Jamita Minggu Paskah 2 Senin, 18 April 2022
PASKAH II
SENIN, 18 APRIL 2022
“TUHAN PALUAHON HURIANA“
2 Musa 14:26-31
PATUJOLO
Balga do asi ni roha ni Debata di halak na hinaholonganNa. Asi ni rohaNa na balga i dipataridahon Ibana do marhite pambahenanNa na so haetongan. Marragam do dalan ni Debata laho patuduhon holong ni rohaNa i. Ndang tarlambat Debata laho mangurupi angka na porsea di Ibana. Uju di bagasan sitaonon jolma i. Diapuli Debata do marhite hataNa laos hataNa i mampargogoihon jolma asa tolap haruar sian nasa parsoalan na niadopanna. Nang songon i di bagasan ngolu ni bangso Israel, dipataridahon Debata do holongNa i marhite haluaon. Jumpang ma tingki na di bangso Israel manjalo haluaon na sian Debata dung jolo manaon na porsuk bangso i di parhatobanon Misir.
BACA JUGA ALMANAK MINGGU HKI PASKAH II – SENIN, 18 APRIL 2022
HATORANGAN
Haluaon ni bangso Israel sian parhatobanon Misir, i ma ala ni sangkap ni Debata na marningot bagabaga naung pinasahatNa tu si Abraham, Isak dohot si Jakkob. Na parjolo, mangalehon tano Kanaan, tano habaoran ni susu dohot situak ni loba gabe teanteanan di nasida. Na paduahon, mamasumasu bangso Israel gabe bangso na bolon. Na patoluhon, asa gabe pasupasu nasida tu saluhut bangso, tu sandok portibi on. Dipasaut Debata do bagabagaNa i, marhite panjouon ni Debata di si Musa na gabe partogi di bangso i rap dohot si Aron. Dipataridahon Debata do huasoNa na bolon i. Disuru Debata do si Musa manopot raja Firaun laho manogihon bangso Israel ruar sian Misir. Godang do dipatupa Debata angka tanda halongangan di tongatonga ni bangso Misir i. Asa dipaloas nasida borhat sian i.
Turpuk Jamita Minggu Paskah 2 – 18 April 2022 sadari on, taringot tu pardalanan ni bangso Israel dung ruar sian tano parhatobanon Misir. Dung sahat bangso Israel di topi laut arung, gabe muba ma roha ni si Firaun. Naeng do leleonna bangso i marhitehite 600 paranganna na marhureta hoda dohot di parsihundulna. Dung jonok raja Firaun gabe mabiar situtu ma nasida, mangangguhi ma halak Israel tu Jahowa. Jala marungutungut nasida tu si Musa. Alai dipapos si Musa ma rohanasida, didok ma tu Israel: Unang hamu mabiar, marsihohot ma rohamuna jala ida hamu ma hamuliaon ni Jahowa. Dipataridahon si Musa do pos ni roha laho pasahathon diri nang ngolunasida tu adopan ni Debata marhitehite tangiang. Jala unang marpangunsandean tu pingkiran nang hagogoonna sandiri.
Diramoti jala dipaihutihut Debata do pardalanan ni bangso Israel. Pola do Debata menjamin keamanan nasida marhite Hata ni Debata sandiri, na mandok: “Ahu do marporang humongkop hamu, asal hohom hamu” (ida 2 Musa 14:14). Tanda holong ni roha ni Debata maradophon bangsoNa, Debata sandiri do marporang mangalo hajogalon ni si Firaun na sai mambahen bangsoNa manaon na porsuk. Jala nuaeng marhite api na sai marsijongjong di bornginna i jala ombun na manaongi di arianna i, papatarhon habalgaon ni pangaramotion ni Debata di bangsoNa. Adong do pemahaman di angka bangso israel dohot na humaliang nasida. Molo parporangan na dipamasa maradophon bangso na asing, ndang holan jolma/prajurit na marporang alai dohot do Debatanasida marporang. Molo bangso na monang manandahon Debatanasida pe dohot do monang.
Dung sahat bangso Israel di topi laut arung, disuru Debata ma si Musa manghindat tungkotna. Dipatoltol si Musa tanganna tu ginjang ni laut i, jala ihut dipatolak tanganna asa boi halak Israel mamolus sian tongatonga ni laut i, mardalan di na mahiang. Dung i, diulahon si Musa ma hombar tu hata ni Debata i. Dipatoltol si Musa ma tanganna tu ginjang ni laut. Gabe mabaor ma laut i dibahen Jahowa marhitehite alogo na pur sian purba manipat saborngin i pahiang laut i. Gabe tartulak ma angka aek i. Jadi bongot ma halak Israel tu tongatonga ni laut di na mahiang i. Gabe hira dorpi do angka aek i di siamun dohot di hambirangnasida.
Molo sian hajolmaonta tung so mungkin do marsirang aek di sada laut jala pola gabe dalan na mahiang, alai songon na tarsurat di Lukas 1:37 “Ai ndang adong na so tarpatupa Debata.” Halongangan bolon na pinatupa ni Debata on pataridahon panghophoponNa tu angka na niasianNa.
Ndang olo bangso Misir paluahon halak Israel. Ala ni tangkang ni rohana dilumba si Firaun rap dohot paranganna do bangso Israel. Alai ndang dipaloas Debata bangso i mulak tartangkup, ala ni i jongjong ma Debata marhite api dohot ombun laho mambahen guntur parangan ni halak Misir. Gabe margalpangan ma hureta nasida jala maol ditogu. Dung i didok Jahowa ma tu si Musa: Patoltol ma tanganmu tu atas laut, asa sumuang angka aek i lingkup tu halak Misir.
Jadi diulahon si Musa ma hombar tu hata ni Debata. Dipatoltol si Musa ma tanganna tu atas laut, gabe sumuang ma laut i tu dalanna. Gabe maporus ma halak Misir manjumpangkon aek i. Gabe ditunggalingkon Jahowa ma halak Misir tu tongatonga ni laut. Gabe dilungkupi aek ma angka hureta dohot angka parsihundul ro di sude parangan ni Firaun i. Ndang adong na mangolu sian nasida nanggo sada.
Alai anggo halak Israel mardalan do nasida di na mahiang i, di tongatonga ni laut i jala sahat ma nasida tu bariba ni laut arung i. Tarida ma huaso ni Debata na patariparhon jala paluahon bangso na hinaholongan na i tu bariba ni laut arung. Jadi dung diida halak Israel tangan na timbul, na binahen ni Jahowa tu halak Misir. Gabe mabiar ma bangso i mida Jahowa. Jala porsea nasida di Jahowa dohot di si Musa, naposona i. Dipuji jala dihatindangkon nasida do angka tanda halongangan na pinamasa ni Debata.
Kunjungi juga kanal YouTube HKI untuk mengetahui informasi seputar pelayanan HKI.
HAHONAAN
Jahowa do Haporusanta
Jotjot do hita mangadopi angka na maol di bagasan ngolunta. Godang angka na bernit, nang sitaonon. Na boi ulahononta i ma holan joujou tu Debata do. Jala marhaporseaon dohot marpos ni roha, ndang tadingkonon ni Debata hita. Sai na lehononNa do pangurupion. LehononNa do motivasi dohot gogo manghamonangkon paraloanta. Ala ni i, songon siihuthon Kristus hita, tung aha pe hamaolon na ro tu hita, naeng ma margogo hita mangadopi. Jala unang sumurut semangat nang haporseaonta. Holan tu Ibana ma hita marhaporusan. Jahowa do partanobatoanta jala na tuk pangalualuanta.
Sai na Saut do Sangkap ni Debata
Sangkap ni Debata na ingkon do manjadi do di ngolu ni angka na porsea. Hata ni Debata naung ruar sian Ibana tudos do i songon hadadabu ni udan dohot ambolas sian langit, jala ndang jadi mulak boti, ingkon bahenon na do lomo ni rohaNa (ida Jeremia 55:11). Songon sangkap ni Debata di bangso Israel naung taida. Songon i do nang di parngoluonta. Maragam do dalan ni Debata laho pasauthon sangkapNa i di ngolu ni angka na porsea di Ibana. Jala tarpatupa Ibana do tanda halongangan laho pahothon roha ni jolma i.
Taendehon jala Tapuji ma Angka Denggan Basa ni Debata
Debata do na paluahon huriaNa. Rajumanta ma peristiwa haluaon ni angka halak na porsea sian parhatobanon dosa marhite hamamate dohot haheheon ni Tuhanta Jesus Kristus. Dipalua do hita sian dosa, sian biar dohot arsak ni roha. Ditogutogu do hita taripar sian laut haholomon i tu hatigoran na manongtong. Ala ni i tapatuduhon ma hasetiaon ta tu Ibana. Asa ramotanNa jala pargogoionNa hita di hasiangan on.
Songon halak Israel na manghatindangkon angka tanda halongangan na pinamasa ni Debata. Suang songon i ma nang halak na porsea di tingki on. Marende jala mamuji, manghatindangkon angka tanda halongangan naung pinamasa ni Debata. Naeng tangkas ma i di ngolu ni halak na porsea di bagasan na marhabadiaon. Diajari do hita di turpuk on asa taingot ma angka denggan basa naung nilehon ni Debata. Unang lupa hita di si jala tabaritahon ma i tu angka na humaliangta. Amen.
Penulis:
Pdt. Suan Dame Siahaan
Penyunting:
Timothy P. Saragi
BAHAN JAMITA INI JUGA DAPAT DIUNDUH DENGAN MENG-KLIK TULISAN DI BAWAH INI
JAMITA MINGGU PASKAH 2 – SENIN, 18 APRIL 2022
