JAMITA MINGGU 29 MEI 2022 – MAZMUR 17:1-6

Jamita Minggu Exaudi 29 Mei 2022
MINGGU EXAUDI
MINGGU, 29 MEI 2022
“DITANGIHON DEBATA DO JOUJOU NI ANGKA NA PORSEA“
Mazmur 17:1-6

PATUJOLO

Psalmen sampulu pitu on marisi tangiang ni si Daud na mangido ibana tu Jahowa asa malua ibana sian angka parjahat dohot sian angka tangan ni musu. Di Psalmen 17 on dipatolhas si Daud tu Jahowa aha na di rohana, dipangido ibana asa ditangihon Jahowa ibana. Dialualuhon ibana do nasa parsorionna tu Jahowa, jala di bagasan roha na hibul do ibana pasahathon sude nasa sitaononna i tu Jahowa. Dipasahat ibana sasudena i ala porsea do ibana, Jahowa do na mangaramoti dohot na manjagai ngoluna jala na paluahon ibana sian angka tahitahi ni angka parjahat. Pos situtu do rohana tu Jahowa sai na tongoson ni Jahowa angka panumpahion. Lapatanna, ingkon marujung do angka hamaolon dohot hasusaan bahenon ni Jahowa di bagasan hasintongan. Songon i ma parsorion na songgop di ngolu ni parpsalmen uju i di na mangalualu tu adopan ni Jahowa pasahathon saluhut pangidoanna marhite tangiangna.

BACA JUGA BAHAN EPISTEL MINGGU EXAUDI – MINGGU, 29 MEI 2022

HATORANGAN

Ragam do na mangkasogohon si Daud dung dipabangkit Jahowa ibana gabe raja. Dihasogohon si Saul do ibana. Sahat tu na di lele ibana asa tung tos hosana. Molo tapaihutihut turiturian na disurathon di Samuel bindu 22 dohot 23, sai manggasa do rimas ni raja Saul mangalele si Daud sahat tu na naeng bunuonna ibana. Soada nian salana tu si Saul. Holan ala naung dipabangkit Jahowa do si Daud gabe raja manggantihon ibana jala nunga dimiahi panurirang Samuel ibana di Betlehem. I do bingkas ni pangiburuon ni raja Saul tu si Daud. Laos i do dalanna dilele si Daud. Adong do sataon lelengna si Daud na sai dilele i. Alai ala Jahowa do na mamillit ibana, jala tongtong ibana marsigantung tu Jahowa, dipadao do angka parmaraan i sian ibana. Dung mate si Saul maningkot (marhite na maninggangkon dirina tu podang ni naposo siusung sinjatana) di atas dolok Gilboa (1 Samuel 31), martangiang ma si Daud. Diingot ma angka parmaraan naung binolusna. Diida ibana do asi ni roha dohot angka denggan basa ni Jahowa naung paluahon ibana sian musuna dohot hamatean. I do na mangajari ibana asa marsihohot tu adopan ni Jahowa di bagasan roha na magopu, marningot angka naung binolusna.

Ayat 1+6

Sai tangi ma hasintongan, ale Jahowa, tangihon ma alualungkon! Sai tarehon ma pinggolmu tu tangiangkon sian bibir na so marpangansi! Sai Ho do hupajoujou, ai dialusi Ho do ahu, ale Debata! Sai tarehon ma pinggolmu tu ahu, tangihon ma hatangkon!

Pandohan ni si Daud di ayat sada dohot ayat onom on ndang na mamaksa Jahowa asa ditangihon nasa alualuna i, alai diloas Jahowa do ibana patolhashon nasa na adong di pingkiranna dohot na di rohana asa maralus. Angka aha do na pinangido ni si Daud asa tangihonon ni Jahowa, i ma:

1. Sian roha na ias, marsitutu jala tulus do si Daud mangido tu Jahowa. Ndang adong kepura–puraan alai saurdot do na di rohana dohot pandohan na ruar sian bibirna. Tangiang na marpangansi, marisuang do i, alai molo tangiang na tulus jala na marsitutu dihalomohon Jahowa do i.

2. Dihangoluhon si Daud do ngolu na sai tongtong di bagasan tangiang. Martangiang ibana ndada holan ala na di bagasan hasusaan, sitaonon manang haberniton. Alai nunga be sai dipajoujou ibana Jahowa di angka na masa di ngoluna di angka tingki naung salpu.

3. Tangiang ni si Daud nionjar ni haporseaon do. Mangkirim ibana na ingkon tangihonon ni Jahowa do tangiangna. Ditiop ibana do di bagas dirina na mandok, “Aku berseru kepada-Mu, karena Engkau menjawab aku, ya Allah; sendengkanlah telinga-Mu kepadaku, dengarkanlah perkataanku.”

Ayat 2

Sai dapotan uhum ma ahu sian bohim, sai ditatap matam ma hasintongan.

Dihaporseai si Daud do holan sian Jahowa sambing do na talup mangalehon uhum dohot hatigoran. Molo tung adong pe hasalaan dohot hajahaton ni angka na mangkasogohon dohot na mangasupi ibana, Jahowa do na manguhum ibana. Sai na manatap manonggor do mata ni Tuhan i mida angka hatigoran ni naposoNa. Tagan so manjou dope nasida, nunga mangalusi ahu, mangkatai dope nasida, nunga manangihon ahu (Jesaya 65:24). Porsea do si Daud ditangihon Jahowa do nasa na marpangalaho di bagasan hadaulaton jala maruli pasupasu sian hatuaon ni Jahowa.

Ayat 3+4

Nunga didodo Ho rohangki, ditingkir Ho bornginna i, dilala Ho do ahu, hape ndang adong jumpang Ho, hupompangi do angka pingkiranku, asa unang mangalaosi pamanganku. Sai marjaga do ahu di langkalangka ni jolma sipangarupa, di angka pambahenan ni jolma dompak hata ni pamanganmu.

Na tingkos jala na tutu do uhum na sian Jahowa. Manguhum Ibana hombar tu na niula ni ganup jolma do. Ndang marnida bohi Jahowa di na maguhum i. Diboto Jahowa do angka aha naniula ni si Daud na sai laon i. Patar do i di jolo ni Jahowa, songon dia uli denggan ni roha ni si Daud maradophon Jahowa. Disulingkit Jahowa do nasa ulaon dohot pambahenan ni si Daud na sai laon i. Ndang adong jumpang di si Daud hasalaan, songon naung dipaasuphon angka na mangkasogohon ibana. Adong do nian kesempatan di si Daud laho mambalos aha na binahen ni si Saul tu ibana, alai dijaga ibana do asa unang diula ibana si songon i. Dibuktihon si Daud do i di pandohanna na mandok: “Hupompangi do angka pingkiranku, asa unang mangalaosi pamanganku.” Lapatanna: Dijagahon si Daud do pangalahona unang madabu ibana tu dosa jala jaga do nang ibana dipamanganna unang marpangansi.

Ayat 5

Sai diihutihut langkalangkangku do angka bogasmu, ndang maoraor pangalangkangku.

Martangiang do si Daud tu Jahowa asa asi ni roha ni Jahowa i ndada holan paluahon ibana sian angka musuna. Alai naeng ma nian muse asi ni roha ni Jahowa i sahat tu na patauhon ibana laho paihutihut angka langka dohot bogas ni Tuhan i. Asa dipatau Jahowa ibana marhite asi ni rohaNa, asa unang manimbil tu siamun manang tu hambirang, alai manontong marpangalaho dohot marpambahenan na denggan na gabe halomoan ni Jahowa.

Kunjungi juga kanal YouTube HKI untuk mengetahui informasi seputar pelayanan HKI.

HAHONAAN

Di Jamita Minggu 29 Mei 2022 sadari on adong sungkunsungkun tu hita saluhutna, “Boasa ringkot hita martangiang?” Di angka halak na porsea mansai ringkot do martangiang. Ala marhite tangiang i ma dalanta mangkatai dohot Jahowa i. Di bagasan tangiang i adong do kebebasan di hita patolhashon nasa na solot di bagasan rohanta. Disarihon Jahowa do hita na porsea di Ibana jala patareonna do pinggolNa laho tumangihon nasa alualunta. Ditangihon Jahowa pe hita di na martangiang hita tu Ibana ndada ala na marnida rupanta, bohinta, manang pangkatta. Ala ndang marimbar hita jolma molo di adopanNa.

Uju na martangiang si Daud, hirim do rohana dipatare Jahowa pinggolNa tumangihon alualuna. Alualu tu Jahowa na mardonganhon hasintongan jala naso mengada-ada manang dipatubutubu. Dipatolhas ibana do tangiangna tu Jahowa di bagasan hasintongan dohot tulus ni roha, angka na masa na marpardomuan tu dirina. Asa malua ibana sian angka tahitahi ni halak parjahat dohot angka na mamusuhi ibana.

Marhite turpuk Jamita Minggu 29 Mei 2022 on dipaingot do hita asa lam ringgas mangalului bohi ni Jahowa na tuk boi paluahon hita sian musu, mara, nang parungkilon na masa di ngolunta. Tarlumobi ma di na masa sahit sorimago Covid-19 on na mansai jorbut jala mambahen hita tahutan dohot godang na agoan hosa di portibi on. Alai porsea ma hita na ingkon salpu do sahit sorimago on sian ngolunta, sian portibion, sian bangsonta nang sian luatta. Tajou ma Jahowa asa dipalua hita sian nasa musu dohot hajahaton.

Antong, sai olo ma hita pasahathon dirinta, ngolunta tu gomgoman ni tangan ni Debata, ai Ibana do haporusanta. Ndang sian jolma ro pangurupion i, alai sian Debata do. Nang pe mardalan hita di hamamasa ni Pandemi Covid-19 on. Ala ni i unang mabiar hita di si, ai tungkot dohot batahi ni Debata do na manjagai hita asal ma taparhanalom Ibana. Sai tapasahat ma nasa gulmit ni ngolunta tu Jahowa. Manang aha pe na masa, las ni roha manang arsak ni roha, ai matua ditangihon Jahowa do alualu ni angka na porsea i. Songon goar ni minggunta sadari on, i ma Minggu Exaudi lapatanna, sai tangihon ma soarangku, ale Jahowa, molo joujou ahu (ida Psalmen 27:7a). I ma tapeop be di bagasan parngoluonta. Amen.

Penulis:
Departemen Marturia HKI

Penyunting:
Timothy P. Saragi

BAHAN JAMITA INI JUGA DAPAT DIUNDUH DENGAN MENG-KLIK TULISAN DI BAWAH INI
JAMITA MINGGU 29 MEI 2022 – MINGGU EXAUDI