JAMITA MINGGU XVI DUNG TRINITATIS, 11 SEPTEMBER 2016

Nats : 1 Timoteus 1:12-17

Thema: Marhite asi ni Roha do dipasaut Debata Sakkap Haluaoni

Patujolo

            Dang apostel si Timoteus, alai sisean/murid ni apostel do, ima apostel Paulus. Somalna molo murid ni guru, dung tamat jala karejo tong do digoari guru songon gurunai. Molo murid ni datu tong do digoari datu dung tamat. Alai dang songoni ianggo haapostelon.

Haapostelon, manang kerasulan marhite pamilliton dohot parsuruon ni Tuhan doi laho mangulahon na sinuruhonna. Tudos doi nang pe so apala sarupa tu panurirang di Padan Narobi. Naposo ni Debata do nasida napinillit ni Tuhan secara langsung. Alanii, ikkon hormat jala badia do baenonta tohonan haapostelon dohot hapanurirangon na nilehon ni Tuhan Debata.

Jotjot do akka jamita hubege dohot hujaha di tikki dohot media na berbeda, jinamitahon dohot nisurat ni nang pandita manggoari apostel (contohna: Paulus manang Petrus manang Johanes, manang Jesaya, dna) laos: si Paulus, si Petrus, si Johanes, si Jesaya, ninna. Hira goar ni anggina rupani dibaen goar ni apostel manang panurirang na manurat turpuki. Aha bakkolna hita mandok apostel Paulus, apostel Petrus, panurirang Jesaya, dna.

Ahu Pdt HR. Menek do rohakku umbege molo dohot dakdanak apalagi pahoppu ni pahoppukku manjou au si HR. akka parhalado naasing pe songoni do. St B, Gr C, Pdt D. Boa do parbinegean ni na margoari molo dijou dohot sikola minggu mandok si B, si C, si D, ninna?? Boa do dibege hamu donganta parugamo naasingan manggoari manang manjou nabi manang panurirangna??

Memang masalah etika do masalah on. Alai dipatuduhoni do na godang dope parjamitanta hurang etikana, manang dang diantusi etika sama sekali.

Si Timoteus dang panurirang manang apostel, alai parhalado do ibana nang tikki dolidoli dope. Ai ditabalhon apostel Paulus do ibana jala ditempathon di huta Epesus. Uluan ni jemaat do ibana di Epesus na boi sarupa tu Guru Huria, manang Pandita, manang Praeses, manang Ephorus. Alai ala so adong panggilan kehormatan na pas tu ibana nuaengon, sae ma nidok si Timoteus, songoni nang tu si Pilemon, dohot si Titus. Dang jinou amanta Timoteus manang oppunta Timoteus, ala boi gabe mengaburkan makna panggilanna. Di hita do mansai hormat jala panggilan bermakna manjou amang pandita, amang guru, amang St, oppung ephorus, dna. Ala mangolu be dope. Molo nunga monding ba dohonon ma nahinan. Akka etika panggoraon mai, alai dipanggoraoni tarida roha menghormati dohot na manghargai.

Tung mansai dihalomohon apostel Paulus do panghobasion ni si Timoteus. Alana, nang pe doli-doli ibana rumikkot do panghobasioni dibahen ibana sian akka naasing jala dang hea tarurak ibana alani haposoonna. Tung mansai didukung apostel Paulus do ibana asa tulus aakka ulaonna jala marsangap tongtong Tuhani marhite panghobasionna. Sahat tu nanaeng marujung ngolu ni apostel Paulus, disarihon ibana do tongtong panghobasion ni si Timoteus. Tu si Timoteus do ditongos apostel Paulus suratna parpudi andorang so diuhum mate ibana. Dipatandahoni do panarihonon ni aposteli tu keberhasilan ni panghobasion ni si Timoteus di luat Epesus, jala sahat do tohonannai diulahon si Timoteus.

Asi ni roha ni Debata Jahowa dang marguru tu masa lalu ni jolma

            Toho di tanggal ari sadarion 15 taon nasalpu, manang 11 September 2001, mate do jolma mar 3000 halak di gedung WTC (World Trade Center) di New York Amerika Serikat hinorhon ni na marongso gedungi binaen ni bom dohot na ditombomhon teroris kapal terbang tu gedungi. Tontu, mansai ngeri do situasi di inganani ujui, ai keluarga ni mar 3000 halak ikkon rap mangangguhi sadarii, jala dijokkal bangso di portibion do Amerika Serikat ujui na so mampu melindungi keamanan ni rakyatna. Laos sude do jolma di portibi on na menjunjung tinggi nilai kemanusiaan merasa terpukul ala ni na masai. Sada bagian ni masa lalu ni hajolmaon di portibi na modern nuaeng na ma namasai. Sude naung salpui gabe parsiajaran namai asa boi nijaga diri sian akka na manusai ala asa boi pinaherbang akka na mamboan haulion.

Godang do persitiwa masa lalu na golap di pardalanan ni ngolu ni akka na porsea tu Tuhan Jesus. Nang nuaeng tarlumobi ma dohot di negaranta. Alai marhite jamita on, dang tarbaen masa lalu ni jolma na golapi mangambati sakkap haluaon ni Debata Jahowa, baliksa, sian masa lalu ni jolma na golapi, lam takkas ma hatiuron ni Barita Naulii di patupa Debata.

            Dihasolhoton ni apostel Paulus dohot si Timoteus ala ni panghobasion Barita naulii, pola do diakkuhon apostel Paulus na anakkonna si Timoteus di bagasan haporseaon (ay.2). Ala anakkonna do ibana di bagasan haporseaoni, bulus do roha ni apostel Paulus paboahon tu si Timoteus nang masa laluna na golap di bagasan parulaan haporseaon agama Jahudi. Panginsahi, pangalele akka siihuthon Jesus jala siulahon gogo, ido masa laluna. Alai dung ditakkup Tuhan Jesus ibana asa gabe parbarita nauli, sesa do sude dosa masa lalunai jala dimulai dohot ngolu na imbaru di bagasan haporseaon. Dang holan manghaporseai boti ibana tahe songon akka halak Kristen ruas ni huria na somal, alai dohot do gabe panghobasi sipararat barita naulii tu luat ni sipelebegu. Gariada tahe, marhite panghobasionna do taripar Barita Naulii sian luat Israel sahat tu angka bangso tu luat ni sipelebegu. Ido diappehon Tuhan Jesus tu ibana dipanjouonnai, ibana mamboan Barita Nauli tu jolo ni akka bangso nang tu jolo ni akka raja dohot tu jolo ni akka anak Israel. Jala ikkon godang sitaononna ala ni Goar Jesus (Ul.Ap. 9, 15-16).

Dipabotohon apostel Paulus do masa lalunai tu si Timoteus, ala sahaporseaon jala sapartaonan nasida ala ni Barita Naulii. Dang dipaboa aposteli dalan ni ngolunai tu halak naasing buas songon tu si Timoteus. Asa pos roha ni si Timoteus na mangulahon panghobasion di jolo Tuhani, asa marpakkirimon na mangolu jala unang mandele ala ni panghobasioni. Mendorong jala mangurupi si Timoteus di bagasan pos ni roha panghobasion, ido tahi ni apostel Paulus asa dipabotohon parsorionnai tu si Timoteus.

Manang songon dia pe rumang ni sitaononna ala ni panjouon dohot panghobasioni, dihamauliatehon ibana doi tu Debata, ai nunga dipaunsat ibana sian portibi hagolapon nang pe gok huaso dohot sinadongan ibana disi. Dang dihuaso dohot sinadongan na songoni pinarsinta ni rohana, alai asi ni roha ni Tuhani do na paluahon ibana sian dalan ningolu nasongoni jala na paunsathon ibana tu dalan hatiuron Barita Nauli nang pe gabe so adong huaso ni hajolmaon dohot sinadongan ni parartaon. Huaso ni Debata do mangingani ibana jala arta banuaginjang do artana na so olo sega jala na so olo salpu manang habis.

Rahasia panjouon ni apostel Paulus dipabotohon tu si Timoteus ala tontu dang diboto si Timoteus dope barita panjouon dohot barita pertobatan ni si Saulus na gabe apostel Paulus. Marhite na pabotohon dalan panjouon dohot pamillitonnai, diondolhon apostel Paulus, Naeng jumolo marhite sian ibana patuduhonon ni Kristus Jesus sandok lambas ni rohanai, bahen tiruan di akka naneng porsea. Lapatanna: Pintu pertobatan tongtong do ukkap tu sude jolma, manang songon dia pe jorbut ni hajahatonna, manang songon dia pe dosana, alai molo diida do pintu pertobatan na ukkapi jala masuk siani manghaporseai Tuhan Jesus, malua ma nang nasida.

Lam sumurung do asi ni roha ni Debata Jahowa marhite Jesus Kristus

            Adong sada guru pangajari ni halak Kristen najolo mandok, dang sarupa Tuhan ni Padan Narobi dohot Tuhan ni Padan Naimbaru, ninna. Ai di Padan Narobi, marhite huaso dohot hagogoon do Tuhan Debata Jahowa manguhumi hajolmaon, hape di Padan Naimbaru marhite holong ni roha do dohot halambohon, jala pola mangae na porsuk sian hajolmaon. Tontu, dang tikkos pandapoti tu haporseaonta. Cara pendekatan ni Debata tu jolma do na berbeda di Padan Narobi dohot di Padan Naimbaru, jala sian mulana pe andorang so ditompa dope portibion, nunga disakkapi cara na songoni. Ido asa didok Debata tu ulok napaotooto si Hawa i: BahenonKu ma parbadaanmu dohot boruborui, ro di pinomparmu tu pinomparna. Ibana mangalisathon ulum, gabe pagutonmu tambihulna (1 Musa 3, 15).

Saleleng so ro dope Jesus tu portibion na digoari Immanuel manang Silo, patik i do gabe patokan hasintongan di jolo ni Debata. Ala dang adong na boi mangulahon patik i sikkop, gabe hona bura do sude hajolmaon ala ni patik i, tontu lobi hona bura dope jolma na so manjalo manang na so marpatik na sian Debata Jahowa. Ala dang adong na boi malua sian dosana be marhitehite Patik i, dibasabasahon Debata Jahowa ma AnakNa na Sasadai bahen pardamean ni jolma tu Debata, asa Ibana dalan hataridaan haholongon ni Debata tu portibion. anakNa Nasasadai, ima Jesus Kristus, gabe mangulahon Patik i di adopan ni Debata Jahowa atas nama ni jolma, asa akka jolma na manjalo dohot mangihuthon Ibana, haholongonNai nama siihuthononhon. Ido asa didok Tuhanta: Haholongi Tuhan Debatam … jala haholongi donganmu jolma. Patik na dua on do mangkangkam nasa patik dohot hata ni panurirang (Mateus 22, 40).

Asa molo idok apostel Paulus: Haposan jala sandok tau jaloon do hata on: Nunga ro Kristus Jesus tu portibi on paluahon akka pardosa, na marlapatan: Tutu situtu do naung ro Kristus Jesus tu portibion patupahon hasesaan ni dosa ni hajolmaon. Alanii ikkon sihaporseaan ma Ibana jala siihuthononhon. Haporseaon tu Jesus Kristus do dalan haluaon, jala di duru ni Ibana dang adong haluaon. Marhite Jesus Kristus, na diuduti dohot marhite panghobasion ni akka naposoNa sian najolo sahat tu joloan on, hasangapaon na salelenglelengna ma di Raja na so  marmula i.

Siauhononhon jala sipahebahebaon

1. Sude do jolma mandapot asi ni roha ni Debata Jahowa marhite hasesaan ni dosa, akka na olo manjalo Jesus Kristus Sipaluai.
2. Dolidoli pe songon si Timoteus dipakke Debata Jahowa do gabe parhobasNa laho pararat BaritaNa.
3. Naeng ma akka pangula natuatua (namatoras) boi rap masihaporseaan dohot akka pangula naposo, ido disakkapi Debata Jahowa manjamin kesinambungan ni panghobasion parbaritanaulion. Marhitehoni do nasida pasangaphon Debata Nasangapi.

Pdt. Dr. HR. Panjaitan