JAMITA JUMAT AGUNG 15 APRIL 2022 – JESAYA 52:13–15

Jamita Jumat Agung 15 April 2022
JUMAT AGUNG
JUMAT, 15 APRIL 2022
“PARUNGKILON NI NAPOSO NI DEBATA“
Jesaya 52:13–15

TABE

Dame ma di hamu, huria ni Debata, na porsea di Jesus Kristus! Sadari on marpungu do hita patupa partangiangan di parningotan hamamate ni Tuhanta Jesus. Tongon do i di ari Jumat. Ala ni i do ari sadari on digoar “Jumat Agung”. Siala ni i hupasahat ma tabe tu hamu “Selamat Jumat Agung”!

Ojahan ni Jamita Jumat Agung 15 April 2022 di hita saonari i ma “Naposo ni Debata na Marsitaonon”. Jesus i do nanidokna Naposo ni Debata na marsitaonon. Ibana do na taingot di partangianganta on. Songon nidok ni endenta “Sai ingot Jesus Tuhanmi, sitaon godang na bernit” (ida Buku Ende nomor 199 ayat 2).

BACA JUGA ALMANAK HKI JUMAT AGUNG – JUMAT, 15 APRIL 2022

HATORANGAN

Sumalin do Hinaroa ni RupaNa

Ala ni sitaonon na mansai bernit gabe sumalin do hinaroa ni rupa ni Jesus. Boi do roa rupa sian hatutubu. Alai hinaroa ni rupa ni Jesus ala na pinaroa ni angka jolma do. Sega daging ni Jesus ala panggosagosa ni angka tentara ni si Pilatus dohot angka halak Jahudi. Pardalanan na ganjang mamorsan silang, tijur, tali dohot pastappastap, linsinglinsing, sungsang duri dohot tolong dilibashon, songon i nang panorusi ni angka labang ro di na diparsilangkon, mambahen sega jala sumalin  hinaroa ni bohi dohot pamatang ni Jesus.

Ndang rumang jolma be dapot di Ibana. Songon “halakhalak” nama Ibana idaon. Hampir ndang ditanda jolma be Ibana dibahen hinaroaNa (ida Jes. 53:2-3). Dohot do diae Jesus sitaonon psikologis na mansai paet. Godang insakinsak, reherehe, asupasup tu Jesus, jala disolukkon baju dapdap tu Ibana dalan laho mangaleai, laho pailahon Jesus. Jala Jesus mate tarrajum tu halak parjahat (ida Jes. 53:12). Hape ala ni pangalaosionta do marsitaonon Ibana (ida Jes. 53:4-5).

Ise mambahen hinaroa ni rupa ni Jesus? I ma jolma parroha na roa. Jolma parroha na roa mambahen roa rupa ni halak. Jolma parpingkiran na sega mambahen sega rupa ni halak. Ise na paroahon halak, parroha na roa do i. Ise na pasegahon halak i do parroha na sega. On do panjouon ni Debata tu hita halak Kristen, i ma asa parroha na denggan, parroha haserepon, parroha na burju. Tanda ni parroha na denggan i ma, mambahen denggan halak, jala parroha haserepon mambahen sangap halak. Ia parroha na burju mambahen maruli tua halak. Ndang jadi halak Kristen manginsahi, mangarehei, manijuri, mangaleai, pailahon jala manegai manang ise pe. Jamita taringot tu naposo ni Debata na marsitaonon mandok tu hita, na so jadi mambahen halak marsitaonon. So tung hita mambahen roa rupa nang daging ni halak manang paroaroa karakter ni halak.

Na Pistar do Naposo ni Debata na Marsitaonon

Di ayat 13 didok: “Ida ma na pistar do pambahen ni naposongku”. Pambahenan na dia do na pistar? I ma pangoloionna marsitaonon, na pola mambaen sun hinaroa ni rupana (ayat 14). “Dipasipal pe ibana, sai manaonnaon do anggo ibana, ndang manang mangkuling pamanganna, songon birubiru do Ibana na tinogu tu pamotongan, jala songon anak ni birubiru na hohom maradophon jolma sigusting ibana, tung na so dibungka do pamanganna” (ida Yes. 53:7).

Dalan marsitaonon i do dipillit Jesus. Ndada na so boi dipasiding asa malua, gabe di dalan hamonangan na gok las ni roha (ida Mat. 26:53). Alai dipillit do dalan i hombar tu lomo ni roha ni Debata (ida Mat. 26:39). Molo di roha ni angka jolma manang portibi on, haotoon do i jala hagaleon (ida 1 Kor. 1:18). Ndang dapot roha ni jolma na di portibi on molo sahalak Mesias marsitaonon. Di rohana molo Mesias i, bebas do i sian sitaonon. Hape na pistar do pambahenan ni Jesus. I do hapistaran na mambahen Ibana berhasil. Dia keberhasilanna? Adong do dua rumangna.

Na parjolo, tarhinsat Ibana jala dipatimbo, gabe timbul situtu. Dipatutoru do dirina alai gabe dipatimbo Debata Ibana jala dibasabasahon Debata tu Ibana goar na sumurung, asa nasa goar marsomba tu Ibana, nasa ulu ni tot jala nasa na marsoara marhatopothon Jesus Kristus do Tuhan (ida Plp. 2:8-11). Asa ndang hea gagal pambahenan ni Debata. Jolma do na gagal mangantusi pambahenan ni Debata. Ndang hea tarambat dalan ni Debata, jolma do na so tolap mangantusi dohot mandalani dalanNa.

Keberhasilan na paduahon dipaboa di ayat 15, urasonna do torop angka bangso parbegu sogot, hohom be angka raja maradophon Ibana. Dung i halak na so dung panahatan ni barita i, nasida do marnida, jala halak na so dung umbegesa, i do mangantusi. Ai hagogoon ni Debata do Barita na Uli. Pambahenan ni Jesus na marsitaonon i do Barita na Uli. I ma Barita na Uli na paluahon angka nasa na porsea (ida Rom 1:16-17).

Hamu angka dongan na hinaholongan! Ndang gabe marlea jolma na serep marroha molo dipalealea halak. Ise na mangaleai, i do na dapotan lea. Reherehe manang asupasup ndang paoru sangap ni jolma na sintong jala na burju. Molo hot di bagasan serep ni roha, di bagasan hasintongan dohot haburjuon, manang aha pe dibahen halak laho paroaroahon, sai na sahat do hita ro di ujungna.

Dalan sitaonon na binolus ni Jesus i ma dalan tu keberhasilan. Ndang tarambatan ni situasi dohot kondisi aha pe huaso ni Debata. Huaso ni hamatean singkat ni huaso ni sibolis dohot banuatoru, taluhonon ni Jesus do nang i. Asa manang aha jala manang songon dia pe dalan sibolusonta molo tapasahat tu Jesus, sai na ture do bahenonNa. Via dolorosa manang dalan sitaonon, i do pasahathon Kristus tu keberhasilan.  Ala pangalaosion dohot hajahaton  ni jolma do umbahen marsitaonon Jesus, asa malua jolma i. I ma hapistaran ni Jesus, Naposo ni Debata. Angka Naposo ni Debata di tingki on dijou marpambahenan na pistar. Pambahenan na pistar do molo marsitaonon Naposo ni Debata humongkop haluaon ni halak. Tung na pistar do ise na rela marsitaonon laho manghophop na marpangalaosion jala na jat asa malua ibana. I do tanda ni Naposo ni Debata.

Kunjungi juga kanal YouTube HKI untuk mengetahui informasi seputar pelayanan HKI.

HAHONAAN

Mangihuthon data Almanak HKI taon 2021 adong 913 jemaat ni hurianta HKI di 14 Daerah, tamba ni angka Jemaat dohot Pos Pekabaran Injil (Pos Zending). Gabe huria na pistar ma sude huria HKI, i ma na so mambahen donganna sahuria marsitaonon alai baliksa olo marsitaonon laho mambahen donganna malua jala martua. Huria ni Debata do HKI. Tutu na boi do masa parsoalan di tongatonga ni huria. Na boi do adong parasingan ni pandapot manang pingkiran ni marsasahalak manang marhoronghorong. Jala ndang boi jaminonta paboa huria na sintong, na badia, i ma na sama sekali ndang adong parsoalan. Alai molo sada huria na sai marbolatbolati, ndang olo marsada, molo sada huria na sai marbada, ndang olo mardame, ndang tutu i huria ni Debata. Molo adong sada huria ni HKI na pola martaon ro di martaontaon lelengna sai marbolatbolati, marsoalsoal, marbada, songon dia ma huria ni Debata si songoni?

Huria HKI na pistar pasti marhasil do. Angka huria na di bagasan parbolatan marsada ma. Angka huria na di tonga ni parbadaan mardame ma. I do huria HKI na marpambahenan na pistar.  I do huria ni Debata. Hehe ma hurianta HKI, dipatimbo, gabe timbul situtu bahenon ni Debata. Amen.

Penulis:
Pdt. Firman Sibarani, M.Th
Ephorus HKI

Penyunting:
Timothy P. Saragi

BAHAN KHOTBAH INI JUGA DAPAT DIUNDUH DENGAN MENG-KLIK TULISAN DI BAWAH INI
JAMITA JUMAT AGUNG 15 APRIL 2022