JAMITA MINGGU 13 MARET 2022 – MINGGU REMINISCERE – MARPANGUNSANDEAN TU TAHI NI DEBATA (BDK. 1 MUSA 15:1-6) – OLEH DEPARTEMEN MARTURIA HKI

Epistel Minggu, 13 Maret 20222

EVANGELIUM MINGGU REMINISCERE
MINGGU, 13 MARET 2022
“MARPANGUNSANDEAN TU TAHI NI DEBATA
1 Musa 15:1-6

PATUJOLO
Ndang sarupa sangkap ni jolma tu sangkap haluaon na sian Debata. Molo jolma, aha na sinangkapanna margatung tu haboionna do parjolo dipeakhon, aha sipangkeonna, alai molo sangkap ni Debata haunduhon dohot serep ni roha di na mangulahon Hata ni Debata do ojahanna.
Uju masa lalo 7,7 Magnitudo gogona di Pangandaran, Pulo Jawa di bulan Juli 2006 naung salpu, pola do didok lalo i “Tsunami Earthquake”, hombar tu barina pinabotohon ni World Health Organization manang organisasi kesehatan dunia mansai torop do halak na mate hinorhon ni i. Adong do 668 halak na marujung ngolu, adong do 65 halak na mago jala didok do naung mate, 9.299 halak na mabugang.
Adong ma sahalak na malua sian lalo i alai masa ma di ibana depresi na mansai bagas hinorhon ni tolu ianakhonna ndang marna dapot. Nunga ro Tim SAR dohot angka peralatan na lengkap laho manghali inganan angka na maloha di humaliang luat na i, alai tong dang adong tarboto di dia ianakhonna na tolu i. Holan sada nama na paposhon roha na, diingot ibana ma, tu singkola do anakna i borhat andorang so masa lalo na bolon i. Diingot ibana do parmisi tu ibana, mandok: ”Kami sekolah dulu ya!”, nunga sai manginongi di bagasan roha na. Marlojongi ma ibana mandapothon parsingkolaan ni ianakhonna i hurang lobi 4 kilo meter sian jabu na. Alai dung sahat ibana, mansai hansit situtu do dihilala ibana, ai holan dolok panimbunan ni angka batu bogas ni gedung na marumpak i nama na adong dohot angka hau. Sai hira na di sintak ronggur nama dihilala ibana, malala pusupusuna mamereng na masa i.
Songgot ma tu roha na, di na sai tumatangis ibana, adong sada haporseaon na mandok, “di son do angka ianakhonku”. Pintor digogohon ibana ma laho manghali angka batu na marbolaan i dohot tanganna papindahon angka batu i. Torop do halak na marnida na masa i, jala mamereng ibana nunga songon na lilu, alai sai torus do dinunuti ibana.
Didok angka na torop i do maradophon ibana: “Loja ma hamu amang, ndang adong be i di si, molo tung pe adong, manambai hansit ni pingkiranmuna nama i”. Alai nang pe songon i, ndang marna so ibana, torus do dinunuti manggali holan mamingkiri ianakhonna i. Torus, sahat tu na bot ari. Di na so panagaman tompu tarbege ma soara ni boroti mardarak di toru, laos tarbege ma soara ni dakdanak songgot mangangguhi. Pintor dihojot amanta i, manghandit boroti i, manjou goar ni anak na i. Nunga borngin, tarbege ma tu anak na i soara ni amang na i mandok: “Bapak …, tolong!” songon i nang soara ni anakna na dua nari, marhaolan do nasida dung masa lalo i, laos tarbege dope soara ni angka na asing manggora, patuduhon na marhosa dope nasida. Laos di tingki i masa ma halongangan bolon, ganup naung malua, gabe masiurupan do nasida manghali laos gabe godang ma nasida na malua. Gabe torop ma na tarhalomong marnida na masa i, huhut mandok mauliate ma tu Jahowa ala na masa i, diida jala dihatindanghon nasida. Molo Debata do na marsoara, aha na so tarpingkiran ni jolma alai boi do dipasaut Debata sangkap-Na.

HATORANGAN
Tung so tarjalo roha ni portibi on do sangkap ni Debata tu si Abram (goar andorang so dijou: lapatanna, Abraham: Ama ni saluhut na porsea). Dibagabagahon Debata do tu ibana, … upam mansai balga”. Ingkon borhat ma si Abram manadingkon hutana dohot angka haha anggina ala haporseaonna tu Debata. Tutu dipangkilalahon ibana do pangurupion dohot godang ni pasupasu ni Debata sahat tu na marumur 85 taon ibana. Alai holan sada do na mangarsaki rohana, nunga be marumur 85 taon ibana, alai ndang adong dope anakna songon panean di ibana. Laos i do umbahen ganggu rohana di bagabaga ni Debata. Hatiha i di bangso Israel ditorushon dope hasomalan paturunhon angka teanteananna tu anakna angka na mangolu. Dihaporseai bangso i do i, jala na marujung ngolu pe parsidohot do dapotan teanteanan. Hombar tu angka barita na masa, nang pe adong dipatupa dalan laho mangorui bilangan ni hatubuan, alai ingkon ingotonta do molo haroro ni sada anak/panean tong do i mansai ringkot di angka na marbagas. Molo taida, andorang so pardijabu ni si Isak si Rebekka, didok parhata na i do tu si Isak: “Gabe ma ho ale ito marriburibu loksa, jala mandapot di pinomparmu ma bahal ni angka musuna” (ida 1 Musa 24:60). Pandohan na sarupa dipasahat do tu si Rut andorang so dibuat si Boas ibana bahen jolmana (ida Rut 4:11-12). Baliksa, angka boruboru na hol diida do i songon sada musu di tongatonga ni keluarga di Israel. Ai haurahon do i dietong nasida di tongatonga ni keluarga, tubu do hansit ni na so marianakhon dohot pangkilalaan na so dijangkon di angka ulaon na marhadohoan.
Dihaporseai si Abram do molo panean i ma silehonlehon na badia, ndada holan silehonlehon sambing, alai gabe milik pusaka Allah, i ma arga na. Lapatanna molo dung adong panean naung sadalan do i tu sangkap ni Debata. Molo dung adong panean na marlapatan do i nunga be mandapot hagabeon sada keluarga, jala molo adong panean na dilehon Debata do hatoruson (regenerasi) ni sada bangso, pola didok gabe bangso na bolon. Molo pangantusion ni halak Batak mandok, molo adong pinompar, naung gabe ma i, boi maranak nang marboru, marpahompu sian anak nang sian boru, didok ma muse saur matua. Umbahen i do uju na marujung ngolu ni sada natuatua naung marhagabean nang marhasangapon disurathon ma di silangna i RIP (Rest in Peace, lapatanna: beristirahat dengan damai).
Hinorhon ni na so adong panean di ibana gabe patubu sungkunsungkun di si Abraham jala songon na marungutungut do ibana, marhata metmet jala mandele, “ … oe ale Tuhan Jahowa, aha ma lehononmu di ahu? Sai na punu do ahu, si Elieser na sian Damaskus na ma sitean bagashu” (ayat 2). Pola sai hira na so magodang ibana mandok: Na punu (mate so marlapatan) … ndi, ndang adong pinomparhu dilehon Ho”, mandok na di bagasan roha na. Dang holan i, gabe sahat do dipatudoshon ibana dirina tu angka naposona na mangula di bagasna. Mago haporseaonna, golap satongkin i. Hira na mandok: “Dibagabagahon angka hamoraon, dibagabagahon Ho hasangapon, alai so dilehon Ho di ahu pinompar”, marungutungut ibana. Uju ndang tulus dope bagabaga i, olo do tubu ganggu ni roha jala hira na so tolap paimahonsa. Tarlumobi ma molo so adong haunduhon dohot serep ni roha di na manjangkon bagabaga i. Laos i do na mangaluahon roha ni jolma i lam dao sian Debata, pintor mambahen sada pingkiran na so adong Debata, gabe patubu rimas ni Debata ibana, jotjot do gabe hadadabu i di na laho pasauthon sangkap hatuaon na sian Debata. Uju di ganggu ni roha i do dipagomos Debata roha ni si Abram marhite hata-Na: “ … ndang ibana tumean ho, na ruar sian butuham, ibana tumean ho”. Halak na sai gale panghirimonna na sai laon nuaeng dipapos panghirimonna marhite hata ni Jahowa di ngoluna, na so jadi halak na asing na gabe panean di ibana, alai anak na tubu sian bortian ni si Sarai jolma na i do. Ditogu Jahowa ibana asa diingot saluhut pambahenan ni Debata tu bangso i dohot tu ibana sandiri asa margogo jala marhatoguon ibana di haporseaonna. Nang pe sian parnidaan ni halak ndang tarida dope bagabaga i, alai ala haporseaon na, marningot hamonangon na nilehon ni Jahowa tu ibana maralohon opat harajaon Sodom. Dang pola be adong sungkunsungkun na mangihut sian pamanganna. Ingkon gohan ni Jahowa nama bagabaga i tu si Abram mangalehon panean asa marhaudutan ngolu na nang ngolu ni bangso na pinillit ni Jahowa. Dilehon Jahowa do sada dalan na tutu manang hata ni Debata taringot tu hatorusan (regenerasi) ni pinomparna nang songon i pe bangso i marhite panumpak ni Jahowa na mangalehon pinompar songon torop ni bintang di langit. Tu angka pinompar ni naposo na i didok: “Ndang ibana tumean ho”, tu pinomparna/paneanna didok: ” … na ruar sian butuham, ibana tumean ho”. Tangkas do tarida pamilliton ni Jahowa, ingkon sian pinomparna sandiri do na gabe panean di ibana, ndang sian halak na asing.
Mulak saotik tu bona, tangkas do diboto Debata hagaleon ni angka naposo-Na, tarsongon si Abram na gabe gombaran ni torop bangso na parjolo i sahat tu nuaeng on. Parbiar, songon naung dipatorang di angka jamita naung salpu, i ma na gabe sahit ni jolma na so porsea di sangkap ni Debata. Mabiar manang lomos i ma sada gombaran na marbalik sian Tuhan i. Hape nunga tung tangkas dilehon Tuhan i do pasupasu-Na, diramoti jala diparmudumudu do angka halak na porsea di Ibana. Angka na mabiar manang na marlomos ni roha i ma na so tontu marhadirion di adopan ni Jahowa, ganggu jala mandele na sai holan na sungkunsungkun di bagasan rohana, atik na boha nama on … dohot na asing. Ndang tangkas haporseaonna. Dang ingot ibana ai sian mulana nunga marbagabaga Jahowa asa bahenonna si Abram gabe bangso na bolon, na tarpasupasu sian saluhut hamoraonna, marsangap di adopan ni torop bangso, jala gabe pasupasu tu humaliangna (ida 1 Musa 12:2). Nunga digohi Debata marsadasada angka bagabaga-Na i. Alai i ma, olo do tubu parange ni hajolmaon songon i tong di si Abram, na so hot ibana “baoa” na naeng didok “na satia”, alai gabe parbiar do ibana, na holan mamingkiri na ringkot di dirina. Tubu do na so denggan di ibana (egois), sampe olo do ibana mengorbankan pardijabuna si Sarai, ala disungkun ise do i? (mandok si Sarai), gabe dialusi ibana: “ibotongku … ” holan laho palua diri na sandiri dohot arta na. Hatiha i maringanan do ibana di Misir. Pola do sampe lomo roha ni si Firaun marnida haulion ni si Sarai jala disangkapi do naeng buatonna ibana gabe jolma na asa haru tamba pardijabuna. Ndang na denggan nian anggo pambahenan na i alai hasatiaon ni Debata ingkon pasautonna do bagabaga-Na marhite si Abram, ndang adong na tuk manundati. Nang so satia si Abram, ndang sundat asiasi dohot bagabaga ni Debata.

HAHONAAN
Suman tu jolma di sihatoropan, boi do lomos si Abram. Tu aha ma sinamot, tu aha ma tutu hasangapon i molo so adong panean. Ndang holan sada dilehon Debata, alai songon torop ni bintang na di langit. Di tongatonga ni ganggu ni roha i do ro Debata mangungkap angka na so masuk angkal ni hajolmaon, alai masuk angkal di Debata. Molo sian hajolmaon ni si Abram dohot si Sarai ndang adong dalan na be boi manubuhon ianakhon. Alai molo tarimangi, ngolunta on ndada holan na boi sipingkiran manang na so boi, adong do na umbalga sian i, i ma haporseaon. Boha do hita mardalan manghaporseai Debata naung mengaramoti hita na sai laon, manghaporseai Debata na pamonangkon hita sian ragam ni hamusuon ro di angka sahit. Boha do hita manghaporseai Debata naung pamonangkon hita sian pangontak ni Covid-19? Ra godang do hita na olo manghalupahon saluhutna i sian Jahowa, alai unang lupa hita tongtong do dilehon Jahowa partingkian tu hita ganup asa taboto na adong do Debata na mangolu, na paingothon bagabagana tu hita ganup. Ringkot do hita marunduk jala marserep ni roha tu Debata, songon Minggunta sadarion, didok Reminiscere na marlapatan, “sai ingot ma ale Jahowa denggan ni basaM” (ingatlah segala rahmat dan kasih setia-Mu, ya TUHAN). Ganup na adong di hita silehonlehon ni Debata do i. Porsea ma hita, tapelehon luhutna parngoluonta tu mual ni hangoluan i, laos i do haporseaonta jala sian i do targoar si Abram gabe ama ni saluhut na porsea (ida Heber 11:1).
Hita pe na tardok ruas ni huria ingkon berjuang do hita mangalo angka ganggu ni roha, lomos dohot godang nari angka pamingkirion na adong di dirinta na jotjot mambahen hamamaol ni parsaut ni bagabaga ni Debata di ngolunta. Unang ma nian gabe hita sandiri na gabe hamamaol ni parsaut ni sangkap haluaon na sian Debata di bagasan ngolunta. Dang hita na manontuhon ari marsogot di ngolunta manang sadia godang basa ni Debata na tu hita. Ndang adong laba na hita paginjang pingkiran nang rohanta, alai asi ni roha ni Debata sambing do na paluahon hita. Dung dipalua jala dipasintong hita gabe tubu do haoloon, haunduhon laho mangulahon lomo ni roha ni Debata. Ai didok do: “Mardongan biar dohot lomos ni roha ulahon hamu ma haluaonmuna! Ai diula Debata do di bagasan hamu giot ni roha nang ulaon saut, mangihuthon lomo ni roha-Na. Di nasa pambahenanmuna: Unang ma hamu marungutungut, unang ma marroha ganggu!” (ida Pilippi 2:12b-14). Sai na urupan ni Jahowa do hita mangulahon lomo ni roha-Na di bagasan hita hombar tu lomo ni roha-Na.
Padan asi ni roha ni Jahowa tu si Abram dohot do manghonai tu dirinta. Ai didok do di Galatia 3:9, 29 “On pe, angka na sian haporseaon i do dipasupasu rap dohot si Abraham na porsea i. Alai anggo Kristus nampuna hamu, pinompar ni Abraham do hamu, antong, jala panean mangihuthon bagabaga i.” Molo tung dohot hita angka na porsea tu Jahowa marhite Jesus Kristus sipalua i, Ibana do Malim na bolon na mangalehon haluaonta i ma pangondian ni ngolunta mangadopi angka ariari ni ngolunta. Hot ma bahen panghirmonta di Jesus maimaima haroro-Na na paduahalihon. Langkahonma dalanmu, marhite parnidaan ni haporseaon na togu so mubauba, nang so tarida marhite parnidaan ni jolma, naung pinarade ni Debata di ganup na porsea di Ibana. Amen.

Penulis:
Departemen Marturia HKI

Penyunting:
Timothy P. Saragi

Bagikan Postingan ini:

About Timothy Saragi

Staf Biro Infokom HKI

View all posts by Timothy Saragi →