PSALMEN 111 : 1 – 10, EPISTEL MINGGU XX DUNG TRINITATIS, 9 OKTOBER 2016

EPISTEL MINGGU XX DUNG TRINITATIS, 9 OKTOBER 2016

NATS : PSALMEN 111 : 1 – 10

 

“MAMUJI JAHOWA ALA DENGGAN NI PAMBAHENANNA DI NGOLUNTA”

 

  1. PANBONSIRI

Buku Psalmen on masuk do tu horong “Kitab Puisi”. Adong do 150 bindu di buku on na manggombarhon panghilalaan ni angka  ni par Psalmen di tongatonga ni ngoluna. Adong do tangiang, andungangdung, angka pujipujian, joujou tu Debata dohot angka las ni roha dohot ungkapan perasaan na asing dope. Buku psalmen on somalna dipangke do najolo di tongatonga ni ibadah ni halak Israel. PSALMEN di bagasan hata Heber “Tehelim” na marlapatan “pujipujian” (Di bagasan septuaginta digoari Psalmoi na marlapatan ende pujipujian na diiringi alat musik). Buku Psalmen on, ima tangiang dohot pujipujian na tahaporseai na sian Tondi i, disurathon laho manggombarhon panghilalaan ni angka par psalmen dibagasan parsaoran na rap dohot Debata di ngoluna.  Secara khusus naeng idaonta balga dohot denggan ni pambahenan ni Debata di ngolu ni bangsona marhite psalmen 111 on.

Psalmen 111 di hata aslina ima hata heber disurathon do secara Akrostik manang hombar tu urutan ni angka huruf/ abjad ni halak heber, ganup baris sian psalmen on dimulai sian abjad ni halak heber. Laos on do na gabe keunikan ni psalmen on. Jala isi ni psalmen on ima taringot tu haluaon ni bangso na pinillit ni Debata ima bangso Israel sian parhatobanan Misir, angkup ni i ditaringoti do taringot tu pangaramotion ni Debata di bangsoNa i di pardalanan 40 taon lelengna andorang so bongot nasida tu tano na nijanjihon Debata tu ompu nasida, si Abraham, si Ishak dohot si Jakob. “Tano na gok susu dohot situak ni loba” ima tano Kanaan. Boi do dohonon, Psalmen on ima marisihon pujipujian tu Jahowa ala ni haluaon na dohot saluhut pangaramotion dohot pasupasuNa na suksuk di ngolu ni halak na manghaholongi jala na manghabiari ibana. Tubu do di roha ni par psalmen laho mamuji Debata sian nasa rohana di sandok gulmit ni ngoluna dohot di tongatonga ni huria i. (Psalmen 111:1).

 

  1. HATORANGAN NI TURPUK

Digoari do psalmen on ima “Psalmen Halleluya” manang “Mazmur Haleluya”. Ala dimula ni Psalmen 111 on parjolo sahali didok par Psalmen hata “Haleluya”. Dang holan di pasalmen 111 on na masuk tu horong ni “Psalmen Haleluya”, alai boi do idaonta nang di psalmen na asing, isarana psalmen 106, 112, 113, 135, 146, 147, 148, 149 dohot 150.  Hata “haleuluya” patuduhon las ni roha ni par psalmen di ngoluna. Gok   pujipujian do rohana. Jala hata “Haleluya” ima hata na patuduhon roha na mandok mauliate na mansai balga sian sasahalak manang kelompok (punguan) tu Debata, ala pambahenanNa na mansai uli dohot denggan di tongatonga ni ngoluna, jala ala ni haluaon na jinalona sian Debata di tingki ro hamaolon dohot parungkilon di ngoluna. Jala holan angka halak na tutu manghilalahon denggan basa dohot pangaramotion ni Debata di ngoluna do na tuk mandok “Halelelya”. Jala ingkon patuduhonon do hata “Haleluya” i di saluhut gulmit ni ngolunta.

 

Adong do 3 bagian na naeng idaonta sian turpuk on:

 

  1. Komitmen laho mamuji Jahowa (Ayat 1)

Komitmen ni par psalmen tangkas do boi idaonta sian hata na na mandok: “Pujionku ma Jahowa sian nasa roha”. Sada komitmen na mengandung arti gok pujipujian tu Jahowa ma roha ni par psalmen. Dang adong be na asing di bagasan rohana, pujipujian, las ni roha dohot roha na mandok mauliate dipasahat par psalmen holan tu Jahowa sambing. Jala komitmen on lantang do didok ibana dang holan dibagasan rohana dohot dirina, alai dipaboa do tu halak na asing “di luhutan ni angka partigor dohot di huria i”. Sian i boi idaonta pujipujian tu Debata dang boi holan gabe “konsumsi pribadi” alai ingkon botoon ni halak do las ni rohanta umbahen na tapuji Debata dibagasan rohanta. Molo las rohanta ala ni pambahenan ni Debata di ngolunta, tarida ma i sian sude gulmit ni ngolunta, marhite angka tindakanta, panghataionta, pamingkirionta, dohot parangenta. Laos ido hira “iklan” na mangolu tu halak na di humaliangta, na paboahon, manjamitai, dohot na manjou nasida asa dohot mangida denggan basa dohot balga ni pambahenan ni Debata di tongatonga ni ngoluna, jala laos i do na gabe joujou tu nasida asa dohot mamuji pasangaphon Tuhan i di ngoluna.

 

  1. Angka pambahenan ni Jahowa di ngolu ni bangsoNa (Ayat 2 – 9)

Di bagian na paduahon on dipaboa par psalmen do alasanna ingkon mamuji pasangaphon Jahowa di ngoluna. Didok nangkin “Balga do angka pambahenan ni Jahowa, hinalungunhon ni sude angka na lomo roha disi.” Balga ni angka pambahenan ni Jahowa ido na gabe alasan umum ni par psalmen on mamuji Jahowa di ngoluna.

Secara khusus dipaboa par psalmen do balga ni pambahenan ni Jahowa di ngolu ni bangsoNa. Didok par psalmen do “hot do jongjong hatigoranna i salelenglelengna”(ayat 3), “pardengganbasa jala parasi roha do Jahowa.” (ayat 4), “diparbohali angka na mangkabiari Ibana, diingot do padan binahenna i ro di salelenglelengna.” (ayat 5), “dilehon tu bangsoNa parjambaran ni angka parbegu.” (ayat 6), “hasintongan dohot uhum do angka pambahenan ni tanganna, sintong do sude angka patikna i.” (ayat 7), “Hot do pambahenan ni Jahowa ro di salelenglelengna, dibahen do angka i di bagasan hasintongan dohot habonaron.” (ayat 8), “nunga ditongoshon Ibana haluaon tu bangsona, dipatik do padan binahenna i salelenglelengna, nabadia jala na songkal do goarna i.” (ayat 9).

Sude do i diparrohaon, dihilala, jala dibilangi par psalmen di ngoluna, ido na mambahen tubu las ni roha di ibana jala ido na mangonjar ibana mamuji pasangaphon Debata di ngoluna. Laos on do na naeng paboaonna tu saluhut halak, asa mananda pambahenan ni Debata di ngoluna ganup, asa marlas ni roha nasida mamuji pasangaphon Debata songon par psalmen on di ngoluna.

 

  1. Tatanda ma pambahenan ni Debata di ngolunta. (Ayat 10)

Dibagian na patoluhon on dijou do saluhutna hita asa tatanda asi dohot holong ni roha ni Debata dohot sude pambahenan ni Debata di tongatonga ni ngolunta. Otik, godang, balga, gelleng pe tahilala pasupasu i, naeng ma tahamauliatehon. Ai dilehon Debata do pasupasu i tu hita ganup marsadasada hombar tu takaran masing-masing, hombar tu kemampuanta laho manjalo pasupasui. Dijou do hita muse asa tatanda pambahenan ni Debata di ngolunta, secara khusus selaku halak na porsea hita, nunga dipalua Debata hita sian parhatobanan ni dosa i. Nunga disuru Debata anakNa na sasada i, ima Jesus Kristus tu portibi on, manaon na porsuk jala mate di hau pinorsilang i laho paluahon hita sian dosa i. Asa mangolu hita muse rap dohot Ibana jala bongot hita muse tu harajaonNa i, di surgo hasonangan i, naung pinaradeNa di angka na porsea. Didokdo di ayat 10 on  “Biar mida Jahowa do parmulaan ni habisuhon, maruli hapistaran na sumurung do sude angka na mangulahonsa; hot do baritana i ro di salelenglelengna.” Marhabiaran tu Jahowa ma hita, taulahon ma saluhut na nihalomohonNa i di ngolunta. Molo taulahon i, dapotan bisuk dohot hapistaran ma ma hita sian Tuhanta.

 

  1. HAHONAAN

Di tongatonga ni ngolunta di tingki saonnarion, secara sadar manang dang, nunga mangula Debata di tongatonga ni ngolunta sahat tu tingki on, nunga tajalo ragam ni pasupasu pardagingon dohon partondion sian Debata. Na gabe permasalahanima: tatanda jala tahilala do pambahenan ni Debata na balga i di tongatonga ni ngolunta i?

Godang do halak na manghilala, sada kewajaran do molo sude na masa di ngoluna on, ala ni gogona dohot haboionna. Isarana, molo boi ibana hehe manogotna i, mangolu, marhosa, boi margogo jala hipas mangula angka ulaonna siganup ari,  gabe sude na niulana, ganjang umurna jala dapotan pasupasu na marragam i didok rohana do ala ni haboionna/ kemampuanna do i sude. Dang ditanda ibana, saluhutna i boi masa di tongatonga ni ngoluna ima ala adong campur tangan ni Debata di ngoluna. Angka halak sisongoni jotjot ma madabu tu ginjang ni roha dohot dosa.

Dibahen I, dijou hita marhite turpuk on, asa tatanda ma saluhutna na masa di tongatonga ni ngolunta i dang lepas sian campur tangan ni Debata. Debata do mual ni angka pasupasu pardagingon dohot partondion, dilehon do hita hahipason laho mangula, dipargogoi, jala ditiop Tuhan i do hita di ragam ni angka parungkilon na masa di ngolunta. Ditangihon do tangiangta jala dilehon do angka na ringkot i di ngolunta. Tarlumobi dilehon do tu hita haluaon ni tondinta i di bagasan Kristus Jesus. Tatanda ma pambahenan ni Jahowa na balga i di ngolunta, asa marlas ni roha hita jala mampu ma hita mamuji pasangaphon Debata sian nasa rohanta. amen.

 

Pdt. Rogate Dan M.J. Silitonga, M.Div

Bagikan Postingan ini: