EVANGELIUM MALAM NATAL – 24 DESEMBER 2023

Matius 1 : 18-23

Donganta Ma Debata

1. Selamat Ari Natal ma di hita saluhutna! Hamu angka dongan na hinaholongan ni Tuhanta Jesus Kristus. Nunga sahat hita tu pesta puncak “las ni rohanta” saborngin on, tgl 24 Desember 2023 i ma na sai tagoari Pesta Natal, Pesta parningotan di hatutubu ni Tuhanta Jesus Kristus. Sandok sude do mar las ni roha molo tangkas taauhon di borngin na holom, i ma pesta holong, na ingkon siauhononta di ganup haporseaonta, ima : Boha nunga tutu tubu Tuhanta i di ngoluku, ngolu ni keluarganami, ngolu ni haporseaon ni ruas, parhalado ni Hurianta on ? Molo naung tutu do tubu ibana di ngolunta, aha do na gabe siparbuehonon, sipatuduhonon (Dia ma parbuena ) ?  Naeng do tangkas sungkun-sungkuni alusanta be asa boi taputihi huhut tahangoluhon, ai ndada holan hasomalan las ni roha sambing songon las ni roha pardagingon, lobi sian i las ni roha partondion do/pesta iman na mangarahon ngolunta asa gabe jolma si parholong songon Tuhan naung jumolo manghaholongi hita. Naeng do adong haimbaruon ni ngolu haporseaonta tu joloan on marhite naung tahalashon, tajangkon saborngin on pesta haroro ni Tuhan Jesus, Sipalua i.
2. Hamu angka dongan na hinaholongan di bagasan Jesus Kristus ! Boha sahat do gok las ni roha I di hita nuaeng, siala hatutubu ni Jesus sipalua i ? So tung do pilit las ni roha i ala salah  pangantusion di namanghalashon Pesta Natal on. Nian ingkon ta akui do marmacam sikap ni hita jolma patuduhon las ni rohanta di Ari Pesta Natal  on. Boi do angka dakdanak las rohana ala angka na mamangke baju baru (ni ingot ma i tingki SM/SD iba uju i ), ala ni  tabo ni sipanganon, uli jabunta ala tagabagai/tabunga-bungai, galak lilin di sepanjang kota dohot di mall, hiasan muse terpajang tulisan “Merry Christmas, na deba ala ni godang ni angka pesta pesta natal ta dohoti, Punguan an- on, dohot di gereja dope, sektor, Lembaga, Adong do muse na mamangke partingkian on boi liburan dohot keluarga huhut ziarah mulak tu Bona Pasogit, saling berkunjung dohot lan angka na asing dope.  Dang na sala i angka dongan, alai na naeng si dohononta unang ma gabe holan pesta pardagingon sambing, manang hasomalan taulahon (tradisi). Alai sintong-sintong ma pangontakna tu ngolu ha kristenonta/partondion ni hita songoni dohot keluarganta be anggiat marimpola Pesta Natal 2023 on. Alani pinasahat ma jo muse tu hita saluhut amanami, inanami, sekkola minggu, remaja naposo, angka pangaranto ro di sude Parhaladonta na ro di garejaon bornginon, Selamat Natal ma di hita saluhutna.
3. Hamu angka dongan na hinaholongan dibagasan Jesus Kristus ! Apala di pesta Natal parpunguan borngin na tahalashonon, marsoara do Tuhanta ro mandok tu hita “Ai saut  ma tahi ni Debata” marhite sian naung sinangkapNa, di naung jotjot pinalumbahonNa marhite angka panurirangNa (Jesaya 7 : 14 ; Mikha 5 :2).  Na so tahi-tahi ni jolma, so ala ni haburjuon ni hita jolma, ndang alani ulaon na denggan manang alani na sai taturuti/taulahon patik i asa ditongos Debata Tuhan Jesus, Sipalua i. Holan basa-basa do, tahina na sumurung do i tu portibion dalan laho paluahon, manobus hita jolma  sian hamagoan.

Molo tangkas tapaihut-ihut nangkin, dipaboa do di turpuk saborngin on sinurat buku ni si Mateus,  dipakke Debata si Yosep dohot si Maria, na gabe di patujolo laho manjalo hasahatan ni haluahon i atik pe ndada holan laho tu nasida haluaon i ( Universal). Unik, mistery do, ndang siat tu roha, sian na so hapingkiran ni si Josep  do na masa i ala dimasa pertunangan ni nasida dope,diboto si Josef naung gabe-gabean si Maria (mengandung), hape so adong nasida masipadonohan  (sebelum mereka hidup sebagai suami istri). Secara pikkiran hajolmaon, ala parroha na bonar si Josep (ayat 19) disadari ibana na so adong ulaon ni ibana na salah, gabe tubu do tanda tanya besar, curiga, boha na mangalangkup/ berzinah do si Maria tu baoa na asing nian ndang adong  ayat manghatahon i. Josep songon sahalak na bonar mempergumulhon na masa i sahat tu na loja ibana mamingkiri huhut manangkapi dohot  sipsip naeng manirangkon si Maria. (jaha 5 Musa 23 :18 ; 3 Musa 19 : 29 ; 5 Musa 22 : 23-29; na manaringoti aturan uhum tu sahalak borua manang baoa angka na mangulahon haramunon). Alai ia gabegabean pe/mengandung si Maria ndada ala ulaon haramunon manang perzinahan, ndang sian dirina sandiri, manang sian ulaon ni sahalak jolma. Alai justru ulaon ni Debata do. Gabegabean pe ibana sian Tondi Porbadia do. Dungi muse na  di pabotohon Debata do tu si Josep marhite di nipi na suru-suruan ni Tuhan i na mandok tu ibana : O Josep, anak ni si Daud, unang alang  roham mangalap si Maria gabe donganmu saripe muse, ai na sian Tondi Porbadia do na nanaeng tubu i. Di bereng/diboto si Josep pe si Maria gabegabean sasintongna na di ungkap Debata do parnidaan/ simalolong na. Alani Tondi Porbadia dohot sangkap HALUAON na sian Debata do umbahen na gabegabean si Maria. Ndang porlu siraguhonon ni si Josep, ndang adong hape hadomuan ni ulaon pardagingon, hagiot ni hajolmaon jala ndang adong hadomuan na dohot tu pelanggaran patik manang aturan ni hajolmaon. Alai apala ulaon na balga do sian Debata, i ma haluaon ni sandok bangsoNa, ala ni ido umbahen na ro Debata pahothon roha ni si Josep asa dohot ibana ambil bagian di sangkap ni Tuhanta i, marhite na mandok “Unang alang roham” mangalap si Maria gabe donganmu saripe (ayat 20). Jala pola do sahat  tu na sinuruna si Josep mambaen goar ni na tubu i “JESUS = SI PALUA” ( ayat 21).

• Hamu angka dongan na hinaholongan dibagasan Jesus Kristus ! Ia Hatutubu ni  Jesus tu portibion laho paluahon jolma/hita do sian dosa songon i dohot biar ni roha tarlumobi laho mandongani hita (Immanuel, Ayat 23). Dihorhon pangalaho ni jolma na parjolo i, mamungka madabu si Adam dohot si Hawa tu dosa gabe di tubuhon i do biar ni roha hasusahan dohot hamatean. Alai las ma rohanta ai ala marhite hatutubu ni Jesus, Sipalua i gabe di solungkon pos ni roha na imbaru tu jolma marhite na mandok “Unang mabiar hamu, ai barita halalas ni roha godang do huboan tu  hamu, parsaulian ni sandok bangso i. Ai naung tubu do dihamu sabornginon di huta ni si Daud, ima Kristus Tuhani Sipalua I (Lukas 2 : 10 -11). Asa barita las ni roha do na tajalo bornginon ndada holan las ni roha pardagingon alai lumobi las ni roha partondion ta.

Taparhatutu do nang sahat tu tingkion tung mansai torop do angka na masa gabe mambaen hita mabiar sian berbagai aspek na so hagoaran hita. Ndang boi enteng roha taringot tu si. Alai ingkon marposni roha do hita manghaporseai hata ni Tuhanta na mandok na Immanuel do Ibana, na rap do Tuhanta di ngolunta, di keluarganta, diulaonta, di hurianta, di bangsonta (bnd Joh 1 : 14 “Gabe daging ma hata i jala maringan di tonga tonga ni hita on”). Artina na so di pasombu Debata hita mardalan sandiri, mamolus dohot mamingkiri angka na patut si pingkiran dohot sisarihononta, alai urupanNa do hita molo olo hita gabe inganan / Parhitean ni Tuhanta laho ula-ula ni Tuhan i songon si Josep dohot si Maria mamboan Haluaon tu bangsonta, na humaliangta lumobi di huriana. AMEN.

Selamat Hari Natal ma dihita!
Pdt. Kepler J. Bakara, S.Th