EPISTEL MINGGU 26 JUNI 2022 – LUKAS 9:51-62

Epistel Minggu, 26 Juni 2022

Epistel Minggu 26 Juni 2022
MINGGU II DUNG TRINITATIS
MINGGU, 26 JUNI 2022
MANGIHUTHON TUHAN JESUS
Lukas 9:51-62

PATUJOLO

Lukas 9:51–19:27 i ma barita Pardalanan ni Jesus dohot angka sisean sian Galilea tu Jerusalem. Sintuhu ni pardalanan ni Jesus na parpudi nunga jumolo digurithon si Markus (Mrk. 10:1, 32) alai si Lukas paandarhonsa laho pataridahon parsitutuon ni Jesus laho manggohi sangkap ni Debata Ama (Luk. 9: 62; 13:33). Diparade si Lukas do asa mamparrohahon ondolan siputihon sian pardalanan ni Jesus (Luk. 13: 22; 17:1) jala ditambahon do angka barita dohot pangajarion (Luk. 9:51 – 18:14) na marisihon angka cerita na binegena sian angka sumber na asing. Dipadomu si Lukas do pangajaran on na tematis marhite manolothon (manambahon) dua carita taringot tu angka dakdanak (Mrk. 9:36 – 37; 10:13 – 16). Pardalanan asa gabe sisean di ha-Kristenon tarida sian tanda ‘hatorukon ni roha’ songon sahalak dakdanak na metmet, na martandatanda: ungkap ni roha di pambahenan ni Debata jala marhaposan tu Debata.

HATORANGAN

Marnida tu jolo naeng pasangapon ni Ama i Jesus di ampuanNa, ndang pola longang roha molo Jesus patohom bohi tu Jerusalem (Luk. 9:51). Diboto Jesus do pardalanan tusi mansai porsuk, alai diboto Ibana do paboa na naeng mulak Ibana tu bagas ni Ama i laho mangungkap pintu ni bagas ni Ama i tu ganup siihuthon Ibana. Alai di tingki di patohom Jesus tu Jerusalem, ndada holan hamatean dohot haheheon niidaNa, alai di ida Ibana do hananaekNa tu banuaginjang jala marsaor dohot angka siihuthon Ibana disi. I do alana umbahen dijouhon tu angka siseanNa laho manadinghon saluhut na di pudi jala mangihuthon Ibana. Sihol rohaNa asa tundalhononta saluhut hagiot ni daging laho manean tumpal hinorhon ni Kristus i (pat. Filp. 3:14). Ai ndada di tano on sambulo ni tondi ni ganup na mangihuthon Ibana (Filp. 3:20 – 21). Manatap tu pandang situjuon pardalanan ni Jesus laho patulus sangkap ni Debata Ama i di portibi on, dipatohom Jesus bohiNa (mengarahkan pandangan-Nya) tu Jerusalem laho pasidunghon ulaonNa.

Mula ni Pardalanan ni Jesus tu Jerusalem (51 – 62), i ma mangalangka tu jolo laho ‘patimbohon’ dalan manggohi sangkap ni Debata. Pardalanan ni Jesus di portibi on gabe tudutudu tu hatatamba ni huria dung hananaek ni Jesus tu banuaginjang. Disuru do angka suruanNa, laho mangarade andorang so bongot Jesus tu Samaria (ay. 52) alai ndang dijangkon haroro ni Jesus. Sian laporan ni suruan i naso olo pangisi ni Samaria manjangkon Jesus, pataridahon paboa ndang sude luat olo manjangkon Barita Nauli. Alai molo tung pe so olo manjangkon Barita Nauli, ndang pintor siuhumon nasida. Tumagon do luluan luat na asing, paima adong ‘tingki na une’ bongot muse tusi, biarlah waktu yang menjawab. Huria hatopan i sandiri pe na rap udur dohot Jesus ‘manuju Jesrusalem’ alai pardalanan laho manopot hamuliaon, songon naung nilumbahon ni Jesus, ingkon marhite sitaonon. Resiko gabe siihuthon Kristus tung tangkas do i songon pardalanan ‘tuat’ tu toru. Pangalaho ‘musu tihus’ ni halak Samaria laho manulak manang ndang manjangkon Jesus, ndada parmusuon marsasahalak, alai parmusuon na rasial halak Samaria dohot Jahudi.

Dirajumi angka sisean i do paboa nang angka sisean i pe tupa do tulakon ni halak Samaria muse di jolan ni ari, ala ni i ma gabe tubu rohanasida (Jakobus dohot Johannes) laho patupa pamaloson, ai tagonan do sude halak Samaria dilengsehon sian tano on. Ai didok do: “Tuhan, anggo olo Ho, hudokkon hami ma turun api sian ginjang mangalengsehon nasida, songon binahen ni si Elia” (pat. 2 Raj. 1: 9 – 16). Alai andul marasing do alus ni Jesus, ai ndang dihalomohon Jesus pamaloson. Dipinsang Jesus do angka siseanNa na mangganti sasaran utama sian ulaon misi gabe eksekusi pamaloson laho mangagohon tondi ni jolma (ay. 55). Ai naeng paluahon do misi ni Debata marhite Jesus. Ingkon marsiajar dope si Jakobus dohot si Johannes pasiding partontangan naso marimpola, alai tumagon mangalului luat na asing laho pararathon harajaon ni Debata. Dijagahon Jesus do sotung “suda arang so himpal bosi” lapatanna gabe marisuang. Baliksa, tagonan do mangganti rute pardalanan mangalului luat na asing laho pararathon harajaon ni Debata (ay. 56). Tongon do Tuhan Jesus mardalan rap dohot angka natorop na paihutihut Jesus manuju Jerusalem. Torop na mangihuthon Tuhan Jesus, marragam do parrohaon nasida, laos marragam do motivasi nasida mangihuthon Jesus.

Sai ihuthononku do Ho manang tudia pe Ho lao. Panurat Mateus 8:19, sahalak siboto surat do halak on. Diuji Jesus do patandahon diriNa tu na naeng mangihuthon Ibana, paboa ‘hapariron na mamolin’ do diae Jesus (ay. 58) gari hapeahan ni simanjujung ni Jesus pe soada. Gombaran ni na naeng tarsilang i do na nidok ni Jesus: tu tano ndang dais, tu langit pe so tuk. Tarrajum do Jesus ‘Raja Namarsiakbagi.’ Pandohan: Loas ahu jolo mananom damang. Sada sidalian laho menunda waktu, laho mangihuthon Jesus. Hasomalan na denggan do ulaon mananom na mate, tung sura bangke ni halak na asing di halak Jahudi lumobi ma mananom natuatuaniba manang keluarganiba. Jala ringkot situtu do ulaon sisongon i. Alai adong do hasomalan di halak Jahudi “secondary burial” i ma mananom holiholi ni naung mate dung jolo busuk bangkena, i ma hasomalan ni angka halak paradongan. Alai nunga adong hian naung ditotophon tu ulaon i, jala ndada ulaon na mendesak anggo ulaon i, jala dalih do i naeng manjua panjouon ni Jesus laho mangihuthon Ibana, i do umbahen didok Jesus tu ibana: Pasombu ma angka na mate mananom na matena; alai anggo ho, borhat ma mamaritahon harajaon ni Debata! Tujuan ni Jesus i ma asa dipaso ma marsidalian alai diihuthon ma Ibana jala borhat ma mamaritahon harajaon ni Debata. Tumangkas si Lukas manurat Pasombu ma angka na mate mananom na matena; alai anggo ho, borhat ma mamaritahon harajaon ni Debata! Alus ni Jesus on lam torang molo dipahombar tu Padan Narobi sian Sakaria 11: 9.

Loas ahu jolo mananom damang, boi do tupa ala naung marsahitsahit natoras, manang naung matua natorasna alai ndang mate dope, jala molo dung mate, jolo tanomonna ma natorasna, ala ni i jumolo ma ibana ‘mangurus’ i dung pe asa ihuthononna Jesus. Ditimbang rohana sotung topet mangihuthon Jesus ibana hape mate ma damangna (natorasna), ise ma annon mananom i? Manang sotung didok nadeba ibana naso sangap marnatoras. Jolma na so rade mangihuthon Jesus menunda waktu. Olo do mangihuthon Jesus, alai jolo mate ma natorasna. Mamaritahon harajaon ni Debata, tumimbo dope ringkotna sian angka ruhut kewajiban suci dari hukum di ganup na mangihuthon Jesus. Didok Jesus: “Pasombu ma angka na mate mananom na matena, alai anggo ho, borhat ma mamaritahon harajaon ni Debata!” Hataridaan ni pangoloion tu patik ni Debata do molo pasimpul ariari ni natoras, alai andul ummarga do pararathon harajaon ni Debata. Ai ulaon ni angka siihuthon Jesus ndada laho mananom na mate, baliksa naeng ‘pangoluhon angka naung mate’ do. Ai rumingkot do mangoloi joujou tu ulaon pararathon harajaon ni Debata (asa mulak mangolu angka ‘na mate’) sian saluhut ruhutruhut ni harajaon portibi. Ai marhite na mamaritahon harajaon ni Debata, tagamon do ungkap pintu hamubaon ni roha asa mulak mangolu angka ‘naung mate’ (pat. Luk. 15: 24, 32). Ndang bolas ditunda ‘tingki’ laho mangihuthon Jesus. Ndang bolas dohonon: “Tunggu dulu!” Marhite pandohan on, paboa mamaritahon harajaon ni Debata i ma ulaon yang sangat mendesak dibandingkan dengan semua kebutuhan, naso boi ditunda partingkianna.

