EPISTEL MINGGU EXAUDI – MINGGU 21 MEI 2023

Epistel: 1 Petrus 5:6-10

DITANGIHON DEBATADO JOUJOUNI NAPOSONA

I. Patujolo
Dibagasan parungkilon dohot pangaleleion sian halak Jahudi dohot halak Rom do halak naporsea dihatiha i tagan digorithon Apostel Petrus turpuk on. Jala dipasahat Apostel Petrus do angka poda do tu angka sintua asa denggan nasida marhobas. Boasa ingkon paingoton ni Apostel Petrus sintua i? Napinillit ni angka apostel dohot ruas do nasida asa gabe sintua (Bahasa Gorik: “presbuteros”) laho marmahani ruas ni Debata, gabe sitiruon dohot papunguhon pangurupion tu halak Kristen Jahudi na pogos jalan na haraparon. Ala ingkon gabe sitiruon do nasida, umbahen pola dipaingot apostel Petrus angka sintua i tarlumobi ma dibagasan parungkilon do godang halak Kristen hatiha i.

II. Hatorangan Ni Turpuk
Ayat 6. Ginjang ni roha manghorhon hadadabu ni jolma tu dalan na ramun. Ala jorbut do ginjang ni roha on, umbahen di paingot Apostel Petrus angka sintua dihatiha i asa marserep ni roha. Gabe patupahon bada do ginjang ni roha alai manghorhon dame nasumurung do anggo serep ni roha. Ndang tama sada sintua manghobasi dibagasan ginjang ni roha alai ingkon dibagasan torup ni roha do.
Ayat 7. Adong do di ayat pitu on hata “tingganghon” manang “serahkanlah” (di Bibel bahasa Indonesia), ima molo di hata Gorik “epiriptō”, namarlapatan ma i “mandanggurhon”, “pasahathon”. Lapatanna ima ulaon nadiulahon sahali ro di salelenglelengna; mandanggurhon manang pasahatton saluhutna ngolu on ro di sude angka holso ni roha tu Debata. Holso ni roha dohot habiaran ro alani angka ragamni sitaonon. Pasahathon sude holsoniroha tu Debata ndang mambahen jolma na porsea gabe ndang mulaulaon alai ingkon dibagasan bisuk ni roha na sian Tuhan i do hita laho mangadopi sude angka na maol na diparngoluon on. Holsoniroha ima habiaran taringot tu nanaeng masa anon, sogot manang haduan nang pen dang tarboto dope toho do i masa manang ndang. Holsoniroha on ima hinorhon ni dosa dohot pangalaosion ni jolma marhite hadadabu ni jolma tu bagasan dosa. Pasahathon ngolu dohot holsoniroha tu Debata dipukka sian patutoru roha tu toru ni tangan ni Debata, ala ni tapar ma idaon ni jolma naporsea pangaramotionNa di tongatonga ni parngoluon on. Pangaramotion ni Debata ndang holan taringot tu sipanganon, siinumon, pahean nang dohot parlinggoman, alai ihut do tu ngolu partondion ni naporsea asa mangolu ibana.
Ayat 8. Didokhon Apostel Paulus do asa “torangma rohamuna” (dibagasan bahasa Indonesia ima “sadarlah”), molo dibagasan bahasa Gorik ima “nepho” namarlapatan ma i “tarjolma” manang “malua sian hamabukon”. Unangma gabe mabuk jolma dibahen angka ginjang ni roha dohot angka pangajarion na ramun sian angka panurirang pargapgap, ai i do manghorhon gabe mura jolma i dielaela sibolis. Jolma na mabuk ndang tonggor be parnidaanna, isara ni jolma na mabuk nungga ramun jala maol be laho mangalapati pardalananna. Molo nungga ro si songon i mura ma ibana diboan sibolis tu dalan naso ture. Haserepon ni roha do namanghorhon tonggor ni parnidaan laho mangida angka ulaula ni sibolis asa unang tarrobung jolma naporsea.
Ayat 9. Dipaingot Apostel Paulus do taringot tu dalan laho manaluhon sibolis asa manghorhon hamonangon ingkon garang jala aloon do sibolis dibagasan. Ndang jadi lehonon tingki tu sibolis asa unang dielaela angka naporsea tu dalan na so ture. Aloon ma sibolis i dibagasan haporseaon na togu. Hata “togu” (teguh) molo di bahasa Gorik ima “steros” namarlapatan ma i “hot”, “togap”, “gogo”, “tang”. Jadi ingkon margogo jala togap do angka naporseai laho mangadopi angka parungkilon namasa di hatiha i, ai masa do pangaleleion tu halak Kristen sian hala Jahudi dohot bangso Rom.
Ayat 10. Gabe ayat manang hata silehon panghirimon namangolu ma ayat 10 on tu angka naporsea nang pe dibagasan parungkilon. Dapotan hasangapon angka naporsea ndang alani ulaonna sandiri alai inisiatif ni Debata do namanjou angka jolma i tu hamoraon ni asi nirohaNa. Ala Debata do namanjou, sian Debata ma nang angka pangurupion naphothon haporseaon dohot pangkirion ni angka naporsea. Unang be nian munggil roha ni angka naporsea i dung dibege nasida ayat 10 on ai nungga tarjou nasida tu harajaon ni Debata.

III. Sipahusorhusoron
Adongdo angka piga napinasahat tu hita marhite turpuk on naporlu sirimangrimangionton:

  1. Marserep ni roha
    Marserep ni roha manang patutoru diri di adopan ni Debata manghorhon hasangapon na sian Tuhan i. Ikkon marserep ni rohama hita tarlumobi di angka sintua dohot parhobas, naeng ma nian songon na nidok ni Jesus di Matius 23:12 “ai sipaoruon do ganup napatimbo dirina, alai sipatimboon do na paoru dirina”. Molo nunga marhobas hita di ladang ni Tuhan i, molo nunga taula nadenggan dibagasan ngolunta, unang ma dirippu rohanta gabe siginjanghononton i alai parohon hasangapon ma di goar ni Debata. Godang do jolma manghaginjangkon dirina ala dirimpu rohana nunga godang naniulana i jala manghilala ibana ditoruna do jolma naasing, hape dos do sude jolma i diadopan ni Debata. Ala na nionjar ni holong dohot haserepon ni roha ma nian ganup naporsea mangulahon panghobasion dohot angka ulaon nadenggan asa manghorhon sangap di goar ni Jahowa.
  2. Hot ni haporseaon
    Godang do angka pargapgap jala parungkilon namasa, namambahen sipata lomos haporseaonta di hasintongan dohot tu Tuhan i. Sian on do sibolis i laho mangelaela hita asa madabu tu dalan na so denggan. Ala ni togu dohot tang ni haporseaonta do bahenonta mangalo sibolis, angka pargapgap, manang hatiha ro angka parungkilon ingkon do marhagogoon hita laho mangadopi i saluhutna. Haporseaon na mangolu ndang holan porsea alai ndang mulauaon. Haporseaon na mangolu ima haporseaon namanghorhon bisuk laho mangulahon na denggan tu tongatonga ni parngoluon dalan laho marsiurupurupan. Molo nunga tang haporseaonta tatogihon ma angka dongansaripenta na sai munggilunggil asa marhaporusan tu Jahowa nasida.
  3. Panghirimon na mangolu
    Nunga di jou Tuhan Debata hita laho manghobasi di tonga-tonga ni huria na, ala ni i molo per o angka sitaonon nadokdok ndada be mabiar hita di si ai Ibana do namanjou hita jala laos Ibana do namargogoihon hita siapari. Marhite turpuk on, molo adong panghirimon tangkas ma taboto ai ditangihon Debata do ganup angka joujounta. Amen.

    Pdt. Mangaliup Simanjuntak, S.Th
Bagikan Postingan ini: