MARSADA ROHA HUHUT PATUTORU DIRI
Jesaya 45:20–25
I. Sibonsiri
Minggu Trinitatis, ima minggu Hasitolusadaon Ni Debata na laho paingothon hita di sangkap ni Debata taringot tu haluaon na pinatupaNa. Minggu Trinitatis marlapatan tolu pribadi/personal/oknum, alai sada do anggo hakekatna/substansina ima Debata. Tangkas do paboa Debata Ama marsangkap laho paluahon jolma manisia sian dosa, laos dipatulus ma sangkap i marhite-hite haroro ni Anak Ni Debata ima Jesus Kristus na ro tu portibion mamboan haluaon, dame nang songoni hangoluan. Ai didok Jesus do paboa Ibana do dalan i, dohot hasintongan dohot hangoluan jala ndang adong na sahat tu Ama i, molo so marhite Ibana (bdk Joh. 14:6). Jala Tondi Ni Debata ima Tondi Porbadia na mangarahon roha dohot pikkiran ni jolma i asa manongtong marhaporseaon tu Ibana siala Ibana do dalan, hasintongan dohot hangoluan i. Songoni ma gombaran ni minggu Trinitatis na naeng paboahon sangkap na mansai uli jala denggan marhite-hite ulaon ni Debata Sitolusada i.
II. Hatorangan
Turpuk ni jamita sadarion masuk tu Jesaya paduahon manang Deutro Jesaya (40-55), na manaringoti parsorion ni bangso i di habuangan, dohot bagabaga taringot tu haluaon nasida sian habuangan. Turpuk on manaringoti pardengganan na pinatupa ni Debata tu bangsoNa Israel dohot haluaon sian habuangan Babel marhite raja Kores, asa mulak jongjong muse Jerusalem. Di turpuk jamita on dipatuduhon, Debata Jahowa do patupahon pardengganan tu bangso Israel, naposoNa i. Debata do na mamillit nasida gabe bangsoNa. I ma hasurungan nasida sian angka bangso na asing. Asi ni roha ni Debata do i di nasida. Soala hadengganon nasida dipillit nasida gabe bangsoNa. Hape ndang diargahon bangso i pamilliton dohot asi ni roha i, ditundalhon nasida do Jahowa. Ndang unduk nasida tu Jahowa, gariada debata ganaganaan do disomba nasida. Ala ndang satia nasida tu Jahowa, diloas nasida tarbuang, anggiat marhite i ditanda nasida Jahowa parasiroha i. Hape nang pe naung parir diahap nasida di habuangan i, ndang ra muba rohanasida. Nang pe ndang ra muba nasida, mangula do Debata di habungan i, dibagabagahon do tu nasida haluaon marhite asi ni rohaNa.
Huria ni Tuhanta, sasintongna nunga diontang Debata hita sude angka na tinompana asa marhamubaon jala mulak tu Ibana laho manjalo haluaon na pinatupaNa. Ido barita nauli na sahat nuaeng on disoarahon tu halak na porsea paboa nunga diparentahon Debata sude huria i laho marbarita nauli sahat tu ujung ni portibion. Ido umbahen didok di ayat 22 asa sude bangso i mangadop manang dompak tu Debata asa martua jolma i. Nian boi dohonon dang ulaon na mura on alana ingkon adong do proses taringot tusi ala berkaitan tu haporseaon. Di bagasan turpuk on disoarahon panurirang Jesaya do asa mulak bangso i tu Debata dohot hatorangan paboa Debata rap dohot sude angka na tinompaNa. Tangkas do di panompaon i, sian na so adong hian gabe adong do dipatupa. Songoni nang ngolunta on, adong hita dang alani hagogoonta manang hamaloonta, alai holan ala ni huaso dohot habalgaon ni Debata sambing do umbahen adong hita di portibion. Na paduahon umbahen disoarahon panurirang Jesaya asa mulak bangso i tu Debata ima siala Debata do na naeng pasahathon haluaon tu bangso i. Holan parhitean do anggo panurirang Jesaya pasahathon sangkap ni Debata di ngolu ni bangso i.
Sian turpuk on tarida do hasatiaon ni Debata ala memang Debata na satia do anggo Tuhanta nata pe olo sipata dang satia bangso na pinilitNa i. Dao do perbedaan ni Debata dohot gana-ganaan na disomba bangso i ala haliluonna. Molo gana-ganaan ringkot situtu do di nasida pengakuan, alai anggo Debata dang na i na umringkot ala parmulak nasida do manadinghon na jahat i. Nian secara psikologis mansai marsak do anggo bangso i siala diparhatoban, ido umbahen diurupi Debata nasida mulak sian tano parhatobanon i. On do na naeng tangkas botoonta nian, paboa dang adong na tuk mangimbangi huaso ni Debata lumobi ma di portibion. Nang songon dia pe kemajuan teknologi nuaeng on, pasu-pasu ni Debata do i na pinasahatNa marhite-hite angka na pamajuhon. Unang nian tapangasahon gogo manang huaso ni portibion ala parsatongkinan do sudena. Taingot ma, songon dia panurirang Jesaya pasahathon tu bangso i asa mulak muse tu Debata, songoni ma nang rohanta asa marhamubaon jala marpangusandean holan tu Debata.
III. Hahonaan
Marhite-hite turpuk on dipangidohon tu hita angka na porsea asa marsada roha huhut patutoru diri. On ma na gabe sipahusor-husoron di gulmit ni ngolunta. Ala nunga tajalo rupani haluaon na sian Debata umbahen mangolu hita nuaeng, tama do hita angka na porsea marsada ni roha di na laho mangulahon manang mempertanggungjawabhon haluaon naung pinasahat ni Debata. Unang ma nian satonga roha laho manghaporseai Debata alai ingkon marsihohot ma nian. Na mangihut patutoru diri, unang ala naung tajalo haluaon sian Debata gabe sihaginjanghononhon di ngolunta angka na porsea, alai asa lam tapatutoru do dirinta paboa dang adong gogonta hian di na laho mangalo dosa i. Asa lam tu serepna ma nian roha ni angka na porsea dung manjalo haluaon na sian Debata i. Amen
Pdt. Hotman Hutasoit, M.Th
Sekretaris Jenderal
