2 TIMOTEUS 1 : 1 – 8, EPISTEL MINGGU XIX DUNG TRINITATIS, 2 OKTOBER 2016

EPISTEL MINGGU XIX DUNG TRINITATIS, 2 OKTOBER 2016

NATS : 2 TIMOTEUS 1 : 1 – 8

 

“UNANG MABIAR MANGULAHON LOMO NI ROHA NI DEBATA!”

 

  1. PANBONSIRI

Surat paduahon na tinongos ni Apostel Paulus tu si Timoteus on, masuk do tu horong ni “Surat Parmahanion” rap dohot surat 1 Timoteus dohot Titus. Disurathon Apostel Paulus do surat on sian bagas hurungan di Rom, hirahira taon 65 M, uju Kaisar Nero manggomgomi di harajaon Rom. On ma paduahalihon tarhurung Apostel Paulus di bagasan hurungan ala ni ulaon parbaritanaulion. Dihilala ibana humansit do di tingki na tarhurung napaduahalihonon, ala hira parjahat do ibana dibahen dibagasan hurungan i, dang adong na mangurupi ibana, jala godang do donganna na mandao dohot na manadinghon ibana (pat. 2 Tim. 4 : 16). Angkup ni i, dihilala ibana do hira na jonok nama tingkina mandapothon hamatean i.

Dibagasan situasi sisongon i, masihol do ibana tu si Timoteus “anak haholonganna i”, jala sihol do rohana asa hot jala togu nian haporseaon ni si Timoteus di Tuhan i, nang pe ragam angka hamaolon, parungkilon dohot sitaonon na ingkon adopanna di ngoluna ala ni ulaon parbaritanaulion i. Diapoi ibana do asa anggiat ditiru si Timoteus teladan ni Apostel Paulus di tongatonga ni panghobasionna. Nang pe godang jala ragam angka hamaolon siadopanna, pola tarhurung ibana ala ni parbaritanaulion i, alai dang gabe mambahen moru haporseaonna tu Kristus i. Tongtong do benget rohana mangadopi angka hamaolon dohot ragam ni angka parungkilon  i, jala dang moru holong ni rohana dohot las ni rohana di tongatonga ni ulaon parbaritanaulion i.

Laos on do panbonsiri manang latar belakang disurathon Apostel Paulus surat paduahon na tinongosna tu si Timoteus on. Ditonahon jala dipodahon Apostel Paulus do marhite surat on, asa tongtong denggan diramoti, jala diulahon si Timoteus angka ulaon panghobasion di tongatonga ni huria i, jala tongtong marsihohot ibana tu hata ni Debata.

 

  1. HATORANGAN NI TURPUK

Adong do 3 bagian na boi idaonta sian turpuk on:

 

  1. Tabi ni Apostel Paulus tu si Timoteus (Ayat 1 – 2)

Dibagian na parjolo on dipaboa do tu hita 3 hal:

  • Songon sada surat na somal tatanda di tingki on, tangkas do di bagian on dipaboa ise na manongos surat on. Tangkas do dipaboa, ia na manongos surat on ima si Paulus, “…apostel ni Kristus Jesus, marhitehite sian tahi ni Debata, marguru tu bagabaga hangoluan na di bagasan Jesus Kristus.” Dipabotohon ibana do taringot tu dirina dohot haapostelonna, ima na dijalona secara langsung sian Jesus Kristus. Taboto do, ditangkup Jesus do ibana di tonga dalan laho mandapothon huta Damaskus (Pat. Ulaon ni Apostel 9 : 3), jala dipauba Jesus ma rohana disi. (Pat. Ulaon ni Apostel 9 : 20). Mamungka sian i ma tubu dirohana laho pararathon barita nauli taringot tu haluaon ni halak na porsea dibagasan Jesus Kristus.
  • Dungi dipaboa do muse tu ise do hasahatan ni surat on. boi do idaonta di ayat napaduahon ima tujuan ni surat on ima si Timoteus na nigoaranna “anakhonhu na hinaholongan”. Digoari Apostel Paulus do si Timoteus “Anak” sian haporseaonna ala termasuk do sada parbue ni parbaritanaulion do si Timoteus uju marbaritanauli Apostel paulus di huta Derbe dohot Listra (Pat. Ulaon Apostel 16 : 1 – 3).
  • Dungi, laos diuduti ma muse dipasahat Apostel paulus tabi tu si Timoteus “Asi ni roha, talup ni roha, dame sian Debata Ama dohot sian Kristus Jesus Tuhanta i” Sarupa songon angka surat ni Apostel Paulus na asing, surat on pe dimulai dohot tabi. Jala tabi na pinasahat ni Apostel Paulus ima dibagasan goar ni Debata dibagasan Kristus Jesus. Ala holan dibagasan Kristus Jesus i do singkop jumpang asi ni roha dohot dame.

 

  1. Las ni roha (Apresiasi) ni Apostel Paulus tu si Timoteus (Ayat 3 – 5)

Di bagian  napaduahon on, mansai tangkas dipaboa Apostel Paulus las ni rohana dung ditanda si Timoteus, suang songon i nang keluarga ni si Timoteus (Ompungna si Lois dohot inana si Oinike) na gabe porsea tu Jesus Kristus. Didok Apostel Paulus do di turpuk on, haporseaon na so marlaok do jumpang di nasida. Haporseaon na hot nunga pola tolu generasi sian Ompungna si Lois, sahat muse tu inana si Oinike jala sahat muse tu si Timoteus. Dibahen i, adong panghirimon dohot pos ni roha di bagasan roha ni Apostel Paulus mida si Timoteus, pos ni roha na mandok: haporseaon ni si Timoteus pe pasti do songon haporseaon ni ompungna dohot inana. Dibahen i, nang pe angka donganna na asing maninggalhon ibana ala ni angka hamaolon dohot sitaonon ala ni haporseaon i, alai pos do rohana, na margogo do si Timoteus marsihohohot di haporseaonna, jala mampu do ibana laho mangulahon angka ulaon panghobasion i di tongatonga ni huria i, nang pe ragam angka tantangan dohot angka parungkilon siadopanna. Ido sihamauliateon ni Apostel Paulus tu Debata dibagasan tangiangna.

 

  1. Poda ni Apostel Paulus tu si Timoteus ( Ayat 6 – 7)

Bagian na patoluhon on marisihon angka poda dohot tona ni Apostel Paulus tu si Timoteus. Adong do 3 poda ni Apostel Paulus tu si Timoteus di bagian on:

  • Dipodahon do tu si Timoteus asa diparatarata silehonlehon ni Debata na tu ibana marhite Apostel Paulus. Silehonlehon ni Debata ima tohonan na pinasahat ni Debata tu si Timoteus. Marhite i, naeng ma nian diulahon ibana dohot denggan angka ulaon panghobasionna na manguluhon huria i, mangajari hombar tu hata ni Debata dohot nasa ulaon parbaritanaulion i, asa marsangap Debata marhitehite nasa ulaon panghobasion i.
  • Angkup ni i, dipodai do ibana asa unang mabiar jala unang tahuton di ulaonna i manang aha pe na masa di ngoluna. Nang pe ragam hamaolon, godang angka parungkilon jala dokdok nang angka sitaonon pe, asal ma marhaposan jala mangunsande tu Tuhan i ibana, pasti do pargogoan ni Tuhan i ibana di ngoluna. Dilehon Debata do nang tondi haholongon dohot tondi pangarajaion diri tu ibana asa mampu ibana manguluhon huria i, dohot mangalehon alus na denggan di ragam ni persoalan na muncul di tongatonga ni huria i. Sudena i, asa tongtong marsangap Tuhan i marhite angka ulaon panghobasion i.
  • Dungi dipodai do ibana asa unang maila manghatindanghon Tuhan i di tongatonga ni ngoluna. Dipodai do ibana asa tongtong ibana manghophop barita na uli i. Ai dang gabe sada hailaon molo marsitaonon hita ala ni barita nauli i.

 

  1. HAHONAAN

Di tongatonga ni ngolunta di tingki saonnarion, ragam do angka hamaolon, tantangan dohot angka parungkilon diadopi angka halak na porsea. Ragam do tantangan dohot tekanan, di bidang ekonomi, politik, sosial budaya, kesehatan dohot lan na asing. Dibahen i, godang do angka ruas ni huria na gabe gale di tongatonga ni ngolu on. Godang halak Kristen na mandele, dang olo be martangiang, dang olo be marminggu dang be ro tu partangiangan ni huria bahkan laho maninggalhon Tuhan i.

Alai marhite turpuk on, dipodai do nang hita saluhutna, asa tongtong hita marsihohot hita tu Tuhan i. Unang muramura hita mandele, unang muramura hita marungutungut, jala unang muramura hita manalahon Debata di situasi ni ngolunta tarlumobi unang ma tatadinghon Tuhan i molo pe ro angka parungkilon, hamaolon dohot angka sitaonon i. Dijou do hita asa tongtong hot haporseaonta, jala ro ma hita tu Tuhanta i di nasa kondisi na taadopi. Tahangoluhon ma hata ni Tuhanta di Mateus 11 : 28 na mandok: “Ro ma hamu tu Ahu, hamu angka na loja jala na sorat, asa Hupasonang hamu.” Ai molo ro hita tu Ibana di bagasan tangiangta, jala tapasahat ngoluntaon secara total tu tangan ni Tuhanta, pasti do urupanNa hita, jala usehononna tu hita TondiNa i. Didok Apostel Paulus do “Ai dilehon Debata do tu hita tondi hagogoon, tondi haholongon, tondi pangarajaion diri, ndada tondi hatahuton.” (Ayat 7)

Marhite TondiNa i ma margogo jala marbisuk hita mangadopi ragam ni tantangan na taadopi di ngolunta on. Antong, taulahon ma lomo ni roha ni Tuhan i di saluhut gulmit ni ngolunta, dipargogoi Tuhan i ma hita mangulahon lomo ni rohaNa i jala marsangap ma Tuhantai marhite saluhut gulmit ni ngolunta, amen.

 

(Pdt. Rogate Dan M.J. Silitonga, M.Div)

Bagikan Postingan ini: