1 MUSA 32:22-31, JAMITA MINGGU XXI DUNG TRINITATIS, 16 OKTOBER 2016

JAMITA MINGGU XXI DUNG TRINITATIS, 16 OKTOBER 2016

NATS : 1 MUSA 32:22-31

 

PARSIRANGGUTAN NI SI JAKKOB DOHOT DEBATA

 

PATUJOLO

Buku 1 Musa on digurithon ± taon 1445-1405 Sebelum Masehi. Buku on dibagi ma gabe dua buku bolon ima : Bindu 1-11, manaringoti panompaan ni Debata di portibion dohot mula ni jolma adong di portibion. Buku iindu 12-50 manggombarhon ise do Ompu ni bangso Israel, ima nataboto si Abraham, Ishak dan Jakkob (Jakkob on didok mai tong Israel) lihat 1 Musa 32:28. Boasa didok ibana Israel jala marganti goarna on, on ma naeng tasigati di jamita sadarion.

 

ISI

1 Musa 32:22-31 “Parsiranggutan ni si Jakkob dohot Debata” on sasintongna udut ni sian 1 Musa 31:1-21 do, didok disi ringkot naeng pajumpang si Jakkob dohot si Esau alani sihol ni rohana hinorhon ni na marsalisi nasida ala naung binuat ni Jakkob sahala sihahaan ni si Esau (lihat 1 Musa 25:31-34), jadi borhat ma Ibana tu Seir.

Ay. 22-23 : Di borngin i hehe ma si Jakkob rap dohot ripena na dua, dua pangurupina parompuan songoni nang sampulu sada ianakhonna, borhat ma nasida taripar luar bolus panariparan ni aek Jabok. Jumolo ma ditariparhon ibana ianakhonna rap dohot jolma nai dungi muse ditariparhon ma nang angka siboanonna.

Ay. 24-27 : Tingki sasadasa disi … marsiranggut ma ibana dohot Debata, alai rupa ni sada baoa do ro tu si Jakkob na martondi Debata  (Allah mengambil rupa manusia berjenis laki). Alai ditingki na marsiranggut i nasida ndang dung tunduk si Jakkob, ro ma baoa i disoro ma soitna (memukul pangkal paha Yakub sampai terpelecok, ay. 24, ay. 31-32), dung disoro soitna pola do gabe telpang ibana (terpelecok) dison porlu taboto jala taingot, ala ompu ni na porsea Jakkob, gabe parningotan do on di bangso Israel tung na so jadi nasida mangan sibuk na adong di pangkal paha (urat doldol).

Di ayat 26 didok ringkot naeng pasu-pasuon ni Debata si Jakkob ala naung diboto ibana ia donganna na marsiranggut i Debata do, jadi didok Debata ma tu si Jakkob i dang be si Jakkob dohonon goarmu (ay. 28) alai Israel nama.

Sasintongna pasu-pasu ni Debata nunga adong mulai sian si Ishak amongna (lihat 1 Musa 27:27-29) jala sahat tu ruma tanggana pe tongtong do ibana dipasupasu Debata (1 Musa 31:3-13).

Ay. 28 : Dung didok jolmai tu si Jakkob, dang be dohonon goarmu si Jakkob, alai Israel nama, ala naung dialo ho do Debata dohot jolma i jala monang do ho. Dung marsingkat goar ni si Jakkob gabe Israel, gabe pasu-pasu ma i tu saluhut nasida. Alai dilehon goar i gabe Israel sasintongna nunga mulai sian opung nasida : Abraham dohot di Ishak alai dang Israel dijou “Pomparanmu” i do didok. Memang goar Israel dang nag oar na asal-asal, jala ndang na sembarangan, Israel na marlapatan : “na marsiranggut do ho dohot Debata nang jolma, jala monang”

Ay. 29-31 : Ua paboa ma goarmu … Jakkob manungkun goar ni Debata, alai dang dialusi Debata, ala goar ni Debata ima na Badia, jala dang boi dohonon goar ni Debata anggo so sian Dalanna. Di tingki tarsosak do jouon goar ni Debata. Debata tongtong do Debata, di bahasa Ibrani/Heber : Ellohim ima Allah manang Yahweh ima Tuhan.

Digoari ma parsiranggutan ni Jakkob dohot Debata “Pniel” (ay. 30) na marlapatan “Ai nunga tangkas huida apala bohi ni Debata, jala malua tondingki.

Memang dihalak Israel na boi langsung marnida bohi ni Debata : ndang adong. Alana dung diida nasida bohi ni Debata, gabe mate ma nasida, jala na boi langsung marnida Debata ima si : Abraham (1 Musa 17:11), Ishak (1 Musa 26:2), dohot si Jakkob (1 Musa 32:30).

 

HAHONAAN

Diparngoluonta songon halak Kristen hita, jotjot do hita manaon angka na dokdok, na tahilala tung na so boi hita manaon i dohot mangalewati i saluhutna alani boratna, songon si Jakkob na ingkon marsiranggut dohot Debata, suang songon i nang angka na asing na ni adopanna, tarsongon na pajumpang ibana dohot simatuana si Laban, angka na maol do tong diadopi ibana disi, songon i tong na marsalisi ibana dohot Esau abangna (sahala sihahaan) lao meminta maaf. Dibagasan toruk ni roha borhat do si Jakkob manopot si Esau, nang pe borat on dirohana. Dison taida niat baik ni si Jakkob ima rade rohana meminta maaf tu si Esau.

Jadi taboan ma angka na borat na di ngoluta on tu Debata, dung taboan tu Debata, ingkon porsea hita disi na ingkon alusan ni Debata angka joujouta on. Molo tung tahilala adong musunta, manang tahilala hurang denggan komunikasita tu donganta rade ma attong hita minta maaf.

Naeng ma nian tong taharingkothon on ditonga-tonga ni Huria, Keluarga nang Negarata, asa unang godang konflik na berkepanjangan, masihosoman, jala dendam.

Na parpudi, tangkas  taida teladan na pinatudu ni Tuhan Jesus, ima ditingki Jesus na tarsilang i dang dibalos Ibana hajahaton dohot hajahaton, alai didok do “Ai ndang diboto nasida aha na niula nasida i” (Lukas 23:34).

Rade ma hita minta maaf songon si Jakkob on, diboan saluhut jolma nai lao manjumpangi abangna si Esau, huhut mangido pandonganion ni Debata. Boan tu Jesus angka na borat na dokdok dingolumi, jala pos roham alusan ni Debata do ho. Amen.

Pdt. Ebert Marbun, S.Th

Bagikan Postingan ini: