Jesaya 66:10-14, EPISTEL MINGGU VI DUNG TRINITATIS MINGGU, 3 JULI 2016

1. Debata do haroroan ni haluan dohot las ni roha na manongtong.

Ia huta Jerusalem tano ni halak Jebusi do i, sada sian bangso na maringanan di tano Kanaan. Di tingki ni si  Daud dung bangkit gabe Raja di bangso Israel halak Jebusi di taluon ibana. Dung di patunduk halak Jebusi ditotophon Raja Daud ma Jerusalem gabe pusat ni harajaon-Na, laos tu Jerusalem ma di diparentahon ibana mamboan Poti Parpadan ni Jahowa. Diparsinta ibana do naeng pajongjong Bagas Joro ni Debata Jahowa inganan ni Poti Parpadan i, alai ndang di tolopi Debata Jahowa sangkapnai. Jongjong  bagas Joro ni Debata di Jerusalem dung pe di tingki ni si Salomo gabe Raja di bangso Israel. Dung di taban bangso Babel bangso Israel, gabe tarulang ma huta Jerusalem dohot bagas joro ni Debata. Saleleng di habuangan Babel nasida (bangso Israel) marsak situtu do nasida. Masihol situtu do roha nasida naeng mulak asa boi di pauli bangso i huta Jerusalem naung tarulang i dohot bagas Joro i. Di situasi ni bangso Israel na songon i, di soarahon si Jesayas ma tu nasida pabao laho paulihon Jerusalem dohot bagas joro ni Debata  ingkon marhitehite pangantoion ( campur tangan ) ni Debata do . Tung so boi nasida laho mangulahon i, molo sian hadirion nasida. Dibahen i di jouhon panurirang Yesaya do tu nasida asa mulak nasida tu Debata Jahowa jala tumangihon hata-Na. Debata Jahowa do na boi paluahon nasida sian tano habuangan i jala na pataruhon mulak tu Jerusalem. Dilehon Debata Jahowa baga-baga marhitehite Hata-Na taringot tu haluaon. Hasatiaon dohot holong ni roha ni Debata di pamilliton-Na di bangso Israel gabe bangso-Na, i do na manghorhon Debata Jahowa mangula (bertindak) laho mambahen hamubaon na ni alaman ni bangso Israel si parhatobanon/parungkilon  tu haluaon, Ulaon dohot pangaramotion ni Debata marhitehite tondi-Na na mandongani bangso Israel mulak sian habuangan dohot margogoihon nasida paulihon Jerusalem, jala na mambahen bangso i boi marlas ni roha. Digombarhon si Yesaya do holong ni roha ni Debata na pinatupa-Na tu bangso i, songon holong ni roha ni sada ina tu ianakkonna. Ina mangalehon gogo dohot hasonangan ni roha tu ianakonna marhitehite susu sian bagotna. Songon i ma Debata Jahowa mangalehon gogo dohot las ni roha/sonang ni roha tu bangso Israel marhitehite pasupasu-Na dohot pandonganion-Na di pardalan ni ngolu ni bangso Israel. Debata Jahowa do mangula laho paluahon dohot paulakhon pargouluon ni bangso Israel sian ragam ni parungkilon na niadopan nasida  marhite holong/Asi ni roha-Na dohot hasatiaon-Na di pamilliton-Na, asa boi bangso i marlas ni roha. Songon i do nang ngolu ni angka na porsea i di pardalanan ni ngoluna, asa boi marhaluaon sian saluhut ragam ni hamaolon na ni adopanna jala boi manghamonangkonsa na mangalehon las ni roha di ngoluna, naeng tongtong rade manangihon dohot manghangoluhon Hata ni Debata  Holan .marhitehite hamamate ni Yesus Kristus di hau pinorsilang di patuduhon  Debata Jahowa do holong ni roha-Na tu saluhut na tinompa-Na. Asa dapotan haluaon ganup jolma na porsea di Ibana jala taruli di las ni roha, sonang ni roha dohot di hangoluan na manongtong. Debata sandiri do na patupahon haluaon i di angka na porsea jala na manghaholongi Ibana., Molo olo hita mangoloi dohot manghangoluhon hata ni Debata, disi do Debata marhitehite Tondi-na mangalehon pandonganion-Na. Pandonganion ni Debata di ngolu ni ganup na porsea na mangalehon las ni roha dohot sonang ni roha di na mandalani ariari ni ngluna,  i ma  hapapatar ni pasupasu-Na. Dibahen i, olo ma hita manghaporseai hata-Na jala manghaholongi Ibana sian nasa rohanta asa tajalo pasu-pasuNa di ngolu partondion dohot pardagingon. Tapangke ma pasupasu na tajalo i i ma haluaon ni tondinta laho patulushon sangkap dohot lomo ni raha ni Debata Jahowa di portibion.

2. Debata si parorot di ngolu ni halak na porsea di Ibana.

Pembangunan Jerusalem ingkon mangadopi hamaolon dohot parungkilon. Dipatudos Panurirang Yesaya do di na paturehon/paulihon ( mambangun ) Jerusalem, songon sada ina naharoan( managam poso-poso ) na mamboan poso-poso di si ubeonna  9 (sia ) bulan lelengna. Uju managam  poso-poso i mansai hansit do diae sahat tu na manubuhonsa. Diiparorot ina i do poso-poso na dibagasan siubeonna i, asa  sehat tu na sorang (tubu ) poso-posa i. Hasosorang ni poso-poso manghorhon las ni roha ni ina na manubuhonsa. Ndang di ingot ibana be hahasinton na ni aena uju mamboan poso-poso i.. Somgom i ma Debata Jahowa ndang pasombuhon Jerusalem sega jala tarulang, alai diparorot asa boi Jerusalem dohot pangisina ingkon marlas ni roha. Songon sada ina na manjaga/marorot posoposona jala na mangalehon susu sian bagotna sampe bosur asa sonang ianakonna. Holong ni roha ni ina maradophon ianakkonna manghorhon hajonokon ni anakkonna tu inana..  Hasonangan dohot  las ni roha ni dakdanak i di horhon pangkaol ni inana di ibana ( dakdanak i )… Songon i ma Debata Jahowa parorot Jerusalem sahat tu na sidung pembangunanna. Haulion dohot hadameon na pinataridahon ni huta Jerusalem manghorhon las ni roha dohot parolopolopon di saluhut pangisina. Pangisi ni  huta Jerusalem naung taruli di hadameon dipardalanan ni ngoluna ingkon lam magodang jala lam tu torasna manghaporseai Hata ni Debata laho mangeahi sangkap dohot lomo ni roha ni Debata di portibion. Pangisi ni Jerusalem ingkon papatarhon marhitehite parngoluonna, paboa Jerusalem gabe panondang ni portibion jala bagas joro ni Debata na di Jerusalem ingkon inganan panombaon ni saluhut bangso tu Debata Jahowa.. Huta Jerusalem ndang holan hapapatar ni pasupasu ni Debata tu saluhut halak na manghaholongi ala na manghaporseai Ibana, alai Jerusalem gabe pusat ni uhum dohot rismas ni Debata Jahowa tu halak na so manghaholongi dohot  na mamusu i Ibana. Panurirang Yesaya manjouhon Debata ndang holan manguhum  alai dohot do patupa haluaon tu halak na olo paubahon rohana/pangalahona. Jerusalem ingkon gabe pasupasu na mangalehon hangoluan dohot hasonangan. Pola do digombarhon si Yesaya pasupasu na mabaor sian Jerusalem songon sunge na sirnip.Halak na dapotan haluaon i manghilalahon hasonangan ni roha jala las ni roha na gok di bagasan pangaramotion/parmahanion ni Debata Jahowa. Pangaramotion ni Debata di pangisi ni Jerusalem dipatudos tu hajongjongan ni sada ina na manusui( patarusson ) ianakkonna., na mangabing jala manghopol anakna di abingganna. Atik pe Debata Jahowa pangiburu jala na tegas di Hata-Na dohot ulaon-Na, alai hategason-Na ndang holan manguhum. Dipatuduhon si Yesaya do hategason ni Debata Jahowa di na olo Ibana mangapul jala marorot bango-Na songon ina na marorot ianakonna. Hasatiaon ni halak na porsea tu Debata gabe alusma i tu haluaon na ni lehon ni Debata marhitehite Yesus Kristus di ganup na porsea jala mangjangkonsa.Haluaon i unang di rajumi angka na porsea i songon silehon-lehon sambing, alai ingkon marpanghorhon do i tu saluhut halak asa lam tamba bilangan ni na porsea di Debata. Hamaolon dohot parungkilon na di adopan ni ganup  na porsea di pardalanan ni ngoluon unang di bahen gabe sada boban na borat na padaohon ngoluna sian holong ni roha ni Debata. Porsea ma hita paboa Debata Jahowa sian mulana satia di janji-Na tu bangso na pinillit-Na dohot tu ganup halak na jinou-Na sian saluhut bangso tu harajaon-Na marhitehite Huria-Na, Tongtong  do satia di janji-Na ( baga-baga-Na ).. Songon parmahanion, pangaroroton dohot pandonganion ni Debata di bangsoNa di tingki naung salpu ( na jolo ) songon i do Debata Jahowa marorot,marmahan, mandongani dohot manarihon na ringkot di ngolu ni ganup halak  na manghaholongi Ibana jala na porsea di Hata-Na. Dibahen i, patut do hita paubahon rohanta marhitehite na patangkon haporseaonta jala tama mandok mauliate, mamuji jala pasangap goarNa marhite na mangulahon na hombar tu lomo ni roha ni Debata dibagasan ngolunta. Hinorhon ni pasupasu na nilehonNa naung ta jalo jala tadai,  i ma haluaon ni tondita na na pinatupa-Na di bagasan hadirion ni Yesus Kristus, i do na manghorhon las ni roha jala na mangarahon golunta tu hangoluan na saleleng ni lelengna. Amen.

Pdt.M.A.E.Samosir,MTh/Kantor Pusat HKI