EVANGELIUM, MINGGU XIV DUNG TRINITATIS – 10 SEPTEMBER 2023

“DIHALOMOHON DEBATA DO HAMUBAON NI ROHA NI PARJAHAT”

Hezekiel  33:7-11

  1. Patujolo

Kitab Hesekiel ima sada sian Kitab na adong di Padan na Robi, suratan on masuk ma tu horong Kitab Panurirang na balga, buku on marisi godangna 48 bindu jala hapeahan inganan ni buku on di holang ni Kitab Jeremia dohot sampuludua panurirang nametmet sian Alkitab (bibel) Ibrani jala dohot molo marsurathon Septuaginta ima diholang buku Jeremia dohot Daniel. Hesekiel targoar sada panurirang Yahudi na mamboan barita nauli hatiha di tano buangan bangsoNa (tahun 593-771 SM) ditingki panggomgoman ni bangso Babilonia jala diuluhon raja Yoyakin na sian bangso Yehuda dohot raja Nebukadnezar sian Babel. Panurat buku on ima panurirang Hesekiel. Dimasa ni pangulahonon ni panurirang Hesekiel, bangso Israel mangulahon naso hinalomohon ni Debata ima naso olo mangulahon akka nadenggan. Hombar tusi ditomos Debata panurirang Hesekiel asa paingothon bangsoNa jala mulak mangulahon lomo ni rohaNi Debata.

  1. Hatorangan

Di bindu 33 on dipabotohon panghirimon ni bangso Israel, Debata pasahathon hataNa marhitehon panurirang Hesekiel asa marhumabon ni roha dohot hatorangan taringot dapotan haluaon tu bangsaNa. Adong impola na boi sipaihut-ihuthonon di turpuk ni jamita on:

  1. Debata na marsuru jala patotophon naposoNa (ayat 7)

Hesekiel ima goar Ibrani na marlapatan “dipargogoi Debata”. Di ayat on dipabotohon ia panurirang Hesekiel namarhaporseaon na togu jala tongtong paingothon bangsoNa asa manadinghon dosa jala mulak asa manjalo haluaon na sian Debata. Yesus Kristus  tarsongon sada na gok huaso laho pasahathon hata ni Debata tu saluhut manisia. Suang songoni nang dohot panurirang Hesekiel ditomos gabe songon sada panjaga bangsi ni Debata, tung borat situtu siulahonon ni si Hesekiel songon sada panurirang, asa hombar tu siulahononna adong sihatindanghonon (tanggung jawab). Umbaenna tung gomos situtu dipaimahon si Hesekiel asa marhamubaon ni roha bangso, ido ditotophon Debata Debata si Hesekiel songon sada “sipenjaga” ima namartugas songon sada silehon poda, pamissang di akka pangalaho namaralo tu lomo ni Debata, jala paingothon bangso Israel asa mulak di dalam lomo ni roha Debata. Panjaga tugas ni Hesekiel hombar ma tu pangkuling ni sarune ima songon sada partanda nanaeng namasa insara akka mara manang hamatean. Takkas situtu dipaandar turpuk on ima na ditomos sasahalak manisia asa manjaga manisia na asing gabe songon tanda asi ni Debata, tudos ma songon haroroni Jesus Kristus na ro songon sada manisia laho patuduhon balgani asi ni roha ni Debata di jolma. Songon sada naung tardok jolma na porsea di Debata totop manjaga diri asa tongtong mardalan di dalam lomo ni rohaNi Debata molo tung ro akka sitaonon di ngoluta. Tarlumobi di na mangadopi akka parsiajaran naso hombar nidok Debata manang didok pengajar sesat asa hot manongtong marhaporseaon di Jesus Kristus. Molo marsiajar jala marnida tu akka naung masa ima gok ni jolma na baliksa manadingkon haporseaonna molo masa parungkilon na dokdok di parngoluanna, na mangalului alusni jala solusi sian akka sitaonon na ro di sasahalak jolma tu naso hombar tu lomo ni roha ni Debata. Jala hita naung gabe jolma na marhaporseaon didok asa manongtong mamodai jala paingothon akka dongan jolma (Luk. 17:3). 

  • Ruhut ni akka siulahonon marhite hataNa dohot pabotohon asa marhamubaon ni roha (ayat 8-9)

Di turpuk dipabotohon akka nanaeng siulahonon ni si Hesekiel marhite hataNa. Panurirang Hesekiel ikkon mamissang jala paingothon akka jolma parjahat asa tumadingkon dalanna. Jala molo sahat ro di ujung ni ngoluni siparjahat i dang manadinghon dalanna da ikkon tungguon (tanggungjawab) ni Debata ma tu si Hesekiel ima songon sada tugas massai dokdok tu si Hesekiel, alai molo naung dipasahat si Hesekiel hata poda asa marhamubaon ni roha alai dang diulahon sahalak jolma parjahat, nda ikkon mate ma ibana dohot hasalanna (dosana) alai ianggo si Hesekiel mangolu ma ala na manontong mangulahon naung sinuruhon ni Debata. Artianna molo manang ise na olo umbege jala manjalo hata poda manang sipaingot namangolu ma ibana gok akka pasu-pasu ni Debata, alai manang ise naso olo manangihon jala mulak manadinghon dalanna na maralo tu lomo ni Debata hona uhumNa ma ibana. On ma sada parsuruon ni Debata tu si Hesekiel asa tongtong jala mangaradoti bangso Israel songon sada sipasahat akka na pinangido ni Debata asa malua sian rimas jala padaohon sian hamatean.

Tangkas situtu dipabotohon marhite turpuk on asa molo adong sada panurirang (naposo ni Debata) tongtong mampariateatehon situtu akka jolma. Dibasagan pasahathon hata ni Debata mardongan hata na gok huaso asa boi paubahon roha ni jolma asa tung boi dijalo jala boi gabe sitindangi ni hata ni Debata. Disinuaeng gok jolma naso olo manangihon hata ni Debata na pinasahat ni akka parhalado (imam) alani hurang di akka metode manang dinahurang tangkas pasahathon akka jamita umbaenna gok jolma na holan sipanangi alai dang di dorong asa olo mangulahon akka jamita naung ditangihon nasida. Marhite turpuk on dipabotohon asa molo naung manjalo tohonan songon sada naposo ni Debata tarsongon panurirang Hesekiel, na ikkon tau gabe sitiruon asa saurdok hata na didok di jamita (poda) dohot pangulahonon di ngolu siganup ari, tontu sahali ndang boi ulahononta molo so mardonganthon Tondi Parbadia hita. Songon nidok ni si Paulus asa hita naung manjalo di Tondi gabe sipangalehon poda mardonganthon halambokhon.

  • Paluahonon ni Debata bangso na molo marhamubaon ni roha (10-11)

Ai nasa Surat i, sinihathon ni Debata do; jala hasea mamodai, maminsang, paulihon, manogu di bagasan hatigoran (2 Tim. 3:16). Hata ni Debata gok huaso maradophon jolma na marhaporseaon (Yoh.1:1-3, 14). Tarsurat do hata na mandok sian parbuena do tandaon hau na, jala nang ngolu ni jolma naung manjalo hata ni Debata tarida do parbuena di ngolu siganup ari. Diarahon asa tongtong marningot mardalan di dalan ni Debata ima songon tanda asi ni rohani Debata di jolma, asa unang mate dibagasan dosana.

Ndang dihalomon ni Debata molo mate parjahat i andorang so mulak manadinghon dalanna, manontong do Debata paingothon hita asa unang sai lalap mangulahon akka namaralo tu lomo ni rohaNa. Asa molo dalan naso hinalomonhon ni Debata na pasti dapotan uhum ma ibana. Jala manontong Debata paingothon asa mangolu hita di akka dalam hatigoran. Dipaingot hita asa mulak jala manadinghon dalanna na salah i, asa mangolu dibagasan gomgoman ni Debata marhite tondiNa. Jadi marhitehon panuruhon ni Debata tu hita asa gabe sitindangi ni hataNa hita na manongtong satia na mangulahon akka na dipatuduhon ni Debata. Asa molo olo hita pajonokhon dirinta na pasti dang paholang on ni Debata bohiNa sian hita. Na manongtong do Debata massarihon na ringkot di ngolunta. Songon na pinasahat ni panurirang Hesekiel asa mangulahon hombar songon hata jala pangidoan ni Debata jala marhamubaon ni roha. Asa molo naeng manjalo haluaon na sian Debata na ikkon mangolu dibagasan hasintongan. Ai ndang dihalomohon Debata hamamate ni parjahat so ingkon manadinghon dalanna.

  1. Panimpuli/Hahonaan
  2. Gabe sipanindangi do hita tu saluhut bangso ima haluaon na sian Jesus Kristus.
  3. Tungguon ni Debata do di tikkina tu hita hombar na taulahon taga di ngolunta, dipangido hita asa mangolu dibagasan habadiaon, manadinghon dalan na maralo di Debata jala asa manjalo haluaon na sian Jesus Kristus.
  4. Songon halak Kristen, ikkon manongtong do hita mangarahon diri tu pinangudo ni Kristus, jala dang sada parulahonon na mora si ulahonon, paholang diri sian dosa ima sada tugas na borat situtu, siala ni do jolma tongtong mangolu dibagasan dosa siala ni maralohon akka sitaonon gabe mangalului alusna hatop. Asa marhite hataNi Debata dipaingot hita asa manghalungunhon haluaon na sian Jesus Kristus.

Pdt. Boy F. Tampubolon, S.Th, CPS

Bagikan Postingan ini: