PSALMEN 84 : 1 – 7, EPISTEL MINGGU XXII DUNG TRINITATIS, 23 OKTOBER 2016

EPISTEL MINGGU XXII DUNG TRINITATIS, 23 OKTOBER 2016

NATS : PSALMEN 84 : 1 – 7

 

MANANG ISE NA PATUTORU DIRINA DI ADOPAN NI DEBATA, DIPATIMBO IBANA

 

  1. Panbonsiri/ Patujolo

Ende Psalmen, manang didok “mizmor” dibagasan hata Ibrani, manang didok  mitsmor marlapatan ende mardongan uning-uningan. Ende laho mamuji goar ni Debata, nadipasahat di bagas joro ni Debata. Dipasahat do Ende laho mamuji goar ni Debata, ala denggan basa-Na dohot sude angka naung pinasahat-Na tu ganup ruas-Na. Songoni ma nang di Psalmen 84 on, di dok “Ende sian angka anak ni si Kora”, ima kaum lewi namartugas laho menggubah syair manang lagu nalaho sipasahathonon di bagas joro ni Debata. Adong do piga-piga pondapot ni angka jolma taringot ise do ulaning namanurat ende on. Alai boi do taida naadong kemiripan ni Psalmen 83 on dohot Psalmen 63 nasinurat ni si David. Sian piga-piga pondapot i didokdo ala naung lao si David sian hutana  binahen ni pangalaho si Absalom, anaknai. Laho ma ibana sian hutana i, lungunma rohana manadinghon huta i, dang alani tininggalhonna harajaonna, alai disiala ni pangalaho ni gellengnai gabe dao ibana sian huta nabadia, huta inganan ni angka jolma namanghasiholhon Debata di bagasan parsaoran dohot Ibana. Songonima sihol ni roha namanurathon Psalmen on, dibahen gabe dao ibana sian joro ni Debata. Gabe tubuma sihol ni rohana laho mulak muse tu huta nabadia i, naeng muse ibana jonok tu joro ni Debata, neng sihol rohana masuk hubagas joro-Na i laho mamuji goar-Na. Alai, situasi pambarontakan ni angka parjahat umbahen dang boi dope ibana mulak tu si.

Taringot tu joro ni Debata, marhite turpuhon dipatuduhon do dihita mansai sihol do roha ni angka jolma namarholong ni roha mida Jahowa tu bagas joro-Na. Aha naboi diida di bagas jorona? Naparjolo sahali tontu ma Debata i. Digoari sipanurat i do Ibana Debata Zebaot, ima Debata na manompa portibion dohot namamasu-masu naung tinompana. Debata Zebaot namaringanan di bagas joro-Na i, ima Debata natontong pabadiahon bagas joro i. Badia ma nang ulaon pamujion tu Debata disi. Jala didokdo di turpuhon hata “angka alaman ni Jahowa” (ay.3) namarlapatan tung mansai atur do tahe inganan nabadia on dibahen Debata Jahowa, asa badia ma tong ganup jolma na masuk hu bagas i, laho mamuji pasangaphon Ibana. Marhite-hite i, naeng ma didok dihita nuaeng, manang ise ganup jolma masuk hu bagas i, angka jolma nabadia mai, manang jolma nagabe badia ibana ala naung dipadia Debata dibagas joro-Na.  Alai nuaeng didok muse ma nagabe ummuli ma angka amporik namambahen angka sarangna di bagas joro-Na i, haru angka amporik i gabe dapotan lasniroha ala boi jonok hubagasni joro i. Nda holan i, alai gabe maranianakhon disi. Jala ala di si do sarangnai, gabe sai mulak tusi ma angka amporik i.  Alai ianggo ibana tutu gabe dao do sian huta nabadia i, huta inganan ni joro ni Debata i. Tudia ma ibana tutu laho saonari? Alai sada do panghirimonna, ayat 6 namandok “martua ma halak ia dibagasan Ho hagogoonna, ia rohanasida dibagasan manuju dalan natigor”. Ima angka jolma namambahen sangkap laho mulak muse tu inganan nabadia i, inganan namambahen jolma lam jonok tu Debata Jahowa. Ima angka jolma naolo patutoru dirina laho patimbohon goar ni Jahowa.

 

 

  1. Hatorangan ni Turpuk

            Dihatiha nuaeng on, godang do masa angka situasi namambahen hita gabe targasip sian haporseaonta di Debata namangolu. Lam ma tutu nuaeng, gabe godang do angka jolma i, na lam sangap di rohana ia dao ibana sian Debata. Nuaeng pe, godang do taida angka kegiatan kerohanian nungnga diganti be dohot sarana hiburan. Acara huria diganti dohot acara hiburan keluarga. Manang godang do ditingki ari paradian i, ganup jolma dang be tu bagas joro ni Debata, alai gabe tu parlapoan. Apalagi muse molo adong saotik parsalisihan di angka donganna jolma, olo do gabe manimbing sian Debata; gabe dang olo be martangiang, ndang olo be marminggu, ndang olo be mangihuthon ulaon ni haporseaonna. Olo do ra, molo masa sada situasi tarsongon namasa di Psalmen on, pintor mura do ra hita mandele, jala mura mambahen keputusan laho manimbing sian dalan ni Debata. Godang angka pingkiran nasala gabe taihuthon dingolunta; taetong do molo ro angka sitaonon i dihita, gabe ndang holong be rohani Debata marnida hita. Alai ianggo si sipanurat Psalmen 84 on, tung mansai denggan do sude dialuhon ibana tu Debata, angka nahansit natinaonna marhite-hite ende pamujion tu Debata. Disiala i, gabe diloas ibanama Debata laho mangurupi ibana asa tung tulus panghirimonna boi muse ibana mulak tu huta nabadia i, ima huta inganan bagas joro ni Debata.

 

  1. Jolma na patutoro dirina ima jolma nasihol tu bagas joro ni Debata

Sihol tu bagas joro ni Debata, tontu sahali ala sihol do ibana di Debata. Didok nangkaning, manang ise jolma namian di bagas i, ima angka jolma natarpasu-pasu. Nasida ma angka jolma namarlasni roha. Martuama angka namangingani bagasMu (ayat 5). Didok, hata martua, namarlapatan “tarpasu-pasuma” angka jolma namangingani bagas ni Debata. Konteks namangingani inganan najonok tu joro ni Debata ima angka halak Lewi dohot angka sintua ni malim namangula di bagas ni joro i. Antong, molo tabaen do nangkaning sipanurat on margoar si raja David, adong ma sada keirian diibana tu angka pangula bagas i. Di ida ibana do hape, nauringkot nuaeng ndang status sebagai raja, manang habadiaon nagabe sahalak penguasa. Justrus nagabe naumringkot diida ibana ima ulaon angka pangula i di bagas jorona. Tontu sahali, ndang sude jolma boi mangula ulaon ni Debata di bagas joroNa asing ni angka naung tarpillti hian. Antar songoni ma nuaeng andung ni si raja David on, nuaeng dao ma undenggan di nasida angka pangula na di bagas joro i sian statusna na gabe raja. Alana raja pe ibana alai ianggo nuaeng dao do ibana sian bagas i. Ndand songoni di angka sintua ni malim, dohot diangka halak Lewi, ganup ari sai di bagas joro i do nasida. Aut boi ma nian ibana tinggal di bagas joro i ganup ari, asa ganup ari ibana jonok dohot Debata.

Nuaeng, masa do dipamingkirion ni jolma, tarpasu-pasu ibana nian di angka naniulana, alai unang pola jonok hu Debata. Molo boi, unang pola martangiang, unang pola marminggu. Tontu sahali sada ginjang ni roha do pamingkirion ni jolma nasisongon on. Alana didok dihita, holan jolma naolo masihol di Debata do jolma natardok tarpasu-pasu. Molo sai lam ginjang rohana dipamingkirionai, tontu ma dang lomo rohani Debata disi. Disialai dipaingot tuhita marhite turpuhon; unang ma nian hita gabe jolma najotojot mambahen jut ni roha ni Debata. Marhite sude angka ulaonta. Ganup hita mangulahon aha naporlu dihita nuaeng; ima ulaon asa boi hita mangan, marpahean nauli, boi hita manorushon parsingkolaan ni ianakhonta, boi hita manutup sude angka tagihan; listrik, aek, telepon lan naasing. Alai unang antong gabe mago hita di naringkot nuaeng, ima pajonokhon diri tu Debata. Jonok hu Debata, marlapatan do i jonok hu bagas joro ni Debata. Ala ganup jolma na lam manghabiari Debata, lam tamba do angka bisuk di nasida laho mandalani ngoluna siganup ari.

 

  1. Ganup jolma na patutoru dirina gabe tangi mamuji dohot martangiang

            Tontu sahali, ndang tardok molo naung ro tu bagas ni Debata, gabe jolma naung tangi mamuji dohot martangiang di Debata. Alai dipaingot tu hita, diharoronta tu bagas i ima alani sihol nirohanta laho manomu-nomu Debata. Ro pe hita hu bagas i nda alani rutinitas sebagai halak naporsea di Debata, alai alani kebergantungan penuh hita di Debata, naingkon Ibana do hagogoon di ngolunta. Disiala na gale hita antong, gabe tapangidoma gogo sian Debata asa boi hita margogo mangadopi angka hangoluan i (Poda 18:10). Gabe marpanghirimon hita di Ibana (Psalmen 40:4’ 146:5). Nasida on ma jolma na tardok napatutoru dirina di Jahowa. Ima angka jolma na tulus rohana ro pajononkhon dirina tu Debata di bagasan joro-Na. Raja David sihol hian rohana naingkon mulak ibana tu angka alaman ni Debata di bagasan joroNa asa dapotan gogo ibana sian Debata laho mandalani angka namaol di ngoluna. Disialai di dok ibana, tung mansai tabo ma niang angka sintuani mal ii, dohot angka halk Lewi, naganup ari boi nasida mangula di bagas joroNa i, tontu sahali ganup ari ma dapotan gogo nasida sian Debata Djahowa. Ido sihol ni roha ni raja i, raja pe ibana alai ianggo gogona do naingkon sian Debata do dapothononna. Songon i ma nian nang hit ape naung mangolu hita di bagas goar ni Tuhanta Jesus Kristus. Naingkon olo do hita patutoru dirinta sian nasa naadong dihita nuaeng, mangalap gogo naimbaru sian ibana siapari. Olo ma hita ro pajonokhon dirinta di Ibana di bagasan joroNa, asa sai lam margogo hita laho mandalani ngolunta siapari. Marsiajar mahita mandok mauliate tu Debata disiala ro las niroha di hita. Jala ingkon lam marsiajar hita muse mangido gogo sian Debata marhite-hite ende puji-pujian dohot hamauliateon tarlumobi di bagasan joroNa.

 

  1. Jolma napatutoru dirina ima jolma namanuju dalan natigor

Dalan na tigor berarti dalan naso mandengkuk. Ima dalan nasoolo mambaloshon angka na jat dohot ulaon najat. Alai namanontong maniop balga holong ni Debata naung manesa dosana jala naingkon olo manesa dosa ni angka donganna. Dang adong dihatahon raja i naingkon balashononna sude na jat nabinahen ni ianakhonna tu ibana, alai didok ibana do na sihol rohana di dalan natigor.Didophon rohana do ulaon ni Debata ima ulaon haholongan. Aha pe namasa dingoluna nuaeng, porlu do ulahononna parjolo manghaholongi Debata. Boasa ingkon songoni? Alana marhite manghaholongi Debata do ganup jolma boi marbisuk laho mangalo angka najat nabinaen ni angka donganna. Tontu molo sodibagasan holong ni Debata hita, tabalos ma sude na jat dibagasan ulaon na jat. Alai molo taloas do holong manghunghupi hita, berarti taloas ma Debata mangalo angka musunta. Ima namanuju dalan na tigor. Tontong pasahathon sude angka sitaononna tu Debata. Nang hita be dingolunta nuaeng, taihuthon ma poda on; dalan naung binaen ni raja David on, parungkilon, sitaonon, masalah, tantangan, rintangan ala dang tolapsa mangadoti i sian nasa gogona, ingkon sihol do rohanta tong asa tapaloas dirinta diurupi Debata marhite haunduhonta ro tu ibana sian nasa sihol ni rohanta di Debatanta.Olo ma hita mamiaro pardamean tu angka ganup donganta jolma. Unang olo hita gabe sipardohot di angka halak namarjat ni roha di hita. Alai tabaen ma Debata nagabe gogonta laho mangalo sude angka tahi ni jolma na jat di hita (ayat 6).

 

  1. Napatutoru dirina di Jahowa dapotan do nasida malua sian angka hamaolan

            Nasida na dibagasan hamaolon laho mandapothon bagas ni Debata, angka ido natarpasu-pasu sian Ibana. Sude halak Jahudi nanaeng mandapothon ulaon/perayaan di Jerusalem, tontu adopan ni nasida do gok angka rura, manang dalan namansai horing jala ingkon rade do nasida molo pe naingkon mate mauas nasida dipardalanan nasida laho mandapothon joroNa. Alai mardongan bisuk sian Debata, dihuar nasida do tano i bahen ingan aek udan na ro sian langit asa boi nasida minum, jala boi manimpan aek di lubang i. Songoni ma adong angka mual bahen inuman nasida dohot sude angka jolma na rap dohot nasida. Ditingki dibahen nasida inganan ni aek udan i, gabe ro ma tutu udan mangisi inganan i, boi ma nasida minum, alai boi do muse sude angka dongan nasida na rap dohot nasida (ayat 7). Songoni ma nang hita pe, molo taparade do rohanta manjalo pasu-pasu ni Debata, sukkup do i dihita, dohot di halak na rap dohot hita.  Taparade ma dirinta laho dipasu-pasu Debata. Tabukka ma rohanta asa masuk Ibana di ngolunta. Tabaen ma tontong dirinta gabe dalan ni angka donganta asa boi tong nasida ro mandapothon Debata. Unang taambati angka donganta ro tu Debata holan alani pangalahonta nahurang. Songoni ma muse, unang olo hita diambati angka jolma, diambati angka situasi namaol, dohot diambati angka las ni roha laho ro tu Debata. Unang alani gok parungkilon, gabe mandao hita sian ibana. Songoni muse do las ni rohanta molo adong ulaon las niroha naeng sipatupaon di bagasta, sotung unang holan alani naing patupahon sipanganon bahen las niroha di dongan punguan i, gabe sundat hita mandapothon Debata di bagas joroNa.

