Jamita Minggu IV Setelah Trinitatis 10 Juli 2022
MINGGU IV SETELAH TRINITATIS
MINGGU, 10 JULI 2022
“MAMARITAHON JALA MANGULAHON HATA NI DEBATA“
5 Musa 30:11-14
PATUJOLO
Tung so adong do nanggo sada sian hita na mangkalomohon ulaon na marisuang di angka naung hinalojahon manang gabe ambolong sude angka ulaon na denggan naung ditambortambori. Diaturhon angka natuatua do angka ruhut laho mangaramoti parngoluon tu pudian ni ari, asa lam tu sonangna parngoluon ni jolma. Didok angka natuatua do umpama: “sinuan bulu sibahen na las, binahen uhum sibahen na horas” na gabe andor sipaihutihuton. Lapatanna diaturhon angka ompunta na jolo do angka ruhut siihuthonon ni angka na parpudi asa jumpang hadameon, jumpang parngoluon na sonang. Didok natuatua angka parjolo: “ompunta sijolojolo tubu martungkot sialagundi, pinungka ni na parjolo ihuthonon ni na parpudi.” Alai dung tamba parbinotoan jala lam tu ragam na angka luat dohot na masa, lam tubu ma angka pangantusion na lumehet, dipature ma pandohan i. Gabe didok: “ompunta sijolojolo tubu martungkot sialagundi, pinungka ni na parjolo pinauli ni na parpudi.” Luhutna i martujuan asa dapot hasonangan.
BACA JUGA BAHAN EPISTEL MINGGU III SETELAH TRINITATIS – MINGGU, 3 JULI 2022
HATORANGAN
Buku 5 Musa on, molo di hata Indonesia didok Kitab Ulangan jala somal do digoari Deutronomy, i ma na marisihon angka tona (jamita) ni si Musa tu bangso Israel tagan di huta Moab, huta paradianan parpudi ni bangso i andorang so mamasuhi tano Kanaan. Mangihuthon angka na malo di parbinotoan taringot tu Bibel, turpuk on masuk ma tu horong hata partadingan ni si Musa tu bangso Israel.
Marhite angka jamita nunga taboto ganjang do pardalanan ni bangso i sian Misir tano habuangan i (na so hutanasida) mandapothon luat na binagabagahon ni Debata na naeng gabe inganannasida. Siingoton, na so nampuna huta hian nasida, laho mardalan mamolus godang angka na masa tu inganan na gabe nasida nampuna (dari yang tidak mempunyai/memiliki menjadi mempunyai/memiliki = dari yang tidak ada menjadi ada). Gumodangan dope nasida na mangarajumi “si adongan” (arta, kepemilikan) na di portibi on do na gabe tudutudu ni pasupasu. Molo ndang adong di ibana pintor didok na so tarpasupasu ngoluna. Molo ndang adong pinomparna (ianakhon, godangan halak Batak mandok anak baoa) didok na so tarpasupasu ngoluna. Ndang dapot rongkap, ndang dame parsaripeonna, ndang sarjana gellengna, ndang dapot pangomoan. Gabe ndang sonang roha na. Sasintongna ndang dapot di si pasupasu. Ia pasupasu na godang i ma roha sonang (ida Buku Ende nomor 122 ayat 4).
Di bagasan pardalanan ni bangso Israel mandapothon tano na niuarihon ni Debata tu nasida, dibolus do ragam ni hamaolon, sitaonon, situasi na mambahen biar, lomos na patubuhon holso. Pola do diultophon nasida i marhite hamuruhon tu si Musa na manguluhon nasida nang tu Debata sandiri pe. Atik pe, di sude situasi na maol i sai dipatuduhon Debata do huasoNa marhite angka ulaon halongangan, laos gabe i dalanNa patandahon diri tu bangso na pinillitNa i, sai marulakulak do tubu biar dohot holso ni roha di nasida. Tongtong do marulakulak dipatuduhon Debata huasoNa, paluahon nasida sian sude ragam ni hasusaan, laho paposhon roha jala pahothon rohanasida asa porsea di Debata. Sude halongangan na pinamasa ini Debata i tu nasida naeng patandashon, sasintongna jonok do Debata tu nasida.
Dung jumpang tingki na, ndang rap be si Musa dohot bangso na niuluhononna i, jala naeng sahat nama nasida tu inganan si tujuon i, tano na pinarbaga ni Debata gabe hutanasida. Ditonahon si Musa tu nasida asa tongtong porsea di Debata. Nunga dipatuduhon Debata hagogoon dohot huasoNa, paboa na jonok do Debata. Asa hot nasida mangoloi Debata, nang angka pinomparnasida tu joloan ni ari. Dipasahat Debata ma bagabagaNa tu nasida. Ingkon haholonganmu Jahowa Debatam, jala marparange di angka dalanNa, huhut mangaradoti angka patikNa, angka aturanNa dohot uhumNa, asa pangoluonNa jala patoroponNa ho, jala pasupasuon ni Jahowa Debatam ho di tano sitopotonmu nuaeng bahen partalianmu (ayat 16). Dipaingothon do tu nasida, ia pinangido ni Debata tu nasida, i ma gabe sioloi patik si hangoluan i, ndang masongkalhu i di ho jala ndang maholangku. Ndada di banua ginjang hata i, ndada di bariba ni laut. Ndang adong sidalian mandok masongkalhu, maholangku.
Kunjungi juga kanal YouTube HKI untuk mengetahui informasi seputar pelayanan HKI.
HAHONAAN
Taboto do tangkas, sahat do tano pinarbaga ni Debata i tu nasida. Na so nampuna tano hian gabe marnampuna. Ganjang do pardalanan sibolusonnasida dohot angka ragam ni na masa siadopannasida: dilele, manaripari laut, las ni ari, mohop niari, mamolus huta ni halak jala diambati, ingkon marporang maralohon jolma raksasa. Saluhutna i patuduhon hamaolon, hasusaan, hatahutan; laho manjumpangkon luat na so binotonasida dope. Alai jumpang jala sahat do. Ai didok do: “Alai anggo haporseaon i, pos ni roha do i di angka sihirimon, jala pamotoan na tontu taringot tu na so niida” (ida Heber 11:1).
Pasupasu ni Debata dipungka marhite bagabaga (lapatanna, na so adong dope, ndang niida dope na binagabagahonNa i). Ala ni i do ganup na porsea, angka na tarpasupasu do. Jala haunduhon/haoloon (ketaatan) ma gabe dalan paubahon, sian na so marnampuna gabe marnampuna. Haoloon dohot haunduhon do na mamboan bangso Israel ruar sian tano bangkalbangkal tu tano na gok susu dohot si tuak ni loba. Halak Kristen na porsea di Jesus Kristus naeng lam bagas pangantusionna, ia pasupasu di hita i ma hangoluan na marsonangsonang saleleng ni lelengna, ndada hangoluon tu hamatean. Bagabaga hangoluan nunga dilehon tu hita asa hita nampunasa.
Didasdasi Jamita Minggu 10 Juli 2022 on do hita asa tongtong mangkaholongi Jahowa Debata, jala marparange di angka dalanNa, huhut mangaradoti angka patikNa, angka aturanNa dohot uhumNa. I do na ginurithon ni hurianta HKI gabe visi, i ma gabe Huria na Kuat Iman, Misioner, Modern dan Berdedikasi. Di partingkian na gok hamaolon on, naeng nian hita tongtong togu mangula gabe parbarita nauli, ndang holan songon na jolo i, alai boi paihutihut hamajuon di bagasan haunduhon tu Debata. Naeng lam tangkas tapataridahon, lumobi ma mangeahi 100 taon HKI, asa parsidohot saluhut ruas ni huria patupahon i. Di angka natoras naeng ma lam marsitutu di na marmudumudu angka ianakhon asa mangkaringkothon parsaoran di huria huhut marrohahon nasida so tung so mangolu di bagasan ngolu haporseaon i. Hamajuon ni zaman on boi do lam parohon halosohon tu parsaoran di huria, lam tarpodom. Hata ni na tuatua mandok: “horbo ni pea raja manggagati di balian molo so lomo roha ai godang do sidalian.” Dipaingot do hita: mansai donok do hata i di ho, di bagasan pamanganmu tahe dohot di bagasan roham, asa ulahononmu i. Unang ma masidalian.
Penulis:
Pdt. M. Lumban Gaol, S.Th
Penyunting:
Timothy P. Saragi
BAHAN JAMITA INI JUGA DAPAT DIUNDUH DENGAN MENG-KLIK TULISAN DI BAWAH INI
JAMITA MINGGU 10 JULI 2022 – MINGGU IV SETELAH TRINITATIS
