EVANGELIUM, MINGGU XIII DUNG TRINITATIS – 03 SEPTEMBER 2023

“Manghobasi Dibagasan Holong”

2 Korint 8: 1-7

I. Sibonsiri
Panghobasion Apostel Paulus di na mangebati piga-piga luat laho mamaritahon barita nauli pasang surut do panghobasionna, alana dang holan apostel Paulus na patupahon pardalan pamaritaan barita nauli alai dohot do angka sisean ni Jesus na asing. Ido umbahen adong do piga-piga luat na didalani Apostel Paulus naso adong dope huria gabe dipajongjong ma di luat i parpunguan manang huria. Alai adong do luat na didalani Apostel Paulus nunga adong jongjong huria manang parpunguan ni halak Kristen disi songon di luat Rom.
Di Taon 52-57 M dina manghobasi Apostel Paulus huhut do ibana papunguhon pangurupion sian angka luat manang huria dijumpangina, songon huria na adong di Galatia, Makedonia, Akhaya suang songoni huria na adong di Asia kecil. Dohot tujuan angka pangurupion naung dipapungui laho mangurupi angka halak na badia nang huria na adong di Jerusalem. Dang tangkas songon dia na masa di Jerusalem alai masa do haleon na balga di Jerusalem pola do sampe amnghorhon tu panghobasion nang parpunguan ni halak Kristen di Jerusalem.
Sian huria naung mangalehon pangurupion adong do sada huria naso mangalehon roha laho mangurupi ima huria na di Korintus, laos i do na mambahen Apostel Paulus manongos nang manggurithon turpuk on. Laos di pabotohon ma marhite turpuk on ringkotna songon ojahan minggunta sadarion “Manghobasi Dibagasan Holong”

II. Hatorangan
Ayat 1-3, Dison adong naing sipabotohon ni Apostel Paulus ia ibana tongtong dope di luat Makedonia manghobasi, ala surat on digurithon di luat Makedonia taon 56M. Huhut di pabotohon tu huria i, ia huria na adong di Makdeonia dohot Akhaya paputushon mambahen pangurupion tu angka dongan na hurangan di Jerusalem (Rm. 15:26). Sikap na binahen ni angka huria do na didok ni Apostel Paulus asi ni roha ni Debata (kasih karunia).
Jala dipatangkas do muse dia do pambuatna umbahen didok Apostel Paulus songoni : “..atik pe di bagasan pangunjunan…haporsuhon godang… sungkot ni hinapogosnasida do habasaon na lumobi.” na dipasahat disi sada kritikan tu huria na adong di Korint marimbangkon situasi ni halak Korint dang sadiana dope ekonomi ni huria na adong di Makedonia alai nasida patupahon pangurupion tu angka dongan sahaporseaon na adong di Jerusalem.
Marimbangkon situasi ekonomi ni halak Korint angka huria na asing singkat ni pangurupion naung nipasahat ni huria i didok Apostel Paulus do “..nasa tarpatupa nasida, lobi tahe sian gogona; jala sian lomona do!” tangkas do digurithon Apostel Paulus surat on naing mangalehon perbandingan tu huria na adong di Korint, na mandok haporseaon ni huria di Makedonia saurdot dohot pambahenan nasida pola do didok si Paulus “huhatindangkon do”. Dang dipatupa nasida holong na mamparbuat jala sian ias ni roha nasida do mangalehon pangurupion i. baliksa do na masa di huria Korint adong piga-piga na mandok ia si Paulus dang na tutu Apostel ni Kristus jala holan barani marhite surat, alai molo patumpol bohi dang mungkap. Dibaheni do sian pandohan ni si Paulus na marjanji mangebati huria Korint alai sundat do borhat si Paulus tu huria i.
Ayat 4-5, saurdot tu 2 Korint 9: 7 huria na adong di Makedonia dina patuduhon holong nasida tu dongan sahaporseaon na adong di Jerusalem. Mangihuthon ayat on pambahenan ni huria di Makedonia na naeng parsidohot mangurupi, tung maol do jumpang di huria Korint na patupahon pangurupion alai mardongan ungu-ungut dohot muruk ni roha ala dang dihaporseai nasida sahat pangurupion na dipasahat nasida i tu hapeahanna. Dison pe apostel Paulus dang holan naing pabotohon pangurupion i alai huhut do dipabotohon apostel Paulus do parjolo do nasida mangalehon diri tu Tuhan tarida ma angka halak na di Makedonia manjalo do nasida haporseaon naung di baritahon apostel Paulus taringot Jesus Kristus, dung i pe asa tu hami (angka apostel, na manghobasi barita nauli, angka na badia). Dang sian paksaan ni Apostel Paulus alai mangihuthon lomo ni roh ni Debata do.
Ayat 6-7, sian surat naung digurithon Apostel paulustu huria Korint dipangido si Paulus do ima si Titus laho patorushon ulaon asi ni roha naung dipatupa songon angka huria na adong di Makedonia. Mangihuthon hasurungan ni huria Korint naung jumolo manjalo Kristus ima haporseeaon, parbinotoan, haringgason nang pangkaholong nasida tu parhobas ni Kristus, asa dipatupa ma muse di huria i ulaon asi ni roha ima pangurupion dibagasan holong naso marpangansi tu angka halak na badia na adong di Jerusalem na mangharingkoti pangurupion i.

III. Hahonaan

  1. Mangihuthon turpuk nang ojahan minggunta on, dipangido do tu angka na porsea nuaeng panghobasion ingkon do dipatupa dibagasan holong. Lapatanna ingkon do tangkas diboto ia panghobasion i, dang holan patupahon parmingguan sambing naso manghorhon tu haporseaon tu na mangalehon panghobasioni ima Jesus Kristus. Alai ingkon do dipatupa suma tu lomo ni roha ni Debata, asa tanda ma disi panghobasion i manghakkam holong na ingkon dipatudu tu dongan na mangharingkothon pangurupion.
  2. Panghobasion na dipatupa dang naing mambuat paruntungan sian ulaon i, alana panghobasion ingkon ro sian ias ni roha dohot roha na tutu. Songon huria na di Makedonia pangurpion nasida ima parbue ni panghobasion nasida tu Tuhan. Ido parbue ni haporseaon suang songoni asi ni roha ni Debata naung di jalo nasida. Tung pe dibagasan pangunjungan dohot haporsuhon godang, dang mangambati nasida laho patuduhon panghobasion na mangasahon holong.
  3. Pangurupion na mangasahon panghobasion dibagasan holong ingkon do dipatupa saluhut angka na porsea jala dang mardia imbar (na pogos, na mora, huria na metmet manang huria na balga). Saluhut na adong di huria i sotung di homol-omol manang dianggap gabe gogo ni jolma, alai tung do alani asi ni roha ni Debata. Dibaheni dang adong dalan laho dang patupahon ulaon asi ni roha na didok dison pangurupion. Tanda ma antong hita nang huria i naung mangula Debata mangalehon nasa na ringkot di ngolunta. Amen.

Pdt. Wahyu M. Sirait, S.Th

Bagikan Postingan ini: