EPISTEL MINGGU 7 AGUSTUS 2022 – MATEUS 24 : 45-51

Epistel Minggu 7 Agustus 2022

Epistel Minggu VIII Dung Trinitatis 7 Agustus 2022
MINGGU VIII DUNG TRINITATIS
MINGGU, 7 AGUSTUS 2022
“DEBATA DO PANGUHUM“
Mateus 24 : 45-51

PATUJOLO

Di turpuk Jamita on tudosan dipangke Jesus taringot tu sasahalak naposo haposan jala na marroha na dihaporseai Indukna marhite sada umpama laho patoranghon harajaon ni Debata. Halak na manjalo harajaon ni Debata tudoshon angka naposo (pekerja) na paimaimahon tuanna/indukna muli sian parunjuhan di na so pamotoonna. Ingkon dungo jala hobas laho mangungkap pintu di indukna i. Hadungoon di turpuk on ndada hadungoon na marsangga. Ndada ala adong jadual na tontu, alai ingkon dungo jala hobas ganup tingki, ai ndang binoto arina dohot sadiharina. Ala lam jonok tingkina maninggalahon tano on,mulak tu habangsana hian tu surgo.

BACA JUGA BAHAN JAMITA MINGGU VIII SETELAH TRINITATIS – MINGGU, 7 AGUSTUS 2022

HATORANGAN
Ayat 45

Dipatorang do di turpuk taringot tu sahalak induk na naeng sisuruan asa mangalehon mangan di tingkina. Diparsuru ni induk i na ingkon sahalak naposo na na gabe sihaposan (bahasa Indonesia = setia) ni indukna jala marroha (bahasa Indonesia = bijaksana). Jadi disungkun-sungkun ni induk na naeng suruonna naposona, ulaon na borat do di naposona. Ia naposo ni Debata ndada dirina sandiri na mamillit dirina. Alani naposo i ingkon unduk jala satia do tu otoritas ni indukna. Ndada dirina sandiri be na manontuhon ngoluna alai nunga indukna, Molo indukna do na mamillit jala na marsuru tu sude jolma dohot tu liat portibion tontu ingkon tangkas do Kualifikasi / Kriteria naposo na ima: na gabe haposan jala marroha. Alani ingkon ‘mardila sisean”, ‘marbinege na tajom jala tinggil’, jala mampu mangadopi sude angka na masa di ngolu on dibagasan roha na sai tongtong mangoloi parsuruon asa sude mangan ditingki na ditontuhon ni indukna. Ai godang do naposo i ndang boi denggan mamangke tingki laho mangula ulaon jala molo mangula ulaonna ndang tepat sasaran ulaon na naeng siulaonna. I do umbahen, asa pinabangkit pe naposo asa boi tepat tingki jala sasaran ni ulaon i pe ingkon ma tepat tu sasaranna. Na mamelehon saluhut ngoluna tu tuanna. Na sai manggohi roha ni sahalak naposo na sintong ima ulaon na jinalona sian tuanna, na ingkon pasidungonna dohot denggan; dungkon sidung ulaon i mangarade manjalo ulaon na asing sian tuanna; dohot jempek dohonon, ngoluna ima ulaon i. Ulaonna dirajumi songon hagiot ni tuanna, ulaon na pasonanghon, jala na mambahen marsangap tuanna, ima naposo na sasintongna. Alani ido, ndang pola tarsonggot hita molo tung songon i parsuruon ni tuan i tu naposona na baru mulak sian ladang dohot marmahan, dungi mamintor manuru naposo parade sipanganonna, dung pe dung bosur tuan i di sipanganon dohot di siinumon asa di loas mangan naposo na i

Ayat 46

Asa molo pe tepat tingki jala tepat tu sasaran gabe martua do angka naposo na mangula ualonna; “Martua do naposo i, na mangulahon songon i didapot,…..”. di ulaon na naeng siulaonna ingkon ma dibagasan hasatiaon di ulaonna, alani ingkon na marbinege na tinggil jala mardila na denggan.

a). Marbinege na tinggil, ima boi do saluhutna dibege aha pe di ngolu on, nang na roha, na jahat, na gabeak, na hata na so tutu, nang angka na sintong dohot angka na denggan. Alai na ingkon tinggil mambege angka na manangihon parsuru ni indukna, marhite na tajom manang tinggil (peka) mambege dohot manangihon na masa di portibion gabe jongjong ma ibana songon “tangan” ni indukna laho patulushon angka na denggan/na sintong hombar tu lomo ni roha ni Debata (Jesaya 55 :3 “tarehon hamu ma pinggolmuna, jala roma hamu tu Ahu. Tangihon hamu ma asa mangolu tondimuna i. Jadi bahenonHu ma tu hamu padan salelenglelengna”).

b). Dila na denggan, sahalak naposo ni Debata (sisean) ingkon dila na digohi angka hata pasupasu ma manang angka hata na denggan. Asa molo pe manghatai tu jolma pasahathon hata na jinalona laho mangalehon las ni roha, ima ingkon “dila na berwibawa: berbobot jala bermutu”. Ai godang do di ngolu on na mambahen hita tarpodom manang terlena hinorhon ni hinauli dohot hinatabo ni hamajuon ni jaman. Lalap mangeahi parbinotoan, lalap mangalului arta, sinamot dohot hamoraon. Adong muse do na lalap di paredangedangan, so mangaradoti ulaonna, hape holsona na gumogo. Na jumorbut muse ima tarpodom hinorhon ni angka parungkilon na so marnamontok dihilala di ngoluna. Gabe mandosdos ngolu i ndang mangolu panghirimonna. Hape, tompu ma ro arina dohot sadiharina, ndang mamoto be ibana, gabe tarpodom jala tartading, ai ndang dibege be soara ni Tuhan i na manuktuhi pintu ni rohana/ngoluna. I do umbahen dipangido tu angka naposo asa mangulahon di tingkina, na marlapatan, pangke ma tingki na denggan marhite na tinggil dipanjouon dohot parsuruon ni indukna. Ndang gabe semberawut mangula ulaon. Saluhut ulaon na dipasahat tu ibana, nang pe na ingkon mangasa gogo, isarani mangula, songon i na dirajumi ulaon na lea isarani marmahan, ulahononna do dohot denggan sian nasa roha dohot gogo. Balik tahe molo so dilehon be tu naposo na sintong jala na sai rade marhobas di ganup tingki diporluhon tuanna jala ndang marmungut-mungut alai marlas ni roha situtu di ulaonna, di tingki tuanna manghilalahon las ni roha jala marsangap ala ni ulaonna jala diujungna marhatopothon dirina “Pabangkithon do ibana mangaramoti saluhutna na di ibana’. Lapatanna, naeng dohonon ni Jesus di pangajaranNa tu angka siseanNa di turpuk on, ndang gabe naposo na so marlapatan. Alai sahalak naposo, ingkon martoruk ni roha, nang pe naung godang pambahenanna, jala gok angka parbue na uli pinatupana, saluhutna i na patut siulaonna do songon naposo.

Ayat 47

Ise na manangi dohot mangulahon na sinuru ni induk na i gabe las ni roha manang martua di angka naposo na mangulaon parsuru ni induk i. hata (berbahagia), (hata Heber = ’ašre, di hata Gorik = makarios, di hata Indonesia di Kamus Besar = keadaan atau perasaan, sonang dohot dameni ngolu partondion dohot siganupari /di pardagingon). I do letak ni na martua, ima sonang jala dame, aha pe na niulahon, dibagasan sonang ma jala dame asa tarpasupasu Debata na niulana i. Molo pe adong na mandok asa martua, ingkon godang arta dohot hepeng, adong do na mandok ingkon parpahompu dohot marnini marnono, dohot na asing. Alai na didok di turpuk on, manang ise naposo ni induk i, molo dibagasan haposan ni indukna dohot marroha gabe hatuaon di naposo na nang di indukna. Lumobi ma di induk na i, sonang mamereng naposo na unduk tu indukna. Di na mangula ulaon na unduk di induk na sai dapot las ni roha do sian indukna. Naposo na mangula dohot denggan, marhasil do di ulaonna, dung paujungonna ulaonna, dipabangkit do laho mangaramoti saluhutna. Ia di na mangula ulaon i, adopanna do angka hasusaan, hamaolon, panaritaan jala na lea do alai ujungna gabe halongangan do di angka jolma na mamereng hamonangan ni naposo i. Jadi mangulahon na denggan i do hataridaan ni angka na porsea tu Debata, i do respons (sikap) naung manjalo asiniroha ni Debata, i do parbue ni jolma naung paubahon rohana, jala maninggalhon angka dosa.

Ayat 48 – 51

Alai di angka naposo na mangulahon hajahaton, didok “leleng dope asa ro indukna” lapatanna di angka na mangulaon na jahat, ndang dapotan las ni roha alai ro linsinglinsing rap dohot angka parmabuk. Molo pemabuk, mabahen hita gabe losok mula ulaon ala mangolu hita di dunia hidup semu jala agoan panghilalaan maradophon angka ulaon na sintong. Siala naung gabe losok mula ulaon, ndang adong be na gabe dalan ni hangoluanna. Ndang jumpang be dalan manang hatubuan ni sipanganonna, ai nunga suda partingkianna holan paulak gogona naung suda hinorhon ni parminumonna. Gabe lilu sude na niulana, i do ulaon ni portibi on na pinamasa ni sibolis i.  

HAHONAAN

Parjolo, ulaon na borat jala na gok tantangan/ resiko do molo rade hita gabe naposo ni Tuhan i. Ai ingkon hatindanghononta ma na sintong, na gabe haposan jala na marroha, jala ingkon aloonta angka pangalaho, ulaon dohot hasomalan na so hinalomohon ni Tuhan i. Tung songon dia pe maolna dohot tantangan na ingkon masa di tonga ni panghobasionta i, ndang jadi sumurut, alai tapangasahon jala ingkon pos do rohanta di Ibana na manjou jala marsuru hita tu ulaon i. Di bahen i tama do ganup naposo ni Tuhan ingkon tongtong di bagasan haserepon ni roha, ngolu sipartangiang asa didongani jala dirupi hita. Sipasidingon do nang dohot langgus ni roha di sude ulaon tarlobi di ulaon ni Tuhan i. Ai ndang tarula hita agia aha molo so mardonganhon Kristus i (Johannes 15:5), alai saluhut do tarpatupa hita di bagasan Ibana na margogoihon hita (Pillipi 4:13).

Paduahon, di turpuk on pangajarion na dialogis, adong pernyataan ni Jesus na mamangke tradisi parhatobanon na somal di pangke di Padan na Robi laho patorangkon karakter ni naposo [hatoban / budak] na hinirim sian angka siseanNa. Alani, mansai ringkot do hita marsiajar gabe naposo ni Tuhan na berkarakter. Secara khusus angka parhobas ni huria ingkon tangkas markarakter naposo ni Debata songon na hinirim ni roha ni Jesus di turpuk on; jala saluhut ruas ni huria pe martanggungjawab mambukka simalolongna laho mananda naposo ni Debata na tangkas.

Patoluhon, manangi jala mangula na denggan ma hita mambahen na denggan, songon Buku Ende No. 373; “mangula hita jolma manabur boni i”, na mandok ingkon ma ganup ari ma hita mambahen na denggan di ngolunta siala nunga jumolo Debata manghaholongi hita jala nunga ditobus dosanta marhite AnakNa Jesus Kristus. Alani tanda naung dipasupasu Tuhan hita dohot ma taruli pasu pasu ni Tuhan marhite ulaon na denggan di ngolunta.

Paopathon, di portibion mansai godang tantangan laho mangula ulaon na denggan, lumobi di partingki saonari, dipesat ni perkembangan teknologi, isarana handphone. Laho tu Gereja pe, diboan handphone, ndang na Bibel diboan tu Gereja. Di acara kebaktian pe, sai handphone on do dibukka-bukka, molo adong nada panggilan, disangahon do mangalusi. Hape molo laho manangi hata ni Tuhan i, ndang pola songon manangihon soara ni panggilan handphon nakkin. On ma tantangan i. Songon parripe ni harajaon ni Debata, naeng tahangoluhon ngolu na ni igil ni Tuhan i, ngolu na ni igil ni Tuhan i ima ngolu na manangihon dohot mangaradoti hataNa dohot patikNa. Marhite mangaradoti hataNa gabe jumpang ma roha na mangantusi lomo ni rohaNa, mangaradoti hata ni Debata jala tangi di haroroNa, i ma halak na tongtong mamareso ngoluna dohot ulaonna asa hombar tu lomo ni roha ni Tuhan i. Ai molo nunga taantusi hata ni Tuhan i jala taulahon lomo ni rohaNa, gabe tatanda ma soaraNa di na ro Ibana manopot ngolunta. Ala ni i, ndada pasimpu tangan manang so margira tu dia. Alai naeng ma hobas mangaradoti ulaon siganup ari jala mangaradoti lomo ni roha ni Tuhan i saleleng mangolu. Unang lalap ho binahen ni hariburon ni portibi on. Amen.

Kunjungi juga kanal YouTube HKI untuk mengetahui informasi seputar pelayanan HKI.

Penulis:
Pdt. Dormen Pasaribu (Kantor Pusat HKI)

Penyunting:
Yohanes Simatupang

About Yohanes Simatupang

Staff Biro Infokom

View all posts by Yohanes Simatupang →