LUKAS 19 : 1 – 10, EPISTEL MINGGU XXIII DUNG TRINITATIS, 30 OKTOBER 2016

EPISTEL MINGGU XXIII DUNG TRINITATIS, 30 OKTOBER 2016

NATS : LUKAS 19 : 1 – 10

 

UNTAGONAN DO MARHAMUBAON NI ROHA SIAN PASAHATHON PELEAN

  1. Parbonsiri/Patujolo

            Marhite-hite panghobasion-Na diportibion, godang do angka jolma namarhamubaon ni roha jala gabe mulak tu Kristus. Alai, ianggo hamubaon ni sada halak na dietong mansai luarbiasa disurat do i di Bibel, tarsongon hamubaon ni si Sakeus on. Panurat surat on namargoar si Lukas, sahalak pangubati mansai tangkas do patandahon songon dia do si Sakeus on secara biologis. Ai pardaging na met-met do ibana. Dipatorang disialai gabe maol do ibana mangida boha do rupa ni Jesus, ai diambati angka natorop i do pamerenganna. Namasaon di hatiha dibolus Ibana huta Jeriko. Ima sada huta na dibangun di atas kutukan (Yosua 6:26). Alai diparsangapi Ibana do parrona di huta na terkutuk i, ai nalaho mambolongkon kutukan i do ianggo barita nauli. Nalaho tu Betani do Ibana na adong di bariba ni mual Jordan i, ima sada huta  na jonok tu Jerusalem. Naeng rohana pabangkithon si Lasarus naung mate. Andorang so masa dope i, dison ma Ibana pajumpang dohot si Sakeus sahalak induk  ni angka sijalo beo (pemungut cukai).

Didok induk ni angka sijalo beo, namarlapatan doi sada pimpinan di angka pemungut cukai. Molo dihatihai nuaeng on, boi ma ra dipados si Sakeus on tu kepala bea cukai na adong di bangsonta on. Godang do nasip ni angka sijalo beo nahurang denggan di hatihai, alai ianggo si Sakeus on namora do ibana, jala sangap do ibana dihajolmaonna ala ni statusnai sebagai indung ni sijalo beo. Alai tangkas do di dok di surat on, ai pardaging na metmet do ibana. Tontu sahali gabe sada tantangan naborat do diibana disiala hahuranganna on. Ai jolma nasangap do ibana marhite ulaonnai, alai ianggo sahali on naingkon rade ma dirina gabe insahan ni angka jolma, ai pardaging nametmet do ibana, tung maol tutu ibana naing mangida rupa ni Jesus i. Alai dang tardok harajaon ni Debata tahe haroro ni Kristus molo siida daging do Ibana. Hahurangan-hahurangan ni daging naung binoan sian na sorang tu portibion ndada boi i gabe sipangambati tu harajaon ni Debata. Molo sian statusna halak namora ibana, jala sangap; boi hian ma nian pangkeonna podati hoda laho manomu-nomu Jesus, manang hureta dinasna laho mangida rupa ni Jesus i, atik boha disiala namarhoda ibana gabe dipasiding angka jolma dalan tu ibana mandapothon Jesus. Alai hau gala-gala do naingkon gabe dalanna laho mangida rupa ni Jesus i. Jala ingkon jangkitonna do hau gala-gala i, asalma pajumpang ibana dohot Jesus Kristus.

 

  1. Hatorangan ni Turpuk

Menarik hian do memang marningot harajaon ni Debata on. Aha nasomungkin tarpatupa ni angka jolma gabe i do naummura dipatupa Debata. Aha nagabe maol hian di angka jolma gabe mura doi di adopan ni Debata. Ibanna sai jot-jot do Jesus mandok tu angka siseanna, ai harajaon ni Debata ndada songon harajaon ni jolma na mansai godang dohot dunia parpolitikan, ima dunia naulo padabuhon angka donganna tu bagas pangunjunan. Alai ianggo harajaon ni Debata ima sada ulaon nadao hian angka jolma i sian ngolu na denggan gabe berbalik 180 derajat tu haulion ni ngoluna. Jala taida do i sian turpuhon di bagasan hamubaon ni si Sakeus.

 

 

  1. Ditanda Debata do ganup goar ni jolma naung pinillitna

Sakeus manang didok Zakcai/oj (Zakaios) di bahasa Junani. Sasintongna goar Sakeus, patandahon status na halak Jahudi do Ibana. Zaccai ima sada goar nabiasa dipangke di angka halak Jahudi. Sahalak namora do ianggo si Sakeus on, jala sangap do ibana diulaonna na gabe indung ni angka sijalo beo. Alai mansai maol do ibana mandapothon harajaon ni Debata natape namora ibana. Nungnga dipapungu ibana arta nagodang diportibion, alai ianggo arta di harajaon ni Debata ndang dope diida ibana. Alai marhite turpuhon dipatorang ma tu hita maol situtu do tahe angka nagok artana mangalului harajaon ni Debata dibaen gok ni artanai. Alai ianggo si Sakeus on, dipatuduhon ibana do ai namora natargasip do ibana saleleng on. Jala nungnga dilului harajaon ni Debata ibana. Jala nueng gabe dapotdo tahe anak namago i, nga jumping muse dibahen harajaon ni Debata.

Zakcai/e( speu,saj kata,bhqi (Zakchaie, speusas katabethi) namarlapatan: “Ale, Sakeus, humatop ho mijur sian hau sigala-gala i”. Toho tutu, dang dietong si Sakeus on naung ditanda Jesus do hape ibana, jala goarna. Mungkin songgot mardongan lasniroha do ibana di hatiha dijou goarna. Toho tahe, Sakeus sahalak sian bangso naung pinillitna gabe bangsona ditandai Debata do. Songoni ma nang hita naung pinillitna gabe bangsona di haporseaonta di bagasan Kristus Jesus, di tanda Debata do ganup goarta. Tarsongon si Sakeus na sinuru ni Debata asa humatop ibana mijur sian hau sigala-gala i, songoni ma nang hita ganup dijou Debata hita asa humatop ro hita mandapothon Ibana, ai itanda Debata do ganup goarta. Jala nuaeng di dok di hita: “Humatop ma hamu ro, ai naung Hujou do hamu marhite goar munai, jala naing sorang Ahu tu bagasmuna” (Ayat 5).

 

  1. Hahurangan ni pardagingon ndada boi sipangambati di harajaonNa

            Tangkas do di dok pardaging namet-met do si Sakeus on. Sada hahurangan do di dagingna i naung binoanna tu portibion disi sorang ibana ujui. Alai dang gabe sada alasan di ibana dang pola mangida Jesus ala pardaging namet-met ibana jala maol ibana mangida rupa ni Jesus ibaen onding ni angka jolma natorop i. Sasintongna, hahurangan di pardagingonna gabe sada gogo do i, bahen parjumpanganna dohot Jesus i. Harajaon ni Debata ndada manaringoti tanda-tanda lahiriah. Ndada manaringoti angka hahurangan ni daging, alaimanaringoti angka jolma naung mago ingkon jumpangan muse di Debata. Dihajolmaon, tontu adong do perasaan harga diri maradophon angka jolma. Boha ma tutu, sahalak namora, sahalak nasangap i, gabe marlojong songon dakdanak, jala pintor manjangkit hau sigala-gala holan laho mangida rupa ni Jesus i. Di pasiding ibana do harga diri, laho manomu harajaon ni Debata nanaeng ro tu ibana.

Nang dihita pe angka halak Kristen si nuaeng on, unang do disiala hahuranganta di sada sisi mambahen hita tarambati manomu-nomu harajaon ni Debata. Manang adong nahumurang sian pardaginganta, ala sahit, ala faktor kecelakaan, manang alani aha pe umbahen adong nahumurang sian dagingta i, ndada boi i gabe sipangambati di haroroni harajaon ni Debata tu hita. Sotung unang muse disiala hamoraon manang hasangapon natapep nuaeng gabe mambahen hita maila marlojong ro tu harajaon ni Debata. Unang olo hita merasa kecil hati mandapothon haroroni Jesus di ngolunta. Tu angka ganup namanghobasi ulaon ni Debata pe diparhuriaon, sotung unang olo merasa kecil hati laho melayani Ibana holan ala merasa hita marhahurangan di dagingta. Olo hita dipangke Debata laho melayani Ibana di huriaNa i.

 

  1. Naeng untangkas hita tandaon ni Debata

            Sasintongna memang hurang tepat do kalimat on, Alana mansai tangkas do hita ditanda Debata. Alai marhite dipanjouonna di ganup hita, naeng do tangkas hita tumanda Jesus i muse secara pribadi dingolunta.  Dalan ni Jesus laho patandahon diriNa asa lamtutangkasna tandaon si Sakeus, ima marhite panggonghonanNa tu diriNa sandiri laho manomu-nomu tu bagas ni si Sakeus i. Tangkas do diida Jesus las ni roha ni si Sakeus nalaho manopot Ibana, disiala i las ma tutu rohani si Sakeus mangoloi hatani Jesus i. Secara strata sosial nagabe indung ni angka sijalo beo; tontu godang namarsogo niroha di ibana. Ala merasa do nadeba sude angka sijalo beo mandapot angka artana sian angka na jat. Manggomahi angka hepeng ni halak asa tulus angka halak mardagang dohot angka naasing. Songoni ma hira-hira penilaian ni na deba tu ibana. Ali asing do harajaonni Debata hape. Molo jolma mangida sian rupa, alai ianggo Jesus mangida sian roha ni si Sakeus nasihol rohana mandapothon harajaon ni Debata. Naing do untangkas botoon ta nuaeng, nauntangkas do Jesus umbotosa si Sakeus. Jala naeng porlu do tangkas botoon ni si Sakeus songondia do hape roha ni Jesus tu ibana taringot aha naniulana saleleng on.

On ma dogoari sada haunduhon ni roha di si Sakeus. Naeng rohana asa lam ditanda ibana Debata Jahowa tanpa tekanan sian angka jolma. Alai godang do tong taida sinuaeng on, ala lam ringgas sada halak tu bagas joro ni Debata gabe tadok tu ibana: “bah… songon nasobiasa”. Manang olo do gabe sada umpola ni hata-hata di angka halak naasing, gabe tadok ibana na sipanggaron, manang tanilai secara negatip holan ala olo ibana ro tu bagas ni joro ni Debata. Unang manian songoni. Talehon ma dirinta laho mananda Jesus undao muse. Tingkion, nuaeng, marhite turpuhon naeng ma sorang Ibana tu ganup hita namanjaha barita on. Loas ma Ibana sorang tu bagas rohanta ganup, ai untangkas do Ibana mananda hita unang hita sandiri. Disiala i umboto do Ibana mangatur parningolunta unang hita nuaeng. Jala molo olo hita, lama godangma tatanda sian holongNa tu hita.

 

  1. Harajaon ni Debata, I do arta naummarga

Disadari si Sakeus do na adong do ra sian ulaonna i nasoture diulahon ibana saleleng on. Disiala dijalo ibana do Jesus sorang tu bagasna gabe diantusi ibana ma, ido hape arta naummarga sian sude arta naung adong dapotna sian ulaonna saleleng on. Gabe tangkas do hape diboto si Sakeus, andorang so manjangkit hau sigala-gala i ibana, nungnga ditanda Jesus ibana jumolo. Aha pe naniula ni si Sakeus saleleng on, tangkas do i diboto Jesus. Ai Debata do Jesus i, tontu aha pe nataula sadarion, manang nantuari, manang na udjui tangkas do diboto Jesus i. Alai hasesaan ni Dosa, ima harajaon ni Debata. Tung ise matutu jolma naummora diportibion dungkon ni jolma naung disesa dosana? Disiala i do ibanna disadari si Sakeus do dirina saleleleng on, jala marjanji diadopanNa naingkon paulakonnai opat hali lipat (ayat 8). Songoni do molo naung ro harajaon ni Debata disada halak. Ndada seang dihilala ibana mangalehon artana gabe sada pelean namangolu i di Debata; mangurupi angka jolma nahahurangan. Namaol situtudo tahe jumpangan jolma nasisongon on nuaeng. Gabe umbiar do mangalehon pelean di Debata unang manuhor togel . Alai ingkon jujur do hita, molo sai maol hita mangalehon pelean tu Debata mungkin ran dang tangkas dope talapati naung ro harajaon ni Debata tu hita. Antong, tasadari ma arta naumbalga dihita nuaeng ima Jesus Kristus naung ro mangalehon hosaNa humonghop hita angka pardosa on. Pangaramotionna siapari sada takaran do i di hita laho mangantusi godang ni pasu-pasuNa di hita. Alai ingkon tangkas do taingot, ingkon songon si Sakeus on ma hita tutu. Dang umbalga hepengta sian hasesaan ni dosanta. Dang umbalga artanta sian balga ni holong ni roha marnida hita angka jolma pardosa on. Jala dang unsangap hita hape nuaeng sian hasangapon naung pinaulakNa tu hita marhite harajaonNa, nagabe targoar hita anak ni Debata. Ima harajaon ni Debata.

 

  1. Martua ma jolma naolo manjangkon Jesus gabe Debatana

            Gabe digoari do si Sakeus on gabe jolma namartua (ayat 9), ai pinompar ni si Abraham do ibana nuaeng.  Dung dijangkon ibana Jesus nagabe Debata namangolu di ibana, gabe dapotan haluaon maibana sian angka dosana. Nuaeng gabe tardok ma ibana siparsidohot di harajaonNa. Boha do tutu hita nuaeng? Naung tajangkon do Jesus i gabe Debata namangolu di hita nuaeng? Manang ginjang dope rohanta jala dang olo hita mandapothon Ibana dingolunta? Manang taetong do sude naadong dihita nuaeng, ndada ala basa-basa ni Debata i? Jadi didok nasida ma: Haporseai ma Tuhan Jesus, asa malua ho dohot isi ni bagasmi! (Ul.apostel 16:31). Martua ma tutu hita molo nga malua hita dohot donganta sabagas sian huaso ni Jesus ala nanung tinobus ni Kristus i hita. Songon si Sakeus naung marbalik jala marhamobaon di Debata, songoni ma dohot angka pangisi ni bagasna, ripe na dohot angka ianagkonna gabe marhamubaon do tong tu Debata. Songoni do nang hita nuaeng, autsugari ma nian ama i olo marhamubaon niroha diadopan ni Debata, dijamin hata ni Debata on do dihita nuaeng, pasti do donganta sabagas pe marhamubaon ni roha do di Debata.

Sian partuturanna memang toho do si Sakeus pomparan ni si Abraham. Alai alani ula-ulana nagabe indung ni angka sijalo beo, gabe tarcap do ibana gabe halak kafir di angka halak Jahudi, jala maila do angka halak Jahudi mandongani si Sakeus on dipardonganon. Alai ima penilaian ni jolma. Haroro ni Jesus tu ibana ima nalaho paulakhon statusna i gabe mulak tu pomparan ni si Abraham. Alai dipatudu ibana do, haporseaonna tu Jesus mamboan ibana tu hamubaon ni rohana, jala dipatuduhon Jesus do tu angka jolma i naung toho ibana gabe rectus in curia namarlapatan sintong do ibana di bagasan uhum ni Jahudi na pomparan ni si Abraham ibana. Songoni ma nang hita, molo tajangkon do Jesus i gabe Debata namangolu di hita, gabe dipasintong Ibana ma hita di uhum ni Debata, napomparan ni si Abraham do hita dihaporseaonta di Ibana.

 

III. Panimpulion

            Undenggan do marhamubaon ni roha tu Debata sian pasahathon pelean. Alai ndada naing dohonon naso porlu pasahathon pelean tu Debata. Alai disiala ni tabiat ni halak Jahudi na padalanton ulaon keagamaan ni nasida mansai denggan, dipasahat do pelean namatutung tu Debata alai sahat tu sadarion ndada ditanda nasida haluaon ni Debata marhite Tuhan Jesus. On do nanimaksud marhamubaon ni roha. Tatanda ma nian Jesus Kristus i nagabe sasadasa Debata naung paluahon hita sian dosa jala naung gabe dapotan hangoluan hita nuaeng. Songon halak Jahudi napasahathon pelean namatutung bahen hasesaan ni dosa di adopan ni Debata, songoni ma nang Jesus Kristus naung gabe pelean nasintong di Debata bahen hasesaan ni dosanta. Tahamauliatehon ma i antong. Taingot ma Debata do arta naummarga dihita nuaeng, ndada hamoraonta, ndada hasangaponta, ndada gellengta dohot lan naasing. Alai tarsongon si Sakeus on, tung so mararga do nuaeng dihilala ibana angka artanai holan alani haroroni harajaon ni Debata tu dirina, tu bagasna, tu angka ulaonna. Gabe ias ma ibana tutu, jala didok ma ibana jolma namartua. Hita pe targoar ma jolma na dapotan tua sian Debata holan molo olo hita manjangkon Ibana gabe Debata ni sude ngolunta, Debatani keluarganta, Debatani angka ulaonta, dohot Debatanta secara pribadi, namanontong mangolu, mangula dohot mangarajai didirinta. Boasa ingkon songoni? (1) Ai ditanda Debata do ise hita marhite goarta ganup, (2) dipangkulingi Debata do hita on nuaeng marhite-hite goartai, jala didok di hita ai pomparan ni harajaon ni Debata do hita on marhite-hite goarNa I, (3) Taloas ma Ibana marhuaso di bagasan ngolunta asa marhuaso ma tutu harajaon ni Debatai di ginjang ni saluhut angka nataula. On ma naumringkot dihita nuaeng, talapati ma pandok ni hata ni Debata on. Ai untagonando dung taantusi saluhutnai, muba ma nang rohanta tutu, ai ummarga do I sian napasahathon pelean. Molo ganup jolma na pasahathon pelean ndada boi tardok naung marhamubaon ni roha saluhutna, alai angka jolma naung marhamubaon ni roha, tau do nasida na dirina do pelean namangolu di adopan ni Debata. Amin.

 

C.Pdt. Martupa Manalu, S.Th, M.Div

Bagikan Postingan ini: