JAMITA MINGGU, 19 FEBRUARI 2023 – MINGGU, ESTOMIHI

MARSITIOPAN TU JESUS RAJA NA MULIA

PSALMEN 99:1-9

I. Patujolo
Molo adong sungkunsungkun tu hita : aha do tujuan muna laho marminggu? Aha do alusta disi? Ra olo do godang alus tusi ala marragam motivasi ni jolma laho marminggu tu gareja. Adong na mandok ia borhat marminggu tu gareja ima laho mamuji Tuhan, manangihon barita nauli, dohot na manjalo pasupasu na sian Tuhan i. Alai adong do alus na asing sian i. Alai nang pe songoni, ganup hita pasti do boi mangalusi sungkunsungkun i, ima parmingguan na tadohoti bertujuan laho mamuji Tuhan i, mangendehon hasangapon-Na.

Torop do halak Kristen naso sian ias ni rohana laho mamuji Tuhan Debata. Pamujian na pinasahat nasida i holan sekedar rutinitas sambing do, hape diboto nasida do tu ise pamujian i dipasahat, ndada tu jolma alai tu Tuhan Debata do. Molo diboto do pamujian i dipasahat tu Tuhan Debata, ingkon sian ias ni roha do pasahathon pamujian i, jala ido na ringkot. Tingki na mamuji Tuhan i hita, ingkon hibul do rohanta tu Ibana, unang adong na mambahen hita gabe dang fokus tu pamujian i, unang adong di bagasan roha : late ni roha, rimas, hansit ni roha, sogo ni roha, dna. Parpsalmen patuduhon tu hita boha do cara dohot sikap na naeng tapatuduhon laho mamuji Tuhan i. Di bagasan turpuk on, ditogihon do angka na porsea laho manghatindanghon hasangapon ni Tuhan i marhite ende pujipujian. Boha do pamujian i dipasahat parpsalmen? Antong laos tapaihutihut ma turpuk on.

II. Hatorangan Ni Turpuk
Parpsalmen mandok ia Tuhan i Raja do, Raja na mangatasi saluhutna angka raja-raja, Raja saleleng ni lelengna. Ido umbahen gabe angka hitir ma angka bangso maradophon Ibana. Raja na gok huaso do ianggo Tuhan i, tongam do Jahowa di Sion, jala timbul do Ibana gumomgom sude bangso.

Molo taingot do tingki naeng masuk Jesus tu Jerusalem, dijangkon do Ibana songon sada Raja na sangap jala manghirim do bangso Israel asa tutu ma haroro-Na i laho paluahon bangso i. Alai ndang songon sangkap nasida i na masa. Alai nang pe songoni, dipatupa Debata do haluaon tu bangso i marhite Raja na ro i, Jesus Kristus, marhite cara na binahen ni Debata. Raja do Kristus i jala Sipalua, ndang songon angka raja na di portibion Ibana na mambahen pasukan dohot rakyatna gabe korban asal ma selamat raja i. Kristus i mangalehon ngoluNa asa malua do bangso-Na. Tuhan i gabe Raja di ngolunta, ndada holan ungkapan sambing alai naeng mangalehon pangantusion tu hita ia manang ise na porsea maradophon Ibana sai na ramotan-Na do jala tongtong dipasupasu.

Diarahon parpsalmen do asa dipuji ma Jahowa jala mandok mauliate tu Ibana. Saluhut bangso ingkon mamuji Jahowa tau hasangapon dohot hamuliaon di Ibana. Raja na bonar do Jahowa jala na manghaholongi uhum, nunga dipamasa Jahowa uhum dohot hatigoran di Jakkob. Dung dipuji GoarNa dohot hasangaponNa i, dipatimbul ma Jahowa jala marsinggang ma angka na porsea di adopanNa. Timbul do Jahowa mangatasi angka langit, songon ende ni parpsalmen na mandok “sai patimbul ma dirim, ale Debata, tu atas ni langit, hamuliaonMu, tu sandok tano on” (Psalmen 57:6).

Sai martinangi do Jahowa di joujou ni angka na porsea. Ditangihon Jahowa do tangiang ni angka naposoNa ima si Musa, Aron, dohot si Samuel na gabe perantara antara Tuhan dohot bangso i. Ditogihon parpsalmen do bangso i asa patimbulhon Jahowa marhite mangendehon ende pujian i tu Tuhan Jahowa. Boha do muse hita laho patimbulhon Jahowa? Ima marhite na mangihuthon Jesus Kristus na patuduhon haunduhon dohot haserepon tu Jahowa jala lomo ni rohaNa do na mangulahon hombar tu sangkap ni Ama i, songoni ma caranta laho patimbulhon Jahowa.

Dipatuduhon Jahowa do habadiaonNa marhite angka naposo napinillitNa. Uju i di bagasan ombun na marsijongjong do Ibana manghatai tu bangso i, alai nuaeng manghatai Ibana tu hita marhite Jesus Kristus, na Badia sian Debata Jahowa (Joh. 6:69). Dipatuduhon Jahowa do habadiaonNa di bagasan Jesus Kristus, jala ujungna marhite silang na badia i. Gabe hagogoon do i di hita laho mandalani ngolunta siganup ari. Songon sada Raja, Ibana ma na manguluhon hita angka bangsoNa marhite roha hapantason. Di bagasan habadiaon ni Tuhan i, angka na jungkat dohot parjahat ndang boi bertahan lama. Molo di bagas joro-Na do hita na marlapatan do i na dibagasan gomgoman ni Jahowa do hita, ima habadiaon. Molo taringot tu habadiaon i ima ngolu na marasing dohot ngolu na adong di portibion. Molo dibahen jolma tu hita angka na jat, ndang balosanta i hombar tu nabinahenna, alai ingkon boanonta i di bagasan tangiangta.

III. Sipahusorhusoron
Dang adong naso boi diselesaihon Jahowa di angka persoalan manang perungkilon na di adopi angka jolma manisia. Margogo do Ibana laho mangurupi angka bangsoNa, alai sipata ragu do jolma di hagogoon manang huaso ni Jahowa i jala ndang rade roha ni jolma i laho diurupi Jahowa di angka sitaononna be. Molo tadok do Tuhan i do Raja, unang be adong keraguan di hita laho mangasahon gogo nang huasoNa laho mangurupi hita. Molo tadok do Tuhan i Raja, ingkon unduk do hita maradophon Rajanta i jala sangap bahenonta Ibana. Ringkot do hita angka na porsea laho manghatindanghon habalgaon dohot hasangapon ni Rajanta i, asa lam torop muse angka jolma gabe mananda Raja na itasomba i jala gabe porsea ma nasida.
Tuhan i ma Raja di ginjang ni saluhutna jala na marhuaso di saluhutna saleleng ni lelengna. Martua ma hita naung porsea ia Tuhan i do Raja na mangatasi saluhutna jala Ibana do marhitehite Jesus Kristus na paluahon hita sian dosa. Marolopolop ma angka bangso laho marsomba tu Tuhan Jahowa i, marsinggang tu jolo ni sidegedegeon ni patna, na badia do Ibana. Martua ma hita naung ro marsomba tu Ibana, Debata na badia do Ibana na itasomba, itapuji, jala na itapasangap. Nunga diparade Ibana na umuli di hita di hangoluan naso ra suda i. Sai dipatimbul ma Jahowa, joujou ma hita tu Ibana, sai na tangihonon ni Debata do joujounta i jala dialusi. Martua ma hita naung manjou goar-Na di saluhut angka na masa di ngolunta, sai martinangi do Jahowa Debatanta i. Amen.

Kunjungi juga kanal YouTube HKI untuk mengetahui informasi seputar pelayanan HKI.

Bagikan Postingan ini: