GABE SIIHUTHON JESUS OLEH PDT. DORIS M. SIAGIAN – JAMITA MINGGU V DUNG EPIPHANIAS – MINGGU, 6 FEBRUARI 2022

Jamita Minggu V Dung Epiphanias Minggu, 6 Februari 2022 Gabe Siihuthon Jesus

EVANGELIUM MINGGU V DUNG EPIPHANIAS
MINGGU, 6 FEBRUARI 2021
“GABE SIIHUTHON JESUS”
Markus 1:16-20

PATUJOLO
Buku Evangelium Markus on diparhatopot do gabe sada buku na parjolo (na gabe dasor panuratan ni buku Mateus dohot Lukas), na manurathon taringot tu hadirion ni Jesus Sipalua i naung leleng pinaimaima. On ma na gabe buku na marisihon barita taringot tu panghobasion ni Jesus na jumempek. Ia si Markus manang Johannes Markus na sian Jerusalem on, nunga gabe termasuk sahalak na marnida haluaon na pinatupa ni Tuhan tu Apostel Petrus na tarhurung di masa panggomgomion ni si Herodes (Ulaon ni Apostel 12:12) jala gabe dongan sapanghobasion ni Apostel Paulus dohot si Barnabas di luat Siprus sahat tu Pafos (Ulaon ni Apostel 13:4-6). Tung godang do angka ulaon panghobasion dohot halongangan na pinatupa ni Jesus uju di portibion, na sinurathon ni si Markus di buku na on hirahira taon 65-70 M. Saluhutna i disurathon ibana hombar tu na niingotna sian panghataion dohot panindangion ni Apostel Petrus. Jala angka tanda i do na mambahen lam porsea angka sisean ni Jesus taringot tu hadirion ni Jesus na gabe siboan haluaon tu nasida sian panggomgomion ni bangso Rom, uju i.

Turpuk ni jamita di minggunta sadarion i ma bagian panghobasion ni Jesus na parjolo di Galilea (1:14-6:44). Turpuk on ndang tarsirang sian ulaon ni si Johannes Pandidi. Boasa? Ai dung tardidi Jesus, ndang sadia leleng dihurungkon ma si Johannes (ayat 14), dung i ro ma Jesus tu luat Galilea manjamitahon Barita na Uli ni Debata. Dung dipature si Johannes Pandidi dalan ni Jesus, dibaritahon Jesus ma hamubaon ni roha tu na torop (ayat 15). Na marlapatan, naso haotapan ni portibi on angka dalan ulaon parbaritaannauli i. Dung ditangkup si Johannes Pandidi jala tarhurung, manigor ro do na gumogo jala marhuaso manguduti ulaon i, i ma Tuhan Jesus.

HATORANGAN
Dipardalanan panghobasion ni Jesus na parjolo i, dijou Jesus do angka sisean-Na (di turpukta on 4 halak ma na pintor olo gabe sisean-Na, i ma si Simon, Andreas, Jakobus dohot si Johannes). Di na parjolo i otik do na gabe sisean ni Jesus, si Simon dohot si Andreas, laos di tingki i do muse gabe sisean-Na si Jakobus dohot si Johannes. Tangkas do tutu halobian ni Jesus sian na masa on. I ma di na boi Ibana manjou nasida haruar sian angka ulaonna, laos mambahen nasida gabe sisean-Na. Paubahon nasida sian panjala dengke gabe sijala jolma (fishermen become fishers of men).
Adong ma 2 bagian balga na gabe si idaonta sian Markus 1:16-20 on:

  1. Ditanda Jesus do dirinta na rade gabe angka sisean-Na
    Di tingki mardalani Jesus di topi ni tao Galilea diida Ibana adong na manjala dengke. Adong na sumampakhon jalana, laos adong na patureturehon jalana di bagasan parau (ayat 16, 19). Parjumpangan na sangombas, na so marsitandaan hian dope nasida. Pintor adong haradeon ni roha di nasida na 4 halak i laho mangihuthon Jesus. Di ayat 17 didok do na holan saotik sambing do hata ni Jesus tu nasida, “ihuthon hamu Ahu; bahenonHu do hamu sijala jolma.” Tarlumobi molo tajaha di ayat 20, na holan dijou Jesus do na dua nari. Hata na haruar sian pamangan ni Jesus ndada hata elekelek manang elaela, asa adong sisean-Na, asa tarida huaso-Na, asa porsea jolma na umbegesa. Hata panjouon do dibahen Jesus. Hata na so pola patuduhon imingiming haulion, jabatan, hamoraoan dohot na asing, songon na di pingkiran ni torop jolma. Ndang na so adong hian ulaon nasida. Bahkan sian ulaon na i do nasida mangihuthon Jesus (ayat 18). Ndang dibahen nasida angka ulaon na i gabe sidalianna. Ndang pola diparhaseang nasida artana i (parau dohot jala) gabe panundati laho mangihuthon Jesus. Ditadingkon nasida songoni angka artana i dohot ulaonna i. Jala ndang naso adong tutur na nihaholongan nasida di si. Di ayat 20 didok do adong do di si ama ni si Jakobus dohot si Johannes i ma si Sebedeus rap dohot angka anak gajianna, na rap nasida uju i marjala. Alai ditadingkon nasida do i ala mangoloi panjouon ni Jesus. Ndang na so arga di nasida artana dohot tutur na i. Alai ummarga do mangihuthon Jesus. Ndang na so holong nasida tu arta dohot amana i, alai humolongan nasida tu Jesus. Jala mansai tangkas ma di hita, na sasintongna naung jumolo do Jesus mananda dirinta ganup. Ise na olo jala rade bahen sisean-Na, jala ise na sai marsidalian. Ndang marisuang panjouon ni Jesus i dibahen nasida, nang pe ndang tangkas dope di nasida hatiha i, ise do Jesus na sasintongna, jala aha labana mangihuthon Ibana.
  2. Haoloon sian ias ni roha
    Mamungka ulaon-Na marbarita na uli dope Jesus hatiha manjou angka sisean-Na di turpuk on. Boi dohonon ndang dope haru ditanda natorop ise Jesus i. Ndang adong dope halongangan na pinatupa-Na. Ndang adong na gabe sitiopon ni si Simon, Andreas, Jakobus dohot si Johannes molo sian hadirion hajolmaon ni Jesus di portibion hatiha i. Panandaion na so haru tangkas on, boi do dohonon ni halak songon haotoon. Ai gabe ditadinghon nasida ulaon nang na nihaholongan nasida holan laho mangihuthon Jesus, na so haru ditanda nasida dope hadirion-Na. So pola jolo marsoal-jawab nasida dohot Jesus dung dijou Jesus nasida, manigor rade do nasida borhat mangihuthon Jesus. Gabe sai hira jolma na oto do nasida, na so manat mambuat haputusan di ngoluna. Haotoon na nidok ni portibi on, gabe panindangion haoloon nasida na sian ias ni roha. Songon hata ni Apostel Paulus di 1 Korint 1:18 “ai haotoon do hata na taringot tu silang i di roha ni angka na laho mago; alai hagogoon ni Debata do i di hita na dapotan haluaon.” Gabe sisean ni Jesus na niulahon ni na 4 halak on ndada gabe haulion songon panghirimon ni portibion alai gabe silang situhukon nasida do i.

    Haoloon na sian ias ni roha, i ma na taida sian pangalaho ni nasida dipanjouon ni Jesus i. Haoloon si songon on ma na ringkot nang di angka na porsea sahat tu sadarion. Unang holan halihali pangomoan potibi na sai taeahi di na tadok gabe siihuthon manang sisean ni Jesus hita.

HAHONAAN
Ndada dompak bohi be nuaeng tu hita Jesus i molo naeng manjou hita gabe sisean-Na. Hata-Na nama na gabe sitioponta di na laho mambahen haputusan hita di haradeonta gabe sisean-Na. Tarlumobi di naung patar hadirion dohot huaso-Na di bagasan parngoluonta. Ibana naung manompa hita, mangaramoti hita jala manesa nasa dosanta. Dia do na ummarga di hita nuaeng? Panjouon-Na i do manang angka ragam ni basabasa naung pinasahat-Na tu hita? Tung mansai torop do nuaeng on hita na so rade be maninggalhon ulaonna, tingkina, artana, nang tuturna ala didok asa gabe sisean ni Jesus. Jotjot ma gabe sidalian dibahen, di na didok na i sada ulaon na borat, ala dipangasahon gogo nang pingkiranna sandiri, hape asa unang ibana do na tarpillit. Tung tangkas do ganup hita be ditanda Jahowa. Diboto do roha nang pingkiranta. Diida do haoloon manang panjuaonta.

Sadihari pe hita dijou gabe sisean-Na, rade ma hita. Taoloi ma i sian nasa ias ni rohanta. Tarlumobi di tingki adong gogonta, manang haboionta. Unang tatulak asa unang gabe sanga dibahen Jahowa hita martangkang roha songon bangso Israel di turpuk Epistelta (Jesaya 6:9-13). Jala unang gabe rade hita gabe sisean-Na dung magale hita, marsahitsahit hita, manang dung tarunjun hita. Tapasahat ma tu Jahowa bunga na uli jala na hushus i ma dirinta gabe sisean-Na, unang bunga naung malos jala roa.

Penulis:
Pdt. Doris M. Siagian
HKI Resort Pematang Bandar

Penyunting:
Timothy P. Saragi

Bagikan Postingan ini:

About Timothy Saragi

Staf Biro Infokom HKI

View all posts by Timothy Saragi →