Huihuthon pe Ho, Tuhan; alai loas jolo ahu martading hata tu angka dongangku sabagas (“Aku akan mengikut Engkau, Tuhan, tetapi izinkanlah aku pamitan dahulu dengan keluargaku.”) Ganup na naeng mangihuthon Jesus ingkon sian roha na bulus. Dipatudos Jesus do songon paninggalan naeng ma mamuspus tu jolo, unang mamereng tu pudi. Molo si Elia, dipaloas do siseanna, Elisa, laho martading hata (berpamitan) tu donganna sabagas (1 Raj. 19: 19 – 21). Alai laho mangihuthon Jesus ingkon fokus do, ndang bolas mardua roha jala naso jadi diintervensi kepetingan keluarga.

HAHONAAN

Umpasa ni Batak mandok: “Horbo ni pearaja manggagat di balian, molo so lomo roha godang do sidalian.” Matua luluan do alus laho manjua molo so lomo roha. Sian na dua alus ni na tinogihon ni Jesus na mandok: Loas ahu jolo mananom damang dohot huihuthon pe Ho, Tuhan; alai loas jolo ahu martinading hata tu angka dongangku sabagas, pataridahon gombaran ni angka panjua di joujou ni Jesus. Ingkon tumimbo do posisi ni panjouon ni Jesus sian sandok kepentingan pribadi dohot kepentingan keluarga, i do umbahen na didok Jesus: “Na humolong roha di amana manang di inana asa di Ahu, ndang tama i siseanKu; jala na humolong roha di anakna dohot di boruna asa di Ahu, ndang tama i siseanKu. Jala na so mamorsan silang na tu ibana i, laho mangihuthon Ahu, ndang na tama i siseanKu. Ai na marhamaolhon ngoluna, ngolu ni i do na mago sogot; alai na sumeahon ngoluna ala ni Ahu, i do jumpangan ngolu sogot.” (Mat. 10: 37-39). Lam diondolhon Jesus dope muse: “Ganup halak na ro tu Ahu, ndang tarbahen gabe siseanku, ia so dihasogohon ibana amana, inana, na niolina, anakkonna, hahaanggina dohot angka ibotona, ro di hosana sandiri. Ndang tarbahen gabe siseanku halak na so manuhuk silang na tu ibana, laho mangihuthon Ahu! (Luk. 14: 26-27). Siihuthon Jesus nasintong ingkon rade do ganup tingki. Gariada ganup na naeng mangihuthon Jesus, didok do: Nasa na giot mangihuthon Ahu, disoadahon ma dirina, diporsan ma silang na tu ibana; diihuthon ma Ahu! Ai na naeng paluahon hosana, mangagohonsa do; alai na agoan hosa ala ni Ahu, i do na jumpangan. Ai aha ma antong gunana di jolma, nang liat portibi on diomo, anggo mago do tondina? Aha ma tarlehon jolma bahen tobus ni tondina? (pat. Mat. 16: 24-26).

Sian i tarida paboa komitmen mengikut Yesus untuk memberitakan proklamasi Kerajaan Allah memiliki resiko atau konsekuensi, baliksa sahat tu na ‘sumeahon hosa’. Mangihuthon Jesus na marlapatan do i ingkon rade mamaritahon harajaon ni Debata. Mamaritahon harajaon ni Debata, i ma tanggung jawab ni siihuthon Jesus. Molo targoar ‘siihuthon Jesus’ ingkon hobas do laho mamaritahon harajaon ni Debata, atik pe ingkon menanggung resiko. I do na hinangoluhon ni angka Apostel dohot angka Parbarita Nauli rasirasa ro ujung ni hasiangan on. Andorang so tarhinsat Jesus tu banua ginjang didok do: “Nunga sahat tu Ahu nasa huaso na di banua ginjang dohot na di tano on. Laho ma hamu, podai hamu ma saluhut bangso, didi hamu ma nasida tubagasan Goar ni Ama, Anak dohot Tondi Parbadia! Laos ajari hamu ma nasida mangaradoti nasa hata naung hupatikkon tu hamu. Ai ida ma, sai na dongananku do hamu ganup ari, rasirasa ro ajal ni hasiangan on!” (Mat. 28: 18-20). Jambar sijaloon ni siihuthon Jesus, songon Jesus na “patohom bohiNa” (mengarahkan pandanganNya) tu Jerusalem, suangle hita “patohom bohi” tu ‘Jerusalem Naimbaru’ ai disi do sambulo ni tondinta na manongtong. Hendaklah engkau setia sampai mati, Aku akan mengaruniakan mahkota kehidupan (Why. 2: 10). Amen.

Kunjungi juga kanal YouTube HKI untuk mengetahui informasi seputar pelayanan HKI.

Penulis:
Departemen Marturia HKI

Penyunting:
Yohanes Simatupang

About Yohanes Simatupang

Staff Biro Infokom

View all posts by Yohanes Simatupang →