EPISTEL MINGGU XXIII  DUNG TRINITATIS – 12 NOPEMBER 2023

Amos 5: 18-20

Masipauliulian Di Na Maimaima Haroro Ni Tuhan

Tarsar do bangsonta Indonesia bangso na marripehon (dihuni) parugamo na utusan (religius). Tarida do i sian godang tanda dohot sitindangi (banyak bukti yg kuat). Parjolo, diokui do 6 ugamo di bangsonta on. Paduahon, sude do ruas ni na 6 ugamo i berengon ringgas mangihuthon poda ni ugamona (beribadah dgn sangat khusuk). Patoluhon, godang do angka ruas ni ugamo i na burju mamelehon sinadonganna, siala i godang ma idaon angka tempat ibadah na mansai uli jala marmengomengo marjongjongan. Paopathon, sude do ruas i mangalo na dietong manggugai dirina marsomba tu Tuhanna, ima ala ni hangkotna. Godang dope angka bukti na mangihut na boi tapajojor tamba ni on. Alai parsoalanna, nunga sude ulaning angka parugamo na utusan i sintong paradehon ngoluna tu ari sogot marhite na patupa ngoluna marimpola sadari on?.

Ngolu na marimpola (penuh makna) lapatanna ndang sae holan intap ni ringgas maribadah, balga pelean na pinasahatna, girgir  pajongjonghon tempat ibadah, dna. Alai ingkon ngolu na marhabadiaon (kesalehan hidup) do jala na marpangontak na denggan tu sude rumang ni hajolmaon manang di dia, manang ise dohot manang tongon boha parture ni ngoluna. Alai molo tullom (kasat mata) hita marnida parripe ni bangsonta on, atik ibana kristen manang non kristen pe, hira ibana nama idaon naung mulak sian surgo i ro muse tu tano on. Ibana nama dietong na umbadiaan sian donganna, na lobi sintongan na marugamo i. Ujungna asing ni dirina dohot ruas ni ugamona dietong do i kafir. Alai nang pe songon i fanatikna ndang sadia pangontak na denggan tu na humaliangna, gariada jotjot manegai, manusai dohot tahi pamagohon donganna do dipingkiri, tarlumobi ma tu naso saugamo dohot ibana. Tabereng ma bangsonta lam simbur pe tempat ibadah martubuan, laos songon i do nang parsimbur ni hajahaton, teroris, korupsi, pelanggar hukum, dna tubu. Roa molo dohonon holan topeng do hape na marugamo i.

Songon i ma tong na masa na uju i di bangso Israel di ombas ni panurirang Amos. Ringgas situtu do nasida na marugamo i, burju pasahat peleanna di bagas joro, alai pangalahona siganup ari ndang ture. Ndang adong sintong diradoti tona ni Jahowa, jala patikNa pe ditoishon do, gok gabus dohot marsipaula pangalahona, digadis hatigoran, dipapeol uhum sian na gogo alai tajom dibahen tu na pogos (Amos 2:4+6). Jompok hata dohonon, parugamo na utusan do nasida, alai ndang adong roha holong maradophon donganna jolma (mengabaikan kehidupan sosial). Siala i ma umbahen didok Jahowa marhite panurirang Amos di jamita on; Marjea ma nasida, mangapian ma nasida di ari ni Jahowa. Ndang adong be laba nasida na marugamo i, ai haholomon do ari ni Jahowa di nasida, ndada hatiuron (ayt.18).

Saurdot tu si do nang singotsingot ni jamita Evanggeliumta minggu on. Dipaingot asa taparade ma ngolunta tu ari sogot marhite na patupa ngolu na marimpola mamungka sadari on (mempersiapkan hari esok dengan menjadikan hidup hari ini bermakna). Ondolanna, ingkon pungkaonta do i sian ngolunta sandiri. Ala parsaoran dohot Debata di na marugamo i bersifat pribadi do i. Secara pribadi do hita paradehon dirinta, alana haluaon sogot pe panjaloan pribadi do i. Ndang boi bonsengon dongan asa rap bongot tu si. Jadi silangkahon langkana be do, siboan palito dohot miakna be. Antong mamungka sadari on molo tung torop pe taida na humaliangta marsipaula (munafik) na marugamo i, unang taihuthon i. Tapungka ma sian dirinta sandiri gabe parugamo na sintong, na manghangoluhon hata ni Debata sintong di parngoluonta siganup ari. Parugamo na sintong jala na denggan ndang gabe teroris, dihosomi halak, mabiar halak marnidasa ala ekstrim dohot radikal, gabe so boi nok simalolong di lambungna, ndang maralang manggadis donganna, dna. Alai ingkon tarsormin do hata ni Debata di pangalahonta siapari tu na humaliangta. Halak na marnidasa pe parsidohot manaksihon Kristus, mandai dengganbasaNa dohot manghilalahon sintong ni na marugamo. Antong masipauliulian ma hita sama hita, Amen!.

Pdt. Manamba Tua Pasaribu, S.Th