EPISTEL, KAMIS PUTIH – 06 APRIL 2023

“Panghophopion Ni Jesus Kristus Na Paluahon”

Tertulis : 2 Musa 24 : 1 – 8

I. SIBONSIRI
Buku Musa Paduahon on marisihon taringot tu ulaon (upacara) pajongjonghon parpadanan ni Debata dohot bangso Israel. Panurirang Musa do na mamukka ulaon on marhite-hite na pasahathon sampulu Patik ni Debata. Jala ulaon on ima ungkapan komitmen sian bangso Israel laho mangihot sada parpadanan. Tung mansai serep do roha ni Debata jala lambat tarrimas mida hagaleon dohot dosa ni bangso i. Dilehon do partingkian na mansai leleng tu bangso Israel laho marhamubaon asa malua nasida sian dosa huhut gabe bangso na badia. Boha do cara ni bangso Israel asa manongtong dibagasan habadiaon ni Debata ? Konteks ni turpuk on adong do ontangan na sian Debata tu bangso Israel laho mandapothon Jahowa. Dipasahat Debata do asi dohot holong ni rohaNa (Sola Gratia) marhite-hite parpadanan na pinatupaNa i tu bangso Israel.

Kunjungi juga!
Kanal YouTube HKI untuk mengetahui informasi seputar pelayanan HKI.

II. HATORANGAN
Dipatupa ulaon (upacara) parpadanan ni Debata dohot bangso Israel ima sada bentuk ulaon secara formal di na laho memateraihon padan naung dioloi kedua belah pihak. Astuanna, Debata na gabe pihak parjolo ima naung patuduhon pangaramotionNa tu bangso Israel jala bangso i ima na gabe pihak kedua naung manghatindanghon paboa na mangoloi nasida di sude patik ni Debata. Nunga marpadan bangso Israel laho mangulahon patik ni Debata. Ulaon parpadanan ni Debata dohot bangso Israel dipatupa jala dipukka marhite-hite na pasahathon mudar sian pelean situtungon dohot mamotongi lombu bahen angka pelean hamauliateon di Jahowa. Mudar (Ibr: dim) di Padan Na Robi ima songon gombaran ni hangoluan. Molo halak Mesopotamia mangalapati ia jolma i ditompa sian mudar ni Debata asa adong hangoluan. Ido umbahen mudar sian pelean situtungon i dipasahat ma satonga tu langgatan (representasi ni Jahowa) patandahon hamauliateon ni nasida ala satia do Debata mangaramoti jala marmudu-mudu pardalanan parngoluan ni nasida. Jala satonga nai mudar sian pelean situtungon i dipispishon ma tu bangso Israel dung dihatindanghon nasida ima songon komitmen di na laho manangihon dohot mangulahon hata ni Debata. Lapatanna, mudar i ma songon tanda naung dimateraihon parpadanan nasida rap dohot Debata asa dapotan hangoluan nasida. Dimateraihon lapatanna nunga diihot bangso Israel dirina dibagasan Hata ni Debata, alai ingkon dipatuduhon ma i marhite angka ulaon nasida siganup ari maradophon Debata dohot maradapohon bangso na asing.

Di turpuk on dilehon do tu panurirang Musa sada tugas laho nangkok tu Dolok Sinai ima di na laho manjalo Loh Batu na marisihon sampulu patik ni Debata dohot angka aturan nang peraturan taringot tu na pajongjonghon bagas joro ni Debata. Hata ni Debata tu Panurirang Musa mandok asa ro nasida mandapothon Jahowa. Ibana rap dohot si Aron, Nadab, Abihu dohot pitupuluh tua-tua ni Israel parsidohot ditogihon. Alai ingkon sian na dao do nasida marsomba tu Jahowa ala holan Panurirang Musa do na boi nangkok jala jumonok mandapothon Jahowa. Alai anggo na asing na i dang jadi jumonok jala bangso i pe dang jadi nangkok rap dohot Panurirang Musa. Dung mulak sian Dolok Sinai dipaboa Panurirang Musa ma tu sandok bangso Israel taringot tu Hata ni Debata dohot sude angka aturan nang uhum naung dijalo ibana. Dung dipajojor Panurirang Musa Hata ni Debata dohot sude angka aturan nang uhum, sahata ma bangso i mangalusi songon naung disurathon di ayat 3 paboa “Sude hata angka na pinaboa ni Jahowa, sai bahenonnami do”. Pandohan on ma na membedahon bangso Israel dohot bangso na asing tanda napinillit ni Debata nasida gabe bangsoNa. Ingkon unduk do nasida tu Hata ni Debata. Adong dua hali bangso i mandok songoni ima na tarsurat di ayat 7 jala ditambai nasida do mandok “tangihononnami do”. Didok nasida dua hali pataridahon tekad nasida do i laho mangulahon hata na nidok ni Debata. Lapatan pandohan ni bangso Israel paboa dang holan na mangulahon nasida alai huhut do ditangihon. Manang sebalikna ndada holan manangihon nasida alai ingkon do mangulahon Hata ni Debata. Sian on boi sada kesimpulan paboa manangihon dohot mangulahon Hata ni Debata dang boi secara terpisah manang didok ma sada kesatuan. Adong do tingkina hita manangihon Hata ni Debata, jala adong do tingkina hita mangulahon Hata ni Debata. Ingkon taingot ma, molo dang taulahon Hata ni Debata songon alogo na mangulus sambing do i nang pe tatangihon.

Dung adong alus sian bangso Israel mangoloi Hata ni Debata, disurathon Panurirang Musa ma sude Hata ni Jahowa, jala dipasogot ma manogotna i, dipauli ma sada langgatan di bona ni dolok i dohot sampulu dua tiang parningotan marguru sian na sampulu dua marga ni Israel dohot maksud asa adong tugu/monumen na gabe tanda parsaoran ni Debata dohot marga ni Israel. Dungkon ni i, disuru ma angka dolidoli sian halak Israel, asa dipelehon nasida angka pelean situtungon. Boasa ingkon dolidoli ? Ala memang dihatiha i dang adong dope jongjong songon sada persekutuan angka malim. Jala Hata ni Debata do na mandok jala manjou sude bangso i manjadi harajaon malimmalim dohot gabe bangso na badia.

III. HAHONAAN
Mudar sian pelean situtungon na pinasahat ni bangso Israel patandahon naung mardame Debata dohot nasida. Ima songon sada gombaran di hita halak Kristen angka na porsea paboa mudar ni Kristus di hau pinorsilang i, ima naung padamehon hita dohot Debata. Haluaon na pinasahat ni Debata tu hita digonopi ma i marhite-hite Tuhanta Jesus Kristus. Panghohopion ni Jesus Kristus do naung paluahon hita angka na porsea marhite mudarna na durus di dolok Golgata. Dipelehon Jesus do dirina laho manesa angka dosanta jala Debata marhite Jesus Kristus nunga pasahathon padanNa tu angka na porsea ima pangaramotion dohot pambahenanNa na burju i. Nuaeng, dijou do hita laho manghatindanghon hasatiaon dohot haoloonta manangihon huhut mangulahon hataNa. Ingkon sihol do rohanta laho pasonanghon roha ni Debata marhite-hite haunduhonta di hataNa mardonganhon Tondi Porbadia. Ido umbahen di halak Kristen adong ulaon parpadanan na badia, songon sada ulaon na naeng paingothon paboa na adong do padan ni Debata dohot jolma i marhite-hite na manganhon roti dohot manginum anggur. Roti dohot anggur ima songon gombaran daging dohot mudar ni Jesus Kristus. Jadi, molo mangihuthon ulaon parpadan na badia, ingkon adong do komitmen di hita asa lam tu satiana huhut patuduhon haoloonta tu Debata tanda naung parjolo hita manjalo hasatiaon dohot holong na pinatupaNa. Amen

Pdt. Andrian Simbolon, S.Th

Kunjungi juga!
Kanal YouTube HKI untuk mengetahui informasi seputar pelayanan HKI.

Bagikan Postingan ini: