EPISTEL MINGGU 3 JULI 2022 – PSALMEN 66:1-9

Epistel Minggu 3 Juli 2022

Epistel Minggu 3 Juli 2022
MINGGU III DUNG TRINITATIS
MINGGU, 3 JULI 2022
MARPARANGE NA DAULAT TU SALUHUT JOLMA
Psalmen 66:1-9

PATUJOLO

Buku Psalmen on mansai godang do dihalomohon jolma, ala gaya bahasana na tabo jahaon jala boi hona tu ate-ate. Angka kisah nyata na nialaman ni naposo ni Debata manang jolma na jonok tu Tuhan i, bahat do dipaandar di buku on. Tung marragam do angka na nialaman ni angka na porsea uju i, na boi gabe motivasi tu angka jolma na manjahasa. Sian angka pengalaman na disurathon di buku Psalmen on boi gabe parsiajaran na mansai arga jala patoguhon haporseaon. Godang do angka ende huria tercipta borhat sian buku Psalmen on. Suang songoni angka buku renungan harian godang tercipta sian refleksi buku Psalmen on.

Di turpuk on diarahon do jolma asa marolopolop tu Debata. Dang holan tu jolma diarahon asa marolopolop, alai tung tu sandok tanoon. Lapatanna tu sude na tinompa ni Debata ingkon marolopolop. I ma patandahon surung ni hasangapon, habalgaon huaso ni Debata naung sahat tu saluhut hajolmaon nang tu nasa na tinompa ni Debata i. Ibana do Raja di atas ni raja na adong di portibi on, naung patupahon gok angka halongangan tu angka na nirajaanNa. Secara khusus balga nang godang ni naung pinatupana tu tonga-tonga bangso Israel, mulai haruar sian Misir mamongoti tano Kanaan. Jala hot diparmudumudu di pardalanan ni ngolu ni bangsoNai, songon bangso na pinillit nang niasianNa.

Marhite panindangion ni panurat Psalmen on, dipaandar muse hamuliaon, hasongkalon, angka pambahenan nang hagogoonNa naung dihilalahon angka na nirajaanNa. Ido alana umbahen patut ma antong gabe dipasahat parolopolopon, ende pujipujian holan tu Ibana. Marhite turpuk jamita on boi hita mangauhon Hata ni Debata on, asa adong sada pangarimangon di dirinta, tung soadong na boi tapangasahon, nda holan mangasahon Tuhan i di ngolunta. Dang adong alasan di hita manimbohon dirinta, mamuji dirinta, ai holan Debata do na patut pinarsangapan nang pinuji di pardalanan ni ngolunta tarlumobi di pardalanan ni ngolu parhuriaonta.

BACA JUGA BAHAN JAMITA MINGGU III SETELAH TRINITATIS – MINGGU, 3 JULI 2022

HATORANGAN

Di turpuk on, parpslamen mangarahon bangso Israel asa mandok mauliate, marolopolop tu Debata. Parolopolopon i boi di gombarhon songon suraksurak ni jolma na sedang manaksihon pertandingan sepak bola. Songon punguan ni jolma na torop, mangolophon las ni rohana hinorhon adong na mambahen las rohana. Dirajumi do Debata naung patupahon sada ulaon bolon. I ma ulaon paluahon bangso i sian tangan ni musu. Malua nasida sian rongoman nang penindasan ni musu, gabe taruli nasida di kemerdekaan jala dapot ngolu na marhasonangan.

Marhite turpuk on dipaingot nasida sotung manghalupahon angka pambahenan ni Debata di sandok gulmit ni ngolu nasida. Unang songon istilah “bagai kacang lupa akan kulitnya”. Songon jolma na lupa diri, dihilala do holan ala ni gogona sandiri, manang ala pingkiranna sandiri boi ibana malua sian musu, sian sude na manosak ngoluna. Jolma na songon on ima rumang ni jolma na so tau mandok mauliate, na sai mangasahon gogona sandiri nang pingkiranna sandiri. Akhirna boi gabe madabu tu pangalaho na sai patimbohon dirina, na bangkol mangakui adong sada huaso na umbalga sian dirina sandiri.

Di ngolu habatahonta pe nunga jotjot dipodai angka natuatuanta hita asa tapasomal-somal serep marroha. Marhite na tapasomal mandok hata “tolong, terima kasih”. Borhat sian poda sisongoni ma umbahen gabe suan di rohanta, dang boi hita mangolu sandiri. Sai na marsigantung do hita tu pangurupion ni donganta, tarlumobi pangurupion sian Tuhan i. Nunga gabe bagianta na ingkon sai marsigantung ngolunta on tu na adong di sekitarta. Dang holan dongan jolma, alai tung sude do angka na tinompa ni Debata na adong di humaliangta. Sude na adong di humaliangta tapahami doi singkat ni campur tangan ni Debata di ngolunta.
Nunga tung mansai uli ditompa Debata saluhut na adong di hasiangan on. Gabe songon mata rantai na marsirain-rainan, na so boi malua sian na sada tu na sada nai. Memang di zaman saonari on, nunga adong na terputus sian mata rantai i. I do umbahen gabe muncul ketidakseimbangan alam, masa ma bencana, isara banjir bandang, kebakaran hutan, dna. Nunga dipasahat Debata tu jolma i laho mangarajai sude na tinompa ni Debata, asa boi mardalan songon hukum alam naung ditotophon Debata panompa i. Alai hinorhon ni dosa dohot sangkap na jahat ni jolma, gabe adong ma ketimpangan/ segama siklus alami songon naung ditotophon Debata di mulanai.

