUHUT BANGSO UMMPUJI JALA PASANGAPHON DEBATA

Patujolo:

Buku Lukas ima na sinurathon si Lukas sahalak dokter jala dongan Ap. Paulus marbarita na uli (Kol 4:14; 2 Tim 4:11). Buku I disurthon ibana songon sada sejarah haluaon na binoan ni Tuhan Jesus tu portibion, na dimulai sian boaboa hatutubu ni Johanes pandisi, hatutubu ni Jesus, panghobasionNa, sitaonionNa, hamateanNa, haheheonNa sahatbtu hahinsatonNa tu Banua ginjang.

Turpuk on dimulai sian pabotohon tingki hatutubu ni Jesus, dipabotohon ingananna, partinandaan di nasida, na dipabotohon surusuruan tu angka parmahan na marborngin di ladangi. Di Halak Jahudi, parmahan, ima parkarejo kasar, ulaon na lea mandamanda, jala ndang sanga ro tu bagas joro ni Debata laho manguras diri, dohot mangula uhum ni ugamo. Siala ni i nasida dang patut gabe sahalak sitindangi, hape tu nasida do ro surusuruan I mandok: unang mabiar hamu, ai barit ani halalas godang do huboan tu hamuna, parsaulian ni sandok bangso. Ai naung tubu do di hamu sabornginon, di huta ni si Daud, sipalua I, ima Kristus Tuhan i. Tompuma adong dongan ni surusuan I torop angka parangan parbanuaginjang, dipuji ma Debata manedok: Hasangapon ma di Debata di ginjang, dame ma di tano on, di angka jolma halomoan i.

Hatorangan:

  1. Beta ma hita tu Betlehem, taida ma na masa on, na pinabotohon ni Tuhan i

Nangpe parmandamanda nasida, dao sian joro ni Debata, alai diboto do huta ni si Daud, ima Betlehem. Marsitogian nasida naeng mangida na masa i. Boasa? Aha na menarik sian barita i umbaen na ingkon borhat nasida? Ala naeng dohot nasida mangida hasintongan ni hata ni Tuhan I, mangida halalas ni roha godang, parsaulian ni sandok bangso. Naeng parsidohot nasida mangida Sipalua I, ima Kristus Tuhan i. Halalas ni roha godang do Jesus I. HatutubuNa paintophon biar ni roha ala ni dosa, pajonokhon Debata tu portibion, padamehon jolma tu Debata, mangalean hasintongan tu jolma, paluahon jolma sian uhum ala ni dosa, jala mangalehon hangoluan na saleleng ni lelengna. Alanii do Jesus didok parsaulian ni sandok bangso (dang holan tu Halak Jahudi alai saluhut bangso do dipauli jala dipalua Jesus i). 

  • Jumpangsa do si Maria, Josep dohot posoposo i

Borhat do parmahan i mangihuthon partinandaan na pinabotohon ni surusuruan i taringot tu na masa i. Jumpangsa do songon na pinabotoon ni surusuan i tu nasida. Alanii, dibaritahon nasida ma boaboa, naung dihatahon tu nasida taringot tu dakdanak i. Ndang tarintopi pamangan nasida, tung ingkon dihatahon nasida barita taringot tu Jesus i. Parmahan na so boi dipake songon sahalak saksi di pengadilan, hape nuaeng manghatindangkon Jesus.

  • Mulak parmahan I, dipasangap jala dipapuji-puji do Debata

Mulak parmahan i mandapothon na pinarmahanna, mulak laho mangula songon na somal, jala mungkin pandangan ni jolma pe tu nasida tong do songon na somal. Alai nuaeng adong na berubah di nasida, ima nasida na saleleng on digohi biar ala ni dosana, digohi biar ala ni tantangan dohot ancaman di ulaonna, biar ala dao sian keluarga, biar ala ni borat ni parngoluon dohot pendapatan na hurang, nuaeng gok halalas ni roha godang, gok pujipujian ala nunga diida jala ditanda nasida Jesus sipalua nasida i. Ai parjumpangan nasida dohot Jesus mambaen tangkas idaon jala botoon nasida tujuan ni ngolu nasida na marTuhan i. Alaniido nasida mulak pasangap jala papujipuji Debata.

Panimpuli:

  1. Beta hita mangida na pinabotohon ni Tuhan i.

Unang holan mambege, manangihon barita ni Tuhan I, alai dapothon Tuhan I, jumpangi Tuhan I, ida ma na masa i. Dapothon Jesus i tu bagasjoroNa, pestahon ari hatutubuNa, asa parsidohot ho mangida hasintongan ni Hata ni Tuhan I.

  • Naeng dapotan halalas ni roha godang ho? Naeng dapotan parsaulian ni sandok bangso ho? Parguruhon hata ni Tuhan I, ihuthon songon na dipabotohon hata ni Tuhan i. HataMi do sulusulu ni pathu jala hatiuron di dalanhu (Psalm 119:105). Jesus do Hata ni Tuhan I, Jesus do sulusulu dohot hatiuron na patuduhon dalan haluaon I, Jesus do na patiurhon parnidaan dohot dalanmi. Ihuthonma Ibana asa jumpangmu na niluluanmi. Di bagasan Ibana, jumpangmu do hasintongan ni Hata ni Debata. Amos 5:4-6: Lului hamu ma Ahu, asa mangolu hamu. Lului hamu ma Jahowa asa mangolu hamu. Jesus na tapestahon ari hatutubuna sadarion, ro tu portibion asa tandaon ni jolmai Tuhan i. Jesus do Tuhan I, Ibana do halalas ni roha godang, parsaulian ni sandok bangso. Luluima jala dapothon Ibana di inganan naung dipabotohon tu ho, jumpangmu do Jesus i, jumpangmu do haluaonmi.
  • Gabe sitindangi ni hata ni Tuhan i ma hamu

Godang do Halak na manghatindanghon na so sintong. Boasa? Ala dang di bagasan hasintongan I ibana, jala dang dapotna hasintongani. Ganup naung jumpang hasintongani (Jesus i), i do na boi manghatindanghon hasintongan ni Tuhan i. Ai nunga jumpangna hasintongani, jala dapotan hasintongan I ibana. Alani i do, ibana gabe sitindangi hata ni Tuhan I, sitindangi hasintongan i.

  • Saluhut bangso umpuji jala pasangap  Debata.

Tung tu saluhut bangso do halalas ni roha dohot parsaulian na sian Jesus i. Ibana do Tuhan ni saluhut bangso. Alanii do didok di Filipi 2: 10-11: asa somba tu Goar ni Jesus nasa ulu ni tot, na di banua ginjang i dohot na di tano, nang na di toru ni tano, jala nasa na marsoara marhatopothon : Jesus Kristus do Tuhan bahen hasangapon ni Debata Ama.

Pdt. Meri Pitta Ulina
Kolportage HKI

Bagikan Postingan ini: