Jesaya 63:7-9, JAMITA PESTA NATAL II Evangelium, 26 DESEMBER 2016

JAMITA PESTA NATAL II, Evangelium, 26 DESEMBER 2016

Nats : Jesaya 63:7-9

 

Thema: Baritahon Ma Denggan Basa ni Debata

Nga tahalashon be pesta hatutubu ni Tuhan ta Jesus Kristus. Halalas ni roha godang dihatutubu ni Sipalua i, ido umbahen na tapataridahon  marhite-hite haimbaruhon di parabiton nang di parrohahon dohot dilasniroha di pesta natal on. Molo angka nametmet (dakdanak Sikola Minggu), mansai talpe do i idaon di las niroha ni nasida molo jumpang ari pesta. Marbaju na imbaru, marsipatu na imbaru, jala uli ma i idaon jongjong di tingki marliturgi di Gereja.

Sonnari  sahat ma hita tu Minggu parpudi di taon 2016 on. Andorang so tasalpuhon minggu parpudi on, dipangkulingi Debata do hita marhite-hite hataNa, asa tarimang-rimangi jala tabilangi  balga ni panarihon jala pangaramotion ni Debata tu hita, sian tingki tu tingki, minggu tu minggu, bulan tu bulan , jala taon-tu taon, tongtong do anggo asi ni rohaNa dihita. Jala bilangi songon dia ma balga ni pasu-pasu ni Debata tu hita manipat sataonon. Angka pasu-pasu aha ma natajalo manipat sataonon sian Debata? Jala, nunga tahamuliatehon i marhite-hite puji-pujian tu Debata? Marhite turpuk on, naeng dipaingot hita, asa taboto songon marhite-hite i, naeng ma nian tabaritahon i tu saluhut portibion, asa sude jolma taruli pasu-pasu di holongNa na manontong i.

 

Patujolo

Ibana sandiri na mamillit hita gabe ianakon-Na. Sada halaslas niroha bolon do dihita on. Ndang be mabiar hita diangka pergumulan nang di sitaonon dingolunta, nang pe sipata ingkon maol dalananta, alai pos ma rohanta, nunga tubu Tuhan Yesus dihita na paluahon hita. Unang ma nian holan tubu tu portibion sambing, alai tubu ma nian Ibana jala tajangkon dibagasan rohanta.

Andorang so turpuk jamita on, dipatorang do tangkas songon diama Debata manghaholongi bangso Israel marhite-hite panguripionNa tu bangso Israel. Taboto do songon dia roha dohot pangalaho ni bangso Israel, na tangkang roha, ala ni tangkang jala ginjang ni rohana, tama do nian nasida  hona uhum ni Debata. Roha na munggil-unggil roha nasida, ndang adong jumpang hasetiaon, sipata gabe sipangoloi, alai  muba muse gabe halak nalilu na so tumanda holong ni Debata. Alai sian sude  hajungkaton ni bangso Israel i, ndang i mambahen mansohot jala sumurut holong ni roha ni Debata, sai tongtong do marpamuati  roha ni Debata maradophon nasida, jala sai di patudu Debata tongtong pangurupionna tu nasida. Ai Tarrimas pe Debata asa diboto nasida do holong dope roha ni Debata mida nasida, ai ndada lomo roha ni Debata mago nasida jala tu hamatean saleleng-lelengna.

Jala di panghilalahon bangso i do i tangkas, songon dia ma  godang ni asi-asi na nilehon ni Debata tu bangso i di tingki na manaon parhatobanon bangso Mesir nasida.Ido umbahen di turpuk on dipangidohon nabi Jesaya do tu bangso i, asa tongtong marningot bangsoi di sude denggan basa ni Jahowa huhut mamuji asi ni rohaNa alani godang denggan basaNa.

 

 Hahonoan ni Turpuk

Baritahon ma Balga ni Holong ni Debata tu ho

Ayat 7: Sai baritahononku do angka denggan basa ni Jahowa, angka pujipujian ni Jahowa, ai ido na tama marningot sude na binahen ni Jahowa tu hita.  Lapatanna, di rajumi Nabi Jesaya do, songon dia ringkot ni na sai tongtong marningot sude denggan basa ni Jahowa tu bangso Israel. Marhitehite na marningot sude denggan basa i, ndang muramura be munggil rohanasida laho maninggalhon dohot manghalupahon denggan basa ni Debata. Gabe roha parbarita denggan basa i ma nasida, jala gabe bangso na mamuji sude angka pambahenan ni Debata.  Nga tung godang dosa naniulahon bangso na pinillit ni Debata i, pola do di arsahi nasida Tondi na badia i  (ayat 10). Ala ni i, ingkon topotan nasida dosa na i di jolo ni Debata, asa unang tarrimas Debata maradophon nasida. Alani i do didok Si Jesaya, songon tanda panolsolion ni pambahenan nasida i naso di halomohon Debata, naeng ma nasida marningot denggan basa ni Debata huhut mamaritahon sude pambahenanNa.Marningot dohot mamaritahon, ido sada tanda ni naung manolsoli jala tanda ni haimbaruon di jolo ni Debata.

Songoni do nang hita dipartingkian on. Mansai jotjot do hita dibagasan hasusaan ala ni ragam ni parsoalan na ro tu ngolunta. Alai jotjot do tong boi hita monang laho manaon jala mamolus hasusaan dohot parungkilon i. Ta hilala do songon dia Debata mangurupi hita. Alai tung mansai jotjot do hita lupa disude denggan basa na binahen ni Debata tu hita. Ndang taharingkothon laho mamilangmilangi dohot marningot sude denggan basa i. Sipata, molo ditingki hasusaan, ta sungkun Debata, boasa ndang diurupi hita, hira na dao Ibana sian hita. Songon bangso Israel na manungkun Debata; Boasa tung diloas ho hami lilu sian angka dalanmu, ale Jahowa? Boasa tung dipatangkang ho rohanami, unang huhabiari hami ho? (ayat 17). Marhite turpuk on, dipaingot hita andorang so tasalpuhon taon 2016 on, asa tongtong ta ingot mandok mauliate tu Jahowa ai pardenggan basa do Ibana, ai ro di salelenglelengna do asi ni rohana! ( Mazmur 118:1). Ta ingot ma angka denggan basa i, sian na mamungka taon 2016 sahat tu na mangujungi taon hita, marhitehite i boi lam tamba pujipujianta tu Debata jala tabaritahon i tu sude sandok portibion. Songon dia pe na ta dalani pardalanan ni ngolunta, naeng tongtong ingotonta, anggo asi dohot holong ni roha ni Debata tu bangso Israel nang tu hita tongtong do ro disalelengnilelengna.

 

Ibana do gabe Sipalua dihita            

Ayat 8-9 :  Bangso Na, Ibana Sipalua, diompa ganup ari, sian na robi dope.

Debata do na mamillit bangso Israel  gabe bangso na pinillitNa, jala gabe anakNa. Ido mambahen tung balga holong ni roha ni Debata tu bangso i, jala sai mulakulak rohaNa manghaholongi, nang pe mulakulak bangsoNa i mangulahon dosa.  Ibana sandiri do gabe Sipalua nasida na paluahon nasida di tingki hagogotan, lobi sian i, diompa nasida ganup ari sian na robi dope. On do na gabe halalas ni roha godang nang dihita di tingki pesta Natal ta nuaeng. Debata na manongos AnakNa Tuhan Yesus Kristus tubu tu portibion, na gabe Sipalua hita sian dosa ta. Ibana sandiri na mamillit hita gabe IanakonNa. Sada halaslas niroha bolon do dihita on. Ndang be mabiar hita diangka pergumulan nang di sitaonon dingolunta, nang pe sipata ingkon maol dalananta, alai pos ma rohanta, nunga tubu Tuhan Yesus dihita na paluahon hita jala padamehon hita rap dohot Debata, nunga di tobus hita sian hamatean gabe manean hangoluan salelenglelengna. Naeng ma nian nang di tingki on, mansai balga asi ni roha ni Debata tu hita na patut ingotonta jala hamuliatehononta jala huhut tabaritahon i tu saluhut na humaliang hita.Unang ma nian holan tubu tu portibion sambing, alai tubu ma nian Ibana jala tajangkon dibagasan rohanta. Nga tubu Tuhan i di rohanta be?

 

Diakones Rusmawati Gultom

Bagikan Postingan ini: