EPISTEL MINGGU, 23 APRIL 2023

MINGGU MICERICORDIAS DOMINI
Psalmen 116:12-19

Dipaimbaru Asa Mangolu di Sangkap ni Debata

I. Patujolo
Di hata Heber, goar ni buku Psalmen ima “tehilim” na mangondolhon makna ima: “angka ende olopolop/pujian”. Uju patupa parsombaon nasida tu Debata di bagas joro Jerusalem, gumodang do dipangke hata “tehilim” na ginurithon ni angka pande bisuk Israel sian sundut tu sundut. Mamungka sian parhusoron nasida gabe sada bangso harajaon dung mulak nasida sian tano habuangan Babel. Alai torang do diparrohahon parpsalmen i mangalapati angka ari nang angka na masa nabinolus nasida uju di Jerusalem, tano Babel, sahat tu na mulak nasida sian habuangan i. Mansai tangkas jala tiur diida nasida pangaramotion ni Debata na so mansohot saleleng partingkian manang di angka ari na salpu na dibolus nasida.
Psalmen on, ima sada karya sastra manang puisi na sinurathon ni parpsalmen na marojahan tu realitas na hinangoluhon ni parpsalmen sandiri. Sian mulana, Psalmen on nunga memiliki peran na mansai ringkot di ngolu ni bangso Israel lumobi di angka ulaon patimbulhon goar ni Debata di ngolu nasida. Songon ido nang huria na parjoloi, dipangke do Psalmen asa masipaingotan di ganup gulmit ni ngolo nasida (ida. Kol. 3:16), jala sahat tu tingki on godang do ende puji-pujian ni huria dienet sian buku Psalmen on. Songon buku na marrumanghon karya sastra, secara umum isina manghamham taringot tu ende, tangiang, pujipujian, hamauliateon, las ni roha, olopolop (sukacita), dohot angka panindangion haporseaon tu Debata. Boi do dohonon buku Psalmen on songon buku na marisihon “andungadung (ratapan)”. ganup bindu Psalmen on godang na 150 bindu. Psalmen on boi do dibagi tu lima horong, ima: bindu 1-41; bindu 42-72; bindu 73-89; bindu 90-106; dohot bindu 107-150. Sude bindu buku Psalmen on dipaujung marhite: “pujipujian tu Debata na badia jala na songkal saleleng ni lelengna”. Jadi, asa lam bagas parbinotoanta taringot tu Psalmen on, tabereng ma turpuk Epistel naung dienet sian Psalmen 116:12-19 taringot tu panindangion ni parpsalmen marhitehite “roha hamauliateonna tu Debata”.

II. Hatorangan
Molo tajaha Psalmen 116 sian ayat parjolo sahat tu ayat parpudi (ay.1-19), pintor boi do dadapon ni rohanta, aha bonsirna umbahen pola marsampulusia ayat. Alai di bagian paduahon, nagabe turpuk Evanggelium, ditariashon ibana do angka aha sibahenonna di bagasan paragamaonna marhite haporseaonna, ala godang ni na denggan naung jinalona sian Debata (ay.12-19). Songon sahalak na normal parrohaon dohot partondionna, ala panandaonna tu angka pambahenan ni Debata tu ibana, dituktuk ibana andorana mandok: Tung beha ma pamaloshu tu Jahowa, ala saluhut denggan ni uhumna i tu ahu! (ay. 12). Tama do nang hita maniru parpsalmen on. Olo hita tangkas mananda angka dia naung dibahen Debata tu ganup dirinta jala manukkun dirinta be aha bahenonta balos ni nadenggan naung tajalo sian Ibana. Halak na so olo mangaranap dohot mangakui aha naung dibahen Debata tu ngoluna, marungkil do i mambahen balos ni na denggan tu Debata. Molo tinanda aha na denggan nabinahen ni dongan sahuta, manang tulang, dongan tubu, hahaanggi, nang boru tu diriniba, lao do roha mambalos angka nadenggan i tu nasida. Somalna, nadenggan do balos ni nadenggan. Tabilangi ma jolo angka aha na denggan naung dibahen Debata tu hita ganup. Ra olo do ndang hajojoran i sude dison. Ganup do manjalo adong na khusus tu dirina be. Tugasta do manungguli rohanta dohot roha ni donganta, asa mananda nadenggan songon naung dibahen Debata tu ganup jolma na porsea di Ibana.
Hombar tu haporseaon ni parpsalmen on, ndang denggan asal mate boti angka na porsea tu Debata. Tung mansai arga do di roha ni Debata hamamate ni akka naniasianNa (ay. 15). Jadi ndang lomo roha ni Jahowa, asal mate boti angka naniasianNa i. Ikkon mate terhormat do, angka naniasian ni Debata. Ingkon mate marlapatan tu harajaon ni Debata dohot tu hajolmaon do hamamate ni naniasian ni Debata. Artina Ingkon mate di bagasan Tuhan i ma angka naniasianNa. Ikkon mate maninggalhon jasa na mansai arga molo mate naniasian ni Debata. ummarga sian nanidokna: molo arimo mate maninggalhon bolangna, molo gaja mate maninggalhon gadingna, molo mate jolma maninggalhon sangap digoarNa. Hombar tu panindangion ni parpsalmen on, dilehon ibana do dirina gabe naposo ni Debata manang gabe parhaladoNa; parpsalmen mandok: anak dari hamba-Mu perempuan/anak ni hatobanMu (ay. 16). Di haparhaladoon on pe, dihilala ibana do na Jahowa sambing mangaloas ibana gabe parhalado. Ai ala na diharhari Jahowa do angka rante sian ibana jala ditanggali do pangambati sian dirina umbahen boi ibana marhaladoi saluhut bangsoNa i. Alani, gabe ditanda ibana hahuranganna, jala ditanda ibada Debata na mangalehon godo marhite asinirohaNa na tung mansai balga i. Sangap do dihilala ibana ulaon haparhaladoon i jala tung diparsinta rohana do i. Tingki diparhaladoonna i, dipakke Debata do parpsalmen on lao manggohi angka ulaon na mansai denggan di adopanNa, di tongatonga ni bangso i, tarmasuk di alaman ni bagasNa dohot di parsitongaan ni Jerusalem, marhaleluya ibana disi. Tung mansai sitiruon do pangalaho ni parpsalmen on di tongatonga ni Huria Kristen nuaeng. Sian pangakuan ni parpsalmen on, tarboto do na malua ibana sian hamaolon dohot pangunjunan i sian gulmit ni ngolu na. Alani, digurithon ibana do pigapiga ondolan ni roha mauliatena siala panggomgomion ni Tuhan i di ngoluna dohot disaluhut bangso i.

  1. Manjalo panginuman ni angka hatuaon
    Parsidohot do ibana di tongatonga ni angka malim manjalo panginuman na marisi anggur, songon simbol ni hatuaon. Panginuman na songon i, dipatangkas Tuhan Jesus do tingki dipatupa Ibana parsipanganon nabadia borngin i uju tarjehe Ibana. Ninna Tuhan Jesus “Sude hamu manginum sian i. Ai mudarHu do on, mudar parpadanan i, naniusehon humophop torop bahen hasesaan ni dosa” (Mat. 26:27c-28). Sai tahirim ma asa parsidohot jala parjambar hita manjalo panginuman ni angka hatuaon i.
  2. Joujou di goar ni Debata
    Marlapatan do i, na tung mansai godang tingki dohot kesempatan manang dalan na ture di ibana lao manjou goar ni Debata. UhumNa mandok: “Ndang jadi dohonon goar ni Jahowa Debata, ianggo so ture dalanna, ai hona uhumna do sogot angka na marsineang di goarNa”. Martua do jolma na dipatolap Jahowa manjou goarNa. Ai tu namanjou goar ni Jahowa do leononna haluaon, malua sian hagogotan, marmulia. Songon hata ni Debata na mandok di Psalmen 50:15 “Jou ma Ahu jumpa di ari hagogotan, asa hupalua ho, asa dipuji ho Ahu”. Tutu ma songon na didok ni parpsalmen di bindu 91:15 “Jouonna ma Ahu, jadi alusanku ma ibana, sai dongananku do ibana jumpa hagogotan, paluaonku do ibana, jala marmulia ibana bahenonku”. “Jadi joujou ma nasida tu Jahowa di hagogotannasida i, gabe dipalua Ibana nasida sian hagogotannasida i” (Psa. 107:6;13;19;28). “Sian hagogotan do hupajoujou Jahowa, gabe dialusi Jahowa ahu, di na pinalumbangna i ahu” (Psa. 118:5). Tabahen ma dirinta be gabe jolma na torus manjou goar ni Debata. Kesempatan tusi nunga tung tangkas dileon Tuhan Jesus Kristus. Sai olo ma hita gabe sijou goar ni Jahowa marhitehite Jesus Kristus, ai martua do hita disi.
  3. Manggarar angka bagabaga (nazar) na tu Jahowa
    Nuaeng on somal do didok “janji iman”, i ma bagabaga tu Debata na nionjar ni haporseaon dohot haserepon mandok mauliate. Ndang marasing i tu bagabaga (nazar) nanidokna di psalmen 116 on. Olo do memang sahalak naporsea tarallang “bagabaga”, alai na so jadi solsolan i, molo masa na songon i. Panguhum Jefta misalna, tarallang bagabaga (nazar) na do ibana, alai ndang gabe disolsoli ibana nazarna i, diulahon ibana do, ia tung pe dipangido tikki tu Jahowa andigan boi ulahononna. Isarana songon si Jefta na marporang mangalo halak Amon, marbagabaga do ibana mandok: “Dung i marbagabaga ma si Jepta tu Jahowa, ninna ma: Molo dipasahat Ho halak Amon tu bagasan tanganku: Manang aha na ruar parjolo sian pintu ni bagashu manomunomu ahu, di na mulak ahu marsonangsonang sian halak Amon, ingkon Jahowa nampunasa, jala pelehononku do i bahen pelean situtungon” (Pangh.11:30-31). Hape boruna sandiri do naruar parjolo sian baba pintu ni jabuna di na sahat si Jefta tu huta mulak sian parporangan. Dung dua bulannari, dipasaut si Jefta do bagabagana i tu Jahowa, dipelehon boruna i tu Jahowa, jala ndang disikkat Jahowa boruna i marhite hambing, songon na tu si Abraham tikki mamelehon si Ishak. Martua do si Jefta namanggoki bagabagana, nang pe agoan boru ibana ala tarallang bagabaga ibana disi. (Jaha satorusna: Pangh.12:1-7). Parpsalmen on manggarar bagabagana tu Jahowa jala ndang margabusi ibana. Ndang songon angka jolma nadidok ibana “sude pargabus”. Alai ditepati do bagabagana i.
  4. Pasahathon pelean mardongan roha hamauliateon tu Debata
    Apala di adopan ni sandok bangsoNa, di akka alaman ni Jahowa, diparsitongaan ni Jerusalem. Pelean hamauliateon i songon sipanganon jala dibagihon ma i tu angka jolma na ro tu bagas joro i, jala dipasisi do deba gabe balanjo ni angka malim. Pelean i ndang na dipasahat parpsalmen i laho patuduhon na boi sibahenon, ndang patuduhon ginjang ni rohana, alai tung haserepon ni roha do dibahen laho pasangaphon Debata. Marhite pelean hamauliateon i, lam martamba-tamba do hamoraon ni na manggohi nazarna tu Debata. Sude bangso i manghalashon pasupasu ni Jahowa na sahat tu nasida. Sai lam martambatamba ma jolma na olo marnazar songon napinatupa ni parpesalmen i tu sude jolma na ro tu joro ni Tuhan i.

III. Sipahusor-husoron

  1. Naeng ma parsidohot hita songon parpsalmen on, di hata dohot di pambahenan. Marhaleluya ma hita mangendehon angka asi ni roha ni Jahowa tu ganub ngoluta be.
  2. Joujou (seruan) tu saluhut pangisi ni hajanghajang/portibi asa dipatupa pamujion tu hatimbulon ni goar ni Tuhan i”. Panindangion ni hasiangan on tu hatimbulon goar ni Tuhan i. Panindangion on ma na ingkon baritahonon ni portibion on tarlumobi jolma manisia, ingkon manghatindangkon Debata do panompa di saluhut. Tu pandohan on, naeng haporseaon jala panindangion ni jolma i mamboan saluhutna patupa pamujion tu hatimbulon ni Debata, Partanobatoan ni saluhut halak na manghabiari Ibana.
  3. Marojahan tu haporseaon ni halak Kristen, nungna singkop ulaon ni Debata dipanompaon-Na tu hasiangan on. Ibana do muse na “mangaramoti, manobus, paimbaruhon, jala pasingkophon saluhut na tinompa-Na molo dipujipuji Ibana marhite panindangion mardongan roha mauliate.
  4. Patut ma jolma patuduhon sorminan pangalaho na tama di Debata alani denggan ni basa-Na, holong ni roha-Na, dohot asi ni roha-Na. Marhite sikap na songon on, dapotan panginuman ni angka hatuaon ma hita na porsea di Ibana.
  5. Sada kewajiban do mambaritahon hatimbulon goar ni Debata, apalagi halak naung manjalo pangurupion dohot denggan basa ni Jahowa di ngoluna. Molo dipillit Jesus angka naporseai gabe siseanNa, diperlengkapi do saluhutna diangka perlengkapan laho mandok mauliate, mamuji, mamaritahon dohot manghatindangkon Debata marhite Tuhan Jesus tu liat portibion.
  6. Naeng ma tarida nean marhite pambahenan na denggan nang marhite sikap dohot tingkah laku na tama, asa polin hita na mar- Misericordias Domini hombar tu goar ni minggu sadarion.
  7. Taingot ma Micericordias Domini: “Sai endehon ma angka asi ni roha ni Jahowa”. Marhite panindangion na mangolu, marojahan tu roha na marhamauliateon mamuji hatimbulon ni Tuhan i. Selamat marhaimbaruon ma dihita salutna, huhut mangolu ma hita di sangkap ni Debata. Amen.

Pdt. Uba Manatap Panggabean, S.Th

KLIK LINK Kanal YouTube HKI untuk mengetahui informasi seputar pelayanan HKI.

Bagikan Postingan ini: