GALATIA 6:7-16, JAMITA MINGGU VI DUNG TRINITATIS MINGGU, 3 JULI 2016

 “UNANG MANSADI MANGULAHON NA DENGGAN”

 Patujolo

Surat Galatia, ima surat ni si Paulus tu ruas na adong di Galatia na sinuratna di taon 56 M. Dung tarsiar haKristenon di Luar Jahudi na uju i, masa ma sungkun-sungkun “ toho do tahe, manang ise na naeng gabe Kristen ingkon unduk tu uhum ni Jahudi?” Uhum ni Jahudi ima angka Patik na mansai diparsangapi angka halak Jahudi sahat tu tingki on. Hape didok do Kristus ujung ni Patik i, laho mamintori nasa na porsea (Rom 10:4). Antong boasa gabe didok muse manang ise naing gabe Kristen ingkon unduk muse tu uhum i?

Lan do tahe angka halak Jahudi na marsogoniroha tu hahasiar ni barita haluaon sian Kristus i. Dungkon godang jolma na porsea di Ibana, gabe adong do sada kekuatiran sian angka golongan Jahudi sotung gabe mago annon angka uhum ni Jahudi on. Alani i, sai lam margogo do nasida mempengaruhi angka halak Kristen Jahudi taringot tu uhum i. Suang songon i ma masa tu angka halak Kristen di luar ni halak Jahudi pe, gabe terpengaruh ma tu angka ajaran nasala on. Tarlumobi di turpuhon, sai lam dipagogo angka halak Jahudi ma, na ingkon do gabe songon halak Jahudi nasida ingkon di sunat, ipe gabe targoar ma nasida halak Kristen. Jala marhite angka na masa on ma, dialusi si Paulus tu angka ruas na adong di Galatia; ima angka halak Kristen naso Jahudi; asa hot dihaporseaonna tu Tuhan Jesus. Ndada uhum ni Jahudi na paluahon nasida sian dosa, alai alani mudar ni Kristus i do. Alani i, unang be sai lam digogohon mangulahon angka na jat holan alani haliluon ni angka Jahudi i. Alai ulahon ma angka nauli. Ala nungnga uli be sude hahasesa ni dosa ni jolma marhite-hite Ibana.

Hatorangan ni Turpuk

Marhite-hite turpuhon, boi ma talapati aha do urgensitas (pentingnya/mendesaknya) “Hakristenon” tu “mangulahon nadenggan”.

  1. Sunat gombaron baga-baga parpadanan ni Debata tu si Abraham

Nasa baoa na marumur uwalu borngin ingkon sunaton do (1 Musa 17:10-14). On ma baga-baga parpadanan ni Debata tu si Abraham. Ibanna di dok, manang ise pe na tubu dijabu, manang na tinuhor ni si Abraham pe ingkon sunatonna do. Ai ima tanda di si Abraham na marsaor  ibana tu Debata. Jala manang ise inna na so disunat tung ingkon mate ma ibana di adopanni Debata. Na marlapatan doi, tung gabe so adong do dalanni jolma i gabe marsaor ibana dohot Debata. Jadi sunat gombaron hasasaor ni jolma tu Debata ‘secara lahiriah’; ima uhum manang Patik ni Jahudi taringot tu parsaoran tu Debata.

Alai dipaingot si Paulus do, Kristus i do ujung ni uhum, manang Patik i. Gabe sada haginjangan ni roha di angka halak Jahudi ala mangolu nasida di bagasan uhum/sunat i. Gabe dietong nasida do na gabe holan nasida ma nampuna Debata na mangolu. Ibanna nang pe disunat nasida, alai ianggo parniulaon na jat, sai tong do tangkas diulahon di adopan ni Debata. Tarlumobi di bagasan turpuhon, boi do taida, na gabe diambolongkon nasida do habonaron ni Kristus na sasintongna ima paluahon jolma sian dosa; holan laho maniop sunat i. Menurut angka hata nasida i, seolah-olah gabe ndang marguna be hamamate ni Kristus i. Aha do na masa dungkon ni naro pangantusion na sisongon i? Gabe guga do haporseaon ni angka halak Kristen na adong di Galatia uju i, gabe godang ma tong angka jolma na marsak, manang gabe sungkun-sungkun di haporseaonna. Targoar nasida halak Jahudi, Kristen muse, alai ianggo pangalaho; tung so toho matahe patuduhon gombaron holong ni Kristus i. Ai gabe ginjang ni roha do diadu, gabe mangela-ela angka donganna na sahaporseaon. Gabe memilah-milah, gabe tubu sada pengkelompokan. Gabe ndang be mangulahon na denggan.

  1. Kristus ido baga-baga ni Debata tu Parsaoran-Na dohot jolma

Tung tangkas do diboto Debata, ai somargogo daging ni jolma i laho mangaradoti Patik i. Di siala ni i, tung so adong do dalan ni jolma malua sian Patik i, dungkon ni Jesus Kristus, ima anak ni Debata na gabe dalan ni jolma bahen haluaon sian angka uhum i (Rom 8:3). Dang adong be dalan ni jolma laho mananda Debata dungkon ni mananda holong niroha-Na di bagasan Kristus. Jadi manang ise naeng mananda Debata, ingkon do mananda Jesus Kristus. Ai Jesus Kristus do baga-baga ni Debata di hita dalanta marsaor dohot Debata. Ai Ibana do sintua ni malim na umbalga, jala na sun badia  na so pinauli ni tangan ni jolma, alai na pinauli ni Debata Jahowa; jala tu ibana do hita marhaporseaon (Heber 9:11-14).

Jadi tung tangkas situtu do dipatorang si Paulus marhite turpuhon, tung holan dihaporseaonta tu Tuhan Jesus do tahe tuk paluahon hita sian dosa. Haporseaon tu uhum ni Jahudi tung so boi do paluahon jolma sian dosa. Ai molo hangoluan ndada holan taringot di sada Patik (sunat), alai dohot do disude uhum molo malua sian Patik i. Alai Jesus Kristus, lobi sian Patik. Ai Ibana do ujung ni Patik i. Jala nungnga be sidung diulahon Ibana Patik i. Alani i, haporseaon na gogo maradophon haluaon naung pinatupaNa, tung ido na ingkon gabe peopon bohal hangoluanta di sadari on ro di ari marsogot. Antong taulahon ma angka na denggan i, ai Kristus do hape hangoluanta.

  1. Mangolu dibagasan Kristus Berarti Mangolu mangulahon angka na denggan

Mangulahon angka ulaon na denggan memang tung mansai rais do i. Ai sipata olo do didok jolma i, “saleleng mangolu hita di tano on, tung so boi  do malua sian dosa”. Toho do tutu molo sambolus ni rimangan hata sisongon i, alai dang gabe alasan asa dihatiha on, asa di tingki mangolu diportibion dope hita, asa gabe angka na jat ma parniulaonta. Ai nunga di dok marhite turpuk on, molo mangolu di bagasan Patik, doshon na mangolu di bagasan uhum do i. Alai ianggo mangolu di bagasan holong ni Debata, gabe mangolu di bagasan haluaon ni Debata ma tutu. Kristus do holong ni Debata, antong malua ma hita sian Patik ni Jahudi. Dungkon malua hita talapati ma i asa mangulahon angka na denggan di ganup ngolunta. Porsea di bagasan Kristus namarlapatan do i mangolu di bagasan Kristus. Molo nunga mangolu di bagasan Kristus na marlapatan do i mangolu mangulahon nagka na denggan. Jadi manang ise na sai jot-jot mangulahon angka na hurang denggan, ndada tardok i gabe mangolu di bagasan Kristus.

 Hahonaan/Refleksi

          Minggu dung Trinitatis, na marlapatan do i minggu na tontong marhaporseaon di Debata si tolu sada i, nang pe godang angka tantangan hidup. Apalagi di jaman sinuaeng on, godang do mardalan angka hangoluon na so hombar dohot hakristenon di ganup ngolunta siganup ari. Mansai mura do jolma mangaleai angka donganna. Isarana, Olo do ala hurang hepengna saribu nai di na laho manuhor cabe, gabe ro partiga-tiga i mangaleai panuhor i. Hape halak Kristen muse do partiga-tiga i. Manang holan ala dibuat hombar jabu i do sangge-sangge na sinuanna di jumana, gabe ro ma hata na so denggan maradophon hombar jabuna. Olo muse do gabe ro parbadaan di angka supir holan ala ni sewa manang penumpang. Ala gumodangan sewa ni parmotor nasada on, gabe ro ma supir ni nasada an mangaleai donganna. Olo do muse jumpangta deba angka jolma na manghilalahon dumenggan jala tumingkos haporseaonna sian donganna, ala marhuria ibana di sada-sada sekte huria, hape ujungna gabe partuktuhon do ibana tu donganna.

Molo tabereng muse angka namasa ditingkion tung mansai mura do angka jolma i terkontaminasi tu angka hajahaton melalui perkembangan media sosial. Sering do SMS gabe beralih fungsi gabe Sonang Mar Sigugaan. Sai digugai inanta ni halak melalui SMS. Gabe masa ma perselingkuhan. Songoni nang media Facebook, gabe mura do angka jolma i, mangalehon angka komentar manang pandapot na hurang denggan taringot tu angka na masa. Angka status na sinurathonna pe, gabe marhationg-hationg tu na mangultophon emosi nama. Molo di huria, olo dope deba masa na didok dohot istilah “Surat Kaleng”. Ima sada ejekan, manang kritikan tu sada halak Pangula manang Parhalado (sebalikna), na gabe boi madabu tu partuktuhan. Dibahen i, molo na ginoaran halak Kristen ingkon tongtong do mangulahon na denggan, unang be nian mangulahon angka na sisongon i. Antong on ma nagabe sipeoponta marhite turpuhon;

  1. Ai nunga dipasidung Jesus be angka utang dosanta marhite-hite mudarNa; alani i naeng ma nian unang be hita mangolu di bagasan dosanta, alai lam ta gogohon ma mangulahon na denggan.
  2. Tung so adong do dalanta manghaporseai haporseaon na asing dungkon ni Kristus Jesus naung pangoluhon haporseaonta i. Dibahen i, ulahon ma angka na denggan taringot tu haporseaonta i.
  3. Sapala naung tardok hita halak Kristen namarhuria di HKI, sotung unang olo hita mura terkontaminasi dibahen angka jolma na marhuria dihuria na asing; gabe olo ma tadok ndang mangolu haporseaonta di Hurianta i, na boi gabe partuktuhon i di donganta jolma.
  4. Sunat tanda di si Abraham tarsongon baga-baga di ibana tu parsaoran ni Debata, songon i do nang Kristus i do na gabe baga-baga di hita di na laho marsaor dohot Debata. Dibahen i, molo tardok hita naung marsaor dohot Debata, unang ma mansadi hita mangulahon angka na denggan.
  5. Tapasomal ma mangolu di bagasan “Status” ta na gabe ruas ni Debata, jala unang taloas dirinta mangolu di bagasan “kondisi” manang “situasi” mambahen gabe dang olo mangulahon na denggan.
  6. Olo do ala ni pangalaho ni sada jolma tu hita, manang holan alani situasi ni parngoluon na tongon manghopit parngoluonta, mambahen gabe maol hita mangulahon na denggan. Alani marhite turpuk on dipodahon, asa unang sitindangi hita di angka ulaon na so sintong. Tontong ma taulahon angka na denggan dalanta mangulahon dohot mangaradoti Patik ni Debata Jahowa.

(Pdt. HT Fresley Simamora, S.Th, M.Si)

Bagikan Postingan ini: