EPISTEL MINGGU 10 JULI 2022 – KOLOSSE 1:1-14

Epistel Minggu IV Setelah Trinitatis 10 Juli 2022
MINGGU IV SETELAH TRINITATIS
MINGGU, 10 JULI 2022
“MAMARITAHON JALA MANGULAHON HATA NI DEBATA“
Kolosse 1:1-14

PATUJOLO

Tung sada sipingkiran jala mambahen jut roha umbege barita naung godang angka gareja di Eropa naung gabe so adong be parmingguna jala pola gabe mimbar hagunaanna; gabe restoran, bar jala adong muse do digadis gabe inganan di parugamoon naleban. Luat haroroan ni hakristenon tu Asia termasuk tu hita on jala na tumorop hian halak Kristen nuaeng nasida nunga torop pindah ugamo. Tutu, di luatta martamba-tamba do jongjong gareja (atik pe di HKI nangetnanget do) jala sai dihalojahon do pauli jala pabalgahon gareja, las do roha disi, lumobi molo lam tu toropna angka parmingguna. Alai tahe molo diuji mangetong parminggu tu torop ni ruas ndang piga dope hurianta nadapot pola 60% bilangan ni parminggu tu torop ni ruas. Sai tongtong dope taparungkilhon uju jumpang paretongan namangalehon pelean taon, nunga las roha molo sahat tu 65 % atik pe nunga sai didasdasi marhite tingting ni huria jala ro mandapothon.  Ima manghorhon sai maradu ummetmet ma molo adong angka situhukon uju jumpang panghataion di resort, daerah nang tu sentral pusat.

HATORANGAN

Diparhatopot ap. Paulus do las nirohana mardompakhon huria Kolosse di pamuhai ni surat on. Tung mandok mauliate do ibana tu Debata ganup martangiang dompak huria Kolosse (Ind. ‘setiap kali kami berdoa untuk kamu’). Andul marasing sian angka partangiang alani parungkilon, isara natoras nasai tumatangis manang dibagasan holso alani angka ianakhon naso dapotan ngolu-ngolu dope dipangarantoan manang ala so dapot dope napinarsinta ni roha. Dipatuduhon ayat on tangkas roha namarlas niroha. Ndang las niroha ala angka parsaulion pardagingon; arta, sangap; alai ala barita ni haporseaon di Kristus Jesus, nang holong ni roha mida saluhut na badia, jumpang di Kolosse ima sada huta na maju di harajaon Rom hirahira 18 km tungkan utara Laodikia, jonok tu dalan Efesus dohot sunge Efrat. Di tanda jala digoari do najolo huta Kolose on ima Frigia. “Ala barita ni haporseaon di Kristus Jesus, nang holong ni roha mida saluhut na badia” ima namanghalashon roha. Sada alasan naso pola diharinghothon be nuaeng on; ndang piga be huria manang natoras marrohahon on. Ndang piga huria namangaradoti manang manosoi tu ruas nalaho borhat tu luat naasing, nang angka natoras uju paborhat ianakhonna tu pangarantoan asa diharingkothon marhuria apalagi tu HKI. Molo tung pe disosoi alai tarjalo ma alasan; dao do HKI sian inganannami.

Sian angka hatorangan ni pande nisuk ni Bibel, parjongjong ni huria di Kolose ndang pola adong hadomuanna tu apostel. Apostel Paulus. Jala diparhatopot Paulus do i, panandaion nasida di Jesus Kristus ima sian pangajarion di si Epapras (ay.5-7). Na pajumpang do ap. Paulus dohot si Epapras (ay. 8, 4:12) jala dapot ibana barita taringot tu nasida. Alai ndang gabe pangambati i diroha ni Paulus paluahon tanggungjawab mangaramoti ngolu partondion ni halak naporsea asa tongtong togu jala mangolu dibagasan hasintongan ni Debata (tajaha di angka ayat dohot bindu namangihut na torop angka pangajari namangaliluhon haporseaon tu huria i). Disosoi ap. Paulus do nasa naung manjalo parbinotoan jala mananda Tuhan i naeng ma marniula haporseaonna; asa marparange na tama di Tuhan i hamu, gabe halomoan situtu jala marparbuehon nasa ulaon na denggan, laos ganda di hamu panandaon di Debata (10,11). Martimbanghon angka huria naasing (isara gerakan Pentakosta, Kharismatik) tarbilang talu dope hita (HKI) atik pe naeng mangeahi umur 100 taon ma hurianta HKI. Godang dope jumpang na masipabalibalian laho mambahen tangiang, pasiding jala masiadu metmet uju naeng manumpahi, masidalian laho manuhuk mangaradoti ulaon huria, masipasombuan laho mambahen pangurupion, marsalisi jala gabe pagutu ala parrapoton, sai mamaksahon pingkiranna gabe jumpang parbadaan, dna, gabe sai tontong ma tarbilang hita HKI (Huria Kecil Indonesia).

Kunjungi juga kanal YouTube HKI untuk mengetahui informasi seputar pelayanan HKI.

HAHONAAN

Dipangujungi ni turpuk on dipaingothon ap. Paulus do: Ai nunga diroro hita sian gomgoman haholomon i, jala dipaunsat hita tubagasan harajaon ni Anak, haholongan ni rohana (13). Debata sandiri do naung paunsathon hita tubagasan harajaon ni Anak, gabe angka anak harajaon ma hita. Tontu molo gabe anak harajaon ingkon paubaon ma diri laho pasumanon, bahen pujipujian dohot hamuliaon dohot hasangapon, di hapapatar ni Jesus Kristus i. (1 Petrus 1:7). Parbue na hinalomohon ni Debata ndang holan asa gabe ruas na ringgas marminggu asa torop, alai namanogu halak marpangalaho songon Tuhan Jesus Kristus. Dia ma marlapatanna godang kesibukan di gareja alai roha, pangalaho ndang marasing sian sihatoropan?

Songon las niroha ni ap. Paulus tu huria Kolosse, naeng jumpang ma songon i di hurianta HKI, huria na lam patuduhon dirina naung mananda, manjalo, manghaporseai Jesus Kristus silehon Haluaon i. Huria na lam patuduhon haporseaonna: namarholong niroha di angka nabadia, gabe halomoan situtu jala marparbuehon nasa ulaon na denggan.  Las roham o, HKI, ditodo ho nuaeng, pararat hataNa.  Amen.

Penulis:
Pdt. M. Lumban Gaol, S.Th