PSALMEN 16:1-11, JAMITA MINGGU V DUNG TRINITATIS MINGGU, 26 JUNI 2016

Thema: Hatuaon ni akka na marsihohot di haporseaonna tu Debata Jahowa

Patujolo

                Buku Psalmen, sian najolo sahat tu nuaeng, sai dipakke agama Jahudi doi gabe sada bagian di peribadahan nasida na dijahahon manang diendehon. Ikkon adong do panjahaon Psalmen manang mangendehon Psalmen di ganup peribadahan nasida. Molo diendehon, digoari mai: Tahlil. Hita pe tatanda do tahlil on. Asa tumakkas songon dia tahlil, molo tabege adzan dipatubegehon di mesjid (somalna di akka mesjid antar na umbalga), andorang so adzan i sai jolo dibaen do ende-ende hira-hira 10 tu 15 menit. Ende-endenai ma na digoari tahlil. Songoni ma nang di peribadahan ni Jahudi.

Mansai rikkot do Psalmeni di agama Jahudi, ai tradisi nasida doi na dimulai sian raja Daud. Ala raja Daud, ima raja na boloni do na mamulai tradisii, jala dang na tarlupahon bangso Jahudi harajaon ni raja Daud, marhite Psalmen ma nasida marningot habalgaon ni Israel pinukka ni raja Daud.

Balga do antong apresiasi manang pangargaion tu Psalmen on. Psalmen digoari nasida Tehilim manang Mizmor. Tehilim ima  akka hata na ditujuhon tu Debata Jahowa marhite na diendehon. Mizmor ima akka hata na ditujuhon tu Debata Jahowa marhite na dijahahon berupa puisi. Duansa do bentuk puisi on di sude Psalmen na adong di Bibelta i. Duansa (tehilim dohot mizmor) marlapatan : hata manang suara ni roha na ias taringot tu sihatahononi tu jolo ni Debata Pargogo Na so Hatudosani, na hinatahan manang niendehon marhite akka hata naummuli, alai tung ura antusan jala tabo begeon. Ido lapatan ni Psalmen.

Asa, dihatahon mai marhite andung-andung, na marisihon: pangidoan, pengakuan, pamujion, dohot panghatindangion. Molo raja Daud mambahen Psalmen, sai dirangkum ibana do na 4 isi ni Psalmeni.

Godang do ende andung-andung manang bentuk sastra lisan ni Batak na jolo na diendehon marrupahon pangantusion Psalmen on, alai tutu, dang sai ditujuhon tu pardomuan ni na mangendehoni tu Debata hinaporseaanna. Godangan do isi ni ende andung-andung ni Batak na marpardomuan tu dongan jolma manang ungkapan hati sambing. Contoh: ende popular na parpudi on na marjudul Boru Panggoaran. Lirik na mandok: Ho do borukku tappuk ni ateatekki, ho do borukku tappuk ni pusupusukki… molo matua sogot au ho do manarihon au, molo matinggang au inang, ho do na manogunogu au. Tabo do lirik ni lagui begeon jala ura antusan. Sada do impola ni endei na mandok: sasada borunai do rindang manang tubu ni natorasna.

Dipatutomu do Jamita Trinitatis sadarion sian Psalmen, ima Psalmen sinoarahon jala niendehon ni raja Daud, raja na bolon ni bangso Israel. Raja Daud mangendehon ende Psalmenna on, ala naung dialami ibana do parsaoran dohot Debata Jahowa, jala takkas do ditanda ibana na mangolu do Debata Jahowa na tinanda jala hinaporseaannai, na mangalusi akka tangiangna jala naung paluahon ibana sian akka hasosahanna. Asa gabe parsiajaran di hita jala mangigil rohanta mangokkuhon dohot mamujihon habalgaon dohot asi ni roha ni Debata Jahowa huhut patoguhon haporseaonta asa tongtong marhaposan tu Debata na mangaramoti huria dohot akka ruasna.

 

Sub Thema 1. Pangokkuan patandahon partinandaan na sintong

                Anak siampudan do si Daud di amana si Isai, sian ualu na marhahamaranggi. Ummuli do rupana sian akka hahana jala di habajaronna na malo do ibana marhasapi, marsulim dohot alat musik naasing. Pola do boi lao akka tondi na hodar molo marhasapi ibana. Ibana do dipillit Debata gabe raja di Israel manggantihon raja Saul na pinillit ni Debata (jaha 1 Samuel  16).

                Dang holan dung gabe raja si Daud asa ditanda jala diokkuhon ibana Debata Jahowa. Alai panandaon dohot pangokkuonnai naung dialami ibana do nang tikki di haposoonna na jotjot ibana hasosahan, targogot jala jotjot marmara. Jotjot do tarancam ngoluna, nang tikki di tonga-tonga ni akka dongan tarlumobi di tonga-tonga ni musu tarlumobi ma dung dipillit Debata ibana gabe raja gumantihon si Saul. Asa molo pe dung gabe raja ibana sanga mangendehon ende Psalmen, sian sude pardalanan ni ngoluna do na niendehonna na marhaujungan di pangokkuon dohot partinandaanna tu Debata Jahowa Parasirohai.

Dalan pangokkuon dahot panandaonnai diendehon ibana mandok: ale Debata, marhaposan tu Ho do ahu. Ho do Tuhanku, ndang adong hasonanganku dungkon ni Ho. Jahowa do partalianku dohot panginumanki, Ho do pasintong jambarhu. Papuji-pujionku ma Jahowa na marrohaihon ahu, tongtong do hubahen Jahowa di jolongku, ai molo di siamunhu Ibana, ndang tagamon humordit ahu. Las ma rohangku jala marolopolop tondingku, dagingku pe sinok do maringan dibahen. Sude pandohani ima pangokkuon ni raja Daud taringot panandaonna na sintong tu Debata Jahowa na manarihon, manjagai dohot marmudumudu ibana.

Laos parsiajaran jala pangajaran mai tu sude na manghaporseai Debata Jahowa di pudian ni ari. Ragam do akka nauli na dibahen Debata Jahowa di pardalanan ni ngolunta, akka nauli sian na metmet sahat tu na balga. Di akka na mangarimangi na Debata Jahowa do patupahoni akkai, patutna ma mangokkuhon asi ni roha ni Debata Jahowa sambing do hangoluan on. Songon dia pe rumangna, sai dipatutomu Debata Jahowa doi asa ditanda jala diokkuhon akka na manjaloi na holan Debata Jahowa do na campur tangan di pardalanan ni ngoluna. Dang holan di tikki akka halalas ni roha dipuji raja Daud Debata Jahowa, alai di sude dalan ni ngoluna na marragami do. Dang tagamon pujion ni halak Debata Jahowa ianggo so ditanda do na Debata Jahowa patupahon akka na masa di ngoluna manang songon dia pe rumangna. Ido asa didok raja Daud, godang do sitaonon ni akka na hapogan paimbarhon Debata. Akka halak na so porsea di pandonganion ni Debata Jahowa, sude hagogoon do dihaporseai. Laos i do mambahen godang sitaonon nasida.

Molo tahaposi do na Debata Jahowa tongtong raphon hita di hangoluanta on, tarpauba Ibana do akka pengalamanta na hansit gabe na marlas ni roha jala marolopolop. Marolopolop mamuji goarNa, ido dihalomohon Debata Jahowa sian akka na mangasahon Ibana. Dang lomo rohaNa molo susa akka na porseai, alai lomo rohaNa ende parolopolopon ende ni akka na porsea di joloNa.

 

Sub Thema 2. Diramoti Debata Jahowa do nang orbuk ni bake ni akka na porsea

                Dang tagamon pasombuonmu tondingku di banuatoru, dang tagamon loasonmu hasianmu marnida habusuhon. Sai pabotohononMu do tu ahu dalan hangoluan, sun ma las ni roha di adopan ni bohim, angka hasudungan ni roha masa di siamunmu salelenglelengna. Tung porsea do raja Daud na adong do hangoluan salelenglelengna di adopan ni Debata Jahowa. Nang pe so dihaporseai haporseaon Jahudi na adong hangoluan salelenglelengna, alai ianggo raja Daud nunga dihaporseai na adong do hangoluan dung hamatean jala mangolu salelenglelengna. Na tinariashonna marhite pandohan: dang tagamon pasombuonmu tondingku di banuatoru, dang tagamon loasonmu hasianmu marnida habusuhon, ido na masa tu Tuhan Jesus di na hehe Ibana sian na mate di ari patoluhon. Dang dipasombu dagingNai sanga marnida habusuhon ala hehe do Ibana di ari patoluhon jala hundul di siamun ni Debata Jahowa dung manaek tu banuaginjang. Dang apala tu ibana sandiri nanidok ni raja Daud marhite pandohani, alai sian pinomparna do muse, ima Jesus na tinubuhon ni si Maria. Ala haporseaon jala pandohani (godang dope akka pangokkuon ni raja Daud na gabe masa di pudian ni ari) dang holan raja si Daud dietong halak na porsea tu Debata Jahowa alai masuk do dohot tu horong ni panurirang.

Di Minggu Trinitatis on, dibohali do haporseaonta paboa na mangolu do akka naporseai di adopan ni Debata Jahowa nang pe mate ibana. Debata Jahowa do mangaramoti bake ni akka na porsea paima ro ari haheheon na balgai ima haroro ni Tuhan Jesus paduahalihon di tikki Maranatha. Mangolu salelenglelengna do akka na porsea, songon Tuhan Jesus na mangolu salelenglelengna jala diparade Ibana do inganan di harajaon ni Debata Jahowa. Tu si do tujuan ni hangoluan dohot haporseaonta, asa dang na marisuang haporseaon tu Debata Jahowa dohot tu Tuhan Jesus AnakNai. Dang holan di portibion hita manghirim, alai hangoluan salelenglelengna do diparade. Ido siokkuhononta huhut siendehononta saleleng ngolunta di portibion. Sai na dongananNa do hita mandalani dohot mangulahon haporseaonta, ai sian Iabna do haroroan nii. Pinuji ma Debata Jahowa nang anakNa Tuhan Jesus Kristus na patauhon jala mandongani hita mardalan tu hangoluan salelenglengna. Amen                                                                                    Pdt. Dr. H.R.Panjaitan/Ka.Dep. Koinonia    

 

Bagikan Postingan ini: