Johanes 1:1-14, JAMITA PESTA NATAL I Natal I, 25 DESEMBER 2016

JAMITA PESTA NATAL I, Natal I, 25 DESEMBER 2016

Nats : Ev. Johanes 1:1-14

 

Dibasabasahon Debata HataN tu hita,

Dibagasan Hata i do hangoluan; laos

Hangoluan i do panondang ni hajolmaon.

Sadarion dipabotohon tu hita paboa na dibasabasahon Debata  Hata na tu hita. Hata ni Debata na dibasabasahon-Na tu hita, ndada hata na somal songon na dapot di Buku Kamus; ndada hata na boi diterjemahon sian sada parhataan tu parhataan na asing. Tung mamunjung do Hata ni Debata na dibasabasahon-Na i tu hita.

DEBATA DO HATA I

Hata ni Debata na dibasabasahon tu hita nunga adong andorang so ditompa Debata dope portibion. Hata on, ndada holan hata na hinatahon ni Debata; ndada holan Hata naung saor tu Debata andorang so ditompa Debata dope portibion; alai Debata do Hata i.

Tarsongon donganta na di portibion, boi tatanda, boi taantusi pingkiran na, boi taboto dia lomo dohot sogo ni roha na, boi taboto dia las roha na, dia hinabiaran na, dia nahinirim na marhite hata nahinatahon na. Songon i ma Debata  papatar diri-Na tu hita marhite Hata-Na na binasabasahon-Na tu hita.

Tung dihalomohon Debata do tandaonta Ibana, tandaonta pingkiran-Na, tandaonta pangkilalaan-Na, botoonta lomo ni roha-Na, Ibana di bagasan hita, jala hita di bagasan Ibana.

Tung dihalomohon Debata do marbagi holong-Na, marbagi asi ni roha-Na, marbagi habisuhon-Na, marbagi pangantusion-Na, marbagi huaso-Na dohot hita.  Marhite Hata-Na na mamunjung on, dilehon Debata diri-Na tu hita. On ma hadiah Natal na so martudosan tu hita dohot tu portibion.

Hata ni Debata na dibasabasahon tu hita ima Ibana sandiri; Ibana sandiri gabe bagian ni ngolunta; Ibana sandiri mangolu di bagasan hita (di bagasan posisinta) mangadopi angka pangunjunan na ro tu hita, mangalo angka hamaolon nataadopi, mate mangganti hamateanta, mangalehon hangoluan saleleng ni leleng na di hita.Di bagasan Hata ni Debata na gabe Jesus na tubu di Betlehem, jumpang hita hasangapon ni Debata.

DI PORTIBON DO HATA I

Hata ni Debata namamunjung i mian do di portibion. Di ayat 10 didok: Di portibion hian do Ibana…”. Sasintong na, Hata ni Debata namamunjungi do manompa portibion. Di tingki ditompa Debata portibion, hata na nasomal do dipangke manompa, songon na nidok-Na:”Jadi ma ho natiur. Jadi ma ho tano.Jadi ma ho aek”. Alai sude hata na nanihatahon-Na on, na ro do I sian Hata-Na namamunjung i. Sude na tinompa ni Debata marmula do i sian Hata-Na namamunjung i. Alani i do dibahen na sude na tinompa ni Debata manggombarhon bangko ni Debata. Bangko ni Debata naginombarhon ni angka natinompa I, ima:

  • Haulion ni Debata (ai uli angka na tinompa i),
  • Hasingkopon ni Debata (ala singkop na tinompa na i),
  • Habisuhon ni Debata (ala sude na tinompa I saling isi mengisi),
  • Parholong Debata (ala angka na tinompa I papatar holong ni Debata).

Asa, ndada holan papatarhon angka dia ma na boi dipatupa Debata angka natinompa-Nai, alai dohot do papatarhon ise Debata. Masa i, ala saluhut natinompa i, ditompa Hata ni Debata namamunjungi.

Ndada holan mamaritahon ise Debata angka natinompa i, alai dohot do mamaritahon paboa na torop do jolma di portibion na so olo manangihon Hata ni Debata namamunjung i. Dipapangani nasida do sipanganon natinompa ni Hata ni Debata namamunjung i. Sipata tahe, disomba nasida do haulion ni angka na tinompa ni Hata ni Debata namamunjung i. Marlas ni roha do nasida di portibi na tinompa ni Hata ni Debata namamunjung i. Alai ndang ditanda nasida Hata ni Debata namanompa i. Ndang boi ditanda nasida Panompa i alani na tinompa i. Mansai torop jolma ditano on nalilian dibahen pangela ni portbion, gabe so diparrohahon be Hata na saor tu Debata, Hata I do Debata, Hata  na manompa portibi on.

Alai dihatindangkon si Johanes do marhite jamita on  paboa na adong do deba sian jolma i manjangkon Hata i (ayat 12). Marhite Hata i, diboto nasida paboa na dihaholongi Debata do jolma na tinompa na i,  jala mian di tongatonga nasida. Marhite Hata I, diboto nasida paboa na  dihalomohonnasida Debata gabe Ama Parasiroha na manoktong di nasida. Marhite Hata I, diboto nasida paboa:

  • Gabe Anak dohot boru ni Debata nasida, ndada ala natubu nasida tu hasiangan on marhite proses na pinatupa ni Debata.
  • Gabe anak dohot boru ni Debata nasida ala nadiain Debata do nasida gabe anak dohot boru-Na. Manoktong do Debata mangkatahon hata na I tu nasida, manoktong nang nasida mananda Debata. Ro Debata manopot nasida marhite Hata na, gabe ditanda nasida Debata. Dibasabasahon Debata Hata na I tu nasida jala gabe nasida nampuna Hata i.

 

  • GABE DAGING MA HATA I, JALA MARINGAN DI TONGATONGANTA

Sangkap ni Debata ndada holan asa sahat Hata na I tu hita, alai ingkon tangihononta do Hata na i. Ndang sae di Debata holan manompa hita dohot umbasabasahon pardomuan-Na dohot hita. Lomo ni roha ni Debata, ima, ingkon jaloonta na binasabasahon-Nai tu hita, ingkon tangihononta Hata na jala pujionta Ibana. Tung dihalomohon Debata do asa tandaon-Na hita, jala rap Ibana dohot hita, asa tandaonta Ibana, jala rap hita dohot Ibana.

Di ayat 14 di jamita on dipapatar do tu hita ulaon ni Debata na gok halongangan i, asa boi tatanda Ibana marhite Hata-Na namamunjung i. Didok:”Gabe daging ma Hata i jala maringan di tongatonga ni hita on, jadi huida hami ma hasangaponna, i ma hasangapon ni Anak sasada na sian Ama i, gok asi ni roha dohot hasintongan”.

On do barita Natal nasinurathon ni si Johanes. Dibaritahon si Mateus do tu hita hatutubu ni Jesus sian si Maria andorang so habubuhan; si Josep parroha na bonar namangalap si Maria; angka Parroha sian Purba na ro marsomba tu Jesus. Dibaritahon si Lukas do tu hita taringot tu balasting (pajak) uju di harajaon Kaisar Agustus di Rom; ende ni angka surusuruan; haroro ni angka parmahan tu bara ni pinahan uju tubu Jesus. Alai anggo si Johanes, jempek do didok, ima:”Gabe daging ma Hata i jala maringan di tongatonga ni hita on”.

Debata gabe jolma jala maringan rap dohot hita. Sahalak naung manompa portibion gabe mian di portibion (gabe bagian ni na tinompa i). Hata ni Tuhanta na mamunjung on naeng mangalehon silehonlehon na so hasuhatan tu hita. Olo Ibana gabe sahalak sian hita asa boi tatanda jala tajangkon Ibana. Saluhut hamuliaon-Na, huaso-Na, hasongkalon-Na, holong ni roha-Na, mabalgahu antusanta. Sirang do hita sian Ibana nangpe Ibana manompa hita. Tapauba do angka na tinompa na i. Tapauba do jolma i sian sisomba Ibana gabe sisomba jolma i sandiri. Dosanta mambahen hita mabiar mangadopi habadiaon-Na i. Pangantusionta na terbatas taringot tu ngolu, gabe so tarjalo hita pangajarionna taringot tu ngolu saleleng ni leleng na. Roha ahut na adong di hita manutup pamerengonta di holong ni roha-Na tu saluhut jolma; alani i, hita sandiri pe gabe luangan do di holong ni roha-Na i.

Alai manoktong do sangkap ni Debata asa tandaonta Ibana. Manoktong do dibasabasahon Ibana Hata nai tu hita. Marhite i, gabe “diterjemahon” Ibana Hata na i tu sahalak jolma na mangolu, na boi tandaonta. Tongtong do Debata Hata i, alai laos gabe jolma. Tarsongon sada parhataan (bahasa) na “diterjemahon” tu parhataan (bahasa) na asing, ndang maruba anggo lapatan na, alai holan tu halak na mangantusi parhataan (bahasa)  paduahon I do terjemahan i marlapatan. Gabe jolma Debata; ndang marlapatan maradi Ibana Debata;alai gabe Debata tu saluhut jolma na so mananda Debata hian ma Ibana. Hata ni Debata na dibasabasahon tu hita ima Ibana sandiri; Ibana sandiri gabe bagian ni ngolunta; Ibana sandiri mangolu di bagasan hita (di bagasan posisinta) mangadopi angka pangunjunan na ro tu hita, mangalo angka hamaolon nataadopi, mate mangganti hamateanta, mangalehon hangoluan saleleng ni leleng na di hita.

Hata ni Debata na dibasabasahon tu hita gok asi ni roha dohot hatutuon. Haroro-Na ndada laho manguhumi, alai laho manesa dosanta do. Ro do Ibana sadarion tu hamu dohot tu ahu songon “Hadiah Natal” sian Debata, asa ganup (pribadi lepas pribadi) hita maruli. Ro do Ibana paunsathon “rasa bersalah” alani dosa i, dohot roha biar mangadopi hamatean isian hita. Ro do Ibana gabe hasintongan tu hita ganup marsadasada. Ibana do hatutuon (hasintongan) i, ndada holan patudu dalan mulak tu Debata,alai Ibana sandiri do dalan I tu Debata. Ibana do hasintongani namangalompoi “perdebatan filosofis intellectual” na tapangke mangalului hatigoranta.

Di bagasan Hata ni Debata na gabe Jesus na tubu di Betlehem, jumpang hita hasangapon ni Debata. Dipaunsat hasalaanta isian hita, gabe boi ma taungkap simalolongta di jolo ni Debata, jala tabereng dompak Ibana paadopadop bohi. Di si ma taida hamulioan ni “Sada Halak” namanghaholongi hita jala namanghalomohon hita rap dohot Ibana saonari nang ro di saleleng ni leleng na. Boi taida hamuliaon-Na, ala nunga maradi hita mangalului hamuliaon-Na I marhite usahanta, manang marhite pangantusionta sandiri. Di bagasan Hata na nabinasabasahon na tu hita i nama hita marnida hamuliaon ni Debata. Hata na namamunjung I, na rap dohot Debata, Debata do Hata i, gabe daging ma Hata i jala mian di tongatonganta, gok asi ni roha dohot hatutuon. Hata I ma dilehon tu hita ganup marsadasada sadarion.Di bagasan Hata i do hangoluan; laos hangoluan i do panondang ni hajolmaon. Marlas ni roha ma hita jala marolopolop. Amen.

Pdt. Dr. Burju Purba

Bagikan Postingan ini: