EVANGELIUM SENIN 6 JUNI 2022 – PSALMEN 104:24-35

Evangelium Senin 06 Juni 2022
PENTAKOSTA II
SENIN, 06 JUNI 2022
TINOMPA NI TONDI
Psalmen 104:24-35

PATUJOLO

“Pentakosta” di bahasa Gorik di dok: Πεντηκοστή ἡμέρα, (Pentēkostē [hēmera])hari kelima-puluh” manang “ari pa limapuluhon”, manang “Minggu Putih” ima ari raya ni halak Kristen laho marningot haroro ni Tondi Porbadia tu angka apostel ni Tuhan Jesus di Jerusalem. Dung 50 ari sian ari haheheon ni Tuhan Jesus Kristus. Di ari Pentakosta, taruli Tondi Parbadia ma angka siseanNa, songon naung jinanjihonNa andorang so nangkok Ibana tu banua ginjang. Sian Bibel boi tajaha, angka sisean ni Jesus boi manait tolu ribu halak gabe si ihuthon Jesus Kristus di ari Pentakosta i. on ma na nidok gereja dimula na i (Ulaon ni Apostel 2).

Di borngin di tingki nanaeng tarjehe Tuhan Jesus, di hatahon do tu angka siseanNa nanaeng lehonNa sada pangurupi di nasida ima Tondi Parbadia. Di Johannes 14:16-17 di dok: Jala pangidoonku ma tu Ama i, asa dilehon tu hamu sada Pangondian na asing, asa i mandongani hamu salelengna i. I ma Tondi hasintongan i, na so tarjalo portibi on, ai ndang diida jala ndang ditanda; alai ditanda hamu do Ibana, ai na rap ma Ibana dohot hamu jala di bagasan hamu ma Ibana. Di Pentakosta na paduahon on, ima di haroroni Tondi Parbadia, apala di tingkion, sian ende ni par Psalmen, porlu do idaonta pangalaho ni jamitaon tu temanta tingki on, ima “tinompa ni Tondi”.

HATORANGAN

24 – 26 Balga Ni Huaso Ni Debata.

Di buku ni si Musa na parjolo manang di 1 Musa 1, di pajojor do manang songondia Debata Jahowa jumadihon langit dohot tano on, ro di sude isina. Di tompa Debata do langit dohot tano i, marhite-hite hataNa “jadi ma ho” dung i gabe ‘jadi’ ma tutu. Di dok par Psalmen on do, sara ni Debata Jahowa laho jumadihon langit dohot tano on, sangon sada habisuhon na luar biasa. Jadi-jadian ni Debata tung massai godang, balga, huhut gok halongangan. Jala dang tuk pikkiran ni jolma manisia i laho mamikkiri habisuhon ni Debata.

Di ayat on, par Psalmen manggombarhon huaso ni Debata marhite-hite laut jadi-jadianNa i. aek laut na tung massai bidang dohot galumbang na marhasak, maradu tu alogo namangulus massai gogo, gabe songon sada gogo di angka hopal laut, laho marlaiar tu tongatonga ni laut i. dohot sude angka binatang na metmet sahat tu binatang na sun balga, marlangei di tonga-tonga ni laut i. Di son par Psalmen naeng patuduhon habalgaon ni sahala ni laut jadijadian ni Debata jahowa. Molo jadiajadian ni Debata songon i balga na, lam ma hape Debata sandiri sipanoppa laut i dohot sude isina, tung so tar dodo jolma i be laho mamilangi bidang ni parbinotoan ni Debata Jahowa.

27 – 30 Ngolu Ni Jolma di Bagasan Huaso Ni Tuhan

Sian Psalmen on, boi boto on ta, ia parpsalmen on mangolu di bagasan parbinotoan taringot tu bangso ni Debata na mardalani di parhorsikan 40 taon leleng na. Di lehon Debata do di nasida manna di tingki na rapar nasida, jala di lehon do di nasida aek di namauas nasida. Dipatudu Tuhan do dirina marhite-hite tiang api di hagolapan ni dalan nasida, jala dilehon Tuhan di nasida ombun laho mangalinggomi nasida sian hos nia ari na mohop.

Maradu tu ngolu ni jolma i tahe, di bagasan huaso ni Debata. Mangolu manang na mate, jolma i di bagasan huasoNa. Tung orbuk pe jolma i, alai di lehon Debata Jahowa do hosaNa laho pangoluhonsa, gabe mangolu jolma i, di bagasan hasangapon ni hosa ni Debata. Hosa ni Debata mambahen jolma mangolu, molo tung dibuat Debata muse hosa i, mulak tu Ibana, tung saguru di Tuhan do i saluhutna. Sian i ma ikkon tunduk jala mandok mauliate jolma i tu Tuhan Debata. Hosa/ tondi ni Debata do mula jadi ni hangoluan ni jolma, jadi jolma i ima jolma na tinompa ni tondi.

31 – 32 Huaso Ni Debata Tu Sandok Portibi On.

Di diok: “Sai ro di salelenglelengna ma hamuliaon ni Jahowa marlas ni roha ma Jahowa mida angka jadijadianNa. Molo Ibana mamereng tano on, jadi humuntal ma, dijama angka dolok, jadi martimus ma”. Si Par Psalmen on, marnida ia huaso ni Debata tung mansai balga, jala dang hatudosan huasoNa. Humuntal manang so humuntal portibi on, di bagasan huaso ni tangan ni Debata Jahowa do. Ia tung laho salpu jala matutung pe protibi on, dang adong laho mangambati tahi ni Debata. Alai dibagasan asi ni roha dohot pangaramoti on ni Debata do tutu portibi on, umbahen na boi mangolu jolma i jala boi mananda huaso ni Debata. Ende ni par psalmen on, laho paingothon sude naumbegesa, holan Debata Jahowa do na tuk laho sisombaon ni sude pangisi ni protibion. Ndang adong sisombaon asing sian Ibana.

33 – 35 Somba Ma Debata

Di ayat 33-35, tarida ma panghorhon ni hapian ni parpaslmen on tu Debata, ima naeng mangendehon sangap ni Jahowa saleleng ngoluna. Di sadari parpsalmen on do, dang adong na tuk patupaonna laho mambalos holong ni Debata. Ndang adong na boi lehononna na tuk tu hamuliaon ni Debata. Holan pamujion na saleleng ngoluna, ima na tuk leanon na tu Debata. Tahi ni parpsalmen on, ima naeng marsaor dohot Debata marhitehite namangarimangrimangi huaso dohot hamuliaon ni Debata ro di sude denggan basa ni Jahowa. Anggiat marhite i, boi lomo roha ni Debata tu ibana. Di ayat 35 di dok: “Sai siap ma nian angka pardosa sian tano on, jala unang adong be angka parjahat! Puji ma Jahowa, ale tondingku! Halleluya!. Hata on ndang hata ‘bura’, alai laho patuduhon, ndang adong hajahaton na patut mian di jolo ni Debata. Sude angka hageduhon ni roha, dohot na naeng mangarotaki roha, ikkon ambolong do sian jolo ni habadiaon ni Debata. Ido umbahen ikkon ias jolma i laho sahat tu hasangaponNa.

HAHONAAN

Molo tarimangi sian temanta di bagasan minggu on, ima “Tinompa ni Tondi”, aha do naeng niondolhon jamita on tu hita di bagasan tingki on? Dimula nai uju di tompa Debata langit dohot tano on, mangareapreap ma Tondi ni Debata di atas angka Aek (1 Musa 1:2). Dung i, di 1 Musa 2:7 di dok ma: Dung i dijadihon Debata Jahowa ma jolma i sian orbuk ni tano on jala diullushon tu bagasan bungbung ni igungna “hosa hangoluan i”, gabe martondi na mangolu jolma i. Di bahasa indonesia “hosa hangoluan” di dok “Nafas Kehidupan” Panurirang Zakharia mandok, dijadihon Debata Tondi ni jolma i, dungi dipeakhon ma di bagasan pamatang ni jolma i.

Hata ‘tondi’ na pinakke ni si Zakharia ima “ruakh” na sarupa tu “tondi” ni Debata di 1 Musa 1:2 dohot di Psalmen 33:6. Di Job 27: 3 di dok: 27:3 Ai saleleng simpan dope hosangku di bagasan ahu, jala hosa na sian Debata di bagasan igungku. Sian i boi botoanta, ia jolma i di tompa jala dijadihon Debata do sian Tondi Na. Tung saluhut do tahe na adong di portibion, di hajang-hajang, di bagasan aek dohot na ditoru ni tano on, jadijadian ni Debata, alai tung holan jolma i do najinadihon sian tondi ni Debata na adong di atas tano on. Mansai halongangan situtu do angka jadijadian ni Debata, alai tung jolma i do namartua jinadihon sian TondiNa.

Ala jolma i, ima na tinompa sian TondiNa, ikkon ma nian mangolu jolma i di bagasan TondiNa. Ima na mangolu dibagasan parmudumuduon ni Tondi Parbadia. Na taruli ngolu naimbaru. Di 2 Korintus 5:17 Di dok: 5:17 Asa molo di bagasan Kristus halak, na tinompa na imbaru ma i. Nunga salpu pangalaho na robi, gabe na imbaru. Gabe mangolu ala tondi ni Debata, ikkon mangolu di bagasan tondi ni Debata ma jolma i.

Mangolu di bagasan Tondi ni Debata, lapatanna mangolu dibagasan Tondi Parbadia. Di Rom 8:2 di dok: Ai nunga dipalua patik ni tondi hangoluan na di bagasan Kristus Jesus do ahu sian patik ni dosa dohot hamatean. Dosa do na gabe bonsir ni hamatean ni jolma, alai Tondi Ni Debata ima tondi Parbadia, margogo do laho pangoluhon jolma i sian hamatean. Tondi ni Debata na mian di bagasan jolma i, margogo mambahen mulak mangolu pamatang ni jolma i (Rom 8:11).

Jolma naung mangolu di bagasan tondi ni Debata ima Tondi ni Debata gabe namamingkiri jala mangarimangi sangap, huaso dohot gogo ni Debata. Mangarimangi holong ni rohaNa, gabe naeng mamujimuji jala pasangap goar ni Debata songon par Psalmen on. Gabe tubu ma di Ibana parbue ni Tondi songon na di Galatia 5:22 “Alai angka on do parbue ni Tondi: Holong dohot las ni roha, dame dohot lambas ni roha, habasaron, habasaon, haporseaon, halambohon dohot hatomanon”.
Molo halak naeng mangolu di bagasan Tondi, ikkon pamateonna ma hagiot ni dagingna (Rom8:13). Gabe ringgas ima imana marsaor dohot Debata, mangarimangi huasoNa, gogona, HamuliaonNa, sangapna, Burju ni Roha Ni Debata laho paluahon jolma i sian hamatean. Amen

Kunjungi juga kanal YouTube HKI untuk mengetahui informasi seputar pelayanan HKI.

Penulis:
Departemen Marturia HKI

Penyunting:
Yohanes Simatupang

About Yohanes Simatupang

Staff Biro Infokom

View all posts by Yohanes Simatupang →