JAMITA KAMIS 26 MEI 2022 – KISAH PARA RASUL 1:6-11

JAMITA KAMIS, 26 MEI 2022 - GABE SITINDANGI NI KRISTUS SAHAT TU UJUNG NI PORTIBI ON

Jamita Kamis 26 Mei 2022
HANANAEK NI TUHAN JESUS
KAMIS, 26 MEI 2022
GABE SITINDANGI NI KRISTUS SAHAT TU UJUNG NI PORTIBI ON
Ulaon ni Apostel 1:6-11

PATUJOLO

Ganup sahali sataon, sai dipatupa halak Kristen do ulaon Minggu parningotan Hananaek ni Tuhan Jesus Kristus tu banua ginjang. Mansai ringkot situtu do ulaon i laho paingothon hita paboa ndada portibi on inganan na manongtong di angka jolma na porsea. Marhite hananaek-Na i, tung tangkas do dipatuduhon tu hita asa unang holan ngolu na ringkot di portibi on tasarihon, ala saluhutna i na laho salpu do. Tanda ni angka naung porsea hita di Tuhan Jesus Kristus, ingkon sarihononta do ngolu na hot ro di salelenglelengna, i ma di surgo hasonangan i. Marhite Jamita Kamis 26 Mei 2022 sadari on, sada sian torop ni ulaon na ingkon ulahonon ni halak Kristen laho manarihon ngolu na hot ro di salelenglelengna i, i ma marhite na manghatindanghon Kristus di hananaek-Na i, songon naung pinatupa ni angka sisean-Na i. Di huta Jerusalem, marhite angka surusuaruan, nunga disuru Tuhan Jesus Kristus angka sisean-Na asa manjumpangi Ibana di Galilea. Hatiha i ditonahon Ibana hian do asa jumpangan nasida Ibana muse di Jerusalem, di sada tingki. Songon i ma parsuruon ni Tuhan Jesus Kristus di nasida, laho manguji hasatiaon nasida taringot tu haradeon dohot las ni rohanasida laho mangulahon parsuruon-Na i. Marpungu do nasida songon naung tinonahon-Na i tu nasida, asa gabe sitindangi di hananaek-Na tu surgo i. Tapabagas ma muse pembahasan ni Jamita Kamis 26 Mei 2022 di parningotan Hananaek ni Tuhan Jesus sadari on.

BACA JUGA BAHAN EPISTEL MINGGU ROGATE – MINGGU, 22 MEI 2022

HATORANGAN
Ayat 6

Pangantusion ni halak Jahudi di abad na parjolo taringot tu harajaon ni Debata, i ma harajaon ni Israel na bersifat politik di portibi on. Andorang so tarhinsat Jesus tu banua ginjang opat pulu ari lelengna rap dope Jesus dohot angka siseanNa. Saleleng opat pulu ari i, sada sungkunsungkun na mansai ringkot di nasida, i ma taringot tu: “Pajongjongon ni Tuhan Jesus ma saonari harajaon portibi i di Israel?” Dietong rohanasida na patupaon ni Tuhan Jesus nama bangso Jahudi gabe bangso na bolon jala bangso na marhuaso maradophon angka bangso na asing, songon na masa di harajaon ni si Daud, Salomo, Asa dohot Josafat. Hape misi ni Kristus na sasintongna, ndada na laho pajongjongkon harajaon na digohi haulion ni portibi on, alai harajaon na nirajaan ni ngolu partondion do. Ro pe Tuhan Jesus Kristus na laho pajongjongkon harajaon banua ginjang do, ndada na laho paturehon harajaon portibi ni Israel.

Ayat 7

Marhitehite alus ni Tuhan Jesus Kristus di  ayat 7, naeng dohononNa tu nasida asa unang humasusa nasida mamingkirhon taon manang ombas taringot tu si. Ala sandok na binuhul ni Ama i, guru di huaso-Na do. Ndang adong na asing na tuk pabotohon taon manang ombas na naeng masa. Holan Ibana do nampuna huaso, holan Ibana sambing, laho pabotohon mulai sian bonana sahat ro di ujungna.Jala marhite saluhutna i, naeng papataron-Na paboa na Ibana do Debata (ida Jesaya 46:10). Ndang boi i pabotohonon-Na tu nasida, ala ni i tung na so jadi be patupaon nasida sungkunsungkun taringot tu si.

Marhitehite sungkunsungkun ni angka sisean i dipatuduhon nasida do paboa na so sabar nasida paimahon hajongjongan ni harajaon i. Dietong rohanasida di bagasan harajaon i dapotan bagian na dumenggan nasida, jala ala ni i, dietong rohanasida boi nian joloan nasida sangkap ni Debata. Nang pe naung didok Tuhan Jesus di Lukas 22:30 “Asa mangan jala minum hamu di mejangKi di harajaonki, mangkunduli habangsa … .” Alai taringot tu tingki sadiharina nda holan Debata do na umbotosa. Manang ise na porsea tung na so jadi humasusa mamingkorhonsa, alai di bagasan sonang dohot pos ni roha mangkirim, paboa di tingki halehetanna, hombar tu pangatur ni Debata, i do na dumenggan. Ala ni i, di tingki parsiranganNa rap dohot siseanNa di bagasan holong i, dipasahat Tuhan Jesus tona-Na na mansai arga on, jala sekaligus paingothon huria-Na di ganup tingki dohot luat, asa tongtong marjagajaga di hagigiot na marlobi taringot tu parbinotoan na so patut, tarlumobi laho manulingkit angka dia pe na so hea niida, ala ndang dipatudu Debata.

Ayat 8

Adong dope narumongkot sipingkirhononhon ni angka sisean i. Isarana taringot tu haroro ni Tondi Parbadia na naeng dipasonggop tu nasida, na tuk mangalehon gogo na so halompoan tu nasida, asa marhite hagogoon-Na i, tuk nasida gabe sitindangi ni Kristus tu sandok portibi on. Ingkon hatindangkonon nasida paboa na Ibana do Raja, jala mamaritahon angka hasintongan taringot tu harajaon na naeng pajongjongonNa, jala Ibana na gabe Raja di harajaon i. Ingkon patar jala marsitutu nasida mamaritahon Barita Nauli tu sandok portibi on. Jala ingkon buktihonon nasida hasintongan ni Barita Nauli i di bagasan angka sitaononnasida, sahat tu na ingkon mate. Ndang margogo nasida laho mangulahon saluhutna i molo mangasahon dirinasida sandiri. Ai nang sian mulana pe, jolma na gale jala na oto do nasida di portibi on. Ala ni i ndang barani nasida gabe sitindangi ni Kristus hatiha na diadili Ibana, jala sahat tu tingki hananaek ni Kristus on pe tongtong do ndang margogo nasida. I do umbahen na di dok jala dipasahat tu nasida “Alai jaloonmuna do hagogoon ni Tondi Parbadia na songgop tu hamu.”

Tangkas do dipatorang inganan hararat ni panindangion ni angka sisean i di ayat 8 on. Mamungka sian huta Jerusalem (ida Ulaon ni Apostel 1-7); di sandok Judea dohot Samaria (ida Ulaon ni Apostel 8:1-11:18); sahat ro di ujung ni tano on (ida Ulaon ni Apostel 11:19 sahat tu ujung ni bukku on). Ulaon mangkatindangkon Kristus manang marbarita nauli i ingkon mulaan nasida sian Jerusalem. Jala torop halak na manjangkon panindangionnasida. Jala angka halak na so manjangkon ndang tagamon malua nasida sian uhum. Dung i marsinondang ma sondang nasida sian huta Jerusalem tu sandok Judea, tu halak na mangula angka na marisuang andorang so sahat Barita na Uli. Jala sian i torus ma nasida marbarita nauli tu Samaria, atik pe di mulana i diorai nasida pararathon Barita na Uli di luat i. Alai saluhut ulaonnasida na denggan jala marguna i sahat tu ujung ni tano on, jala gabe pasupasu nasida tu sandok portibi on.

Ayat 9

Dung sun dipasahat Tuhan Jesus parsuruon-Na tu angka sisean-Na i, ditadingkon ma nasida.Tarhinsat ma Ibana, dipanotnoti angka sisean-Na i. Tutu situtu diidanasida do Tuhan Jesus tarhinsat tu banua ginjang, jala tung mansai denggan do diparrohahon nasida marhite parnidaannasida, suang songon i nang pingkiran nasida, asa ndang boi tartipu nasida di si. Dung i diholipi ombun i ma Ibana sian jolo ni matanasida. Ombun na mangkolipi Tuhan Jesus  di na manaek i ndada holan ombun biasa na marrumangkon uap ni aek, alai gombaran ni hamuliaon ni inganan, na manggombarhon habangsa ni Debata na gok hamuliaon (ida 2 Musa 33:7-11; 40:34; Markus 9:7). Saonari mardalandalan do Ibana di atas ni habong ni alogo (ida Psalmen 104:3). Marhite angka ombun i, boi idaonta paboa na tongtong do adong hubungan na tarjaga antara banua ginjang dohot banua tonga on. Di bagasan angka ombun i, uap i, tarhinsat Jesus tu ginjang sian tano on, jala ombun i manorop tu tano on sian ginjang. Alani i, tutu ma Ibana tarhinsat di bagasan ombun, ai Ibana do tutu parhitean ni Debata dohot jolma, jala marhite Ibana do angka asi ni roha ni Debata sahat tu hita, suang songon i nang angka tangiangta sahat tu Debata Ama marhitehite Ibana. On ma tingki na parpudi sahali Ibana papatarhon diri-Na. Jala parnidaan ni angka sisean-Na mangkatindangkon Jesus na masuk tu bagasan ombun i. Molo naeng botoonta taringot tu na masa di Ibana hatiha i, boi ma jahaonta di Daniel 7:13 “ … ro sahalak merhitehite ombun di langit i, songon anak ni jolma, jala sahat ibana tu ibana na so suda arina, jala tarboan ibana tu jolona.” Haheheon ni Kristus i paboa naung digotaphon Ibana parsaoran na haidaan dohot angka sisean i di portibi on, jala marhite na mamangke daging haheheon-Na i, dimasuhi Ibana inganan na so haidaan ni mata i, i ma inganan ni Debata Ama i.

Ayat 10

Nang pe ndang diidanasida be Tuhan Jesus, alai tongtong dope diparrohainasida Ibana na laho i tu ginjang. Jala laos di tingki i ma, dua surusuruan pataridahon dirina tu nasida, laho pasahathon tona ni Debata hombar tu na masa di nasida hatiha i. Dua halak surusuruan i marpahean ulos na marlinanglinang. Diboto nasida do tangkas ulaonnasida, na tutu situtu do diulahon nasida na mangkobasi Kristus, molo denggan dihobasi nasida angka naposo-Na di portibi on.

Ayat 11

Tumangkas muse dipatorang taringot tu na hinatahon ni surusuruan i di ayat 11. Isi na i ma laho paingothon nasida taringot tu keingintahuannasida di Tuhan Jesus Kristus naung tarhinsat sian adopannasida i. Nunga dilehon Tuhan Jesus hasangapon tu nasida, marhite na sinuru-Na i nasida gabe sitindangi Ibana. Alai ingkon ingot nasida paboa na jolma do nasida, halak Galilea, angka halak na so adong parbinotoan, jala na lea idaon. Tung na so jadi nasida jongjong jala humasusa sambing mamingkirhon na masa i, ala adong do di nasida pedoman hidup na pasti boi pangkeon nasida laho borhat, suang songon i nang batu mamak na togu laho pature pardalanan ni ngolu nasida laho mangkatindangkon Kristus.

Laho patoguhon haporseaonnasida taringot tu haroro ni Kristus na paduahalihon, nunga tung jotjot dipasahat Gurunasida i pangajarion taringot tu si, jala angka suruan disuru Debata di tingki na lehet on laho paingothon pangajarion-Na i muse tu nasida. Di tingki naung binuhul ni Debata, ro do Ibana muse sogot songon naung niida nasida Ibana manaek tu banua ginjang, jala ndang boi be hirimon nasida manang sungkunon manang pingkirhonon nasida ro Ibana muse andorang so tingki naung binuhul ni Debata. Haroro ni Tuhan Jesus na paduahalihon i marpahean daging na imbaru, di bagasan daging na marmulia, ndada na lea. Tuhan Jesus naung hea ro sahali laho manesa dosa ni saluhut jolma marhite hamamate-Na i, naeng papatarhon diri-Na sahali nari, alai ndada laho mamorsan dosa be(ida Heber 9:26-28), Tuhan Jesus na hea ro sahali di bagasan haleaon jala diparsilangkon, naeng ro muse di bagasan hamuliaon laho manguhumi. Tuhan Jesus naung pasahat ulaon i tu angka naung tinobus-Na naeng ro muse laho menuntut pertanggungjawaban taringot tu denggan do manang ndang diulahon ulaon na pinasahat-Na i. Nunga manaek Debata mardongan parolopolopon, mardongan soara ni sarune(ida Psalmen 47:6), jala tuat ma Ibana muse sian banua ginjang mardongan suraksurak dohot soara ni sarune (ida 1 Tesalonik 4:16). Saonari, mago Ibana sian parnidaan ni matanta ala diholipi ombun jala sahat tu banua ginjang, ndang boi taihuthon Ibana saonari. Alai, haduan, ihuthononta do Ibana, hatiha na nialap-Na hita rap dohot Ibana di bagasan ombun laho manomunomu Tuhan i tu langitan, jadi sai tongtong ma hita rap dohot Tuhan i.

Kunjungi juga kanal YouTube HKI untuk mengetahui informasi seputar pelayanan HKI.

HAHONAAN

Ojahan ni turpuk Jamita Kamis 26 Mei 2022 di Parningotan Hananek ni Tuhan Jesus Kristus tu Banua Ginjang sadari on, i ma: “Gabe Sitindangi ni Kristus Sahat tu Ujung ni Portibi on”. Hananaek ni Tuhan Jesus Kristus tu banua ginjang gabe tanda parpadanan, di si ma tajalo huaso asa gabe sitindangi ni Kristus. Nunga manaek Tuhan Jesus Kristus tu banua ginjang, alai hananaek-Na i ndada ujung ni saluhut ulaon-Na. Dipangke dope hita saluhutna asa gabe sitindangi-Na. Alani i:

  1. Di hita angka na porsea na gabe sitindangi ni Kristus, ingkon unduk do hita tu hasintongan ni Debata. Dibohali do hita marhite huaso-Na, jala digohi do hita di bagasan Tondi Parbadia. Ala ni i, panindangionta i pe ingkon marharoroan sian huaso ni Tondi Parbadia do. Panindangionta i marharoroan sian asi ni roha ni Kristus, ndada panindangion na palsu ala ni ngolu na marisuang, na holan naeng mangalului hasonangan di harajaon portibi.

  2. Tangkas do taboto, paboa na masa do logo ni ari suang songon i nang ari udan, marsingkat soring. Dia pe na naeng masa di ari i, ndang adong hita na umbotosa. Sandok, na pasti ingkon sesuaihononhon ma dirinta tu na masa i, asa tung dia pe na masa, tapangke ma dohot denggan. Tuhan Debata do bonana dohot ujungna. Ala ni i, saguru di Ibana do saluhutna, jala patupaon-Na ma sude di tingki halehetanna. Jala saluhut na binahena-Na i manumpak tu na denggan do saluhutna.

  3. Ndang ulaon na mura gabe panindangi. Olo do ngukngak, boi do sala, bahkan boi do terancam. Alai unang lomos jala unang mabiar hita. Nang pe nunga manaek Tuhan Jesus tu banua ginjang, alai hundul do Ibana di siamun ni Debata. Jala marhuaso situtu do Ibana di banua ginjang dohot di tano on. Nunga dilehon huaso di hita asa gabe sitindangi di Ibana. Diparbohali huaso-Na i do hita asa margogo, jala marhamonangan do hita bahenon-Na. Ala ni i, satia ma hita gabe sitindangi-Na sahat tu haroro-Na na paduahalihon. Amen.

Penulis:
Pdt. Timbul Siregar, S.Th

Penyunting:
Timothy P. Saragi

BAHAN JAMITA INI JUGA DAPAT DIUNDUH DENGAN MENG-KLIK TULISAN DI BAWAH INI
JAMITA KAMIS 26 MEI 2022 – HANANAEK NI TUHAN JESUS

About Timothy Saragi

Staf Biro Infokom HKI

View all posts by Timothy Saragi →