Evangelium : Psalmen 15:1-5

Minggu, 29 Januari 2017 (Minggu IV Dung Ephipanias)

“HULAHON HASINTONGAN RAPHON DEBATA”

Patujolo

Hata Psalmen dibuat sian hata Heber “tehillim” na marlapatan puji-pujian jala di hata Junani “psalmoi” na marlapatan Ende na di padomu rap dohot alat musik na di gesek manang na di petik. Alai buku Psalmen on ndang holan marisi ende dohot pamujian sambing, alai dibagasan ende dohot pamujion i, adong do nang angka tangiang na pinasahat tu Debata nang pe sian marsasahalak suang songon i nang marpungu piga-piga halak lao pasahathon pangidoanna tu Debata songon : Raja Daud (Mzm.11-32), Raja Salomo (lih. Mzm. 72), Asaf (Mzm. 73-89).

Songoni nang Evangeliumta di Minggu on (Minggu IV Dung Ephipanias) ima taringot tu ende ni si Raja Daud (Psalmen 15) taringot “Ise do na boi bongot tu bagas ni Debata”.

Hatorangan

Psalmen 15 on, sada ende pamujion ni Raja Daud on, na diendehon ibana tingki di Bagas joro ni Debata songon di ay. 1 na didok : Ale Jahowa, ise do na jadi sorang di bagasan undungundungmu (kemah-Mu : lih. 2 Musa 25:8-9; Josua 22:19; 4 Musa 7:1)? Ise do na jadi mian di dolok ni habadiaonmi (gunung-Mu yang kudus : lih. 2 Musa 3:1 : Gunung Horeb; 2 Musa 19:20-23 : Gunung Sinai)?

Di tingki soadong dope Bagas joro, bangso Israel molo naeng pajumpang dohot Debata dipauli ma sada joro (kemah) manang olo do tong pajumpang nasida dohot Debata di sada dolok naung ditontuhon Debata (lih. 1 Rajaraja 8:13) alai tingki Raja Salomo do, ia dung tingki Raja Daud nunga dipauli be Bagas joro i. Jala Bagas joro na pinaulina dison (kemah) dohot dolok inganan pajumpang dohot Debata dos doi tu gareja naung tapauli di partingkion sisaonari on, na didok na disi ia gareja (bagas joro) na tapauli, arga situtu doi di jolo ni Debata, molo nunga tapauli gabe Bagas joro ni Debata doi, ndang boi hita mengklaim (mandok) garejaku doi gumodang do masuk sumbanganku laho mambanguni dohot lan na asing. Asa unang gabe tubu parsalisian nang angka parbadaan. Molo nunga tapauli sada Bagas joro ni Debata na porsea do hita Debata do nampunai.

Di Psalmen 15 on, tangkas do didok ia jolma na boi bongot tu Bagas joro i ima :

1. Halak na sun burju marpangalaho, dohot siulahon hatigoran, jala sidok na sintong sian bagasan rohana (ay. 2)
2. Halak na so olo mangkata tundal, na so olo mambahen hajahaton tu donganna, jala na so olo mambahen haurahon tu sisolhotna (ay. 3).
3. Halak na mansoadahon na lea, jala dipasangap do angka na mangkabiari Jahowa; halak na so olo manguba naung sinumpahonna, nang tung marharugian ibana (ay. 4).
4. Halak na so olo paanakkon hepengna, jala na so olo manjalo sisip mangalo na lidang roha i (ay. 5).

Na opat poin ima dibaen Raja Daud (Parpsalmen) gabe sada hasomalan tu bangso Israel molo naeng bongot nasida tu Bagas joro ni Debata. Jala gabe sada hasomalan ni ibadah mai, molo tung adong hian pe dosana, ingkon jolo diakui ma i (hasesaan ni dosa, dungi boi ma nasida manjaha patik naung adong sian ompu nasida Musa, asa gabe tanda nasida bangso naung pinillit ni Debata, jala angka on ma tarlumobi na boi bongot :

1. Halak na so olo paanakkon hepengna (bdk. 5 Musa 15:1-11; 23:19-20).
2. Siulahon hatigoran dohot na so olo manjalo sisip mangalo na lidang roha i (bdk. 5 Musa 16:18-20).
3. Halak na so olo mangkata tundal (bdk. 3 Musa 19:16).

Naung adong hian dibaen ompui nasida Musa, naso boi laosan nasida gabe sada aturan ma on di bangso Israel. Dung gabe hasomalan i di nasida tingki rap nasida dohot si Musa, dung di Raja Daud pe laho patupahon ende dohot pamujion di pake ma on sahat tu Bagas joro. Tujuanna asa tutu bangso Israel mangulahon patik ni Debata dibagasan ngoluna jala mabiar mida Debata, jala na rumingkot asa diingot angka sundut naumposo muse on (generasi ke generasi). Sahat tu partingkion saonari on, nunga taulahon i di liturgi Mingguta ima na tajaha Patik ni si Musa, ditingki patupahon liturgi hita di gareja.

Hahonaan

Di partingkian na lam maju on, zaman na lam lumlam on, olo do hita jolma ndang tatanda be donganta jolma, moral ni jolma lam tu jorbut  na dang mamperdulihon ngolu ni partondionna. Psalmen 15:1-5 on, tung ringkot situtu naeng ulahononta diparngoluonta siganup ari, hata ni Debata on, boi gabe alus ni angka na maol nataadopi dingolunta, nang ngolu ni partondionta tarlumobi songon halak Kristen hita, asa boi hita gabe anak ni Debata, jala bongot tu Bagas joro ni Debata. Psalmen on gabe tolak ukur (indikator ni ngolunta).

Apalagi taida partingkian saonari on, boi tangkas taida diangka media massa, dohot di media on line :

1. Uhum na diperjual-belikan (ay. 5), na tingkos boi do gabe sala, na sala gabe tingkos. Na adong di ibana boi do sogok menyogok, alani dang mabiar be jolma i tu uhum, dang mabiar be jolma i mangulahon dosa, jala ndang mabiar be nasida tu Debata, jala umbiaran nama nasida tu uhum ni portibion (polisi, hakim) Alana molo adong di ibana (punya uang) boi do gabe bebas ibana sian uhum.
2. Songoni do nang masalah ni perekonomian. Na godang modalna boi ma mambaen arga na sandiri asa boi dapotan untung na godang, alai molo otik do modal ni ibana, gabe lam mate ma usahana ala nunga dikuasai na marmodal balga pasar on (MEA : pasar bebas di Asia), sasaran na hita ma angka jolma na pogos, gabe lam tu pogos na ma hita.

Suku bunga na lam naik, naeng lao maminjam hita nanggo bungani pinjaman on pen dang tarbayar hita (ay. 5)

Alani i gabe lam tu godangna ma mangulahon hajahaton, dang ringkot be dihita ngolu ni partondionta. Alai narumingkot sian i saluhutna, molo tung pe godang angka namaol na taadopi songon halak Kristen, hita ingkon tutu ma nian hita porsea tu Debata, tapajonok ma dirinta tu Ibana, ima na tatopot Ibana di Bagas joro (gereja), jala gabe Debata ma tapangasahon di ngolunta.

Angka persoalan na adong dingoluntai boi do saluhut na i alusan ni Debata, marhite na porsea hita di Ibana (ay. 2-5). Ai ndang dung Debata manadinghon na porsea di Ibana, jala Debata mamasumasu jolma na tigor roha (lih. Psalmen 112:1-3). Ai ro di saleleng ni leleng do Asi ni rohaNa. Amen.  Pdt. Ebert Marbun, S.Th