MINGGU KANTATE (Pesta Olopolop HKI) – MINGGU 07 MEI 2023

Yakobus 1: 19-27

TANGIHON JALA ULAHON

I. Patujolo
Mamuhai jamita on, jumolo ma hupasahat hami tu sude ruas ni huria HKI: “Selamat Ulang Tahun pa-96-hon Huria Kristen Indonesia: Panjang Umurnya, Kuat Imannya, Maju dan meningkat Pelayanannya. (alus ni ruas: Amin).
Itaparhatopot do paboa di portibi on, nang di ngolunta sandiri pe tahe, godang do na itadohoti, manang itapatupa pesta ulang tahun. Molo di bangso Indonesia, Hari ulang tahun Kemerdekaan Negara Republik Indonesia, ganup tanggal 17 Agustus, sai dihasomalhon bangsonta do pesta rakyat. Laos di ganup perayaan 17 Agustus i, sai diparade masayarakat do partingkian laho umbege pidoto ni Presiden, baik marsasahalak manang marpungu rap dohot angka donganna di sada inganan. Somalna pidato i, disiarhon secara langsung di Radio Republik Indonesia (RRI), alai di tingki parpudi on nunga lam maningkat, ndang holan di radio be, alai nunga dohot di Televisi, bahkan di media komunikasi dohot informasi na asing. Turpuk Pidato Presiden Soekarno di tanggal 17 Agustus 1966, marjudul: “Jangan Sekali-kali Meninggalkan Sejarah” na dipajompok “Jas Merah.” Mansai istimewa do pidato on di masyarakat Indonesia, ala on ma pidato parpudi sian nasida, gabe sai tongtong diingot jala dipaingothon masyarakat do i sahat ro di tingki on.

II. Hatorangan
Huria Kristen Indonesia (goar naparjolo: Hoeria Christen Batak, na dipajompok H.Ch.B) pe, adong do sejarahna, ima sada huria na jongjong na nionjar ni sihol ni roha ni halak Kristen na maringan di Pantoan (onom kilometer sian Pematang Siantar) marsaor dibagasan Tuhan marhite na patupa parmingguon siganup minggu dohot ari raya Gereja. Punguan i diuluhon ni tuan Frederik Panggabean na margelar Sutan Malu, (ima sahalak na mangula di perkebunan di topi ni huta Pantoan, alai tammat sian singkola Guru Huria di Sipholon Tarutung). Sian na mamuhai parpunguan i, ndang apala ditolopi uluan ni gereja Zending na di Pematang Siantar uju i. Alai hinorhon ni ringkot ni na marhuria i, dituntun natorop ido patupa parmingguan di Pantoan toho di ari Minggu tanggal 1 Mei 1927. Dung i di ari na mangihut muse, dipabotohon Tuan Sutan Malu do, naung dipatupa nasida parmingguan di Pantoan, alai tongtong do ndang marpanjalo uluan ni Gereja Zending i, laos sebalikna dilaporhon do Sutan Malu tu Pamarenta Bolanda.
Uju dijou Pamarenta Bolanda Sutan Malu, ditangkasi Bolanda do sibingkasi dohot ojahan ni huria na pinjongjong na i. Dialusi do sungkun-sungkun ni Bolanda i marhite na mangenet hata ni Debata na tarsurat di Jakobus 1: 22 na mandok: “Alai gabe siulahon hata i ma hamu, unang holan pananginangi, angka na paotootohon dirina.” Jadi na mangulaon hata I do hami umbahen na hupatupa hami parmingguon di Pantoan, ima alus ni Tuan Malu Panggabean.
Di Pesta Parolopolopon ni HKI tahun 2023 on, ojahan ni hajongjongan ni huria i, gabe jamita bolon tu hita saluhut huriaNa. Antong dia ma na naeng sipareahanta sian turpuk jamita on, tangkas ma itapaihut-ihut.

1. Tangihon ma Hata ni Debata
   Marhite buku Ulaon ni Aporstel 12: 17, 21:18, si Jakobus manggurithon surat na on, uju ibana maringan di Jerusalem mangula laho manjamothon huria na disi. Alai nangpe di Jerusalem ibana, dilehon do rohana laho manjamothon nang ruas ni huria na sampulu dua marga na maringan di parserahan (ay 1) manang di duru ni Jerusalem, laho paingothon asa tongtong dipatuduhon nasida haporseaon i marhite-hite parulan na andar jala paltak diida simalolong jala marpanghorhon tu sandok ngolu nasida sandiri nang jolma na asing pe tahe. Hombar tu si, marhite turpuk jamita on, dipangido si Jakobus do asa saluhut nasida:

a. Ringgas manangi-nangi.
Di parserahan di inganan na marragam, pasti do godang parungkilon dohot pangunjunan na niadopan ni ruas ni huria i. Nangpe perungkilon manang pangunjunan na diadopi ima na marhadomuan tu angka na ringkot di ngolu siapari manang secara ekonomi, alai somal do na masa i gabe marpanghorhon tu haporseaon. Dohot hata na asing, ekonomi na do na bermasalah, alai jotjot do ngolu ni haporseaon na dikorbanhon. Alani i, di paingot huria i asa diadopi nasida ragam ni pangunjunan i dibagasan las ni roha, ala sasintongna nasa pangunjunan mangkorhon “habegeton” do i. Jadi molo sonson songgop pangunjunan, unang ditadingkon nasida parsaoran i, alai ingkon diharinggashon nasida ma manangihon hata ni Tuhan i. Marhite buku na badia I do, jumpang hita na tau haposan dohot tiruan di Huria i, ima Jesus Kristus. Nang pe Debata ibana, dirumari do diriNa jala disolukkon rupa hatoban. Alai dipatimbo Debata do Ibana, jala dibasa-basahon Goar na sumurung sian nasa goar, asa somba tu goar ni Jesus nasa ulu ni tot, jala nasa na marsoara marhatopothon: Jesus Kristus do Tuhan. (Bdk. Pilippi 2: 5-11). Lobi sian i dope, dihongkop, ditobus Tuhan Jesus do jolma i, rimpas so marlindang di sandok parngoluonna. On ma sipatondit tu ganup huria molo tung mangadopi hinaragam ni ngolu.

b. Bangkol manghatahon.
Sasintongna, nasa na ringkas managihon hata ni Debata, marpanghorhon do i nang tu hata na haruar sian pamanganna. Lam godang dibege huhut bagas pangantusionna di hata ni Debata, lam manat do nasida manghatai, asa unang targasip. Adong do pandohan bahasa Indonesia mandok: mulutmu adalah harimau-mu. Na marlapatan do i, hata na haruar sian pamangan ndang boi be mulak boti, alai ingkon dipertanggung-jawabhon do i dingoluna.
Si Jakobus mansai tegas do paingothon huria, asa unang sala mandok sidohononna, isara na di ayat 13 mandok: unang ma didok manang ise, jumpa taunjun ibana, na tarunjun do ahu sian Debata! Ai ndang hea diunjuni Debata angka na porsea di Ibana, asa madabu tu hajahaton, jala ndang dung diunjuni Debata manang ise pe tahe.

c. Bangkol tarrimas.
Ndang apala tangkas dipatorang si Jakobus, boasa dipaingot huria i, asa unang tarrimas. Alai boi do dapot tu roha, molo godang sipingkiran, ponjot panghilalan, sonson angka hamaolon, mura do tubu rimas. Alai si Jakobus ndang pasiat alasan dia pe mambahen sasahalak gabe tarrimas. Ala ni i do tangkas situtu disoarahon si Jakobus mandok: bangkol tarrimas, ai ndang diulahon rimas ni jolma hatigoran ni Debata (ay. 20).
Sasintongna ndang holan si Jakobus na paingothon asa bangkol tarrimas, ai di angka buku na asing pe, godang do na manaringoti asa ganup naporsea i pasiding dirina sian angka rimas. Si Salomo mandok: alus na lambok paombun rimas, alai anggo hata na horas mambahen marsijongjong ate-ate. Baoa parpiripiri pahehe parsalisian, jala halak parmurukmuruk do si godang sala (Poda 15: 1; 29: 22).

2. Ulahon ma Hata ni Debata
   a. Umboto na denggan ndang diulahon hona uhum.
   Hea do sada pandita diprotes sahalak parompuan pangisi ni panti jompo, ala ganup matangiang pandita i, sai dipangido asa disesa Tuhan dosa nasida. Didok parompuan i ma: boasa si pangidoon ni pandita i hasesaan ni dosa, ai sian nasogot ndang haruar ahu sian kamarhu, berarti ndang adong huulahon nasala na gabe mantat dosa. Dialusi pandita ima parompuan mandok: dibege inang do nasogot marsoara na gogo na di sihambirang kamarmi? Aha do dibahen ho. Dungi dialusi parompuan i ma pandita i, ai memang mangido tolong ibana, alai dirohangku, pangidoanna i tu pengasuh do i, jala pos do rohangku sigop do angka pengasuh mangurupi ibana, gabe ndang pola huurupi. Tole muse ala tanggung bogas ni sulamanhu, ba sai ido hupuhuti. Dungi didok pandita i ma: sala jala dosa do, molo diboto na denggan hape ndang diulahon. Songon na nidok ni si Jakobus di Jakobus 4: 17 “Na umboto mambahen na denggan, gabe ndang diulahon, na mardosa ma ibana disi.” Jesus sandiri pe, diajari do sisesanna marhite umpama na mandok: “Ia anak somang, na umboto na hinalomohon ni indukna, gabe so marhobas ibana jala ndang diulahon lomo ni rohana, godangma linsing-linsing taononna. (Lukas 12: 47).
   Dibahen si Jakobus do tudos-tudos. Halak na managihon hata ni Debata, alai ndang diulahon, tudos do i tu sahalak na marnida rupana di sorminan, alai holan sambolus nangpe nunga tangkas diida matana adong agong di bohina i.

b. Daulat jala so marlindang.
Adong do tolu ualon ni huria ima: marbarita na uli (Marturia), marsaor dibagasan Tuhan (Koinonia) dohot mangula ulaon parasi ni roha on (Diakonia). Ulaon na tolu on tudos do i tu dalihan na tolu. Molo telpang sada gabe sabur ma na di atasna jala ndang marguna.
Si Jakobus mandok angka na mangulahon ulaon parasi ni roha on, digoari do Halak na Daulat marroha jala so marlindang. Ulaon asi ni roha dipatupa do dalan laho mangahtindangkon asi ni roha ni Tuhan i, ai parjolo do Tuhan manghaholongi hita, Alani i, nang hita pe tama do manghaholong donganta (Bdk 1 Johanes 4: 7-8). Holong ni roha na itapatupa, unang ma manghirim balosna. Ai Jesus sandiri pe mandok nasa na bahen tu sahalak na metmet i na tu Ahu do i. (Mateus 25: 40).

III. Panimpuli:
Di Pesta olop-olop taon 2023 on, disungguli do hurianta asa gabe huria na mangolu jala mangula di bagasan hata ni Tuhan. Songon dia do Halak na mangolu dohot mangula di bagasan hata ni Tuhan? Di taon 2023 on nunga ditotophon huria HKI taringot tu pelayananna na berfokus tu Pahembangkon Kreativitas Parhobas dohot Panghobasion / Pengembangan Kreativitas Pelayan dan Pelayanan Huria Kristen Indonesia.
Masihol do hurianta, asa lam tu hembangna dohot tu majuna huria i. Boi do i jumpang molo tongtong marsada roha HKI (Ruas, Parhalado, Pandita nang Uluan), mangolu jala mangula di bagasan hat ani Tuhan, huhut mananda silehon-lehon ni Tuhan i, laos sian i ma dipelehon tu Debata marhite huria i, gabe ditumpak Debata pola marlobi-lobi, songon na nidok ni Jesus laos sekaligus Ojahan ni panghobasion HKI taon 2023 na mandok: Ai ganup paradongan lehonon do, as marlobi-lobi ibana (Mateus 25: 29.a). Amen. Selamat Hari Ulang tahun ke-94 Huria Kristen Indonesia. Panjang Umurnya, Kuat Imannya, Maju dan meningkat Pelayanannya. (alus ni ruas: Amin).

Pdt. Hotman Hutasoit, M.Th
Sekretaris Jenderal

KLIK YOUTUBE HKI