1 Timoteus 6:6-19, JAMITA MINGGU XVIII DUNG TRINITATIS, 25 SEPTEMBER 2016

JAMITA MINGGU XVIII DUNG TRINITATIS, 25 SEPTEMBER 2016

NATS : 1 Timoteus 6:6-19

 

Molo didok hamoraon, boi do i marrupahon: parbinotoan, pambahenan, panghirimon, sinamot, dna. Molo di turpuk on, hamoraon di sinamot do na nidokna. Ditingki i, adong pangantusion asa marsiadu mangeahi hasonangan sagodang-godangna jala padaohon angka na mangarsahi roha dohot pingkiran. Hasonangan i (Kesenangan/Kenikmatan) gabe na rumingkot songon tujuan ni ngolu. Laos dipataridahon marhite pangalaho nang pambahenan, ima “hidup berpoya-poya jala marsonang-sonang”. Ndang parduli, denggan do tu dongan manang daong. Dang ringkot be mangurupi dongan. Manghorhon ginjang ni roha, jala manghaposi hamoraon i. Ido umbahen, Apsotel Paulus mangidohon tu si Timoteus, laho mamodai ruas ni huria i, asa padaohon manang manadinghon pangalaho i.

Buku na Badia i, godang do manariashon hombar tu hamoraon, angka na mora nang angka panghorhonna. Sasintongna hamoraon i denggan do. Hamoraon gabe pasu-pasu tu angka na boi mangarajai. Jala gabe manusa i tu angka ahalak na so boi mangarajai. Sasintongna, saluhutna hamoraon i marharoroan sian Tuhan i. Contoh : di 1 Musa 24:35, didok :“Jala mansai ditumpak Jahowa rajangki, gabe timbul ibana, jala dilehon tu ibana birubiru dohot lombu, perak dohot sere, naposo baoa dohot naposo boruboru, angka unto dohot halode.” Di 1 Samuel 2:7, didok : “Jahowa do na mambahen pogos dohot mambahen mamora;…”

Dibahen i, ndada “dosa hamoraon i”. Jolma humaliang ni hamoraon ni do na olo mardosa. Dilului jala dipangke marhite dalan na salah. Adong do 3 sibonsiri, hamoraon i gabe manghorhon dosa, ima :

 

  1. Bao do cara laho mambuat hamoraon i.

Godang do tutu dalan mangalap hamoraon, marhite dalan na denggan dohot na hurang tama (Halal atau haram). Gogo na niula do manang na hona tangko. Tinuhor ni hodok do manang sian angka na metmet i do ? Dison, dalan mambuat hamoraon i na gabe sibonsiri madabu tu hadosaon.

 

  1. Panghorhon ni hamoraon tu dirina.

Manghorhon tu na denggan manang tu hurang denggan do hamoraon i ? Dison, dirajumi do na jinalona i holan gogo na sambing. Ndang diingot be Debata na jumadihon saluhut na dihasiangan on. Jala didok rohana, naung singkop di dirina. On ma na olo mamungka ginjang ni roha. Ndang apala arga be jolma na pogos di adopanna. Dirina nama didok rohana na tingkos. Loas ingkon hatana ma sibegeon, molo ndang ditangihon halak hatana, pintor olo do manombisi. Ia angka halak sisongon on, molo adong na nilehonna tu angka na ummetmet manang tu angka na patut silehonon dohot si urupan, on ma na olo patenga-tengahon diri.

 

  1. Tu dia do di pangke hamoraon i.

Hasangapon do i, di angka halak na boi mamangke hamoraonna tu angka na dumenggan. Isarana, pasingkolahon anakhon, tu angka hahipason ni ngolu, nang na mangurupi dongan. Alai, adong do nang na mamangke hamoraon i, holan tu hisap-hisap ni dagingna sambing. Adong na dipangke martahi na hurang denggan mamangke haadongonna. Contohna, asal laho PEMILU/PILKADA godang do halak marlumba mambagi-bagi hepengna, ndang asa tu na dumenggan. Holan asa dipillit do ibana. On ma na nidokna money politik (politik uang), tindakan paotooto rakyat. Gabe ndang boi be dibedahon rakyat i, pimpinan na denggan do manang daong. Ise na olo mangalehon hepeng manggarar tes, ima dipillit.

Alai adong dope na jumorbut, otik dope dapotna, nungga marpoya-poya, hape sipanganon di jabu, manang singkola ni anakhonna, ndang dianturehon. On ma na jotjot ta dok ginjang rohana, manang sipanggaron, alai ndang ditanda dirina. Boi do jolma manganhon dohot marlas ni roha mamangke hamoraon, alai dohot dalan na denggan jala ndang manusai halak lumobi keluargana.

Apostel Paulus mandok, “Rodihon ma angka na mora di hasiangan on, unang ginjang rohanasida, unang dihaposi hamoraon na so mian i; alai dihaposi ma Debata, na buas mangalehon tu hita saluhut sihalashononta. Naeng ma mangulahon na denggan nasida, mamora di angka ulaon na denggan, marroha na buas, na girgir marsibasabasa.” Si Paulus mangido, ndang asa marpogos ruas i. Naengma na mora i, lam mamora. Mamora di sinamot, ingkon ma mamora di angka ulaon na denggan. Ido nang na ginombarhon ni Tuhan Jesus di Lukas 16:19-31, ima “ima halak na mora dohot si Lazarus”, ndada ala sala hamoraonna i. Alai, na patubu ginjang ni roha dohot naso marpambahen do ibana umbahen madabu tu bagasan dosa.

Refleksi/Sipahusorhusoron

Bibel i memang godang do paingothon angka na mora asa denggan jala bisuk mangalului dohot mamangke hamoraon i. Disisi na asing, Tuhan i, hira na manghalomohon angka na pogos dohot hapogoson. Sasintongna, ndang ala pogos asa dihaholongi Tuhan i. Na pogos jala na metmet na nidokna i, ima ala ni pambahenan ni angka na mora manang angka na bisuk i. Contoh, ndang na hurang mora be nian tano ni Indonesia on, alai boasa godang angka na pogos ? Ima ala ni angka korupsi, perampokan, dna. Na pogos na niampinan ni Tuhan i, ima na pogos ala na ni peras manang ditindas angka na marhagogoon i do.

Dibahen i, ta gulutma pasu-pasu ni Tuhan i, na marrumanghon hamoraon i, marhite dalan na denggan, tapangke ma tu ulaon hasangapon dohot las niroha. Asa denggan hita marpangalaho binahen ni hamoraon naung ta jalo i. Unang ma olo hita marginjang ni roha, ala ni hapogosonta. Jotjot do hita, mangasahon hapogosonta asa unang parsidohot hita tu angka guguan, ala ni holit jala lomos ni roha. Laos mangasahon hapogoson asa dapotan parbagianan, ala ni mongkus. Martua ma na girgir marbasabasa sian haadongonna. Amen.

(Pdt. Beresman Nahampun, S.Th)

Bagikan Postingan ini: