JAMITA MINGGU 10 APRIL 2022 – MAZMUR 118:19-29

Jamita Minggu 10 April 2022
MINGGU PALMARUM
MINGGU, 10 APRIL 2022
“PINASUPASU MA IBANA NA RO DI BAGASAN GOAR NI TUHAN“
Mazmur 118:19-29

PATUJOLO

Dipataridahon parpsalmen di son panurirangon taringot tu toruk ni roha dohot hamuliaon ni Tuhanta Jesus. PartinaonanNa dohot hatoguonNa sahat tu na mangkamonanghon diri sian hamatean pe dibilangi parpsalmen on do asa boi taihuthon di bagasan haunduhon ni roha. Dipangido muse tu hita asa pasahathon diri tu habadiaon ni Jahowa, di si ma hita ringkot mangkangoluhon hamuliaon ni Jahowa marhite haroro ni angka na porsea: “Ungkap hamu ma di Ahu bahal ni hatigoran” (ayat 19). Diondolhon do hatigoran tu bahal i, ndang boi ro angka jolma na so tigor manang jolma na so porsea. Pelean i pe digoari pelean hatigoran.

BACA JUGA EPISTEL MINGGU PALMARUM – MINGGU, 10 APRIL 2022

HATORANGAN

Gok Pasupasu do Angka na Ro di Bagasan Goar ni Tuhan, Antong Tahamauliatehon Ma

Angka jolma na naeng bongot tu si jala marsaor tu Jahowa ingkon badia ibana jala ingkon toruk rohana di adopan ni Jahowa. Dung diungkap pintu hatigoran i, ingkon bongot do hita, tadapothonma inganan na badia i. Hasahatan ini habobongotta tu si, i ma laho mamuji Jahowa. Ala ni i ingkon sabar do hita paimahon asa diungkap pintu ni surgo tu hita, asa boi bongotanta jala taingani huhut tapuji Tuhanta.

Kristus do na digombarhon di son, ala Ibana do dalan hasintongan i na mamboan hita asa gabe jolma partigor (ida Joh. 14:6), laos Ibana do pintu asa bongot angka birubiru  na pinarmahanNa (ida Joh. 10:9). Didok parpsalmen ma mauliate ala ni hatigoran ni Debata (ida Ps. 118:21), sai marpangkiriman ma angka na marnida Kristus ala nunga sahat tangiang nasida tu Tuhan i, jala sahat ma haluaon tu angka na porsea. Batu na binolongkon ni angka pande bagas nunga gabe batu parsuhi. Jala di si taida ma habuluson ni Debata. Batu na so masuk etongan ni jolma nunga gabe sada batu na momos, togu jala manongtong gabe hajongjongan ni partondion, batu na mansai arga (ida 1 Ptr. 2:6). Arga do tutu batu na pinajongjong gabe huria i, jala ringkot do hita mangkamuliatehon i. Jesus do raja ni huria i, nang pe manjua angka bangso i di haroroNa. Harajaon na bianoanNa i ma na marpardomuan tu dame, holong dohot angka pasupasu.

Batu Parsuhi, Ojahan ni Hadameon dohot Hasadaon

Batu parushi i do na pasadahon hajongjongan ni sada bangunan. I do na pasadahon angka jolma na marsalisi. Pasadahon bangso Jahudi dohot na so Jahudi, dipajongjong ma sada jala marsaor ma di bagas ni huria. Nunga dipatutoru diriNa laho pasadahon hita ala ni i tama do Ibana gabe ojahan ni pangkirimonta. Ibana do ojahan ni hasadaon dohot hangoluan. Ala ni i tapasahat ma ngolunta di bagasan Kristus. Debata do na manongos Kristus asa mamolus sitaonon dohot hamatean. Antong tama do hita marlas ni roha hinorhon ni i (ayat 24), i do umbahen na adong ende “sadari on ari ni Tuhan, beta hita marlas ni roha” ala memang tung mansai arga do hita ditobus. Nian sude do ari mulai ari Minggu sahat tu ari Minggu muse, ari ni Tuhan do i. Alai di ari Minggu i do tanda hamonangan di halak Kristen. Di ari Minggu i do dipasingkop Debata haluaon na mambahen hita badia. Kristus nunga gabe batu parsuhi jala marsaor ma hita di ari Minggu i marningoti hamonangan na manongtong.

Pangidoan tu Panumpahion

Disoarahon angka jolma na di Jerusalem i do Hosanna (ayat 25-26), lapatanna “Manumpak ma Ho ale Debata” (bahasa Indonesia: Tuhan, berilah keselamatan), sada pangkirimon na mansai togu asa singkop haluaon na sian Debata. Sada pangidoan do on asa sada hita dohot Sipalua i. Musunta nunga gabe musu ni Debata, ala ni i marhamonagan ma hita marolohon angka dosa dohot hamatean. Saut ma lomo ni roha ni Debata songon parmonang ni raja Daud di angka porang maralohon bangso na jat. Alai Raja na naeng ro, i ma Kristus i, ndada mamangke kekerasan, dame dohot holong do dipangasahon. Pinasupasu ma tutu na ro di bagasan goar ni Tuhan.

Ro do Tuhan Jesus di bagasan goar ni Debata, mangula di bagasan goar ni Debata dohot lomo ni rohaNa jala pajongjongkon hamuliaonNa. Umbahen i ringkot do hita mamuji Ibana, mangkatindangkon hasangaponNa, ai manongtong do pasupasu na sian Debata. Domu tu si, ringkot do hita mangkamauliatehon haroro ni parhobas na ro di bagasan goar ni Debata, tajangkon jala tatangiangkon ma hararat ni huria, ala paimaonta dope haroroNa na paduahon. Gabe siboan pasupasu ma hita tutu ala nunga tarpasupasu hita marhitehite haroro ni Kristus. Nunga diboan Debata pasupasu partondion (ida Ep. 1:3), ala ni i dipasupasu ma hita sude na ro dohot na mangula di bagasan goar ni Tuhan.

Ringkot do hita mamboan tangiang dohot pangidoan tu Debata asa manumpahi ngolunta. Jala tongtong ma taputudu pangkirimonta i marhite angka ulaon na mamelehon diri tu Debata. Tapasahat dirinta on di bagasan habadiaonNa, songon na pinatupa halak di Jerusalem di haroro ni Kristus i (ida Mat. 21:1-9). Tapasahat ma sude na di hita laho marhobas di tongatonga ni huria, pos ma rohanta sai disarihon Debata do sude na ringkot di hita.

Panondang na Mamboan Dame

Jahowa do panondang di hita (ayat 27). Nunga dipapatar tu hita Tuhan Jesus Kristus na gabe panondang di hita. Ari na marlas ni roha ma tutu sadari i ala ingkon seahononNa ma mudarNa laho manobus hita. Adong do tradisi panobusion di Israel na mamboan pelean tu altar. Mudarna i do didaishon tu tanduk ni altar i, alai dipasingkop Jahowa ma i di bagasan Kristus. Dung i ndang gabe pelean na mate be diboan tu altar, nuaeng hita pe tarjou ma gabe pelean na mangolu (ida Rom 12:1).

Dipaujung parpsalmen ma turpuk on marhite pamujian dohot mandok mauliate (ayat 28-29). Ditogihon do hita di bagasan pamujian i asa sada di bagasan roha mauliate ai nunga marsaor hita dohot Debata. Dibagabagahon haroro ni Kristus na manobus hita gabe pelean na manongtong. Ro di salelengnilelengna do asi ni rohaNa, Ibana do Alpha jala Ibana do Omega, hamuliaon ma di Jahowa ai saut do lomo ni rohaNa mamboan dame dohot pasupasu tu sude natinompaNa. Disoarahon angka surusuruan do hasangapon ni Jahowa ala naung sahat dame tu tano on (ida Luk. 2:14), jala molo dung ro dame singkop ma tutu panggoraon ni Hosanna, pinasupasu ma na ro di bagasan goar ni Tuhan (ida Luk. 19:38).

Kunjungi juga kanal YouTube HKI untuk mengetahui informasi seputar pelayanan HKI.

HAHONAAN

Di Jamita Minggu 10 April 2022 on disungguli turpuk psalmen on do tu hita taringot tu haroro ni Mesias, i ma Jesus Kristus na ro di bagasan goar ni Tuhan mamboan dame dohot haluaon. Di Epistel minggunta nunga dipasingkop tutu haroroNa, jala na istimewa sian i, nunga jumolo marolopolop angka jolma i ala adong do kepastian na ingkon monang. I do umbahen na taronjar hita mandok mauliate mangadopi angka na masa, ai nunga dipataridahon haradeon ni Debata mangalehon pangurupion molo tongtong raphon Ibana hita.

Haroro ni Kristus ditopot dohot denggan marhite maremare, gombaran do on taringot tu hamonangan. Ala ni i, di Minggu Palmarum on ringkot do hita manogihon angka donganta asa rade jala parsidohot di panongosion (misi) laho mambaritahon dame dohot haluaon. Taihuthon ma Ibana naung ro marhite goar ni Tuhan, ala ni i manang tu dia hita mangalangka ingkon mamboan pasupasu do hita tu humaliangta. Dijou do hita asa mandok mauliate jala mar las ni roha. Psalmen ndada holan ende sambing, alai di bagasan i adong motivasi dohot gogo. Psalmen mangalehon semangat na imbaru marhite tondi asa gomos hita mangadopi angka hamaolon ni ngolu. Dipargogoi Tondi Parbadia do hita mangula di huria, di pemerintahan, advokasi, tenaga medis dohot angka na asing. Di media sosial pe diajari Tondi i do hita mangulahon na marimpola.

Ende Psalmen on ndang boi tarsirang sian ulaon dohot haporseaonta. Sai dipargogoi Tondi i ma hita lumobi di masa hamaolon. Sian 2019 tung godang do jolma na marungkil ala ni pandemi Covid-19, alai tongtong ma hita mar pos ni roha. Tongtong ma hita mangolu di bagasan ni Tuhan i, taendehon ma Hosanna! Sai manumpak ma Ho ale Jahowa! Taendehon ma Haleluya! Tapuji ma Tuhanta huhut mandok mauliate ma hita, ai nunga ro Kristus, pinasupasu ma ibana na ro di bagasan goar ni Tuhan. Amen.

Penulis:
Pdt. Dr. Amran Simangunsong, M.Th

Penyunting:
Timothy P. Saragi

BAHAN KHOTBAH INI JUGA DAPAT DIUNDUH DENGAN MENG-KLIK TULISAN DI BAWAH INI
JAMITA MINGGU 10 APRIL 2022 – MINGGU PALMARUM