EVANGELIUM, MINGGU ADVENT III – 17 DESEMBER 2023

1 Samuel 2: 1-10

Dipatimbul Rohakku Do Tuhan I

I.          Sibonsiri

Minggu on masuk ma hita Minggu Adven napatoluhon, jala ojahan ni Jamitanta: Dipatimbul rohangku do Tuhan i. Molo di Bibel i dibahen judulna “Ende Puji-pujian ni si Maria”, jala aha do bonsir na umbahen marende pujian patimbul Tuhan i si Maria. Taida ma:

1. Boa-boa halongan na sian Suru-suruan Gabariel

Di Lukas 1: 26-38, dipatorang do disi parjumpangan ni suru-suruan Gabariel dohot sada anak boru namargoar si Maria. Disuru Debata suruanNa (pardisurgo) borhat tu Nasaret na di Galilea manopot si Maria pomparan ni si Daud. Ditabi ma ibana didokma:

1. Naniasiaan, didongani Tuhan i ma ho, ai dapotan asi ni roha do ho di Debata!
2. Gabegabean ma ho, tubuan anak ma ho; Jesus ma bahenonmu Goarna. Balga ma Ibana muse, goaron do Ibana Anak ni Natumimbul i; lehonon ni Tuhan Debata do tu Ibana habangsa ni si Daud, amana i.

     Disungkun si Maria do nian pardisurgo Gabariel, songon dia ma pangalaho ni i (bagaimana itu terjadi). Dialusi ma ibana, sian Tondi Parbadia do i masa. Gabe didok si Maria ma: Naposo ni Tuhan i do ahu. Sai saut ma tu ahu songon na nidokmi!

Alani barita nabalga i tung mansai las do rohana manjalo di nanidokna; “Sai saut ma tu ahu songon na nidokmi” (Luk.1:38) laos alani i do umbahen dipuji jala dipatimbul si Maria Tuhan i.

• Barita sian si Elisabet; si Maria do inan ni Tuhan i.

Di Luk 1: 39-45, ditopot si Maria do si Elisabet (ripe ni Sakarias) tu huta Juda. Dinasahat ibana tu bagas i, ditabi si Maria si Elisabet. Umbege tabe i, manggunjal do posoposo di bortian ni si Elisabet laos digohi Tondi Parbadia ma dohot si Elisabet. Laos marsoara nagogo ma hatiha i si Elisabet manghatahon; “Dapotan pasupasu do ho di tongatonga ni angka ina; dapotan pasupasu do na pinarorotmi.” Ndang holan i, alai dohot do dihatahon si Elisabet marhite Tondi Parbadia nasonggop tu ibana, mandok: “Marhua ma pola ro ina ni Tuhanki manopot ahu on! (1:43). Di ayat on, didok si Elisabet, ia si Maria ina ni Tuhan i. Tarhalomong si Maria umbege i, jala las rohana ai halongangan bolon do i. Si Elisabet marhata na sian Tondi Parbadia dompak bohi (secara langsung) mamaritahon tu si Maria, paboa ibana do ina ni Tuhan i.

Marlas roha si Maria ai ditatap Debata do haetehon ni naposona. Naposo nametmet (rendahan) do si Maria alai alai dipatimbul Debata ibana. Dipillit Debata si Maria patulus baga-baga nabolon sian Debata hombar tu nabinagabagahonNa hian tu ompu nasida Abraham. Gabe ro ma tu rohana mamuji-muji dohot pasangap Debata marhite endena on.

II.        Hatorangan

1. Marlas ni Roha Mamuji Tuhan i (: 46-49)

          Marende puji-pujian si Maria patimbulhon Tuhan i. Marende sian nasa roha (segenap jiwa) ibana jala Mariaia dohot tondina. Ndada holan di hata dohot pamanganna natabo begeon sambing endena, alai marende partondion. Diendehon ibana gabe panindangion  ala balga ni pambahenan Debata na tu ibana. Ditodo Tuhan isi Maria, tarpillit sian saluhut angka anak boru na di portibi on gabe ina ni Sipalua ni sandok portibi on ima Jesus Kristus.

Patut do antong Mariaia nang tondina mida Debata, ai dipabangkit ibana, ditatap haetehon dohot hagaleonna. Ndang apala jolma nasangap keluarga ni si Maria, alai ala dipillit Debata Nabadia ibana, gabe marsundut-sundut saluhut jolma naporsea mandok; Namartua do si Maria. Targoar (terkenal) ma ibana di saluhut luhutan ni Israel dohot nasa luat di tano on.

• Asi Ni Roha Ni Debata Di Angka Namanghabiari Jahowa (:50-53)

Dipatubegehon si Maria do di endena, namasa dohot nanaeng masa di ngolu ni angka partigor ima jolma namanghabiari Jahowa, songoni nang tu angka jolma parjahat, angka siginjang marroha. Tuhan sandiri do pamasai di ngolu ni saluhut jolma, ai naung songgop do Harajaon banua ginjang. Diendehon si Maria:

1. Suksuk (berlimpah) do asi ni roha (basa-basa, pasu-pasu) ni Jahowa pasahatonna tu ganup jolma namanghabiari Ibana, jala marsundut-sundut pamasaonNa.  Sai patimbulonNa (pabangkitonNa) do angka namet-met (orang-orang kecil), ima angka na somarama-somarina, namabalu, napogos, naburo, naginosa-gosa dohot angka namanaon angka ulaon naso uhum (ketidakadilan). Diparbohali do angka namale, pola suksuk dilehon sipanganonna be. Antong haroro ni Jesus Sipalua, mangalehon upa haluaon dohot pasu-pasu tu angka natigor marroha. Magurupi angka partigor asa unanga mago jala punu alani angka huaso portibi dohot angka parjahat.
2. Alai ndada songoni tu angka parjahat dohot jolma na ginjang marroha. Dipaserak doi, dipaijur habangsana (direndahkan), jala nang pe nasida lobian nasailaon di angka arta sinadongan dohot sipanganon, alai gabe rumar jala ndang adong nadenggan sijamaon ni tanganna muse, hurangan jala rapar do muse dipalao sian adopanNa. Ndang parsidohot di hatuaon nabinoan ni Sipalua i ai dipalao do nasida, nangpe di adopanNa rade angka naringkot di ngolu ni saluhut jolma.
3. Diingot Debata Bangso Napinillitna Dohot Baga-BagaNa (:54-55)

Dihatahon si Maria di ayat 54-55 on; mulak roha ni Debata mida jolma pardosa:

1. Dipainuinu (diurupi, dijaga, diramoti, diparorot) Tuhan i do manontong Israel bangso napinillitNa i. Haroro ni Jesus nanaeng sorang i tu Israel dohot tu portibi on, ulaon ni Jahowa do i laho mangurupi sian huaso ni dosa dohot paluahon sian nahansit, pardangolan ni jolma. Asi ni roha nasian banua ginjang do i masa, nasian Tuhan i. Mansai balga asi ni roha ni Tuhan tu portibi on, di angka naolo mahamubaon, tapatudos ma tu hata natarsurat di Johannes 3:16: “Ai songon on do holong ni roha ni Debata di portibi on, pola do Anakna na sasada i dilehon, asa unang mago ganup na porsea di Ibana, asa hangoluan na salelenglelengna di ibana.”
2. Mulak muse roha ni Jahowa jala marpamuati rohaNa marningot bangso napinillitNa, Israel. Mulai sian angka panurirang, lelang ni  400 taon ndang mangkuling Debata tu Israel.  Ndang ro hataNa jala ndang disuru be panurirang manungguli nasida. Mandao Tuhan i hinorhon ni dosa ni hajolmaon. Alai dunghon ni i diingot Debata muse angka baga-baga naung niuarihonNa tu angka ompunasida Abraham. Ido nanidok ni Jesaya naujui; “Dibahen i apala Tuhan i sandiri ma mangalehon sada  tanda di hamu:  Ida ma, gabegabean ma sada namarbaju, jala tumubuhon sada anak, jala bahenonna ma goarna:  Immanuel. (Jes.7:14). Immanuel namarlapatan: donganta ma Debata. Immanent = dekat. Ai nunga mandao Debata ala ni dosa i, pola dang mangkuling Ibana mar 400 taon, dang disuru be panurirangNa, alai nuaeng di na ro Jesus, jonok do Ibana, jala di tonga-tonganta.
3. Dipasahat Tuhan Jahowa  baga-bagNa tu si Abraham alai dohot do i nang tu pinomparna marsundut-sundut. Diboto si Maria do tarombo ni si Abraham, gabe didok ibana pomparan ni si Abraham ompu ni naporseai do ibana. Laos sian i do lam tangkas taboto, hasintongan ni hata ni Tuhan ni natarsurat di Jesayas 54:10 “Ai munsat pe angka dolok, jala humuntal angka robean, alai anggo asiasingku na so tupa munsat sian ho, jala padan ni hadameonku na so tupa humordit, ninna Jahowa siasii ho.”

III.       Hahonaanna dohot Panimpuli

1. Marhite perikope on, dipaingot do asa manontong hita mamuji pasangap Tuhan i, songon si Maria ina ni Jesus. Ingkon patimbulonta do Tuhan i di bangasan nasa panggulmit ni ngolunta, ai dilehon  do tu hita barita las ni roha, diingot do hita pomparan ni si Abaraham, diingot do baga-bagaNa angka narobi i asa dapotan pasu-pasu dohot haluaon nang hita. Marpamuati rohaNa mida hita pardosa asa mardame hita tu Debata jala dapotan hangoluan sisalelenglelengna. Songon si Maria, pamujion dipasahat ibana tu Debata, dipatimbul rohana do Tuhan i ala balga ni sangkap dohot ulaon ni Tuhan i di bagasan ngoluna. Ditodo Debata si Maria gabe hite asa sahat Sipalua i tu tano on paluahon saluhut jolma, hombar tu baga-baga di padan na robi. Dohot do do dihatahon ni si Elisabet tu ibana “ina ni Tuhanki” (Luk 1: 43), ina namartua napinasu-pasu (1:42).
2. Sai papataron ni Debata do haluaon dohot pasu-pasu tu angka jolma namanghabiari Jahowa dohot jolma nabonar marroha. Alai baliksa, dipaserak Debata do angka naginjang marroha, songoni angka nagogo, dipaijur (dipatutoru)  Tuhan i angka namora najahat dohot na so marroha holong tu angka napogos,
3. Debata do mangaramoti, mangurupi dohot marmudu-mudu hita ai Ibana nampuna hita. Alani i sai na pujionta do Debata sian nasa roha, dohot nasa pikkiranta.
4. Marhite barita nauli naung sasahat tu hita sian Buku Nabadia i, asa dohot hita marhatopothon; ia Debata marhuaso do manodo jala mamillit manang ise nagabe parhiteaan hasahatan ni baga-baga haluaon  tu portibi on. Ndang mardia imbar di Tuhan i ragam ni status sosial, jabatan, huaso, lan angka naasing dope. Alai ditodo Tuhan i do jolma na dibagasan habadiaon, na manghabiari  Jahowa jala satia maradophon hataNa. Umbahen i tarlumobi di Adven patoluhon on (3) asa marhamubaon hita, jala tapadao ma dirinta sian angka bakko dohot pangalaho namaralo tu lomo ni roha ni Tuhanta. Laos tatiru ma parrohaon ni si Maria namarsihohot ibana daulat marroha mardongan biar tu Jahowa.

Pdt. Hopol M. Sihombing, STh