Psalmen 51, 1 – 10, EPISTEL MINGGU XVI DUNG TRINITATIS, 11 SEPTEMBER 2016

EPISTEL MINGGU XVI DUNG TRINITATIS, 11 SEPTEMBER 2016

Nats: Psalmen 51, 1 – 10

 

Thema: Sai hukkupi ma bohim mida akka dosakku jala sesa ma akka hajahatonku

 

Patujolo

Di Minggu-minggu Trinitatis, sai boanon ni Jamita do pangantusion haporseaonta tu Debata Jahowa Pargogo na so Hatudosan (Kemahakuasaan Tuhan) jala Parasiroha Nasumurung (Kemahamurahan Tuhan). Dang holan margogo manang marhuaso Ibana, alai Pargogo na so Hatudosan do. Dang holan Parasiroha Ibana, alai Parasiroha na sumurung do. Godang do jolma di portibion pargogo jala parhuaso, alai sude doi masigogoi. Pargogo do si Simson na di Bibel i, hape gumogo dope si Delila nang pe so botohonna dibahen manaluhon. Godang do parhuaso di portibion, alai masibalgai do huasona. Marhuaso do raja Parao uju di harajaonnai di Misir, alai umbalga do huaso na adong di si Musa.

Tuhantai Pargogo na so Hatudosan, laos sude pe hagogoon di portibion, na tarida dohot na so tarida marsada dang na margogoi maradophon Hagogoon ni Tuhanta i. Godang do parasi roha di portibion, alai sude asi ni rohanai tarbatas doi ala ni akka kondisina be. Asi roha tu na pogosi, alai dang adong baenon mangurupi. Asi roha, adong baenon, alai alani an manang alani on, dang boi pinatarida asi ni roha. Asi roha, adong baenon, dang pola alani an manang alani on, alai ro ma roha, annon gabe somal manang gabe malas, ujungna dang niurupan. Asi ni roha ni jolma tarbatas do, alai asi ni roha ni Debata dang tarbatas jala dang alani an manang alani on.

Jotjot do maralo huaso ni jolma tu asi ni rohana, alai dang songoni ianggo Tuhanta.

Pardosa na sumalin do na tarsilang di siamun ni Jesus na mananda Jesus di ujung ni ngoluna, dilehon Tuhan Jesus do tusi hangoluan na manongtongi. Dang dipikkiri Jesus, holan sonari do ditanda ho au, annon daong, dang ninna. Pargogo na so Hatudosan do Tuhanta, jala marhuaso do Ibana manguhum manang aha, manang ise, manang didia. Diuhum do saportibi marhite aek na sumar, diuhum do kota Sodom dohot Gomora, diruppakkon do tembok Jeriko, dibunu do raja Gog dohot Magog songon lambang ni hagogoon militer ujui, jala diuhum do nang raja Saul. Laos songoni, Parasi roha na sumurung do Ibana, asi rohana tu si Noak, si Lot, raja Daud, akka boru-boru na so hasea, nang huta Niniveh. Asi rohaNa tu bangso Israel nang pe sai mangaleai Ibana diula. Asi rohaNa nang tu inaina na mabalu na di huta Sarpat.

Debata Pargogo na so Hatudosani alai Parasiroha na Sumurung, ido fokus ni haporseaonta di akka minggu Trinitatis. Asa tung godang hita mangantusii asa songoni godang nig oar Minggu Trinitatis di huria ganup taon.

Hagogoon dohot asi ni roha ni Debata Jahowa dipatuduhon do nang di jamita Epistel on.

 

Nunga huboto akka pangalaosingku, sonson di jolokku do dosakku

            Songon na didok di ayat 2 i, ditegor, dipinsang Debata Jahowa do raja Daud marhite panurirang Natan, ala dilakkup Nai Batseba. Tegoran manang pinsang-pinsangi do mambaen raja Daud gabe disolsoli dirina jala diparhatopot dosana. Jala dungi, dang diulahon be ulaon na sarupa tu joloan ni ari. Dang didok ibana tu si Natan, sian dia diboto ho? Na memfitnah do ho tu au. Sebagai raja au, ikkon uhum mate do uhumanmu, dang ninna. Tutu, songon raja ibana, lomona do di harajaonna tikkii. Dang adong mangambati ibana mangulahon lomo ni rohana. Dang adong dope undang-undang manang paraturan na mangihot ibana. Holan Patik ni Debata, Patik pa 7 honi do na mangihot ibana. Jala ido na niadophon ni Debata tu ibana. Dang patik ni jolma, manang undang-undang/peraturan Negara dipakke Debata Jahowa tu jolmai tung patik ni Debata sandiri do. Mangalaosi tu patik ni Debata Jahowa, ido dosa. Mangalaosi tu undang-undang manang paraturan manang dia pe binahen ni jolma, pelanggaran doi jala adong do uhum na terbatas tu ganup pelanggaran. Alai ianggo dosa, marpardomuan tu patik ni Debata Jahowa, dang holan daging manang hasomalan manang nafsu birahi na marpardomuan tusi, alai mudar do dohot tondi. Melanggar hukum Negara, penjara. Melanggar hukum Tuhan, mati.

Mansai takkas doi diantusi raja Daud, asa dang disoal ibana panurirang Natal di tegorani. Diboto ibana do, diida Debata Jahowa do na so dapot idaon ni jolma, na so dapot CCTV, na so dapot intel dohot naasing. Ulaon ni jolma di na tiur, di na golap, di na patar, di na holip, sude do diida jala diboto Debata. Alanii do dang membela diri ibana. Dang dipukul ibana andorana tu si Natan, ai diboto ibana do, dang si Natan alai Debata do na maminsang ibana. Diakkuhon ibana do dosana jala didok: Nunga mardosa ahu dompak Jahowa ( 2 Samuel 12,13). Mansai manolsoli do ibana. Ra, alani panolsolionna, maos do diulang-ulangi ibana mandok: Nunga mardosa ahu dompak Jahowa. Dang dompak Patik ibana mardosa, alai dompak Debata Jahowa do.

Kesadaran hadosaonna di jolo ni Debata Jahowa do ibana manurathon tangiang panolsolionna jala mangido hasesaan ni dosa huhut mangido asi ni roha. Takkas do diboto raja Daud, sahali dang disesa Debata Jahowa dosana, habis ma sude. Tajaha di 2 Samuel 12 i, ala Debata Pargogo na so Hatudosan do Debata Jahowa, uhuman na diadophon Debata Jahowa tu ibana ala pangalakkuponnai dohot pamununa di si Uria tunggane doli ni Nai Batsebai, ima: dang sumurut podang i sian jabum salelenglelengna (ay. 10); Jea sian pinopparna sandiri (ay.11). Ima upa ni pamunuon. Buatonku akka jolmam/istrim sian jolo ni matam jala lehononku tu pedanmu, asa diakkupi modom di adopan ni mata ni ari on. Ima upa pangalakkupon.

Adong do ende ni anak boru Batak najolo gabe poda tu akka pangalakkup. Didok syairnai: Ahu do ito dipahata-hata ho, alai anggo dirim dang adong diida ho. Nadaoi sai diranapi ho, na jonoki dang adong diida ho. Ima salami ale doli, na manegai boru-borui, tagamonmu do sapatni, so tung songoni ro tu ibotom. Dang hokum karma nanidok ni ende on, alai ia i naniula, tagamon ma songoni manang lobi dope balosna.

Debata Pargogo na so Hatudosan do Debata Jahowa, jala taruhumNa do manang aha, ise, jala manang didia. Unang ruas, unang parhalado manang pandita, gari Presiden, Raja, manang ise pe tahe, dang adong na boi menghindar, mengelak manang membela diri di hadosaonna.

 

Asi ma rohaM di ahu ale Debata hombar tu denggan ni basaM

            Dang maila raja Daud mangakku dosa tu Debata Jahowa, alai tutu dang tu jolma dipaboaboa ibana dosana. Dang di koran manang surat kabar. Tu Debata do diakkuhon ibana dosana jala dang ditabunihon ulaon hadosaonnai sian adopan ni Debata Jahowa. Diakkuhon ibana dosana jala dipangido hasesaan ni dosa asa mangolu ibana. Dang dipangasahon ibana ala na pinillit ni Debata ibana gabe raja di bangso na tarpillit. Dang didok ibana, ai so ahu mambahen au gabe raja, hudok hian do dang tolap au, dang ninna. Alai ala denggan basa ni Jahowa do. Dang adong sipangasahononna di jolo ni Debata nang pe raja ibana. Dang dipangasahon ala naung asi roha ni Jahowa diibana nasailaon, dang didok: nang boa asi do rohaNa di au, manang asi do roham nattoari, ba songoni ma nang sonari. Tung denggan basa ni Jahowa sambing do jala I do dipangasahon ibana. Ganupari do diparata Debata Jahowa denggan ni basaNa. Dang ala dipasupasu iba nattoari jala niulahon dosa sadarion gabe tong hot asi ni rohaNa. Dangi. Tuhan Jesus pe mandok, sae do molo masiporsan hasusaanna be angka ari. Lapatanna, ganup ari hita jongjong di adopan ni Tuhan, manjalo pasupasu alai laos huhut mampartanggungjawabhon na taula. Debata do mamillit raja Saul di bangso na pinillit ni Debata. Denggan basaNai do mamillit raja Saul. Alai dang ala pamillitonNai, nang mardosa si Saul gabe so diuhum. Dipaingot si Samuel ibana didosana, alai dang disolsoli rohana. Naeng memebela diri do ibana tahe (Jaha 1 Samuel 15).

Masa lalu gabe sejarah doi na boi gabe parsiajaran , asa niputihan siani akka na uli jala hinalupahon akka na mangarsahi. Ari sadarion gabe parpasupasuan, ai dilehon dope tikki boi marpardomuan dohot Debata silehon pasupasui. Tuhan tidak terikat dengan masa lalu, tetapi hari ini diberikan untuk bersyukur atas masa lalu dan menerima berkat hari ini untuk mengharap hari esok. Dang dipangasahon raja Daud masa lalu, alai Debata sandiri do dohot denggan ni basaNa tu ari sadarion. Sadarion do hita mangakku dosa, alai sadarion do hita dohot mangido denggan basa.

Ingot mai, sude do tikki dohot akka ari saguru di Debata, jala diparata do asi ni rohaNa ganupari. Akkuhon dosam, jala pangido hasesaan ni dosa ala denggan basa ni Jahowa. Unang maila mangakku dosa tu Debata, dosa na tinuntun manang na so tinuntun, dosa moral manang pardagingon. Sude do diboto Debata, jala ikkon siakkuhononhon doi asa boi iba mangido asi ni roha dohot pasupasu. Akka na mangakkuhon dosana do dapotan hasesaan ni dosa, jala martua ma halak naung disesa dosana jala naung dihukkupi pangalaosionna. Amen.

Kantor Pusat HKI : Pdt. Dr. H.R.Panjaitan

 

Bagikan Postingan ini: