KOTBAH MINGGU, MINGGU PENTAKOSTA I – 28 MEI 2023

Evangelium : Johannes 20:19-23

JALO HAMU MA TONDI PORBADIA

I. Patujolo
Molo adong na masa ulaon di sada inganan, tontu sahali adong do detektif manang tim investigasi na laho papatarhon angka na masa jala ise na tarlibat. Umbahen i do, ingkon dipatorang rentetan kronologi na, asa boi dihaporseai torop halak. Alai na masa di tingki hamamate ni Jesus sahat tu hahabangkit-Na, hurang do alat perekam/recorder dohot kamera. Maol do tarjalo jolma sinuaeng on molo so adong dibege rekaman soara jala diida foto na. Dison ma dipatangkas tu ganup na porsea tu Jesus Kristus, adong pigapiga bukti nyata na laho patoranghon angka na masa di panghobasion-Na di portibi on. Angkup ni i, asa tapamanat ma jo di Minggu Hasasaor ni Tondi Parbadia (Hari Pentakosta I) na naeng sigurithononta sian turpuk Johannes 20:19-23, marhite tema “Jalo Hamu ma Tondi Parbadia”.

II. Hatorangan Ni Turpuk
Dung marujung panaritaan ni Jesus sian hau pinorsilang, mansai tahutan do angka sisean dohot parompuan na satia mangihuthon Ibana. Boasa tahutan? Ala di tingki ari Sabbat (dung tolu ari sian hamamate-Na), ndang tarida be bangke ni Jesus sian tanoman i ala nunga manggulang batu na bolon (ida Mrk. 16:3-5). Laos longang angka sisean i, sampe disordak pintu ni inganan nasida marsunggut sotung diida halak Jahudi gabe mangalapor halaki tu sordadu Romawi asa diuhum angka sisean. Dison ma dipapatar laos tarida ma misi ni Jesus pola ro tu portibion.
Ayat 19-20, Dame ma di hamu. Di bagasan Roha biar do nasida uju dang rap be Jesus dohot nasida Jadi dung bot ari, di ari parjolo dung salpu ari Sabbat, di naung sordak angka pintu ni inganan ni angka sisean i, ala ni biar ni rohanasida mida angka Jahudi, ro ma Jesus jongjong tu tongatonganasida, jadi didok ma tu nasida: Dame ma di hamu! Disurat si Johanes do ianggo nasida mabiar tu halak Jahudi masuk ni akal doi ai na saleleng on rap do nasida dohot Jesus tudia pe Jesus laho ro do nasida mangihuthon langka ni Jesus, alai nung jumpang tingkina naingkon lao nama IbaNa tumopot AmaNa, umbaen I do di tadingkon angka siseanNa I dohot sude na mangihuthon Ibana. Alai Di gohi Jesus do padanNa molo tabereng di pasal 14:18, ndang tadinghononKu hamu so marama na ro ma Ahu mandapothon hamu. Ro Ibana di borngin I marnida angka siseanNa I jala laos didok ma hata “Dame ma di hamu” tarsanggot situtu do roha ni nasida, Alana disordak nasida do bagas I, jala ndang adong na mamboto inganan I, mabiar situtu do saluhut nasida jala taroktoon mangida Jesus i.
Ala di bagasan hatahutan do angka sisean i, pola do ro Jesus dinalaho patuduhon na tutu do Ibana naung bangkit (monang sian hamatean). Sada fakta na ummarga ma on gabe bukti na pabotohon sintong do barita hahabangkit-Na. Secara psikologis, boi do digombarhon hatahutan ni nasida na di bagasan inganan na disordak pintu na, sahira dilelei angka musu, na laho mambuat ngolu na. Umbahen i, uju ro Jesus di inganan I, parjolo didok Jesus do tu nasida, “dame ma di hamu”. Hata on patoranghon asa unang ganggu, tahutan, hitiron roha angka sisean. Sahira mago pusu do nasida marnida na masa i jala boi do tong dohonon tarmali tondi. Dung didok Jesus tu nasida dame ma di hamu, laos mulak ma sonang ma roha na. Ndang sae holan hata i, alai laos dipatuduhon ma tangan-na dohot andora-Na tu nasida, gabe las ma roha na muse.
Ayat 21, Songon sinuru ni Ama i Ahu, suruonku hamu. Surat ni si Johannes on jotjot do dilapati relasi sian ginjang (Kristologi Atas). Sian ginjang do haroro ni Jesus, i ma na sinuru ni Ama, ala holong ni roha-Na (Joh. 3:16). Dipartingkian na parpudi on dihataon Jesus ma, asa adong lanjutan ni relasi i. Na sinuru ni Ama do Ibana, gabe suruon ni Jesus ma angka sisean. Balga situtu do misi ni Jesus na naeng sitorushonon ni angka sisean i di portibion, suangsongoni ditorushon tu huria-Na, asa lam mangherbang harajaon ni Debata di sandok portibion.
Ayat 22-23, Jalo hamu ma Tondi Parbadia. Songon na asing do idaonta pandohan ni Jesus na sinurat ni si Johannes on molo dibandinghon tingki hasasaor ni Tondi. Si Johannes pabotohon, ndang manundati ari palimapuluhon dung hamamate (Hari Pentakosta), alai patoranghon, Tondi na sian Ibana tarbilang Tondi Parbadia. Lapatan na, Tondi na diombushon i, Tondi-Na do i. Ndang disi ondolan ni hata-Na i, jadi aha do? I ma nalaho pahothon harohaon ni angka sisean i, asa unang tahutan, jala asa barani nasida mamaritahon/paboahon naung hehe Jesus na diida nasida tangkas tu torop halak. Barita na uli dison parjolo sahali asa tarbarita haheheon-Na, gabe sitindangi ma nasida (menjadi saksi).

III. PANIMPULI

1. Hasasaor ni Tondi Parbadi sada basabasa tu ganup jolma na tinobus-Na, asa barani jala girgir haporseanon.
2. Dipartingkian sisaonari on, angka na manjalo Tondi Parbadia, ndang adong be sidalian na mandok, a lok ma angka na manjalo tohonon i marbarita na uli. Alai, hehe ma ibana, pabotohon, tutu do naung hehe Jesus sian na mate, pamonanghon ahu sian pardosaon.
3. Tondi Parbadia do patuduhon dalan na tiur jala tigor asa unang tarunjung jolma i. Tondi Parbadia ma tongtong mandongani angka huria-Na, umbahen jongjong sahat tu tingki on. Amen

Pdt. Idris Simbolon, S.Th