EPISTEL MINGGU 25 SEPTEMBER 2022 – PSALMEN 146:1-10

Epistel Minggu XV Dung Trinitatis 25 September 2022
MINGGU XV DUNG TRINITATIS
MINGGU, 25 SEPTEMBER 2022
“PANOMBAON DOHOT ROHA NA MANGHASABAMHON”
Psalmen 146:1-10

PATUJOLO

Puji ma Debata, Haleluya. Barita Nauli on dibuhai dohot diujungi do dohot hata “haleluya”. Hata ‘haleluya’ ndada holan “ajakan”, alai dohot do “perintah”. Hata ‘haleluya’ on sian dua hata, i ma “Halelu” na marlapatan, “Puji hamu ma Debata, manang ida hamu ma”, dungi hata “Yah” lapatanna Tuhan, hata Yah on sian hata YHWH manang Yahweh. Jadi Haleluya lapatanna Puji hamu ma Debata. Asa sada parenta do on tu portibi on asa hormat tu Debata huhut mamuji Ibana. Alani on ma dasar na manggohi roha ni Parpsalmen umbahen didok ibana saleleng mangolu ibana ingkon mamuji Debata songon dalan ni ibana laho sumomba Debata na sumarihon ngolu. On ma tingki na lehet mamuji jala pasangap Ibana, ima mulai sian tubu tu portibi on sahat tu ujung ni ngolunta ingkon do marsomba jala mamuji Ibana na sangap jala na badia. Laos di son ringkot ni hasatiaon asa tongtong patar jala unang sumurut pamujion tu Debata.

Mananda Debata na holong dohot na asi ni roha na so boi holang sian ngolu ni na porsea tu Debata. Panandaonta tu Debata marharoroan sian parsoranta di Gareja (Partangiangan), Parsaoranta di bagasta be nang sian na sai mamingkiri (merenungkan) hata ni Debata. Molo ndang adong panandaon tu Debata tung mansai maol do antusanta ise do Debata, laos gabe tubu ma angka sungkun-sungkun ni roha taringot tu huaso ni Debata na marholong roha i.

HATOTORANGAN

Jamita on didok do on Psalmen Haleluya na pabotohon tu huaso ni Debata sitompa langit dohot pangisina. Adong dua mutiha na mansai arga idaonta mangihuthon Barita Nauli on.

Mamuji Debata Saleleng Hita Mangolu.

Ditompa Debata do hita mangihuthon sangkapNa, ima sangkap na denggan. Diramoti jala diparmudumudu do hita di pardalanan ni ngolunta, songon na tangkas di ngolu ni si Parpsalmen on. Dilehon do haluaon tu hita songon naung di jolona tangan di ngoluna, dipalua ibana sian ragam ni hasusaan i. Suang songoni do nang hita dilehon haluaon marihte Tuhanta Jesus Kristus naung mate jala mulak mangolu humophop hita.

Disarihon do na porlu di pardalanan ni ngolunta. Sude on gabe dasor na togu ma on asa dumenggan pamujionta tu Ibana. Tung dihalomohon Debata do pamujionta tu Ibana. Ido alana Parpsalmen mandok, “Ale tondingku puji ma Jahowa”. Tung dihalaputi do pamujion tu Jahowa, “Puji ma Jahowa saleleng ahu mangolu, sai endehononhu do Debatangku saleleng adong dope ahu”.

Ditanda parpsalmen on do ia haluaon naung jinalona, ndada sian pangarajai (bangsawan) manang sian raja, ai ndang nasida silehon haluaon. Laos marhite barita na uli on paingothon hita asa marhaposan tu Debata, ndang marhaposan tu pangarajai manang raja manang marhaposan tu halak na bonggal, ai sude na di pajojor ondeng, i ma angka na tinompa ni Debata do i tudos songon hita jala naso boi hot ro disaleleng ni lelengna. Sude angka na tinompa i mulak do gabe tano, jala sude na ni omona tading do sudena. Dumengganan ma marhaposan tu Jahowa. Debata ndada holan panompa jala nampuna na tinompa, alai dohot do “pengendali dan penentu hidup kita”. Sasada Ibana do pangurupi ima Jahowa sitompa langit ro di pangisina.

Hatuaon (kebahagiaan) ni Halak na Porsea tu Debata.

Tontu, sude do halak mangharingkothon hatuaon (kebahagiaan). Ido alana jolma manisia sai dilului do dalan asa dapotsa na pinangido ni rohana marhite ragam na pinatupana asa taruli di hatuaon i, atik pe sipata hatuaon na jinalahan ni manisia holan parsatongkinan do. Alani i do diajari Parpsalmen on do hita, paboa hatuaon i marharoroan holan sian Debata do, sian Debata ni si Jakop, Jahowa sitompa langit dohot tano on.

Hatuaon na pinasahat ni Debata tu manisia tung marragam do di pardalanan ni ngolunta. Songon di barita nauli on di tatap do halak na gale, dilehon do uhum na tingkos songon na didok “Sipatingkos uhum tu angka na nirupa, silehon sipanganon tu angka na male, Jahowa mangharhari angka natarrante. Jahowa patonggor mata ni angka na mapitung, Jahowa pahehe angka na tungki, Jahowa manghaholongi angka partigor. Dipasahat do uhum na tingkos tu halak na gale ala ni hatigoran na diperjuangkan”. Dipaingot do hita di panarihononNa di hita, bahwa Allah sungguh mengerti segala persoalan yang kita hadapai. Tuhan selalu hadir dalam kehidupan kita bahwa tiap langkah kita diatur oleh Tuhan. Mazmur 37:23, “TUHAN menetapkan langkah-langkah orang benar yang hidupnya berkenan kepadaNya”. Dihaholongi jala dijagai do angka na porsea di Ibana nang halak na gale na marhaposan tu Ibana, alai diuhumi do halak na marsangkap na jahat (na roa). Marragean ma disi angka siulahon hajahaton, diompashon do nasida, jadi ndang tarbahen nasida be hehe.

Dipaingot parpsalmen on do muse, angka halak naung manjalo asi ni rohaNa asa tongtong mamuji Debata, Debata na hot ro di salelenglelengna. Debata sitompa langit ro di pangisina sude jala Debata na sumarihon ngolunta. Disarihon Debata do sude na tinompana i nang saluhutna jolma manisia, diparade Debata do na ringkot di ngolunta. Diurupi do hita disude angka na masa di ngolunta.

Mangihuthon barita nauli i, diarahon do hita asa satia mamuji jala pasangap Debata, Debata na rade mangurupi hita. Ingkon satia do hita ro marsomba Ibana, martangiang, mandok mauliate, marende pujipujian huhut mangkobasi ulaon na pasangap Ibana. Jala ingkon ta haporseai paboa Debatanta i Debata ni haroroan ni pangkirimonta na paluahon hita sian angka hagogotan jala dilehon pangurupion tu hita. Dilehon do pangurupion tu halak na gale. Suang songon i tu halak na buro, margogoihon angka na sopot somarama so marina dohot angka na mabalu. Alani i ingkon pos rohanta tu Ibana ro disalelenglelengna.

Kunjungi juga kanal YouTube HKI untuk mengetahui informasi seputar pelayanan HKI.

HAHONAAN

Hatuaonta (kebahagiaan) dohot sude halak na porsea ingkon dumenggan pamujionta, ai nunga dipasahat asi ni rohaNa jumolo tu hita jala ndang marnamontok Ibana pasahathon asi ni rohaNa i tu hita. Alani ingkon marhaposan ma hita holan tu Debata sambing, godang do halak na mandele jala maheu ala pangkirimonna tu na di portibi on, marhite na marhaposan tu jolma i ma na digoari di turpukta on marhaposan tu angka pangarajai (bangsawan). Alani ma hata ni Tuhanta tongtong manosoi hita asa unang marhaposan tu jolma manang tu aha na di portibion. Halak na marhaposan tu jolma manang na di portibi on na boi do marsak jala maheu songon na di dok ni Jesaya 2:22, Dibahen i unang hamu marhaposan tu jolma, na marhosa di bagasan igungna, ai tung pola aha ibana rajuman”. Didok do ia jolma na marhosa di bagasan igungna molo di bahasa Indonesia didok ma jolma i; tidak lebih dari pada hembusan nafas, alani ima di dok doi Psalmen 146:4 “Ia ruar sogot tondina i, mulak ma ibana tu tanona, di ari na sasasada i pesan ma sude angka sangkap-sangkapna i/Apabila nyawanya melayang, ia kembali ke tanah; pada hari itu juga lenyaplah maksud-maksudnya.” Alani i, marhaposan ma tu Debata, Ibana do mangurupi hita, mangurupi halak na gale, jala dipalua do hita sian ragam ni hasusaan. Jadi dohononta ma songon pandok ni Parpsalmen, Pujionhu ma Jahowa saleleng ahu mangolu, sai endehononhu do Debatangku saleleng adong dope ahu. Amen.

Penulis:
Pdt. M. Simanjuntak. M.Th

Penyunting:
Yohanes Simatupang