Hape turpuk on mandok ingkon sandok tanoon marolopolop tu Debata. On ma na ingkon sipamanatonta sian turpuk on. Asa boi sandok tanoon marolopolop tu Debata, berarti tanggungjawabta ma laho padimundimun, mamiaro sude na tinompa ni Debata na adong di humaliangta. Digombarhon parpsalmen di turpuk on hasurungan ni Debata di pangarajaionNa. Ibana do raja na mangalehon haluaon, mangalehon sude na ringkot di ngolu na nirajaanna i gabe boi sonang so hariboriboan angka na nirajaanna. Laos i do gabe ojahan ni bangsona i marolopolop, mamuji pasangaphon Debata.

Marhite Psalmen on, dipaingot bangsa Israel, dibalga ni huasoNa paluahon sian tano Misir. Inganan na gabe parhatobanan ni bangsoi pola marratus taon. Dung dibege Debata angguk nasida di tano parhatobanan i, dipabangkit Ibana naposoNa si Musa asa manguluhon bangsoNa i ruar sian Misir. Boi nasida manaripari laut rara marhite halongangan na binahen ni Debata, gabe bola dua laut i, laos sonang nasida mardalan manaripari tano ni laut i. Tung tangkas do diida simalolong ni bangso i pambahenan ni Debata uju mamola laut. Sai ditonahon do pengalaman nasida i sian sundut tu sundut, sahat tu na boi disurathon i gabe buku na badia.

Tanda mauliate ni bangsoi di pambahenan ni Debata mamungka sian panompaon, haluaon na pinatupaNa, jala hasatiaonNa marmudumudu, manggohi nasa na ringkot di parngoluon ni bangso i, i ma marhitehite na manongtong hita mamuji pasangaphon Ibana. Pangalaho pamujionta nang pasangaphon Ibana, ima na gabe identitasta songon bangso ni Debata. Asa songon na pinangido ni thema ni Minggu on “Marparange na Daulat tu Saluhut Jolma” ima hataridaan ni alus ni haporseaonta maradophon Debata na gabe Rajantai. Tanda ni mauliate ni rohanta tu Debata, marhite na denggan parangenta maradophon dongan jolma nang nasa na tinompa ni Tuhan i.

Mandok mauliate, ido hataridaan ungkap ni rohanta mangargahon donganta naung hea mangurupi hita. Jolma na so olo manghamauliatehon pambahenan ni donganna sarupa ma i tu jolma na so mananda asiasi naung jinalona sian pihak na asing, sian donganna lumobi ma sian Debata. Di buku Lukas 17: 11-18, sian 10 halak na pinamalum ni Jesus sian sahit huliton, holan sada do na mulak mandapothon Ibana, huhut mandok mauliate dohot pasangaphon Ibana. Jala ibana halak Samaria, hape na asing nari sian Jahudi alai tung so olo mandok mauliate.

HAHONAAN

Marhite turpuk Jamita Epistel on, dipaingot hita di hakristenon sisaonari on, asa marparange na daulat hita tu saluhut dongan jolma tarlumobi maradophon Debata. Unang tahalupahon angka denggan basa naung hea tadai sian donganta, lumobi sian Debata. Dang boi hita mangolu molo holan mangasahon gogonta sandiri manang pingkiranta sandiri. Unang gabe jolma na lupa diri hita. Ai na marsigantung do ngolunta tu na humaliangta, lumobi tu Debata sitompa jala rajanta, naung paluahon hita sian musunta ima sibolis i. Nunga ditaluhon sorop ni sibolis i marhite ro Jesus tu portibi on. I do umbahen gabe jolma na merdeka jala martua hita.

Di zaman saonari on, mansai godang dope jumpang rumang ni jolma na sai mangaut tu dirina sandiri (egois). Dang parduli na masa na di humaliangna, hira holan sahalakna mangolu di portibi on. Sipata dang sadar ibana balga ni pasupasu naung jinalona di parngoluonna. Tu angka jolma sisongonon ringkot do tapanghulingi, tatogutogu haporseaonna asa mananda Debata. Debata naung paluahon ibana sian sorop ni dosa, sian musuna gabe malua ibana. Ingkon sadar ibana naung pinalua ni Jesus sian tangan ni musu, i ma sorop ni dosa na sian sibolis i. Ala ni i ingkon gabe jolma sidok mauliate tu Debata.

Sebagai halak Kristen, ingkon saurdot do hata nang pambahenan. Unang holan di hata hita mandok Kristen, alai pangalahonta suman tu sipelebegu dope. Ido silang situhuhonta marhite na ringgas hita marpangalaho na daulat. Ingkon gabe ciri khas manang identitasta marpangalaho na daulat i. Ingkon boi tubu pangokuon ni jolma molo marnida hita manghatindanghon di rohana “olo tutu do ibana halak Kristen na sintong”. Sian gulmit ni ngolunta do hita ditanda jolma na asing ise do hita na sasintongna, ndang sian na tahatahon, alai sian parpambahenanta. Ala ni i sai tapeop ma hata ni Debata, asa margogo hita patupahon angka na denggan i, marparange na daulat. Amen…

Kunjungi juga kanal YouTube HKI untuk mengetahui informasi seputar pelayanan HKI.

Penulis:
Pdt. Tumbur Siahaan, S.Th

Penyunting:
Yohanes Simatupang

About Yohanes Simatupang

Staff Biro Infokom

View all posts by Yohanes Simatupang →