Dinamangolu on hita, jotjotdo tabolusi rura partangisan. Ima angka ngolu na mansai maol taadopi, tarsongon na tinaon ni si Psalmen 84 on. Alai gabe tangkas do hita boto nuaeng, gabe sada alat do dihita halak na porsea on angka sitaonon laho mandapothon Debata di ngolunta. Jala di dok, manang ise jolma na ro tu bagas ni Debata mangalewati rura partangisan, maruli pasu-pasu do nasida. Namarlapatan doi, napasti do ro pangurupi ni Debata di hita asal ma olo hita ro pajonokhon dirinta tu Debata, jala pasahathon sude tangiangta mardongan puji-pujian di bagas joroNa. Songon nanidok di hataNa: “Sai jumolo ma lului hamu harajaon ni Debata dohot hatigoranNa, dung i tambahononna do sude angka ondeng tu hamuna!” (Mateus 6:33). Songoni ma dalan ni Debata patimbohon angka naolo serep roha di Ibana.

 

III. Panimpulion

Disiala asi ni roha ni Debata tu si Psalmen on, taruli dope diibana laho manghirim tu Debata dibagasan tangiangna asa boi muse ibana mulak jonok hu joro ni Debata. Naeng do ibana songon amporik, natarbaen marsarang di bagas joroi, jala marpinompar disi. Asa gabe songoni ma nian ibana maringanan di bagas joro i, jala ganup ari tontong jonok ibana tu Debata. Sada do sihol ni rohana, martangiang mangido gogo sian Debata laho mandalani sitaononna. Jala dang dipangidohon ibana asa mate angka na jungkat di ibana i. Alai dipangidohon ibana do asa marhite angka namaol i, unang ma nian lam dao ibana sian Debata Jahowa. Napos situtu do rohana, ro do pangurupion ni Jahowa di ibana na manalpuhon rura partangisan i, songoni do nang di ngoluna na manalpuhon rura parngoluan i, ingkon urupon ni Debata jahowa do i. Antong dihita nuaeng angka halak naung porsea di Debata Jahowa marhite Jesus Kristus, asa taparrohahon ma on:

  1. Ingkon tangkas do botoonta sian Debata do haroroanta, jala na ingkon tu Debata do hita mulak.
  2. Ingkon tangkas do tadok nasomargogo hita mandalani ngolunta molo so dipargogoi Debata hita. Sude naadong dihita nuaeng, sian Debata doi.
  3. Ingkon sihol do rohanta sai jumonok tu Debata, marhite-hite lam jonok hita tu joro-Na. Asa lam dipargogoi hita di ngolunta siapari.
  4. Unang sai lam mandao hita sian Ibana. Alai tapangke ma angka parungkilon i gabe sangkul di hita lahopajonokhon dirinta tu Debata. Asa adong dalanta mangalap gogo sian Ibana. Unang pintor mura mandele, jala pintor mura mandao sian Jahowa.
  5. Marsak manang marlasniroha. Sude ingkon tapasahat do tu Debata, asa lam diajari hita mandok mauliate di Ibana.
  6. Sude angka nasotolapta taulahon tolap do Debata mangulahonsa. Disiala i, molo adong tahi ni angka jolma na jat tu hita, ingkon tangkas do botoonta naingkon Debata do jumolo pujionta dung i dipatuduhon ma tu hita sangkapNa laho manalpuhon sitaonon i.
  7. Dang porlu hita mangalului sangap dihita. Sotung tapangke jabatanta, manang hamoraonta gabe bohalta paginjanghon roha, alai tapangke ma goar ni Debata laho mangadopi sude ngolunta asa marmulia ma goarNa di ngolunta, jala anggo pasu-pasu i, tambahononNa do i. Pos ma rohanta di si.

 

Sai dipargogoi Tuhan Debata ma hita laho mangantusi jala mangulahon hata-Na siganup ari. Jala tubu ma i, mar urat, marbatang jala marparbue di hangoluanta siganup ari. Amen.

Vic. Pdt. Martupa Manalu, S.Th., M.Div.

HKI Resort Tanah Karo

Bagikan Postingan ini: