Galatia 5 : 15 – 21

PARANGE NIRAJAAN DIBAGASAN TONDI

Patujolo

Mangihuthon surat ni Apostel Paulus tu Huria Galatia dibindu na parjolo tangkas do diondolhon ni poda najinamitahonna, na hot do i jala so mubamuba. Ndada laho manggohi lomolomo ni roha ni jolma manang holan palengenlengan pinggol (sipareon) ni jolma barita nauli najinamitahonna alai tung lomo ni roha ni Debata do (Gal. 1:9-12). Dihilala apostel i do hinaringkot ni panindangion i lumobima i taringot tu hasintongan ni haapostelonna. Diparhatopot ibana do hadirionna andorang so tarjou ibana gabe apostel. Jala molo gabe apostel pe Paulus ndada sian hadirionna i jala ndada mangolu didirina sambing, alai Kristus do na mangolu dibagasan ibana. Ganup na mangolu dibagasan Kristus naung pinalua ma i jala naung tinogutogu  ni Tondi Porbadia (2 Kor. 5:17; Rom. 8:14). Naeng tangkas pangantusion ni ruas ni huria Galatia paboa nasida naung mian dibagasan Kristus i, ndang be marguru tu hisaphisap ni tano on alai ingkon marparange dibagasan Tondi ma.

Hatorangan ni Turpuk

Holan marhite haporseaon dibagasan Kristus do jumpang haluaon dohot hangoluan, ndada sian na mangaradoti patik (ptd. Joh. 8:36; Rom 6:18), ai siparorot do patik i dohot mamboan jolma tu panandaion ni dosa. Tandap ma dosa i jala patar marhite patik i (Rom. 7:7). Ndang adong na tigor nanggo sada anggo sian patik i alai gabe patar do hatigoran ni Debata ala asi ni rohaNa sian haporseaon di Kristus Jesus. Niulahon pe patik i ndada asa dapot haluaon manang pamintorion sian Debata alai ala naung malua do binahen panghophopon ni Kristus. Jadi, alani haporseaon i do dapotan haluaon jolma i. Asa alani haporseaon do umbahen dipintor Debata, jala ala asi ni roha ni Debata do umbahen tubu haporseaon ni jolma tu Debata, ndada alani gogo, hatuaon, dohot pangantusion ni jolma. Haluaon marhite haporseaon i naung pinasahat ni Debata i ndada laho pasauthon lomolomo ni rohana manang mangihuthon hagiot ni daging. Haluaon ni halak Kristen ndada haluaon sian na tarihot tu na marlomolomo. Haluaon na tarihot do haluaon ni halak Kristen. Tarihot tu pangajarion ni Tondi Porbadia, haluaon na tarihot tu lomo ni roha ni Debata. Dihaluaon na nilehon Jesus Kristus dilehon do ruhut siihuthononhon ni angka na porsea i, ima ruhut holong. Haluaon na pinasahat ni Jesus ingkon pataridahonon do i marhite pembangunan partondion dohot pardagingon na marojahan tu holong. Dipatorang apostel i do di bindu on haluaon na tarihot i ala masa di huria Galatia pangalaho na mamangke haluaon i tu ngolu na paolooloi hisap ni daging. Ala didok Paulus, ndang alani patik malua jolma sian dosana, gabe tubu ma pangantusion na mandok ndang sala molo niulahon na maralo tu patik i. Gabe tubu ma pangantusion di nasida ia haluaon i ima haluaon/ kebebasan bertindak semaunya gabe so pola mamingkirhon panghilalaan ni donganna: “alai molo marsiharatan jala masiallangan hamu, jaga ma hamu, so tung suda hamu na masilengsean” (ayt. 15). Ndang dipangke nasida haluaon i laho patuduhon holong tu dongan alai marsiharatan nasida ala masipatimbo dirina be. Ndang diantusi nasida ia haluaon i ima haluaon na pahehe hasadaon dohot dongan marhite na masihaholongan. Ai holong do pamusatan ni patik. Haluaon ni halak Kristen ima haluaon na tarihot tu Jesus. Ndang tarsirang haluaon i sian Jesus nang sian dongan. Haluaon i ndang jadi behenon tu kebebasan paolooloi hisap ni daging na boi manegai parsaoran. Ido umbahen didok apostel Paulus di ayat 16 “alai on do hudok: Marguru tu Tondi i ma hamu marparange; unang pasaut hamu hisaphisap ni daging!”. Hata “marguru” dison berasal dari kata Yunani, perpateite, na marlapatan “berjalanlah”. Hata on mangondolhon asa tigor hita mardalan dibagasan ni Tondi Porbadia. Mardalan manang marguru tu Tondi, marlapatan asa mardalan ma hita dibagasan lomo ni roha ni Debata, ido pangajarion ni Tondi i di halak naung pinalua dibagasan Tuhan Jesus. Holon Tondi i do na tuk patuduhon/ mangarahon jolma i mardalan dibagasan lomo ni roha ni Debata. Dihata on apostel Paulus muse, dingolu ni halak naung pinalua, ingkon marsiranggut ibana manaluhon roha sibuk/ daging (ayt. 17) jala tunduk tu pangajarion ni Tondi, ndang mangolu marguru tu hagiot ni dagingna. Hagiot ni daging na nidok ni apostel Paulus di ayat 19 – 21, ima pangalaho na manegai parsaoran ni jolma maradophon Debata. Adong 16 mansam rumang ni roha daging di turpuk on. Jala na boi do i martamba hombar tu situasi dohot partingkian ni jolma. Molo dipangke jolma i ngoluna paolooloi hagiot ni daging gabe monang ma parulaan pardagingon i ala ditolak parulaan ni Tondi di ngoluna. Molo lam mangimbukbuk hagiot ni daging i gabe lam holing ma jolma i sian Jesus Kristus. Molo so olo jolma i dirajai Tondi ni Debata lam so harajaanna ma hagiot ni dagingna, jala diulahon ibana ma na maralo tu lomo ni roha ni Debata. dingolu halak naung pinalua i manang nanirajaan ni Tondi i, ringkot do siparorot manang aturan asa marhite i di ingot jolma i pasidinghon hagiot na maralo tu Tondi. Halak na margogo mangarajai roha dohot mangalo ela ni portibion ima halak na mamparbuehon parange na denggan.

Panimpuli/ Hahonaan

  1. Haluaon ni angka na porsea i (kemerdekaan orang percaya), ndada haluaon na marlomolomo paoloi hagiot ni daging dohot portibion, alai haluaon na nirajaan ni Tondi ni Debata asa pataridahononna parbue na tama tu Debata nang tu donganna jolma.
  2. Mangolu jala marparange nanirajaan ni Tondi marlapatan hangoluan dohot pangulaon i marharoroan sian Tondi ni Debata.
  3. Mangolu jala marparange nanirajaan ni Tondi marlapatan Tondi ni Debata do na mangarajai nang mangula di pingkiran, hata nang pangulaon ni angka naung pinalua ni Debata i. Jadi parbue ni Tondi i diparngoluon ni angka na porsea i mangatur parsaoran ni jolma i dohot Debata nang donganna jolma dohot lingkunganna. Digohi jala dirajai Tondi ni Debata ma hita saluhutna. Amen .

Pdt. Mangara Tua Panjaitan, S.Th

Bagikan Postingan ini: