Psalmen 66:1-7

MASIBETA-BETAAN MAMUJI JAHOWA  ALA PAMBAHENANNA NA BOLON I

 

Horas, Syalom!

Damang, dainang nang angka naposo bulung; nahinaholongan di bagasan goar ni Tuhanta Jesus Kristus. Barita nauli tu hita sadarion on ima natarsurat di bukku Psalmen bindu 66 ayat 1-7 taringot tu  panjouon (jou-jou) ni angka naung pinalua ni Tuhanta,  asa saluhut pangisi ni tano on marende mandok mauliate,  marolop-olop manghalashon denggan basa ni Jahowa. Jala ido angka parbue ni ulaon paboa naung sinonggopan  ni Tondi ni Tuhan i songon natapestahon sadarion di hasasaor ni Tondi Parbadia. Alani i naeng jo parrohahononta dua ondolan ni barita naulion nanaeng auhononta secara pribadi nang keluarga pe (hombar tu taon keluarga):

Naparjolo:

Mangarahon sude jolma asa mamuji Debata

  1. Hata namarsiharaan manang masibeta-betaan dang apala hata naasing be i di hita. Tahasomalhon do namasiharaan, masibeta-betaan di angka ragam ni ulaon manang namasa. Marsiharaan manang tatogihon do dongan isara ni tu pesta asa rap udur, tu gareja asa rap marminggu, tabeta-beta do dongan asa rap marguru ende, mar PA, PW, PNB, marsermon. Masibeta-betaan do dakdanak Sikkola Minggu asa rap marsikola Minggu di manogot ni Minggu i. Las be rohana marsibeta-betaan. Jala sipata masa do mangarahon angka dongan nabaru tinanda asa rap sahuria dohot iba ala binoto dang apala tangkas dope parhuriaonna ala baru nasida di luat i. Taarahon do dongan asa rap mangula (bekerja sama), sapardalanan, nang angka naasing i dope.

Mangarahon tu angka nadenggan i, gabe sitiruon ma i sian hita, asa sude hita marsiharaan, maasibeta-betaan, masijouan, jala masitogihonan tu angka ulaon nadenggan. Tarlumobi ganup keluarga boi masibeta-betaan jala rap udur mamuji Debata jala rap taruli di haluaon sian Tuhan.

Molo tajaha di Psalmen 91:1-2 dibeta-beta parpesalmen i do asa rap mamuji Tuhanta; Ai didok: “Beta hamu itaendehon ma Jahowa, itaolophon ma  partanobatoan ni hatuaonta! Itadapothon ma tu jolo ni bohina marhitehite pujipujian, itaolophon ma Ibana marhitehite ende!”  Jala di Psalmen 95:6 didok “Beta hita….”  Beta-beta marhua dijouhon manang diarahon parpesalmen i? Didok dijou-jounai; “Beta hita manungkap dohot marsomba, marsinggang ma hita tu jolo ni Jahowa, Sitompa hita.”

Nian sipata marsidalian do jolma molo niarahon, nibeta-betana tu angka nadenggan manang tu ulaon huria. Ra sipata begeonma angka alus namarsidalian; isarana: “Ima nei apala adong dope ulaonku tung mansai ringkot jala dang tartadinghon ahu nuaeng, manang: Hurang sehat ahu bah… hamu ma jo, manang: Ima da dang tarpatupa ahu dope nuaeng, maol ni sihumisik on… Dohot lan angka naasing.  Nahumansit molo sulpak manang gotos dope alusna dohot molo laos diinsahi muse hita ala tabeta-beta ibana tu ulaon nadenggan i. Ra hea do masa alus gabe tarbege; “Paburju-burjuhon ho, sai hira holan ho do namarTuhan”, “Pahebat-hebathon ho, sai hira ho nama nampuna gareja i, maos ho na tu gareja ganup tongkin”. Manang molo niarahon jala sai niarahon, ra olo do mandok, “Ahhh anakmu atur..” ninna.

Alai nangpe songoni ianggo hita naung mananda Tuhan i dohot naung manghilalahon denggan basaNa, ingkon naeng ma manontong sai marbeta-beta tu nadenggan do jou-jounta. Ai ingkon taparhatopot do ai godang do tong nadapotan pasu-pasu, las ni roha, nang haluon pe sian Tuhan i marhite ala sai tabeta-beta tu harajaon ni Debata. Di Psalmen 122:1 diparhatopot si Daud do; “Las do rohangku di angka na mandok tu ahu: Beta hita manopot bagas ni Jahowa!”. Tontu ndada holan si Daud naung hea marlasni roha ala dibeta-beta ibana manopot bagas joro. Godang dope nang angka naposo bulung manghatindanghon; “Tuani ma diarahon si anu ahu namasahai marguru tu PNB, marsiajar sian hata ni Tuhan, marminggu, gabe lam sadar ahu, beruba ahu jala boi mangatusi ulaon nadenggan, Asi do roha ni Tuhan sai lam jumpang ahu angka pasu-pasu i. Dapot nahusangkapi dohot nahujalahi, jala las do rohangku nuaeng. Aut soi ra, nunga jolma naso hasea ahu nuaeng. Mauliate ma di beta-beta ni dongan on” Alani do nang sipata adong hamaolon di hita namambeta-beta, unang ma manginsurut, ai torop do tong namanjanghon dohot namanghalashon.

Tarlumobi di keluarga ni HKI, asa saluhut taruli di haluaon i, gabe keluarga Harajaon ni Debata naneg saluhut rap pamuji-muji di Tuhan. Alani porlu masibeta-betaan sude anggota keluarga. Sotung adong jumpang alus ni sahalak ina isarana uju disungkun pandita; “Ai didi amanta  inang, dang huida di gareja nangkinon? Alus ni inanta i, “Ima da amang pandita, toe ma disi amang ai siboan dirina be do tu surgo i”  Ra nian alus i ala ni loja ni inanta i nama i namangarahon amanta i asa marminggu hape laos so hea ro. Alai laos marhite taon Keluarga on di HKI, naeng do sude keluarga ni HKI mandok songon si Josua (24:15B); “…alai anggo ahu dohot donganku sajabu, ingkon Jahowa do oloannami.” Laos hita sakeluarga pe mandok, ingkon Jahowa do pujion nami, oloan nami, ihuthonon nami.

Sude keluarga parsidohot gabe sitindangi, namambeta-beta. Ai sada panghorhon ni hasasaor ni Tondi Parbadia; didok gabe sitindangi ni Kristus ro tu ujung ni tano on. (pat. Ul.Ap.1:8)

  1. Alai olo do jumpa masa sipata di hombarta namarsibeta-betaan, namarsiharaan dang tu nadenggan, alai baliksa tu na roa do. Marsiharaan do angka namardongan hian asa patagas hansit ni rohana. Dihara, dibeta-beta inanta nasada do donganna asa marmusu tu iananta naasing atik pe sapunguan do nasida di PW parikamis, parariSelasa, dna. Manang ni punguan ni ama, ra termasuk deba sipata sian angka parhalado gabe marbolat ala marsibetaan tu na masihosoman. Masa do i,  jala atik naung masa doi di hurianta? Olo do marsibetaan angka naberkeluarga tu angka namarmusu gabe so masipangkulingan nang pe namansai uli hian parsaorannabe. Boi hian do masitariparan nauli nadenggan songoni dohot di sipanganon, alai dung masa namasibeta-betaan tu namarsihosoman, dang jumpang be pangalaho nadenggan i. Sai masipahata-hataan, masipabusukbusukan jala masiburaan nama nasida. Hape jea do i dinasida sude. Olo do ra adong ama sian hita naung hea magarahon anakhonna naso mangantusi manang aha taringot tu namasa uju najolo, asa marmusu tu namboruna. Manang sahalak ina mangarahon amantana asa marmusu maradophon ibotona, ima eda ni inanta i. Ra godang dope naboi hatahonon taringot tu namarsibeta-betaan tu angka ulaon na so denggan jala naso sitiruon.
  2. Alai ianggo di Parpesalmen on justru mangajari hita asa masibetaan laho mamuji Jahowa asa saluhut tano on mandok puji-pujian tu Jahowa Debatanta i. Asa sude taruli haluaon dohot pasu-pasu. Asa sude pasangap (memuliakan) jala dang adong nagabe mangaleai Tuhan i alani pangalahonta. Haru angka namamusui (namnghasogoi hian) gabe ro sude marhatopothon, Jahowa do sipujion. Tajaha ma ulakhon ayat 1-4 songonon:1 Marolopolop tu Debata ma, ale sandok tano on! 2 Endehon hamu ma hamuliaon ni goarna, marmulia bahen hamu pujipujianna!3 Dok hamu ma mandok Debata: Tung na songkal do angka pambahenanmu! Binahen ni hinatimbul ni gogom ingkon marsomba tu Ho angka musum. Ingkon liat portibi on tahe marsomba tu Ho sogot, jala mangendehon Ho, mangendehon goarmu

Napaduahon,

Mangarahon asa jonok tu Tuhan jala Patubegehon angka ulaon ni Debata

Angka amang, inang nang naposo bulung di hita saluhutna naniasian ni Debata!

  1. Jou-jou tu hita nang saluhut nahumaliang pe, ndada holan mangendehon, mamuji marhite olop-olop alai didok di ayat 5, “Ro be ma hamu marnida angka pambahenan ni Debata, tung na songkal do pangarajaionna di manisia.” Didok jala dipatangkas asa ro (datang) marnida pambahenan ni Jahowa. Namarlapatan do i asa ‘tapajonok’ tu Ibana. Alani ndada boi holan hatanta, endenta mandok mamuji-muji Tuhan, hape anggo roha tong dope dao sian Tuhan. Olo do ra adong sada manang dua halak ama, sedang marminggu dope, marende, baru markoor Ama, alai ianggo rohana dang tu jamita i, tu dia do? Tu angka donganna ra naung sahat nuaeng di inganan panghailan (kolam memancing ikan). Namangihut jolma naung mamuji Tuhan, ingkon jumonok ibana nang di panglaho (haubaon ni roha/ nunga bertobat). Tontu hata “ro be ma hamu marnida’ jou-jou doi asa lam jonok, solhot marnida dohot mata ni haporseaon nang mata ni pardagingon. Dang holan nabinege sian halak be, alai dohot gabe namenyaksihon, manghilalahon.
  2. Laos asa i do hape dung masibetaan hita tu angka ulaon nadenggan i, laos masibetaan do hita pajonokhon diri tu Debata ai Ibana do sipalua nang di hita. Laos ingkon hatahononta, tonahononta, warishononta do ulaon nabinahen ni Debata, asa gabe sejarah nang i nuaeng ndada holan najolo. Jahowa napaluahon ompu ni Israel, si Musa dohot bangso i sian parhatobanon ni Mesir tu tano Kanaan, songoni do ditonahon tu sundut namangihut. Ai didok do di ayat 6 i sada sejarah di Israel naung binahen ni Jahowa halongangan, dohot ulaon nabolon paluahon bangso nabolon i. Ahama i didok parpesalmen i, tajaha ma; “Nunga dipauba Ibana laut i gabe mahiang, mardalan pat do nasida manaripari batang aek i, marlas ni roha do hita uju i mida Ibana.(Ia mengubah laut menjadi tanah kering, dan orang-orang itu berjalan kaki menyeberangi sungai. Oleh sebab itu kita bersukacita karena Dia,). Antong ingkon dohot do i sude sipabothononhon, asa martinanda tu Debata angka natarahon i marhite sejarah naung masa najolo i. Laos ido sejarah ni Israel, sejarah paboa didongani, dipasu-pasu jala dipalua Jahowa nasida

Angka amang, inang nang naposo bulung!

Dungkon saor Tondi Parbadia, gabe sitindangi ni Kristus do hita.

Antong sai mamuji-muji ma hita tu Jahowa jala ingkon sai puji-pujian ma haruar sian hita. Ai nunga ro Kristus tu portibi on, dilehon diriNa tu hau pinarsilang asa malua hita sian dosa, gabe mardame dohot Debata. Dungi  mulak mangolu do Ibana sian namate jala hehe manaluhon hamatean asa mangolu nang hita, nangkon tu banua ginjang parade inganan ni naporsea, jala nuaeng tapestahon Hasasaor ni Tondi Parbadia asa gabe sirtindangi hita di saluhut pambahenan dohot ulaon ni Debata nabolon i tu saluhut portibion. Antong unang lupa hita gabe sitindangi do hita tu keluarganta nang nahumaling pe. Taarahon, tabeta-beta ma saluhut nahumaliang hita mananda dohot manghilalahon pasu-pasu nang haluaon pinatupa ni Tuhanta di bagasan Jesus Kristus. Unang ma adong mamambeta-beta donganna tu angka ulaon naso lomo ni roha ni Debata, tu hamusuon, tuparbolatan, tu namarhosom, tu hatangkangon. Alai marsibeta-betaanma tu ulaon harajaon ni Debata asa malua hita nang keluarga dohot saluhut ruas ni huria, Amen.

Salam: Pdt.Hopol M.Sihombing,STh

Catatan:

Sela: sada tanda musik do i di Psalmen namarlapatan ‘maradi satongkin soara/ holan musik’. Jadi molo adong hata ‘Sela’ di pesalmen i, dang si jahaon i. Molo jumpa hata songoni, maradi ma satongkin, dungi di jaha muse ayat selanjutna.

Bagikan Postingan ini: