HATUAON NI HALAK NA MANGOLU HOMBAR TU PATIK NI DEBATA

EPISTEL MINGGU 12 FEBRUARI 2023
MINGGU SEXAGESIMA
“HATUAON NI HALAK NA MANGOLU HOMBAR TU PATIK NI DEBATA”
Sexagesima artinya Enam puluh hari sebelum Paskah atau Kebangkitan Yesus Kristus. (Onom pulu ari dijolo ni ari Haheheon ni Tuhan Jesus Kristus).

PATUJOLO
Tontu marasing do pangantusion ni angka jolma taringot tu hatuaon, alai jotjot halak mangalapati hatuaon i ro sian arta, hagabeon. Molo di pangantusion ni Halak Batak, didok ma i hagabeon, hasangapon dohot hamoraon. Alai molo tarajumi, angka hatuaon parsatongkinan do i luhut. Na laho salpu do sude na i. Jadi songon dia do hatuaon i sasintongna? Halak na porsea ingkon marasing do pangantusionna taringot tu parngoluan, songon i do nang mangalapati hatuaon. Molo di angka hasiangan on, ditagam roha ni jolma do hatuaon i boi dapot marhite angka hamoraon nang hagabeon. Alai molo di angka halak na porsea ingkon marasing do pangantusion na di hatuaon i. Ndang sian angka rumang ni parartaon manang hagabeon di portibi on, alai hombar tu Hata ni Debata do. Didok di ojahan ni Minggunta sadari on “Hatuaon ni Halak na Mangolu Hombar tu Patik ni Debata.” Songon dia do ulaning tua ni halak na mangolu hombar tu Patik ni Debata i? Tapamanat ma marhite hatorangan ni jamita sadari on.

HATORANGAN
Jamita Minggu sadari on tarsurat do di Buku Psalmen. Di angka pangantusion ni angka ompu na parjolo i, jala ditorushon do i sahat tu nuaeng, dipeop do, Raja Daud na manurathon Buku Psalmen on. Tardok halak na biar mida Jahowa do si Daud. Tarida do i sian angka buku na sinuratna, i ma na adong di Bibelta i. Jala dipatudu ibana do habiaranna maradophon Debata.

Alai martamba ma muse angka pangantusion marhite angka parbinotoan di Ilmu Teologi, na mandok ndang sude Buku Psalmen on disurathon si Daud. Adong do deba di Buku Psalmen na tarsurat i na ro sian panurat na asing. Alai nang pe songon i, tong do sada rumang sude impola ni Psalmen i, na pataridahon biar mida Jahowa nang angka pangoloion di angka Patik ni Jahowa.

Marragam do dalan manang hataridaan ni biar mida Jahowa. Adong do na pataridahon marhite na burju mangula di nasa ngoluna. Adong muse marhite haradeon ni roha mangurupi angka jolma. Adong muse na pataridahonsa marhite na ringgas marminggu, dohot lan na asing dope. Alai di turpuk ni jamitanta sadari on tangkas do didok marhite ojahan ni jamita, i ma “Mangolu Hombar tu Patik ni Debata.”

Molo didok “patik” manang “Patik ni Debata,” tontu olo do tubu di pingkiranta angka uhum, aturanaturan na naeng jala ringkot sidalanhononhon. Jala godang do halak ndang apala lomo rohana mangoloi patik, mangulahon angka aturanaturan. Jala pola do gabe adong istilah na mandok “aturan ada untuk dilanggar.” Sasintongna sada prinsip na sala do si songon i alai ndang boi tarjua hita, sai hira naung dihangoluhon jolma do i di parngoluon si nuaeng on.

Molo tapamanat muse, di parngoluon ni Halak Batak, ala targoar do angka pinompar ni Halak Batak, “Anak ni Raja” di angka baoa, jala “Boru ni Raja” di angka parompuan, gabe adong kecenderungan maol diatur, manang mangihuthon aturan manang uhum. Alai di turpuk jamitanta sadari on ndang na gabe patingkoshon (membenarkan) angka i, ai prinsip na sala do i sasintongna. Naeng didok di jamitanta on i ma, molo gabe Halak Kristen do hita, halak siihuthon Debata, naeng ma nian mian hita di Patik ni Debata.

Hombar tu na tarsurat di Psalmen 119:1-8 didok do martua do angka halak na mangolu hombar tu Patik ni Debata. Dipatorang do di turpuk on, boasa gabe martua halak na mangolu hombar tu Patik ni Debata jala songon dia do ngolu ni Halak Kristen na mangolu hombar tu Patik ni Debata.

Martua do Halak na Marpangalahohon Patik ni Debata (ayat 1-3)
Di ayat 1-3 on dipasahat parpsalmen do tua ni angka halak na marpangalahohon Patik ni Debata. Jala mansai tangkas do dipajojor songon dia do halak na marpangalahohon Patik ni Debata. I ma halak na daulat marpangalaho, mangaradoti angka panindangion ni Debata, mangalului Debata sian nasa roha, na so mangulahon hageduhon jala mangkampungi angka Dalan ni Debata.

Mansai tangkas do dipajojor parpsalmen songon dia ngolu ni halak na mangolu hombar tu Patik ni Debata. Lapatanna di si, ndang boi hape holan mananda jala mamparsiajari Patik ni Debata alai ingkon manghangoluhonsa di ngolu ariari jala ingkon gabe i ma dalan laho mangula jala marpangalaho. Dipingkiri rohanta do ra, madodokhu do na mangihuthon Tuhan i. Ala, ingkon sian nasa roha jala marsitutu di na manghangoluhon Patik ni Debata, ndang boi satongasatonga. Di pandohan na ummura lapatan, godang do hape sioloan angka aturan di na mangihuthon Tuhan i. Hape jotjot do jolma i  madabu tu bagas dosa na maralo tu Patik ni Debata. Jadi mansai borat do hape mangihuthon Tuhan. Tontu adong do na marpingkiran songon i. Gabe dihabiari patik i. Alai di turpuk jamita on marbalik do sian pangantusion na songon i didok parpsalmen. Ndang gabe sihabiaran patik i, manang ndada gabe ndang siulaon, ala sai tapingkiri borat na i. Baliksa dipasahat parpsalmen, halak na mangolu hombar tu Patik ni Debata, halak na martua do. Boasa didok halak na mangolu hombar tu Patik ni Debata halak na martua? Dipasahat do i di ayat na mangihut.

Debata Sandiri do na Manonahon Patik i (ayat 4)
Di ayat on dipajojor do, Debata do na manonahon angka parenta-Na, siradotan ni angka na porsea. Ra, molo jolma biasa na pasahathon patik i, olo do sangsi hita taringot tu hasintonganna. Tutu do ulaning i? Olo do muse sungkunsungkun di rohanta, tona ni ise i, hata ni ise, umbahen ingkon ihuthonon i? Jala molo taula i, aha huroha labana di hita? Boi sajo do ro pingkiran na si songon i, molo jolma biasa na mandok angka aturan manang patik i.

Alai tangkas do didok di ayat on, Debata sandiri do na pasahathon, jala i do siradotan ni angka na porsea di Ibana. Molo tadok dirinta sahalak siihuthon Debata, ingkon taihuthon jala taoloi do tona, manang patik ni Debata i. Adong do sada siparsiajarion na menarik di turpuk on. Molo taparrohahon sian ayat sada sahat tu ayat ualu, hombar tu ojahan ni jamitanta, “patik” do na didok di si, jala i do na disurathon di ayat sada, alai di ayat na mangihut marragam do disurathon, di ayat dua, “panindangion” (peringatan-peringatan), di ayat opat “parenta” (titah-titah), ayat lima dohot ayat ualu “aturan” (ketetapan), ayat onom, “tona” (perintah) jala di ayat pitu, “hatigoran” (hukum-hukum). Olo do bingung hita, na dia do sitioponta. Ndang na pola ingkon pabagasonta marhite na mamparsiajari angka pandohan i sian bahasa aslina. Nang pe marragam pandohan i di turpuk on, alai sada do rumang na. I ma na ringkot sipeopon ni angka na porsea. Sian angka pandohan i, boi do gabe sada siingoton di hita, molo patik ni Debata i, i ma na gabe parenta, tona di hita asa tongtong mardalan di hatigoran dohot aturan ni Debata.

Ndang Tarurak Halak na Mangaradoti Patik ni Debata (ayat 5-6)
Halak na mangolu hombar tu Patik ni Debata, tung na so jadi do tarurak (ayat 6). Sude do hita umboto, na denggan do ganup angka Patik ni Debata. Molo mangolu hita hombar tu Patik ni Debata, gabe na denggan ma tutu ro tu parngoluonta. Alai molo taida di parngoluon songon si saonari on, olo do gabe sisogo halak na mangulahon hatigoran. Lumobi ma molo tahatindangkon hatigoran di tonga ni angka halak na mangulahon na jat. Jotjot do ro hata ni halak na mandok, sok suci, perasaan ias dohot angka na asing. Jala olo do tubu di bagasan rohanta, boasa tahe ro tu au na so denggan, hape nunga huulahon hatigoran, nunga huula Patik ni Debata. Boi sajo do ro pamingkirion si songon i molo di posisi i hita. Alai didok Jesus do, “martua ma na pinaburuburu ni halak ala ni hatigoran, ai di nasida do harajaon banua ginjang i!  Martua ma hamu, molo diinsahi halak hamu manang dipaburuburu manang dipatubutubu ragam ni hata na roa, na so tutu, dompak hamu ala ni Ahu! (ida Mateus 5:10-11). Sian i boi do antusanta, diboto Jesus do, molo taula hatigoran, godang do halak na mamburuburu hita. I do na masa di angka panurirang na parjolo, jala masa do nang i di parngoluon ni Jesus, dihasogohon jolma do Ibana ala mangula jala pajongjongkon hatigoran. Alai didok Jesus do, martua ma molo dipaburuburu halak ala ni hatigoran manang ala ni Jesus, ai balga ma upanasida di banua ginjang. Sian i botoonta ma ndang gabe portibi on na gabe ukuran taringot tu na niula ni jolma di bagasan hatigoran, alai sian Debata do. Ala ni i, molo masa nuaeng di hita sogo ni roha hinorhon ni mangula na denggan, las ma rohanta, ai dapotan tua do hita di si. Unang gabe manimbil sian na tigor tu na so tigor, manang manimbil sian Patik ni Debata, ala sai dipaburuburu hita.

Pasupasu do Mangaradoti Patik ni Debata (ayat 7-8)
Adong do sada ende ni Halak Kristen na jotjot tabege jala taendehon, na mandok, “hidup ini adalah kesempatan.” Hurang lobi ende i paboahon tu hita asa taparhaseang ngolunta, taparhaseang tingki na nilehon ni Debata tu hita. Didok do muse, adong pe ngolunta on asa gabe pasupasu do. Jala hita pe ingkon tatiop do tona i, didok parhaseang hamu ma tingki (ida Epesus 5:16). Molo didok mamparhaseang, ndang na mamparhaseang tingki manang ngolu tu angka na asing, alai tu ulaon panghobasion di Hata ni Debata do. Umbahen i do didok parpsalmen di ayat pitu, “mandok mauliate ma ahu di Ho sian hatigoran ni roha, molo huguruhon angka uhum ni hatigoranmi” (ayat 7). Dirajumi parpsalmen do saleleng adong dope tingki, sada pasupasu na balga do i laho mangguruhon angka uhum hatigoran ni Debata. Ala ni i hita pe ingkon tapangke ma tingkinta na adong nuaeng laho mangguruhon Hata ni Debata jala mangulahonsa di ngolu siap ari. Songon naung didok di poin na patoluhon, sai na jumpang do hamaolon manang tantangan di na mangula Patik ni Debata, pola didok sampe dipaburuburu. Jala ndang margogo hita mangulahon i molo mangasahon hagogoonta sambing.

Sian poin na parjolo nunga taboto, molo halak na mangolu hombar tu Patik ni Debata halak na martua do i. Alai songon naung didok nangkin, olo do ro pangunjunan jala ndang tolap hita molo sian gogonta sambing. Dirajumi parpsalmen do hagaleon dohot hahuranganna i, umbahen i do asa didok parpsalmen di ayat ualu, “sai radotanku do angka aturanmi, unang tung tadingkon ahu situtu.” I do na gabe parsiajaran nang di hita, di na mangolu hita mangihuthon Debata, mangulahon patik-Na, tung unang ma tapangasahon gogonta sandiri, songon naung didok di Poda 3:5, “marhaposan tu Jahowa ma ho sian nasa roham, jala unang marpangunsandean ho tu pingkiranmu sandiri.” Jadi ingkon marpangunsandean tu Debata do hita di na mangolu hombar tu patik-Na i.

HAHONAAN
Molo pe jumpang angka sipangambati. Jala ingkon tapajolo do patik, uhum, aturan, tona ni Debata di ginjang ni saluhut. Mateus 6:33 mandok, “sai jumolo ma lului hamu harajaon ni Debata dohot hatigoranna, dung i tambahononna do sude angka ondeng tu hamuna!” Molo pe jumpa hamaolon, alai taingot ma mangula patik ni Debata i, sai na donganan ni Tuhanta do hita di na mangulahonsa jala lam tambaan-Na angka ondeng tu hita. Jala taingot ma sai na martua do halak na mangolu hombar tu Patik ni Debata. Amen.

Bagikan Postingan ini: